Twisakinany Sens Chikunguril cha Distrik “Antwarubil a Want Akweta Mushiku”

¹ Program Umwing Ukasikeshina: Twalondwil program umwing ukasikeshina mud ik ku chikunguril chetu cha distrik chasutina ech! Twakumangen pamwing mulong wa rutong rimwing, kwikal awanyishinau nawamp chakwel kulejan nich mushiku Want wa Nzamb. Ov uvurikin mutapu warumburilay mwin kulond wa kusambish dizu “kulejan”? Ov uvurikin yatukasikesha kusal diskur “Twikalany Akad Wom Chitwija Anch Yehova Udi Netu”? Ov jinsangu ik jakin ja mu mwom washinshikidina nakash?

² Diskur dia yikunku yisatu “Ngikadil ya Ritiy Retu Ripakinau Nich Yoziu Kushalijan” diatwinkishin mayingishin majim masatu mamekeshina mulong wak Yehova ulikidil kuzengol. Ov ukutwish kumarumburil mayingishin minam? Mifund ik pengamidina kulik kwiyandjik kwetu kwa Ukristu mu milong ya mangand? Yom ik yatukasikeshinau kusal chakwel kwirijek mulong wa rupompat rikata kumekan mulong wa kulik kwetu kwiyandjik mu milong ya mangand? Kujijaman kwetu kushinshamena ku yoziu kukat kuletang nchik kushiman padiay Yehova?

³ Ov yikunku ik ya dram “Tujijamanany mu Yisu ya Mar” yakukasikeshina kamu nakash? Ov mutapu ik tukutwisha kwikal mud Jeremiy?

⁴ Yikarumun ik yijim yidia kurutu ni yikeza kutwal ku dichuku diamushena dia Nzamb, yisambinau mu Diskur dia pibur, “Yom ya Mangand Minam Yikat Kukarumuk,”? Pitwatila matu ku diskur dia nsudiel, “Twikalany Nich Midimu Yiwamp Yivud Mud Antwarubil a Want Akweta Mushiku,” ov mutapu ik wambatanisha rusangu riner ni mudimu wey wa kulejan? Ov yom ik tuchingejina mu machuku madia kurutu?

⁵ Milong Yijim ya Kusadil: Mud mwarumburilau mu diskur “Twikalany in Kujikitish,” mutapu ik tukutwisha kumekesh kujimb kwa kujikitish kwetu kud Yehova? Mu diskur nfungwil, “Antwarubil a Want Akweta Mushiku Upandikena,” ov mushiku wa nany watukasikeshinau kwimburij? Kwishinshikin ik kwatwitinau kusal?

⁶ Mud mwashinshikidinau mu diskur dia yikunku yisatu “Uprofet wa Mike Utukasikeshin Kwendil mu Dijin dia Yehova,” yom ik yisatu yitinau tufanyidina kuwanyish chakwel kwitapil dilau dia Yehova? Ov chiswapel kuyiwanyish? (Mike 6:⁠8) Kwambatan nich diskur “Lamany Kwishitul Nich Kuchidij Michim Yen,” mutapu ik tufanyidina kulam kwishitul mu ngikadil? Ov diskur “Twilamany ku Makasu” diatubabeshin mu mitambu ik yimwing chakwel kwipuk kwikal adimbinau ni kwipuk kuyidimb antu akwau?

⁷ Manans ik mafanyidina ma diskur dia yikunku yisatu “Antwarubil a Want Akata Kutumbish Mudimu Wau” wasambishina kal kusadil mu mudimu wey? Diskur “Misamb ya Muspiritu Yikat Kutungang,” disambidin dizu dimwing ku dimwing dia Filip 4:⁠8. Mufund winou ov watukwashin nchik kutadishin misamb yetu pa milong ya Nzamb, ni chisu ik tufanyidina kusal mwamu?

⁸ Diskur “Tumuchingejinany Kamu Nakash Yehova mu Yisu ya Mar” disambina mutapu tukutwisha kurish nich yinship ya mar, mar ma kuman nfalang, kuburen kwa ukash wa mujimbu, milong ya dijuku, ni kuzengol kudandamedina. Mutapu ik tukutwisha kumekesh ruchingej mudiay Yehova chisu tudia mu mikadil yiney?

⁹ Yipau Yisu ya Muspiritu: Twasanger nakash patwatambwila buku musu Mwifukwila Nzamb Umwing Kusu Wakin. Chijikish charumburila rutong ra buku winou chadinga ni usu ik padi ey? Mulong wak ukwikalay wa ukwash nakash mu mudimu wetu wa kwikadish in kwilej mud buku wa kaad wa kwilej?

¹⁰ Kupwa twatambwil kand buku mukwau muwamp Approchez-vous de Jéhovah. Jinsangu ik jimwing ja pakampwil jidiamu? Yipich ik yimwing yidiamu yikusangareshina nakash? Ov kutang kwey kwa buku winou kukushejishin piswimp ni Yehova? Nany kand mukwau ukutwisha kutaninamu ukwash? Twasanger kand pa kutambul Les Écritures grecques chrétiennes​—⁠Traduction du monde nouveau wa Lingala. Chidi chom cha mudimu chiwamp nakash mulong wa dilejan dia muntu ipend ni mulong wa mudimu wa kulejan. Ov mutapu ik utongina kumusadil?

¹¹ Chikunguril cha Distrik “Antwarubil a Want Akweta Mushiku” chatwinkishin dikasikesh dia muspiritu tuswiridina mulong wa kurish mu yisu ya mar makash. Chawiy lel chakwel anch tutaninamu sens ukwash udiokila ku ditenchik dined dia muspiritu, tufanyidin kusal usu wetu wawonsu kuvurik yom yawonsu yalondau, kusanger yom twatambula, ni kusadil yitwilejina. (2 Pi. 3:14) Kudandamen kusal mwamu kukutukasikesh kulam kushinshaman kwetu ni kwimekesh kwikal antwarubil a Want akweta mushiku mu kumwimburij Nsalejetu Yesu Kristu, mulong wa uyaj wawonsu wa Yehova.​—⁠Filp. 1:​9-11.