Ukutwish Wapan Uman wa kukashimwish!

1. (a) Ov, kupan uman wa kukashimwish kurumburikin ik? (b) Ov, antu inch eza mu uyakin kukumangan kapamp ka kusambish kusutil ku uman wa kukashimwish?

¹ Ov, mutapu ik weza antu avud kapamp ka kusambish mu chikumangen chen kusambish kwilej uyakin kusutil ku uman wa kukashimwish? Ukutwish kukashimuk piur pa chakul cha chipul chinech. Kupan uman wa kukashimwish kubachikining kulejan rusangu ruwamp kudi antu tutanijadininga nau mu mijikit yetu ya pichuku pichuku—pa chisu tudia mu weny, pa chisu tuyila kumanijan nau anamakwetu a ku mujimbu ap amutej netu, ap mu mudimu wetu wa kwisak, mudi chipandakena kuwap ku shikol, ku mudimu, ni ap kand pa chisu tuyila ni kunyingumok. Mu chisak chimwing cha atuman ababatishinau kusut pa 200, uvud wa antu 40 pa chitot wijika uyakin kusutil ku uman wa kukashimwish! Chawiy lel, mutapu winou wa kulejan rusangu ruwamp udi mutapu uwapina nakash.

2. Yilakej ik ya uman wa kukashimwish tutanina mu Mifund?

² In kulejan a mu mivu chitot ya kusambish apananga yisu yivud uman wa kukashimwish. Chilakej, pa chisu chayay mu weny ku Samaria, Yesu wapana uman kudiay mband umwing wadinga ni kuvit mem ku dijiy dia Jakob. (Yoh. 4:6-26) Filip wasambisha kwambamb nend mukurump mwin Etiopi walamanga chipau padingay ni kutang buku wa Isay ni wamwipula anch: “Ov, wovil kurumburik kwa yom yiutangina?” (Mid. 8:26-38) Pa chisu chamukashimwishay Filip, kambuy Paul wapana uman kudiay kalam wa rukan. (Mid. 16:23-34) Kupwa, pashakamay ku chikumbu, Paul “wayakang antu awonsu ezanga ni kumutal. Ndiy warumburilanga mazu ma Want wa Nzamb, walejananga mulong wa Nsalejetu Yesu Kristu.” (Mid. 28:30, 31) Ni yey kand ukutwish wapan uman wa kukashimwish, ap anch udi kwey wakad kulondang. Mutapu ik?

3. Ov, chom ik chikutwisha kutukwash chakwel tupandakana kulik kulond?

³ Sambish Kukimb: antu avud a mukach mwetu amening anch chidi chikash kusambish minsamb nau antu akad kwijik. Ap anch atwij kudi antu akad kwikal atuman, alondining patok anch uyakin umekening mudi chom chakamishina. Pakwez, chitubachikining kulond nakash anch twatongijokin pa kuwap kwa Yehova, pa chipau cha usey chiyinkishiningay atushalapol end, ni anch twaman mashakamin makash ma antu mu mangand. (Yona 4:11; Kus. 40:5; Mat. 13:52) Chikwau, tukutwish twamwit Yehova atukwasha chakwel ‘atwinkisha kutakaman.’ (1 Tes. 2:2) Mwin kwilej umwing wa ku Gilead walonda anch: “Namana anch yisu yivud kulembil kwinkwashining pa chisu chikash chakwel nilonda ni antu.” Anch ukat kwidjidjek kulond, sal malembil ma mu wiswimp mu muchim wey.—Neh. 2:4.

4. Rutong ik ra kusambish tufanyidina kwikal nich, ni mulong wak?

⁴ Mudi mutwija, kulejan kwa kukashimwish kwitiningap kusambish bil kwambamb ni muntu chakwel twijikijan nend ap kusambish bil mifund. Tukutwish twatan ukwash uvud anch twikal ni rutong ra kusambish mambamb kapamp kamwing ni kwiyov anch tufanyidin kupan uman mu mutapu uwamp. In kulejan avud alondil anch uwanyish rizau riner kuyinkishining richingej kwa awiy kuswiridin kwijikish rusangu ruwamp mudi chifanyidina. Anch muntu kasotinap kwambamb, chiswiridinap kusal yom ku usu. Pwish mambamb nich kalimish ni diokal pa ndond yin ya.

