Dibatish—Chidi Chom cha Usey Nakash Kudi in Kristu

1, 2. (a) Mutapu ik wiyovilingau anvaj amwing chisu chikimbiningau anau kutambul dibatish? (b) Mulong wak antu akimbining kutambul dibatish akat kuyipul anch ipanin kal kamu ayinau kudi Yehova? (Tal chipich cha kwinsambishin.)

ANVAJ a Maria ading atadin pading piminyay mwanau mband pamwing nau antu akimbina kutambul dibatish. Mwin kusal diskur wipula yipul yaad. Maria wakula nich dizu dia piur ni diovikena kamu nawamp. Kupwa, amubatisha.

² Anvaj a Maria asangara nakash mulong mwanau mband wapana mwom wend kudi Yehova ni amubatisha. Pakwez kurutu kwa kutambul dibatish, makwend a Maria wading wiyakamishin pakemp. Wiyipula anch: ‘Maria uchid kal mwanikanch, ov, uwanyidin kamu kutambul dibatish? Wovil kamu kurumburik anch kwipan amwinend kudi Yehova udi mulong ujim? Ufanyidin kupamaku bil chad atambula dibatish?’ Anvaj avud akweta rukat akat kwiyipul yipul mudi yiney payilejiningau kudi anau anch akatin kutambul dibatish. (Mulej 5:5) Kupwa kwa yiney yawonsu, mupak wa usey nakash ukutwishay muntu mwawonsu kukwat udi wa kupan mwom wend amwinend kudi Yehova ni kutambul dibatish—Tal mushet ulondina anch: “Ov, Wipanin kal Amwiney Kudi Yehova?”

3, 4. (a) Mutapu ik watufundishay kambuy Pita anch dibatish didi dia usey nakash? (b) Mulong wak Pita wafanikesha dibatish ni kusal waat wa Nowa?

³ Pita wafanikesha dibatish ni kusal waat mu chirung cha Nowa. Walonda anch: “Chijingidij cha dibatish dikata kukupandishany en katat.” (Tang 1 Pita 3:20, 21.) Waat wapana uman wakin kudi antu akwau anch Nowa wipana kamu ni muchim umwing mu kusal rusot ra Nzamb. Nowa wasala nich kushinshaman mudimu wamwinkishau kudi Yehova kusal. Mulong wa ritiy ra Nowa, Yehova wamupandisha ni wapandisha dijuku diend chisu cheza Mabeb. Yom ik yakimbay Pita kutufundish?

⁴ Pamanau antu waat, ijika anch Nowa ukwet ritiy mudiay Nzamb. Pameningau antu anch muntu watambul dibatish, ijing anch wapan kal mwom wend kudiay Nzamb mulong wa ritiy rend mudiay Kristu wavumbulau. Mudi Nowa, antu atambwiling dibatish amuziyidining Nzamb ni kusal mudimu wayinkishay anch asala. Mudi mwamupandishau Nowa kudi Yehova chisu cheza Mabeb, ukupandish kand atushalapol end ashinshamena atambwila kal dibatish chisu chikusheshay mangand minam mayimp. (Marko 13:10; Kujingunik 7:9, 10) Chidi kamu cha usey nakash kupan mwom wetu kudi Yehova ni kutambul dibatish. Chawiy, anch muntu walab kutambul dibatish, ukutwish kushadish ruchingej ra kushakam chikupu.

5. Yom ik tukwileja mu mutu wa mulong winou?

⁵ Katat mutapu twijika kal anch dibatish udi mulong ujim, tukwet kuswir kwa kwijik yakul ku yipul ey yisatu: Yom ik yilondinay Bibil piur pa dibatish? Yom ik yifanyidinay muntu kusal kurutu kwa kutambul dibatish? Mulong wak tufanyidin kuvurik chisu chawonsu usey ukweta dibatish chisu tuyifundishina anetu ap in kwilej etu a Bibil?

YOM YIFUNDISHINAY BIBIL PIUR PA DIBATISH

6, 7. (a) Dibatish dia Yohan diading dirumburikin ik? (b) Dibatish ik diading dishalijadina ni makwau ni mulong wak?

