Wirijekin kal Kulejan mu Mutapu Wakad Kuchingejin?
1. Chilakej ik chimekeshina anch kulejan kwakad kuchingejin kukutwish kwikal nich yibudikin yiwamp?
1 Kulejan mu mutapu wakad kuchingejin kuding ni yibudikin yiwamp nakash. Mu Bibil mudi yilakej yivud ya kulejan uman pakad kuchingejin ni kwadinga yibudikin yiwamp. (Yoh. 4:7-15) Chom ik tukutwisha kusal chakwel twirijeka mulong wa mutapu winou wa kulejan?
2. Kudjal, kwikil ni kwileng kwetu kutukwashining nchik kwikal tayad kulejan uman?
2 Kudjal, Kwikil ni Kwileng: Kuta muchim chisu chawonsu pa mutapu wetu wa kudjal, kwikil ni kwileng kwetu kukez kututwishish kuyilej antu akwau ritiy retu. (1 Tim. 2:9, 10) Anch twiyov nayimp mulong wa kudjal kwetu, tukez kwidjidjek pa kulejan uman. Pakwez, kumekan kwetu kwinangina ni kuwamp, kukutwish kwayishikij antu akwau ku kutwipul. Chilakej, padingau mu weny, ambay Atuman atijadina adinga adjit nawamp ashakama piswimp ni ikundj umwing Muus (Musulman). Pamanay kudjal kwau kuwamp, ikundj winou wayipula anch adinga in Kristu. Chipul chinech chayishikija ku mambamb ma asaa asatu piur pa Bibil.
3. Mutapu ik tukutwisha kusambish mambamb anch twimburij chilakej cha Yesu?
3 Sambishany Mambamb: Pa chisu chisambay Yesu ni mband mwin Samariy ku dijiy dia Yakob, ndiy wasambisha mambamb nich kumwit kwau kusu mem ma kuna. Chilik chimwing, tukutwish niyetu twasambish mambamb nich mazu makemp ap nich chipul chiswapela. Ap anch pa yisu yimwing tukutwish twidjidjek, nich ukwash wa Yehova, tukutwish ‘twajijaman’ chakwel tusambisha mambamb.—1 Tes. 2:2.
4. Mutapu ik tukutwisha twikal tayad mulong wa kulejan pakad kuchingejin?
4 Kusambish Mitapu ya Kulejan: In kulejan avud akat kutan mitapu yivud ya kulejan pakad kuchingejin. Shinshikinany mikadil yen, ni tonginany pa mitapu ya antu ukutwisha kutanijanany nau pichuku ni pichuku. Send mikand yifanyidina ni ka Bibil kakemp. Ikalany in kushinshikin yom, ni yisangerany antu adia piswimp ney. Anch watonginany mitapu ukutwishanya kwikal nich pa dichuku, ukutwish wikalany tayad kulejan uman uwamp.—Filip. 1:12-14; 1 Pita 3:15.
5. Mulong kulejan pakad kuchingejin kudiap kwau kuyuk kwa chamwamu?
5 Tukwet mayingishin maad ma kusadil mitapu yitukweta ya kulejan pakad kuchingejin—rukat ra Nzamb ni ra mutej netu. (Mat. 22:37-39) Mulong wa kuya swa-swa kwa mudimu wa kulejan, kulejan uman pakad kuchingejin kukutwishap kwikal kwau kwa kuyuk. Tufanyidin twikala tayad mulong wa kwisakin mitapu yawonsu yifanyidina mulong wa kuyilej antu akwau rusangu ruwamp ra Want pikuchidia chisu ap.—Rome 10:13, 14; 2 Tim. 4:2.