5. Chom ik chamukwasha nambaz umwing wakad kulondang kupan uman wa kukashimwish?

⁵ Pa chisu cha kwisak mu sok, nambaz umwing wakad kulondang wamanijana kapamp ka kusambish ni arund end ni wayisangera ni masip. Anch muntu wamekesh musangar ni masip, urumburil yom mu wiswimp mu muchim wend. Anch muntu wakul nawamp, chimwinkishin ruchingej ra kwambamb nend nakash. Nambaz winou watesha nawamp ni wajingunina mutapu wa kupukun ku muchim wa muntu nich rusangu ruwamp. Pasalay mwamu, wapana mikand yivud ni wasambisha dilejan dia Bibil.

6. Mutapu ik tukutwisha kusambish minsamb mu mutapu ukashimwishina?

⁶ Minsamb ya Kusambish: Chom ik tukutwisha kulond mu misamb ya kusambish? Pa chisu chambambay Yesu ni mband ku dijiy, ndiy wasambisha ni chipul chikemp anch amwinkishaku mem ma kuna. (Yoh. 4:7) Pamwingap kand tukutwish kusambish minsamb nich kulangwish kwa urund ap chipul. Anch wisambin ni muntu kanang ukutwish kutan chisu cha kujimbul mifund ni pamwingap kukun mbut ja uyakin. (Mul. 11:6) Antu amwing atanining musangar kusutil ku kwijik mazu masangareshina ni malangwishina yipul pakad kulab. Chilakej, pa chisu tuchingedininga kumanijan nend dokiter, ukutwish wasambish mambamb ni kulond anch: “Nikez kwikal ni musangar chisu nikeza kulik kuman muntu kanang ni mayej.”

7. Mutapu ik kwikal mwin kutal ukutukwasha kupan uman wa kukashikwish?

⁷ Kwikal mwin kutal kukez kutukwash kand chakwel tusambish mambamb. Anch twamutal nvaj ukweta an a kalimish, tufanyidin kumulej nvaj winou, ni kumwipul anch: “Ov, chom ik chakukwasha chakwel wikal nvaj muwamp?” Nambaz umwing wafunda mitu ya milong ya kwisamb nau antu akwau ku mudimu ni kupwa walejana rusangu ra pakampwil rengamidina pa mutapu usangaredina ambay nend a mudimu rusangu riner. Pilejay anch mband umwing udia ku mudimu wirijekin kuya ku uruu, wamwinkisha Réveillez-vous ! umwing wisambidina pa mutapu wa kurijek uruu. Chinech chita kwisambin nakash pa Bibil.

8. Ov, mutapu ik tukutwisha kusadil mikand yetu chakwel tusambisha minsamb?

⁸ Mutapu ukwau wa kusambish minsamb udi kutang mikand yetu pa chisu chikutwishau kutuman kudi antu akwau. Mukadivar umwing wafungul mutu wa mulong umwing usangareshina wa mu Chinong cha Kalam ap Réveillez-vous ! Chakwel asambish kuutang. Anch ndiy waman muntu kanang udia piswimp nend watal mu gazet wend, ndiy ukumwipul chipul ap ukurumburil mu wiswimp yom yidia mu mutu wa mulong winou. Kusal mwamu kutakedil kwambamb ni kupan uman. Kwikal kusu ni umwing wa mikand yetu pa chisu yimekena kukutwish kupwit jinkeu ja ambay netu a mudimu ap ambay netu a ku shikol chakwel ipula yipul piur pa yom yidiamu pakad kulab.

9, 10. (a) Ov, mutapu ik tukutwisha kukimb yisu yiwamp ya kupan uman wa kukashimwish? (b) Ov, mutapu ik ukeza kwikal ufanyidina kusal mwamu?

⁹ Kukimb Yisu Yiwamp: Kukwatijan nich usey wa kusal swa chakwel tusal mudimu wa kulejan, tufanyidinap kuman kupan uman wa kukashimwish mudi chom kanang chitukutwisha kusal pa chipatu. Pakwez, tufanyidin kukimb yisu yiwamp ya kupan uman mudi mutuyilinga ku midimu yetu ya pichuku-pichuku. Tong bil kurutu piur pa antu ukimbina kukumangan nau, ni shinshikin mutapu ukutwisha kusambish nich mambamb masangareshina. Chipandaken kuwap kulam Bibil mu makas mudi mukand ukutwisha kubudish kudi antu amusangaredina.—1 Pita 3:15.

