Tudi Atuman Chisu Chawonsu
1. Chom ik tukutwisha kwilejin mu rusangu riner ra Yesu ramulejay uman mband winou ku dijiy dia mem?
1 Yesu wadinga wasal kal asaa a weny. Wadinga waziy kal ni impu yikash yamukwata. Payau in kwilejend ni kuland yakudia, ndiy washakama ku dijiy dia mem pa musumb wa Samaria apimaku. Yesu kayap mu Samaria akalejanamu bwat; ndiy wadinga usutil kwend uyil mu Galaliya chakwel akadandamena nich mudimu wend wa kulejan. Ap mwamu, ndiy wasadila chisu chinech chakwel amuleja uman mband wadinga uvitina mem. (Yoh. 4:5-14) Mulong wak? Yesu kandikal alikap dichuku ap dimwing kwikal “kaman ushishamen ni wakin” wa Yehova. (Kubur. 3:14) Niyetu tumwimburijin Yesu kusutil ku kwikal chisu chawonsu Atuman a Yehova.—1 Pita 2:21.
2. Mutapu ik tukutwisha twirijek mulong wa kulejan mu mutapu wakad kuchingejin?
2 Irijekany: Tufanyidin kwikal irijekina mulong wa kupan uman mu mutapu wa kukashimuk kusutil ku kuyang ni mikand yetu kwawonsu kutudia. In kulejan avud asendining matrakt ni akat kuyinkisham in kulandish mu makashing, in kulandish kasarony, ni antu akwau akatau kutanijan nau pa dichuku dia kabuj. (Mul. 11:6) Nambaz umwing wadinga ni kwendangan nakash wadinga ni kushinshikin anch ka Bibil kakemp ni buku Chifundishinay Bibil yidi mu kasakosh kend, ni wadinga ni kusambish mambamb ni antu ashicha piswimp nend.
3. Mutapu ik tukutwisha kusambish mambamb?
3 Sambish Mambamb: Pa chisu cha kulejan mu mutapu wakad kuchingejin, kituswiridinap ching kusambish nich mutu kanang wa Mifund. Yesu kasambishap mambamb ni mband wadingay nend ku dijiy dia mem nich kusambish kumwijikish anch ndiy Mesia. Wamwita kwend kusu mem, ni chawiy chamulangwishay yitongijok yend. (Yoh. 4:7-9) Nambaz umwing wamana anch kusal mwamu kwadinga ni kumutwishish kusambish mambamb padingau ni kumwipul anch ukat kusanger misambu ya machuku matumbila. Pa ndond pa kwakul anch kakatap kumasanger mulong udi Kaman wa Yehova, ndiy wadinga ni kulond anch: “Nakwata mupak wam amwinam wa kulik kumasanger.” Chad muntu ukumwipula ukusot kwijik mulong wak, chawiy chadinga ni kumutwishish nambaz winou alejana uman.
4. Mulong wak Mateu 28:18-20 utukasikeshin?
4 Ap anch Yesu wapwisha mudimu wend wasalay panap pansh ni mushiku, ndiy wadinga ni kuusanger nakash mudimu wa kulejan ni wausala mudi mwadinga mutongidinay. (Mat. 28:18-20) Chawiy lel, mudi Chilakej chetu Yesu, tudi Atuman adia kal tayad mulong wa kupan uman wa patok piur pa ritiy retu chisu chin chawonsu.—Heb. 10:23.