‘Yangany Uyikadishany in Kwilej, Uyibabatishany’
“Chawiy en yangany kwen ku michid yawonsu uyikadishany in kwilej, wend uyibabatishany . . . , wend uyilejany kusal yom yawonsu yinakulejanya en.” —MATEU 28:19, 20.
1. Mupak ik wakwata muchid wa Isarel ku Mukandu wa Sinai?
PASUTIL kal mivu 3 500, muchid wawonsu wachipa kud Nzamb. Akumangana ku Mukandu wa Sinai, in Isarel alonda patok anch: “Yawonsu yalonday [Yehova], tukez kuyisadil.” Kudiokal pa chisu chinicha ni kuya kurutu, Isarel wikala muchid wa antu ipanina kud Nzamb, ‘dipit diend dia pakampwil.’ (Kubudik 19:5, 8; 24:3) Achingejina nich impu yikash kutambul diking diend ni kuswan ngand “yizwila mayel ni woch” chizaz ni chizaz.—In Levi 20:24.
2. Ilel, urund wa mutapu ik ukutwishau antu kusanger pamwing ni Nzamb?
2 Pakwez, mud mwalonday nfund-a-kuseng Asaf, in Isarel ‘kalamap kwau manswik ma Nzamb, alika kwendil mu yijil yend.’ (Kuseng 78:10) Akanganya kulam machip machipau atatukwau kudiay Yehova. Chakin kamu, muchid washadisha urund wa pakampwil ni Nzamb. (Mulej 5:4; Mateu 23:37, 38) Chawiy, Nzamb, ‘wayivurika antu a michid yikwau watondap antu amwing a pakach pau mulong wa dijin diend.’ (Midimu 15:14) Mu machuku minam ma kwisudiel, ndiy ukat kukumangej pamwing “chisak chipandiken kujimb, chakad kutwish kuchind kudi muntu, mupwidil michid yawonsu ni majuku mawonsu, antu a mangand mawonsu ni jindim jawonsu,” itiyijina nich musangar anch: “Dipandish didi kudi Nzamb wetu, ushicha pa nkwas, ni kudi Mwan a mukoku!”—Kujingunik 7:9, 10.
3. Nzau ik jifanyidinay muntu kusal kurutu kwa kusanger urund ni Nzamb?
3 Chakwel kwikal mukach mwa antu akweta urund winou uwamp ni Nzamb, chimufanyidin muntu kwipan kud Yehova ni kukwijikish patok kusutil ku dibabatish. Chinech chidi mu kuziyil kwi mbil ya umutakel wa Yesu kud in kwilejend anch: “Chawiy en yangany kwen ku michid yawonsu uyikadishany in kwilej, wend uyibabatishany mu dijin dia Tatuku ni dia Mwan ni dia [s]piritu [u]tumbila; Wend uyilejany kusal yom yawonsu yinakulejanya en.” (Mateu 28:19, 20) In Isarel amutesha Moses patangay “mukand wa manswik.” (Kubudik 24:3, 7, 8) Pa chinech, awiy atesha kurumburik kwa yisend yau pantaliken nend Yehova. Chawiy chimwing kand ilel, ronganyin rakin ra rusot ra Nzamb mud muridia mu Dizu diend, Bibil, ridi ra usey kurutu kwa muntu kusal ruzau ra kuya ku dibabatish.
4. Chom ik chifanyidinay muntu kusal chakwel awanyisha yitinau mulong wa dibabatish? (Tal mushet udia kwiur oku.)
4 Chakin, Yesu wasota anch in kwilejend ikala nich ritiy rijikishina nawamp kurutu kwa kutambul dibabatish . Kayinkishap kusu in kwilejend mbil ching ya kuya ni kwikadish in kwilej pakwez wayinkisha kand mbil ya kuyilej ‘kusal yom yawonsu yayilejay.’ (Mateu 7:24, 25; Efes 3:17-19) Chawiy lel, antu awanyishina yitinau mulong wa dibabatish adi antu ileja kal Bibil mu angond kanang, mu muvu umwing ap mivu yaad, chawiy lel mupak wau udiap wa maumau ap wakad kutong. Ku dibabatish adinad, antu asotinau kubabatish akwiling anch inge ku yipul yaad yijim. Mulong Yesu wakasikeshina anch ‘Inge wetu ikala kamu Inge, ni Bwat wetu, Bwat,’ chikez kwikal cha ukwash kud antu awonsu adia pakach petu kushinshikin nawamp kurumburik kwa yipul yiney yaad ya dibabatish.—Mateu 5:37.