¹⁰ Chakwel ikal ni manangu ma kuusadil, in kulejan avud atanining mitapu ya kukimb yisu yiwamp chakwel apana uman wa kukashimwish. Nambaz umwing wadinga ushicha mu chikumbu chijim cha diking dia piur wasadila mitapu ya kwipuwej ya mu teritwar wau chakwel asala pamwing disengan dia kuwap kwa yitangil yidia pa disengan din diang. Pa chisu chikwimanau antu chakwel arumburil yin yom yang, ndiy wakimbanga chisu cha kusambish kwambamb ni kuyilej milong yitadila kushilamu kwa mu Bibil kulondila anch: “Diur disu ni mangand masu.” (Kuj. 21:1-4) Ov, ukutwish watongin mitapu chakwel ukimba yisu yiwamp ya kupan uman wa kukashimwish?

11. Mutapu ik tuktuwisha kulondul yisakin tutanininga pa chisu tupanininga uman wa kukashimwish?

¹¹ Mu Kulondulang Yisakin: Anch watan muntu uteshina, ileja kulondul yisakin ya kusanger kwend. Anch chitwishikin, ukutwish wamulej anch: “Nikwet musangar uvud wa kwambamb ney. Kwisu nikutwisha kukumen kand chakwel twambamba?” In kulejan amwing afundining maadres mau ni atazukining antu ku telefon pamwing ni kulond anch: “Nidi musangar wa mambamb metu. Anch uswiridin kwijik yom yivud piur pa yom twisambina kal, winou udi mutapu ukutwisha kwimman.” Anch ukutwishap kulondul yisakin ya pakampwil, irijeka pamwing ni chikumangen chifanyidina kusal mwamu kusutil ku kuziyil ku kwizwish fomu Veuillez suivre l’intérêt (S-43) kudiay kalam w ujindj wa chikumangen chen.

12. (a) Ov, mulong wak tufanyidin kulam trakt ni kuchind chisu tusutishina mu kupan uman wa kukashimwish? (b) Yibidikin ik yabukiningaku kusutil ku kupan uman wa kukashimwish? (Tal ka mushet kakweta mutu wa mulong ulondila anch: “Kupan Uman wa kukashimwish Kuletining Yibudikin!”)

¹² Tufanyidin kuchichind chisu tusutishininga mu kupan uman wa kukashimwish. Chawiy, ikal nich kashinsh ka kuchitambul, ap anch wasal kal maminit pa dichuku. Shinshikin chom chinech: Anch in kulejan avud apan uman wa kukashimwish maminit yitan pa dichuku ni dichuku, chisu chinech chikwiwej ku asaa ma miliyon 17 tupanininga pa ngond ni ngond!

13. Ov, chom ik chifanyidina kutubachik kupan uman wa kukashimwish?

¹³ Tukwet yiyingish yivud chakwel tupanang uman wa kukashimwish—Rukat ra Nzamb ni ra mutej netu. (Mat. 22:37-39) Antu alondwilinga nich musangar ngikadil ya Yehova adi ni rutong ra kutukwash chakwel tulonda piur pa “uyaj wa kulim kwa want.” (Kus. 145:7, 10-12) Musangar wa kwangan nau amutej netu utubachikin twikala ni chisu chiwamp chivud tufanyidina kupan rusangu ruwamp pichidiaku muten. (Rom 10:13, 14) Nich kalimish kakemp ni kwirijej, antu awonsu a mukach mwetu akutwish kupan uman wa kukashimwish ni pamwingap kumekesh musangar mu kwijikishang uyakin kudia muntu kanang ukweta muchim uwamp.

[Dizu dirumburila chipich chidia pa paj wa 4]

Ukutwishany kutan ukwash wa kwikal ni rutong ra kwijikijan ni antu pamwing ni kusambish minsamb

[Dizu dirumburila chipich chidia pa paj wa 5]

Chakwel ikal ni manangu ma kuusadil, in kulejan avud atanining mitapu ya kukimb yisu yiwamp chakwel apana uman wa kukashimwish

[Kamushet kadia pa paj wa 5]

Yitongijok Mulong wa Kusambish Minsamb

◼ Lembilany mulong wa ukwash wa kuya kusambish mambamb

◼ Tondany antu amekeshina kuta urund ni alondila mu mutapu uwamp

◼ Talijanany pa mes pa chisu wambambinanya, sipanyaku, ni rumburilany yom mu mutapu kanang usangareshina

◼ Ikalany in kutesh awamp

[Kamushet kadia pa paj wa 6]

Kupan Uman wa Kukashimwish Kuletining Yibudikin!

• Pa chisu chadingay ni kuchingel motak wend ku garaj chakwel aurijek, mukadivar umwing wapana uman kudi adinga piswimp nend ni wayinkisha maladikij chakwel eza atesha diskur dia pibur. Ku chitentam cha muvu wasuta, mukadivar kajinguninap muntu wamulangwisha nich chirungil. Wadinga muntu ikundj winkishay diladikij ku garaj muvu wadinga kurutu! Ikundj winou waya kutesh diskur dia pibur ni wachirika mu dijin diend mulong wa kwilej Bibil. Awonsu aad ndiy ni mukajend ayibabatisha.

