Itenchikany mu “Mudimu Wawonsu Uwamp”
1 Pasambishay Yesu kampany musu wa kulejan, witekina chisu cha kuyifumb in kwilej end. (Mat. 10:5-14) Ap anch etu awonsu tukwatiken nich midimu, pakwez kwitekin kwetu minit yikemp mulong wa kwirijek kurutu kwa kuya kulejan uman ku chis ni chis ku kutukwash tutana yibudikin yiwamp.—2 Kor. 9:6.
2 Mutapu wa Kwirijek: Kwirijek kuwamp kusambishining nich kwijik yom yidia mu mukand ukupanau. Tukutwish kand twayitongin antu adia mu teritwar wetu. Mulong ik uyikwatina? Yitiyij ik ya chirelijon yidia mwi ndond yiushichanya? Tukutwish kutal mutapu wa kusambish mambamb mu Mudimu Wetu wa Want ni mu buku Comment raisonner à partir des Écritures chakwel utana yitongijok.
3 Anch tukat kuta kamu matu nawamp ku yakumenaku yisadiningau mu Chikumangan cha Mudimu kukutukwash. Anch twikal nich nkeu ja kusadin mazu ma kusambish mambamb, komb tukuswiriken chisu chikemp mulong wa kwirijek. Pakwez, chisu chawonsu kurutu kwa kuya mu mudimu, anch twashinshikinaku yitongijok yitukulonda ni anch twadandamen kutenchik mazu metu ma kusambish nich mambamb metu, tukez kwikal ayifuvu mu kulejan. Tukutwish kand twitekin chisu cha kusop chibut chetu cha kuyang nich mu kulejan anch mudi mikand yituswiridina.
4 Yik yikutukwasha kuvurik mazu metu ma kusambish nich mambamb? Kwiyijidish dizu piur udi mulad uwamp wa kutek mu manangu metu yom yitusotila kulond. Amwing akat kusanger kwiyijidish anch apwish dilejan dia dijuku. Akwau amening anch chidi cha ukwash afunda tumazu tukemp pa kadipaper chakwel atalangap kurutu kwa kushik ku chis.
5 Chidia cha Kutaninamu: Kwirijek nawamp kukat kutwikadish ayifuvu ni kusangar mu mudimu. Kutukwashining tulonda ni want ipetu ni chakwel kulik kwakam pitudia ku chis cha muntu. Tukutwish kuta chipandikena matu kudiay mwin chikumbu pa ndond pa kwiyakamish mulong wa yitukulonda. Chikwau, kwijik yom yidia mu mikand kukutukwash tuzanguroka pa chisu tuyipanina.
6 Mifund yitukasikeshin chakwel twitenchika “mu mudimu wawonsu uwamp.” (Titus 3:1) Mudimu ik uwamp udiaku upandakena mudimu wa kulejan rusang ruwamp? Kusutil ku kwirijek kamu nawamp, kwawiy tumekeshidina anch tumulimishin mwin chikumbu witiyijina kututesh, ni Yehova Nzamb, mulong tudi antimesh end.—Isa. 43:10.