Kukarumuk ni Kwipan
5. Nzau ik jaad ja usey jikasikeshidina chipul cha dibabatish cha kusambish?
5 Chipul cha kusambish cha dibabatish chimwipwilingau muntu usotina dibabatish chiding cha kwijik anch wakarumukin kal kudiokal ku mwom wend wa pakur ni anch wapanin kal mwom wend kud Yehova chakwel kusal rusot rend. Chipul chinech chikasikeshidin nzau jaad ja usey jifanyidina bil kusal kurutu kwa dibabatish, charumburik kukarumuk ni kwipan.
6, 7. (a) Ov, mulong wak kukarumuk kudi kwa usey kud antu awonsu asotina kutambul dibabatish? (b) Yikarumun ik yifanyidinay muntu kusal kurutu kwa kukarumuk?
6 Ov, mulong wak chimufanyidin muntu kukarumuk kurutu kwa dibabatish? Kambuy Paul urumburil anch: “Niyetu awonsu twadinga mukach mwau, pakur etu awonsu twalondula maku metu ma wuntu.” (Efes 2:3,MM) Kurutu twijika ronganyin rakin ra rusot ra Nzamb, twadinga ni kushakam kwambatan nich mangand, kulondulijan nich ngikadil ni yany ya mangand. Mwom wetu ading autakedin kud nzamb wa mangand minam, Satan. (2 Korint 4:4) Pakwez, pitwijika rusot ra Nzamb, twakwata mupak wa kulik ‘kushakam kand mu maku ma mujimbu wa pasak, pakwez ching mu rusot ra Nzamb.’—1 Pita 4:2.
7 Mwom winou usu uletin yiyukish yivud. Chipandikenamu, wazuril njil yitwadina ku urund uwamp ni Yehova, urund wilikejay David nich diladikij dia kwandam mu “dizang” ni kushakam ku ‘mukandu utumbila’ wa Nzamb—chakin kamu didi dilau dijim. (Kuseng 15:1) Chakin kamu, Yehova kakatap kumuladikij muntu win mwawonsu, pakwez ching in “kwendil mu kashinsh ni kusadil mu kutentam, ni kulond yakin mu [michim yau].” (Kuseng 15:2) Mulong wa mikadil yetu kushalijan ya kurutu twileja uyakin, kuwanyish yitinau yiney kukutwish kwit anch tufanyidin kukarumuk mu mulad kanang—mu mwikadil ni mu untu wetu. (1 Korint 6:9-11; Kolosay 3:5-10) Chibachikin cha yikarumun yiney chidi kukarumuk—kwov ushon nakash pa mwom wetu wa pakur ni kukwat mupak ukash wa kumusangaresh Yehova. Chinech chikat kushikij ku kukarumuk kwakin—kulik mwom wa yifu, yom ya mangand ni kulondul mwom umusangareshina Nzamb.—Midimu 3:19.
8. Mutapu ik tukata kwipan, ni kukwatijadin nchik nich dibabatish?
8 Chikunku cha kaad cha chipul cha kusambish cha dibabatish chiding cha kwijik anch antu asotina kutambul dibabatish ipanin kal kud Yehova chakwel kusal rusot rend. Kwipan ridi rizau ra usey rifanyidina kusambel dibabatish. Kwipan akusadining mu malembil, mutukata kumulejin Yehova anch kusutil kud Kristu tusotin kumwinkish mwom wetu. (Rom 14:7, 8; 2 Korint 5:15) Chawiy Yehova ukat kwikal Nsalejetu ni Mwant wetu, mud Yesu tukat kusangar kusal rusot ra Nzamb. (Kuseng 40:8; Efes 6:6) Kushilamu kwinoku kwa kuchip kwa kwipan kud Yehova kusadikining kapamp kamwing kusu. Ap anch, tukat kwipaninang kuns, kwijikish kwa patok pa dichuku dia dibabatish kukwashin kuyijikish antu awonsu anch twipana kal kwa kuchip kud Tatukwetu wa mwiur.—Rom 10:10.
