Program Musu wa Chitentam cha Pakampwil cha Dichuku Dimwing
Nich usu ukash wa spiritu utumbila, in Kristu a pasak asala usu nakash wa kulejan rusangu ruwamp mwi ndond ja kulemp mutwishikina kulejan. (Midimu 1:8; Kol. 1:23) Program wa chitentam cha pakampwil cha dichuku dimwing wa muvu wa mudimu wa 2007, “Twikalany Nich Mudimu Ukash wa Dizu,” ukez kutukwash kwimburij chilakej chipandikena kuwap.—Midimu 18:5.
Mwant David parumburilay Dizu dia Nzamb, walonda anch: “Malejan ma Nzamb madi makin, makat kuyibabesh ayisup.” (Kus. 19:7) Program wa 2007 utenchikinau nawamp wa chitentam cha pakampwil cha dichuku dimwing ukez kukasikeshin usey wa Mifund chakwel “kuyilej antu kuyibabesh ni kuyitenchik” ni ukez kutukasikesh kusadil Dizu dia Nzamb mu mudimu wa kulejan ni kufundish nich chitong cha kuswapej. (2 Tim. 3:16, 17) Program musu ukez kutulej kand mutapu tukutwisha kwiyep kuwil mu mipit ni kutaninamu kusutil ku kusadil yany ya Bibil dichuku ni dichuku mu mwom. Ukez kutukwash kand kusadil Dizu dia Nzamb mulong wa kuyikwash ansand ni antu asu kukul muspiritu.
Sal usu wa kwikalaku chisu chisambishina program, ni kuta matu nakash. Fund yom ya usey yiukeza kusadil amwiney. Mekesh kusanger kwey mafundish ni yivurish utambwila, ni kutongin pa mutapu ukutwisha kusadil yom wilejina.
Program wa chitentam cha pakampwil cha dichuku dimwing ukez kukasikeshin kusanger kwetu Dizu dia Nzamb, ni kutuvurish chakwel kudandamen kwiman dang mu kulejan rusangu ruwamp ra Want nich mushiku, ni kutulej mutapu wa kuyikwash antu akwau kusal mwamu. Chawiy twikasikeshany lel chakwel kulik kuburen ku umutakel wa muspiritu ni mafundish maletinay Yehova kusutil mwi njil yiney!—Is. 30:20b, 21.