Ov Tujingunin Usu wa Kwishitul?

¹ Rukat ra Nzamb Utumbila utukata kwifukwil rifanyidin kutubachik kwikal achila mes piur pa kwishitul, mulad wa kwileng ni kudjal. Buku Notre ministère ulondil pa paj 130-131 anch: “Mulong wa kupan kwetu uman wa patok, twijiken nawamp kamu mu chisak tushichinga. Kulam chikumbu chetu chinangina ni pakad upalakas, mukach ni pol, kuding ni kwawiy kupan uman kud amutej netu. . . . Angatan ni atatuku afanyidin kubangin kamu nakash yisakin ya mu chikumbu ni kumekan kwach kwa pol, nich kwijik anch chikumbu ni rupang yinangina yifanyidin kamu uman uwamp kudiokal kud antu akwau. Mitu ya majuku yifanyidin kujingunin nawamp anch chom chinech, pamwing nich kutakel kwau kwa mu milong ya muspiritu, udi uman wa kwel anch akat kutakel nawamp majuku mau. (1 Tim. 3:​4, 12) Amband, ni yawiy, akwet chisend cha kushinshikin yom, nakash kamu mukach mwa chikumbu. (Titus 2:​4, 5) An afumbinau nawamp akat kusal ni yawiy nawamp mu kwikal inangina ayinau, ni tupalikany twau twa kulal. . . .

² “Mulad wetu wa kwileng ni kudjal ufanyidin kwikal wambatena nich yany ya Nzamb. Tufanyidinap kutongin kwimekesh kurutu kwa antu ajim nich kudjal kumwing kwakad kalimish. Tufanyidin kwiyakamish nakash mud ik piur pa yidjal yetu pitumusadidina Yehova mudimu, pitumumekeshina mu mujikit wa chingand ap pitudia ku chimet! Kwileng kwetu ni mulad wetu wa kudjal yikutwish kwikal nich usu padiau antu akwau mu mutapu umenau difukwil diakin dia Yehova. Chakin anch chikwikalap chifanyidina kudjal kwakad kwishitul kuletina kuburen kalimish piur pa antu akwau. (Mik. 6:8; 1 Kor. 10:​31-33; 1 Tim. 2:​9, 10) Chawiy lel, pitudia mu mujikit wa chingand ap anch tukumangen mulong wa kwifukwil ku yikumangan ya chikumangen, yikumangan ya munyimuku ni yikunguril yijim, tufanyidin kuvurik yilondila Mifund piur pa kwinang kwa mujimbu ni kumekan kwa kwikepish chakwel kumushiman Yehova yisu yawonsu.

³ “Chawiy chimwing kand pituyila kutal chikumbu cha Betel. . . . Vurik anch, dijin Betel dirumburikin “Chikumbu cha Nzamb,” chawiy lel kudjal kwetu, kwileng ni ngikadil yetu yifanyidin kwikal chilik chimwing mud mutuchingejinau kwikal pitukumangena ku yikumangan mulong wa kwifukwil ku Chot cha Want.”