⁶ Mu Bibil, muntu wa kusambish tutangina wayibatisha antu akwau wading Yohan Mubatish. (Mateu 3:1-6) Mulong wak antu eza kudiay ndiy chakwel ayibatisha? Asala mwamu mulong wa kumekesh anch akarumuk kal ku yitil yau, kwawiy kulond anch itiyina anch abwambwila Chijil cha Moses ni ading anenganen nakash. Pakwez dibatish dikweta usey nakash diasalay Yohan diading dikwet kurumburik kushalijadina. Yohan wikala ni chisend chijim cha kumubatish Yesu, Mwan uwanyidina wa Nzamb. (Mateu 3:13-17) Yesu kasalap chitil. Kadingap ni kuswir kwa kukarumuk. (1 Pita 2:22) Chad mulong wak lel Yesu watambula dibatish? Chading mulong wa kumekesh anch ukatin kusadin mwom wend mulong wa kusal rusot ra Nzamb.—Hebereu 10:7.

⁷ Kupwa kwa Yesu kusambish kulejan, in kwilejend asambisha kubatish antu akwau. (Yohan 3:22; 4:1, 2) Antu inay ayibatisha mulong akarumuka ku yitil yau piur pa Yijil ya Moses. Pakwez kupwa kwa Yesu kufa ni kumuvumbul, antu akata kwikal in kwilejend afanyina kutambul dibatish mulong wa diyingishin dikwau.

8. (a) Mbil ik yapanay Yesu kupwa kwa kuvumbuk kwend? (b) Mulong wak in Kristu afanyidin kutambul dibatish?

⁸ Mu muvu wa 33, kupwa kwa kuvumbuk kwend, Yesu wisamba nau amakundj 500 ni kusut, amband, ni ap kand anikanch. Chinech chikutwish kwikal chisu chayilejay anch: “Yangany kudi antu a michid yawonsu, [yikadishany] kwikal in kwilejam. Yibatishany mu dijin dia Tatuku, ni dia Mwan, ni dia [spiritu] utumbila. Yilejany kuziyil ku yom yawonsu yinakulejanya.” (Mateu 28:19, 20; 1 Korint 15:6) Yesu wayileja in kwilejend kwikadish niyau in kwilej. Muntu mwawonsu wakimba kwikal mwin kwilej wend, ap kusend “mpand” yend, wafanyina kutambul dibatish. (Mateu 11:29, 30) Mulong wa kumusadin Nzamb mu mutapu ukatinay, muntu ufanyidin kwitiy anch Nzamb wamusadina Yesu mulong wa kuwanyish rusot rend. Kupwa, muntu winou ukutwish chad kutambul dibatish mu mutapu ukatinay Nzamb. Bibil utwinkishin kashinsh anch in kwilej a kusambish a Yesu ading ij mutapu chidia cha usey kutambul dibatish. Katongangap anch afanyidin kuchingel ni kutambul dibatish machuku ma kurutu.—Midimu 2:41; 9:18; 16:14, 15, 32, 33.

KANGAL WALAB KUTAMBUL DIBATISH

9, 10. Yom ik tukutwisha kwilejin ku dibatish dia ikundj mwin Etiopi ni Saul?

⁹ Tang Midimu 8:35, 36. Ikundj umwing mwin Etiopi witiya ritiy ra in Yuda pading pachirikinay kwol kwend kupwa kwa kwifukwil ku tempel wa mu Yerusalem. Mwangel wa Yehova wamutuma Filip kumufundish muntu winou ni Filip wamufundisha “rusang ruwamp ra Yesu.” Mutapu ik wasalay ikundj mwin Etiopi winou? Wijika anch chading cha usey nakash kumwitiyij Yesu mudi Nsalejend ni wakata kusal yom yading yiyitinau in Kristu kudi Yehova. Chawiy watambula dibatish pakad kulab.