9, 10. (a) Kusal rusot ra Nzamb kwitin yom ik? (b) Mutapu ik wijikau amakurump in Nazi kwipan kwetu?
9 Kulondul chilakej cha Yesu cha kusal rusot ra Nzamb kwitin yom ik? Yesu wayileja in kwilejend anch: “Muntu anch wel anch alondul panyim pam, lik ituna bil amwinend, azambul [mutond wend wa mar, NW], anlondul am.” (Mateu 16:24) Pinap Yesu wakasikeshina yom yisatu yitufanyidina kusal. Cha kusambish, ‘kwitun’ ayinetu. Chirumburikin anch, tulikin kulondul maku metu ma mbij, makad kuwanyin ni twitiyijin kulondul yiyul ni umutakel wa Nzamb. Cha kaad, ‘kusend mutond wetu wa mar.’ Pa chirung cha Yesu mutond wa mar wadinga chijingidij cha usany ni mar. Mulong tudi in Kristu, twitiyijin anch tukutwish kuman mar mulong wa rusangu ruwamp. (2 Timote 1:8) Ap anch mangand makutwish kutupipesh ap kutufish nich, mud Kristu tukat ‘kupipej usany,’ ni kusangar pa kwijik anch tumusangareshin Nzamb. (Hebereu 12:2) Cha nsudiel, ‘tudandamena’ kumulondul Yesu.—Kuseng 73:26; 119:44; 145:2.
10 Cha musangar chidi anch, ap akankuny amwing itiyijin kwipan kwasalau Atuman a Yehova kud Nzamb mulong wa kumusadil ching ndiy kusu. Chilakej, mu chibeng cha mar cha Buchenwald cha in Nazi mu Allemagne, Ayita Atuman alika kutun ritiy rau kutek chikas pa mazu mafundau malondwila am: “Nichidi ni katat mwin Kwilej Bibil ushishamena, nikezap kujip kuchip kunachipa kudiay Yehova.” Chakin kamu mazu minam ma patok mamekeshin ngikadil ya manangu ya atushalapol ashishamena awonsu ipana kal a Nzamb!—Midimu 5:32.
Kwiyijikish Mud Kaman wa Yehova
11. Dilau ik ditapidilay muntu utambwila dibabatish?
11 Chipul cha kaad chimwipilingau muntu usotina kutambul dibabatish, cha kusambish, chiding cha kwijik anch wovil kurumburik anch dibabatish diend dimwijikishin mud Kaman wa Yehova. Kupwa kwa dibabatish diend, ndiy ukat kwikal kashalapol winkishinau mbil ni usendina dijin dia Yehova. Chinech ni chawiy chidi chisend chijim ni dilau dijim. Chimutekin kand muntu utambwila dibabatish mu mulong wa kutambul mwom wa chikupu, anch ndiy washal ushishamena kudiay Yehova.—Mateu 24:13.
12. Chisend ik chilondwila dilau dia kusend dijin dia Yehova?
12 Chakin kamu, kusend dijin dia Nzamb mwin dikand diawonsu, Yehova didi dilau dia pakampwil. Muprofet Mike walonda anch: “Antu a michid yawonsu, akez kwendin muntu ni muntu mu dijin dia nzamb wend; pakwez etu, ku mutambu wetu, tukez kwendin mu dijin dia Yehova Nzamb wetu chikupu ni chikupu.” (Mike 4:5, NW) Ap mwamu, mujikit ulondwil dilau dined. Tufanyidin kusal usu wa kushakam mu mutapu uletina ntumb pa dijin ditusendina. Mud mwayivurishau in Kristu mu Rom kud Paul anch, ang muntu walik kusal yikatay kulejan, dijin dia Nzamb akat ‘kudisaal,’ ap kudipipesh.—Rom 2:21-24.
