Mushimanany Yehova Kusutil ku Kulejan Kwa Kukashimun
1 Atushalapol ashinshamena a Yehova akat kukimb yisu ya kumushiman pichuku-pichuku. (Kus. 96:2, 3; Heb. 13:15) Njil yimwing mutukutwisha kusal mwamu yidi kupan uman wa kukashimun. In kumwifukwil Yehova avud nlel adi in kujikitish mulong muntu kanang wayishikija ku uruu wa Want kusutil ku uman wa kukashimun.
2 Kupan uman wa kukashimun kud muntu kanang chisu ni chisu kukat kuyifungwil antu akwau njil ya kutesh uruu wa Want. Chilikej, minsamb ya Yesu nend mband mwin Samaria ku dijiy dia Jakobu yayishikija antu avud ku kusanger rusangu ruwamp. (Yohan 4:6-30, 39-42) Padingau Paul nend Silas mu rukan mu Filip, awiy apana uman kudiay kalam wa rukan.—Midimu 16:25-34.
3 Yisu Yitukweta: Yisu ik ukweta ya kupan uman wa kukashimun? Amwing akat kusal mwamu chisu cha kuland yom, chisu chidiau mu motak wa antu awonsu, ap chisu chichingedilau mwingang. Akwau niyawiy apanining uman pa chisu cha kwiswedish ku mudimu ap ku shikol. Kutekang patok umwing wa mikand yetu ya pa dishin dia Baibel pa ndond udia kukutwish kuyibachik antu akwau kwipul yipul piur pa yitiyij yetu.—1 Pi. 3:15.
4 Mutapu wa Kusambish: Changadim umwing ubutwalela wa mivu sambwad watesha ku chikumangan mutapu chidia cha usey kud antu awonsu kulejan. Chawiy lel payay ni makwend kuland yom, wateka mabroshir maad mu sakosh wend. Makwend padingay ni kuchind nfalang ja kufut, changadim wapana broshir umwing kud mband umwing, muntu wamutambula nich kalimish ni musangar. Pamwipulau kwisu kwatanay dikasikesh dia kumushejin mband, changadim winou ubutwalela wakula anch: “Nalonda kusu anch, Zangurok, Tayad, Yang! Nikuyang kamu!”
5 Tuswiridin etu awonsu kwikal nich spiritu mud wa changadim winou, chakwel kupan uman wa kukashimun. Ov chom ik chikutwisha kutukwash? Lembil chakwel kwikal nich dikasikesh dia kulond. (1 Tes. 2:2) Rijek chipul ap chirumburil piur pa mutu umwing wa mulong usangareshina ukutwisha kusadil chakwel kusambish minsamb. Kupwa chingejin anch Yehova ukez kuyukish usu wey.—Luka 12:11, 12.
6 Kupan uman wa kukashimun kud antu tukata kusankanijan nau pichuku-pichuku kukat kumushiman Yehova ni kutwinkish musangar. Kukutwish kumukwash muntu kanang kushiken mwi njil ya mwom wa chikupu.