¹⁰ Chilakej chikwau chidi cha mwin Yuda watazukau anch Saul. Muchid wa kabuj wa in Yuda wading wipanin kal kudi Nzamb, pakwez Yehova wayilika in Yuda mulong awiy alika kumuziyin. Saul witiyija anch in Yuda ading adandamedin kumusadin Nzamb mu mutapu uwamp, chawiy wasambisha kuyizengol in Kristu. Pakwez dichuku dimwing, Yesu wavumbulau ni kupwa waya mwiur, wading utonginay Saul anch wafil kal, wambamba nend Saul. Mutapu ik wasalay Saul? Witiyija nich musangar ukwash wa mwin Kristu Ananias. Bibil ulondin anch: “Walanka, chad amubatisha.” (Midimu 9:17, 18; Galatia 1:14) Kupwa kwa machuku amwijika chad anch kambuy Paul. Pijikay anch Nzamb wamusadina Yesu mulong wa kuwanyish rusot rend, Saul watambula dibatish pakad kulab.—Tang Midimu 22:12-16.

11. (a) Yom ik yisadining anch in kwilej a Bibil nlel akwata mupak wa kutambul dibatish? (b) Mutapu ik tukata kwiyov anch muntu watambul dibatish?

¹¹ Nlel kand, chidi mutapu wawiy umwing kudi in kwilej a Bibil avud, ikala ansand ap antu apamina kal. Mulong akatin ni achingejidin yom yilondinay Bibil, akat kwipan nich mushiku kudi Yehova ni kutambul dibatish. Chawiy, diskur dia dibatish chiding kamu chisu cha pakampwil ku yitentam. Atuman a Yehova akweting musangar pitiyijiningau in kwilej a Bibil uyakin ni kukwat mupak wa kutambul dibatish. Anvaj niyau akat kusangar nakash pameningau anau akat kusal mwamu. Mu muvu wa mudimu wa 2017, antu 284 000 ni kusut atambwil dibatish mulong wa kumekesh anch apanin mwom yau kudi Yehova. (Midimu 13:48) Chakin kamu, ijika anch chidi cha usey kudi in Kristu kutambul dibatish. Pakwez yom ik yading yifanyidinau kusal kurutu kwa kutambul dibatish?

12. Yom ik yifanyidinau kusal in kwilej a Bibil kurutu atambula dibatish?

¹² Kurutu kwa in kwilej a Bibil kutambul dibatish, afanyidin kwilej uyakin piur pa Nzamb, yitongijok yend mulong wa an a antu ni divu, ni kwijik yom yasalay mulong wa kuyipandish an a antu. (1 Timote 2:3-6) Kupwa afanyidin kukudish ritiy rau, rikuyikwasha kuziyin yijil ya Nzamb ni kulik kusal yom yikisinay. (Midimu 3:19) Chinech chidi cha usey, mulong Yehova kakwitiyangap kwipan kwa muntu udandamedina kusal yom yiyimp. (1 Korint 6:9, 10) Pakwez kudi yom yivud ya kusal. Antu akatina kupan mwom yau kudi Yehova afanyidin kukumangan ku yikumangan ni kulejan chisu chawonsu rusang ruwamp ni kuyifundish antu akwau. Yiney yawiy yimwitinau muntu win mwawonsu ukatina kumulondul Kristu. (Midimu 1:8) Mwin kwilej ufanyidin chakusambish kusal yom yiney yawonsu. Kupwa ukutwish kupan mwom wend kudi Yehova kusutin malembil ma amwinend ku ujindj ni kutambul chad dibatish.

SAL ANCH DIBATISH WIKALA MUPAK WA IN KWILEJ A BIBIL

13. Chisu tuyifundishina antu akwau, mulong wak tufanyidin kuvurik anch afanyidin kutambul dibatish mulong wa kwikal in Kristu akin?

¹³ Anch twayikwash anetu ni in kwilej akwau a Bibil kusal yom yiney ya usey, tufanyidin kuvurik anch antu akimbina kwikal in kwilej akin a Yesu afanyidin kutambul dibatish. Kupwa tukutwishap kwov wom wa kuyilej pa chisu chiwanyidina mutapu kwipan kwau ni dibatish diau yikweta usey. Tukatin anch anetu ni in kwilej akwau a Bibil adandamena kuya kurutu ni kutambul dibatish!