13. Ov, mulong wak atushalapol ipana kal a Yehova akwet chisend cha kupan uman piur pa Nzamb wau?
13 Anch muntu wikal Kaman wa Yehova, witiyij kal kand chisend cha kulejan uman wa Nzamb wend. Yehova waladikija muchid wa Isarel wipana kwikal atuman end chakwel kupan uman wa Winzamb wend wa chikupu. (Isay 43:10-12, 21) Pakwez muchid wakanganya kuwanyish chisend chinech, ni chashadisha chikupu kwitiyik kud Yehova. Ilel, in Kristu akin azangamidin dilau dikwetau dia kupan uman wa Yehova. Tukat kusal mwamu mulong tumukatil ni tusotin kamu nakash anch dijin diend ditumba. Tufanyidin kuyilej antu akwau uyakin piur pa Tatukwetu wa mwiur ni rutong rend? Tukat kwiyov mud mwovay kambuy Paul palonday anch: ‘Kufanyin kulel padi am; anch kinilejenap katumb kawamp riyind kudi am.’—1 Korint 9:16.
14, 15. (a) Chisend ik chikweta dirijek dia Yehova mu kukul kwetu muspiritu? (b) Yitenchik ik yidiaku ya kutukwash muspiritu?
14 Chipul cha kaad chimuvurishin kand muntu usotina kutambul dibabatish chisend chend cha kusadil pamwing ni dirijek ditakedilau nich spiritu wa Yehova. Tudiap ayinetu mu kumusadil Nzamb, tuswiridin ukwash, pa kwengamin, ni kuhamuk kwa ‘anamakwetu awonsu in Kristu.’ (1 Pita 2:17; 1 Korint 12:12, 13) Dirijek dia Nzamb dikwet chisend cha usey mu kukul kwetu kwa muspiritu. Diletin mikand yivud ya Bibil yikata kutukwash kukul mu ronganyin rakin, kusadil manangu piturishina nich yikokujol, ni kukudish urund wa piswimp ni Nzamb. Mud maku ushinshikidina anch mwanend amulil ni kumubangin nawamp, “kashalapol wakin ukweta manangu” uletin yakudia yivud ya muspiritu mulong wa kuya kwetu kurutu muspiritu.—Mateu 24:45-47; 1 Tesalonik 2:7, 8.
15 Ku yikumangan ya rubing ni rubing, antu a Yehova akat kutambul mafundish maswiridinau ni dikasikesh dia kwikal Atuman a Yehova ashishamena. (Hebereu 10:24, 25) Shikol ya Mudimu wa Uteokras yitulejin mutapu wa kulond patok, ni Chikumangan cha Mudimu chikat kutufundish mutapu wa kupan uruw wetu muchifanyidina. Kusutil ku yikumangan yetu ni ku dilejan dietu ayinetu dia mikand ya Bibil, tukutwish kuman mutapu usadila spiritu wa Yehova, mutapu utakedilay dirijek diend. Kusutil ku yitenchik yiney ya chisu chawonsu, Nzamb utubabeshin ku yak, utufundishin muchifanyidina chakwel twikal atushalapol asongina mabuj, ni utukwashin kucha ku mes muspiritu.— Kuseng 19:7, 8, 11; 1 Tesalonik 5:6, 11; 1 Timote 4:13.
Chibachikina Kukwat Mupak wa Kutambul Dibabatish
16. Chom ik chitubachikininga kupan mwom wetu kud Yehova?
16 Yipul yawonsu yaad ya dibabatish yiyivurishin antu asotina kutambul dibabatish kurumburik kwa dibabatish dia mu mem ni yisend diletina. Ov, chom ik lel, chifanyidina kuyibachik kukwat mupak wa kutambul dibabatish? Tukat kwikal in kwilej ababatishau kal, chidingap mulong anch muntu kanang utushindidil, pakwez mulong Yehova ukat ‘kutukak.’ (Yohan 6:44) Mulong “Nzamb udi rukat,” ndiy uyikedil mangand nich rukat, chidiap ku kushindil. (1 Yohan 4:8) Atukakidin kudiay Yehova kusutil ku ngikadil yend yiwamp ni ku mutapu ukat kutusadinay. Yehova wamupana Mwanend kapwokal mulong wetwetu ni utwinkishin machuku ma kurutu mapandikena kuwap. (Yohan 3:16) Ku mutambu wetu, chitubachikin kumwinkish mwom wetu.—Jinswir 3:9; 2 Korint 5:14, 15.
