Yifumbany Antu asu Kurish Nich Rupompat

¹ Pakatau antu kusambish kwilej Bibil ni ‘kusot kwikal antu a Nzamb,’ Satan usadiling usu ukash mulong wa kuyipompat. (2 Tim. 3:12) Rupompat rikutwish radiokal kudi ambay netu a mudimu, a ku shikol, ap amutej netu. Rikutwish rikal rikash pakampwil anch anamakwetu akweta michim yiwamp amukangesh muntu musu.—Mat. 10:21; Marko 3:21.

² Rupompat Rasambelau Kulond: Antu asu afanyidin ijik anch kuzengol kukutwish kwayishiken ni chidi chijingidij cha kwikal kwau in kwilej akin a Kristu. (Yoh. 15:20) Pa yisu yimwing, rupompat ridiokilinga kudi antu akwau riding mulong wa yitongijok yiyimp yikwetingau piur pa Atuman a Yehova. Ijikany anch musangar ujim udiokiling ku kukupipejany mulong wa kwikal kwen in kwilej a Yesu ni mulong wa kumuziyil kwen Nzamb. (Mid. 5:27-29, 40, 41) Iyijikishany antu asu anch Yehova ukwashin nich rukat. (Kus. 27:10; Marko 10:29, 30) Kulam kashinsh kau kuyitekin ku mutambu wa Yehova pa mulong wa ukaleng wa mangand.—Jinsw. 27:11.

³ Mudimu wa Ronganyin Rakin: Yikasikeshina in kwilej ney Bibil usey ujim wa kudandamen kwak ronganyin rakin kwikalap nchik yoziu yikutwishau kurish nich. Kusutil ku rupompat, Satan ukat kupakish kukangesh yom yilejinau kwikal nich mij mu michim yau ya chifanikesh. (Jinsw. 4:23; Luka 8:13) Afanyidin kudandamen kwak ronganyin ra Dizu dia Nzamb chakwel ajamisha mu ritiy.—Kus. 1:2, 3; Kol. 2:6, 7.

⁴ Kuswir kwa Kujijaman: Mu mwikadil win wawonsu wa kupakiu, kujijaman kudi kwa usey ni kukutwish kwalet yibudikin yiwamp. (Luka 21:16-19) Pakatau antu asu kujijamen rupompat, akat kutanyinamu ayinau ni antu akwau. Amening chiyukish cha Yehova chikatay kuyiyukish antu ashinshamena mu kujijaman.—Yak. 1:12.

⁵ Kambuy Paul wasangara mulong wa kuya kurutu muspiritu kwa akadivar nend adinga mu Tesalonika. Wamujikitisha Nzamb mulong wa awiy, ndiy wayikwasha avud au kwijik uyakin. (2 Tes. 1:3-5) Niyetu tukutwish twatan musangar wa chilik chimwing ni mazang anch twayifumb antu twilejina nau Bibil chakwel arisha nich rupompat ni kujijaman.