14. Mulong wak tufanyidinap kumushindin muntu win mwawonsu kutambul dibatish?

¹⁴ Chakin kamu, kwikil muntu ufanyidina kumushindin ap kumubachik mwan ap mwin kwilej wa Bibil kutambul dibatish. Yehova kakutushindilangap anch tumusadin. (1 Yohan 4:8) Chisu tuyifundishina akwetu, tufanyidin kuyikwash ijika mulong wak chidi cha usey kudi awiy kukudish urund wau ayinau ni Yehova. Kupwa anch mwin kwilej wa Bibil wasanger kamu kwijik uyakin piur pa Nzamb ni wakat kamu kusal yom yawonsu yifanyidinau in Kristu akin kusal, ukukat chad kutambul dibatish.—2 Korint 5:14, 15.

15, 16. (a) Ov, muntu ufanyidin kwikal ni mivu kanang chakwel atambula dibatish? Rumburil. (b) Mulong wak mwin kwilej wa Bibil ufanyidin kutambul dibatish mudi Kaman wa Yehova ap anch amubatisha kal mu relijon mukwau?

¹⁵ Muntu kafanyidinap kwikal ni mivu kanang chakwel atambul dibatish. Antu ashalijadin, ni in kwilej amwing akat kuya kurutu swa swa kusutamu akwau. Avud ayibatishining padiau ansand, ni ashadining ashinshamena kudiay Yehova padandamedinau kupam. Akwau ayibatishining apama kal chisu chilejiningau uyakin wa Bibil. Amwing akwet mivu 100 ni kusut chisu chiyibatishinau!

¹⁶ Maku umwing wileja Bibil ading amubatisha kal mu marelijon makwau. Chawiy chipulay kudi nambaz wamufundishang Bibil anch chidi kand cha usey kumubatish kapamp kakwau. Nambaz winou wamuleja maverse mamwing ma mu Bibil makula ku chipul chend. Pijikay maku winou yom yitinay Bibil kusal, amubatisha ap anch wading wawanyishin kal mivu piswimp 80. Yom ik twilejidina ku chilakej chinech? Yehova ukwitiyij dibatish dietu ching kamu anch twijik uyakin piur pa rusot rend. Komb ap anch atubatishin kal mu relijon mukwau, tufanyidin kwitiy anch atubatisha mudi Kaman wa Yehova.—Tang Midimu 19:3-5.

17. Yom ik yifanyidinay muntu kutong pa dichuku dikutambulay dibatish?

¹⁷ Dichuku ditambwilingay muntu dibatish diding dichuku dia musangar nakash. Chiding kand chisu cha kutongin nakash piur pa kurumburik kwa kwipan ni dibatish. Mulong wa kusal yom yawonsu yimwitinau mwin Kristu wakin kusal udi mudimu ukash. In kwilej a Yesu kafanyidinap kand kwikal “aom mulong wa ayinau kusu, pakwez mom yau yikwikal yendendiy wayifila, chad wavumbuk wikal kand mwom mulong wa kuyambat awiy.”—2 Korint 5:15; Mateu 16:24.

18. Yipul ik tukwisambina mu mutu wa mulong ulondwilaku ou?

¹⁸ Mudi mutwileja kal mu mutu wa mulong winou, mupak wa kwikal mwin Kristu wakin udi wa usey nakash. Wawiy mutapu wiyipulay makwend a Maria yipul twisambinang kwisambishin kwa mutu wa mulong winou. Anch udi nvaj, ukutwish kwiyipul anch: ‘Ov, mwanam wawanyidin kal kamu kutambul dibatish? Mwanam wij yom yivud piur pa Yehova mulong wa kwipan amwinend kudi Nzamb? Mwanam ufanyidin kupwish shikol ni kwikal ni mudimu kurutu atambula dibatish? Chikwikal nchik anch wasal chitil chijim kupwa kwa kutambul dibatish?’ Tukwisambin yipul yiney mu mutu wa mulong ulondwilaku ou ni tukwilej mutapu ufanyidinau anvaj in Kristu kwikal ni chitongijok chiwamp piur pa dibatish.