17. Kitwipanap ku chom ik?
17 Twipanining ayinetu, chidiap ku chitongijok kanang chitiyijinau antu ap anch ku mudimu kampand, pakwez kud Yehova amwinend. Mudimu wayinkishay Nzamb antwend ukez kukarumuk, pakwez kwipan kwau kud ndiy kukushal cha chinicha. Chilakej, yamulejay Aburaham kusal yadinga yishalijadin nich yamulejay Yeremiy kusal. (Disambishil 13:17, 18; Yeremiy 1:6, 7) Chikwau kand, awonsu aad asala mudimu kampand wijikena wayinkishau kud Nzamb kusal mulong awiy amukata Yehova ni asota kusal rusot rend mu kushinshaman. Pa chirung chinech cha nsudiel, in kwilej ababatishau kal a Kristu asadil usu wa kuwanyish mbil ya Kristu ya kulejan rusangu ruwamp ra Want ni kwikadish in kwilej. (Mateu 24:14; 28:19, 20) Kusal mudimu winou nich muchim wawonsu yidi njil yiwamp ya kumekeshin rukat retu mulong wa Tatukwetu wa mwiur ni kumekesh chakin kamu anch twipana kal kud ndiy.—1 Yohan 5:3.
18, 19. (a) Mazu ik ma patok mitukata kulond kusutil ku dibabatish dietu? (b) Yom ik tukeza kushinshikin mu mutu wa mulong wambakedinap?
18 Pakad ap chinshilend ku muchim, dibabatish diyazuridil avud njil ya yiyukish, pakwez ridiap rizau ra kupipej bwat. (Luka 14:26-33) Dibabatish dilejening mupak wetu pa ndond ya kusambish kupandakanamu chisend ap chisu. (Luka 9:62) Pitukata kutambul dibabatish, tukat chakin kamu kulond patok anch: “Mwamu mudia Nzamb mujim, udi Nzamb wetu chikupu ni chikupu. Ndiy mwin kututakel chikupu.”—Kuseng 48:14.
19 Mutu wa mulong wambakedinap ukez kushinshikin yipul yikwau yikutwisha kulank kukwatijan nich dibabatish. Ov, kudi mayingishin makin makutwisha kumukangesh muntu kutambul dibabatish? Ov, reng rikwet mulong? Mutapu ik ukutwishau antu awonsu kulimish chisu cha dibabatish?
Ov, Ukutwish Kurumburil?
• Ov, mulong wak uswiridinay mwin Kristu mwawonsu kukarumuk kurutu kwa kutambul dibabatish?
• Kwipan kud Nzamb kwitin yom ik?
• Yisend ik yezininga nich dilau dia kusend dijin dia Yehova?
• Chom ik chifanyidina kutubachik kukwat mupak wa kutambul dibabatish?
[Kamushet/Chipich chidia pa paj wa 20]
Yipul Yaad ya Dibabatish
Pa dishin dia yakupesh ya Yesu Kristu, ov, wakarumukin kal ku yitil yey ni kwipan amwiney kud Yehova mulong wa kusal rusot rend?
Ov, uteshin anch kwipan kwey ni dibabatish diey yikwijikishin mud Kaman wa Yehova mu kubombakan ni dirijek ditakedinau nich spiritu wa Nzamb?
[Chipich chidia pa paj wa 21]
Kwipan kudi kushilamu kwa kuchip mu malembil kud Yehova
[Chipich chidia pa paj wa 23]
Mudimu wetu wa kulejan ulejen kwipan kwetu kud Nzamb