Tushakamany Kwambatan Nich Kwipan Kwetu
1 Wikala ubatishinau katat ap pasutin kal mivu yivud, chakin kamu anch ukat kuvurikang chinship chinech cha usey mu mwom wey. Dibatish dietu didiap nsudiel pakwez, didi kwau disambishil dia kwipan mu mudimu wa mwom ukutwisha kushal chikupu. (1 Yohan 2:17) Kushakam kwambatan nich kwipan kwetu kwitin yom ik?
2 Tulondulany Chilikej cha Kristu: Kupwa kwa kubatishiu, Yesu “wasambisha mudimu wend,” wa kulejan “Rusangu Ruwamp ra Want wa Nzamb.” (Luka 3:23; 4:43) Chilik chimwing kand, kupwa kwa kwijikish kwipan kwetu kud Yehova kusutin ku dibatish, tukat kwikal atushalapol inkinau mbil ya kulejan rusangu ruwamp. Ap anch yitining chisu chivud ni usu nakash chakwel kuwanyish maswir ma yom ya ku mujimbu, mudimu wetu wa kusambish, udi mudimu wa Ukristu. (Mat. 6:33) Pa ndond pa kurish mulong wa kwikal nich dipit ap katumb, antu ipanina kud Nzamb akimbining mutapu wa ‘kutumbish mudimu wau,’ mud mwasalay mupostol Paul. (Rom 11:13) Ov ukatin nakash chisend chey cha kumusadil Yehova ni kusal usu chakwel kutumbish mudimu wey ukata kumusadilang?
3 Mud muchadinga ku mutambu wa Yesu, tufanyidin ‘kurish nend Djabul.’ (Jak. 4:7) Satan wamupaka Yesu kupwa kwa dibatish Diend, chilik chimwing kand ndiy ukat kuyirishish atushalapol a Yehova nlel. (Luka 4:1-13) Mangand ma Satan chimatunyingumukina, tufanyidin kwipup ayinetu, kwipuk chom chin chawonsu chikutwisha kujondish manangu metu ap kuyipish muchim wetu. (Jinsw. 4:23; Mat. 5:29, 30) Ayibabeshin in Kristu anch “kiukutwishanyap kwibomb nend Nsalejetu pa kudia ku ‘Mes ma Mwant [Yehova, NW]’ chad wibombany kand nau ayilembil.” (1 Kor. 10:21) Chinech chitin anch twilama ku masengan mayimp, urund uyimp, ni ubaj wa Internet. Chitwitin kand kwipuk kulondul malejan ma mwin kupumbok. Kubabel yom yiney ni mipit yikwau yijingamina ya Satan kukez kutukwash kushakam kwambatan nich kwipan kwetu.
4 Tusadilany Yitenchik ya Nzamb: Chakwel kutukwash kushakam kwambatan nich kwipan kwetu, Yehova utwinkishin ukwash kusutin ku Dizu diend ni ku chikumangen cha Ukristu. Sal kutang Baibel ni malembil yikala chaku chey cha pichuku-pichuku. (Jos. 1:8; 1 Tes. 5:17) Sanger yikumangan ya chikumangen. (Kus. 122:1) Kwat urund ni antu akata kumwov Yehova wom ni kulam mbil yend.—Kus. 119:63.
5 Nich ukwash wa Yehova, ukutwish kushakam kwambatan nich kwipan kwey kud Yehova ni kwikal nich musangar wa kumusadil chikupu.—Kus. 22:26, 27; Flp. 4:13.