• Nambaz wileja uyakin kusutil ku uman wa kukashimwish ushinshikidin teritwar wend wa pakampwil chakwel ikala ni antu a kwijikijan nend kusutil kudia an end asatu. Teritwar wend ukwet amutej nend ni anvaj ijikinay ku shikol ni ku yikumangan kusutil kudi anvaj. Pakwez wiyijikisha amwinend, ulejen kusu rusangu ripukwena michim ridia rimekeshina anch Bibil ukwet usey wa kumusadil ni ukwashin kukudish anend, kupwa umubachikin kwisambin mitu ya milong yikwau ya usey. Mulong wasambisha pakadi kulab, wajingunina anch chid cha usey nakash kusadil Bibil mu minsamb yikwezap. Mu kusalang mutapu winou, wayikwasha antu 12 ku kutambul dibabatish.

• Pa chisu chamwendinau nambaz kudiay ntakel wa milong ya asirans, ndiy watambula chisu cha kupan uman kudiay. Wamwipula anch ndiy wadinga ufanyidina kwitiyij nawamp muchim, musangar, ni mwom wa chikupu. Ndiy witiyija anch mwaning ni wamwipula wisu mutapu wa asirans umwing wadingay ni kwisambin. Wamuleja ndiy yakushilamu ya mu Bibil ni wamwinkisha umwing wa ku mikand yetu, watangay urel umwing. Atenchika dilejan dia Bibil, Ndiy wasambisha kuya ku yikumangan, ni kupwa wababatishiwa.

• Pa chisu chadingay mu weny ku avion, nambaz wasambisha kwambamb ni mband wadinga ushich piswimp nend ni wadinga ufanyidina kupan uman. Kupwa kwa kutumbuk, nambaz wamwinkisha mband winou adres wend ni nimero wa telefon ni kupwa wamukasikesha mband winou chakwel ita dilejan dia Bibil pa chisu chikwau chikwezau kumwendil kudia Atuman a Yehova. Dichiku dimwing diwamp, Atuman aad akokala ku chis cha mband mwinou. Ndiy wasambisha dilejan dia Bibil, waya kurutu mau mau, amubabatisha, ni katat utakedil malejan ma Bibil masatu ku chikumbu chend.

• Mukadivar umwing mputames wadinga ni mivu 100 mu chikumbu cha amapal walondanga chisu ni chisu anch: “Tuswiridin Want.” Chipul chinech chalankisha yipul kudi amingang amband mu chikumbu chinech pamwing ni ayej chakwel amwipula ni ayirumburil chidia Want. Umwing wa amband adinga ni kusal mudimu mwin mu chikumbu omu wamwipula anch chom ik chikezay kusal mu Paradis. Ndiy wamwakula anch: “Nikwez kuman ni kwend kand pamwing ni kwosh chitwam cha ayibid.” Mulong ndiy wadinga mputames, chawiy wayita kumutangin magazet. Pa chisu chezau kumutal kudiay mwan changadim, mwin mudimu umwing wamwipula changadim piur pa mbil yadingay nich ya kulet magazet mu chikumbu. Mwingang mband wamuleja changadim anch: “Mutu wetu wa mulong usu mu chikumbu cha amapal ulondil anch: ‘Tuswiridin Want.’”

• Nambaz umwing wadinga uchingedil mu mifund ku chikumbu cha kudil watesha chisak cha antu amakurump adinga ashich piswimp nend isabinanga pa jinsangu ja politik. Muntu umwing walonda anch guvernema kakutwishap kupwish milong yetu. Nambaz wilondila amwinend anch ‘Dined didi dilau diam.’ Wasala malembil ma mu wiswimp ni washeja kudiau. Kupwa kwa kwiyijikish amwinend, ndiy walonda piur pa guvernema ukeza kupwish milong ya mangand, Want wa Nzamb, ni wayinkisha broshir wadingay nich. Kapamp kamwing kamu ntakel waseja kudiay. Chitongijok cha nambaz chadinga cha kumwipul kwindond kwadingay ushich. Kupwa, ndiy wamuleja nambaz anch ni ndiy wading uteshin, ni ukatin ni yend broshir. Mwin mudimu wadinga kand ni kutesh waseja mansoj ku mes. Wadinga mwin kwilej wa Bibil wa pakur wasota kwiswipish dilejan.