Kuwanyish Yitinau Mulong Wa Dibabatish Dia Ukristu
“Chom ik chikwinkangesha am kwimbabatish?”—MIDIMU 8:36.
1, 2. Mutapu ik wasambishay Filip minsamb ni nyikel mwin Etiopi, ni chom ik chiletina uman anch ikundj winou wasangera uyakin?
MUVU umwing ap yaad kwinyim kwa rufu ra Yesu, nyikel umwing wadinga uyil kurul mwi njil yidiokila ku Yerusalem kuya ku Gaza. Weny uziyishena wa kwendish ditemb wa makilometre 1 500 wadi umuchingedin. Muntu winou mwin kwipan wenda kal weny wawonsu wa kudiokal ku Etiopi kuya ku Yerusalem kumwifukwil Yehova. Mu weny ulemp wa kuchirik, ndiy wasadila nawamp chisu chend kusutil ku kutang Dizu dia Nzamb—winou wadinga uman wa ritiy rend. Yehova wamushinshikina ikundj winou mwin yakin, ni kusutil kud mwangel, Ndiy wamutakela mwin kwilej Filip chakwel amuleja.—Midimu 8:26-28.
2 Chamuswapela Filip kusambish minsamb, mulong nyikel mwin Etiopi wadinga ni kutang dizu dia Nzamb nich dizu dijim, mud muchadinga chaku mu machuku minima. Chawiy, Filip watesha yadingay ni kutang ya mu muvungur wa Isay. Chipul chimwing kusu cha Filip chalangwisha kusanger kwa ikundj winou: “Ukat kwov yiutangina?” Chipul chinech chashikija ku minsamb piur pa Isay 53:7, 8. Kupwa kwa kwisambin mifund ya Isay, Filip “wamulej djat ni ku Rusangu Ruwamp ra Yesu.”—Midimu 8:29-35, Manswik Masu.
3, 4. (a) Ov, mulong wak Filip wamubabatisha mwin Etiopi kapamp kamwing? (b) Yipul ik tukushinshikina katat?
3 Mu kachisu kakemp kusu, mwin Etiopi watesha kurumburik kwa mwaz wa Yesu mu rutong ra Nzamb, ni waswirikena kapamp kamwing kwikal mwin kwilej ubabatishinau wa Kristu. Pamanay kal dijiy dia mem diwamp ndiy wamwipula Filip anch: “Chom ik chikwinkangesha am kwimbabatish?” Chakin kamu, winou wadinga mwikadil wa pakampwil. Nyikel mwin Etiopi wadinga ikundj mwin ritiy wadia ni kumwifukwilang Nzamb, wading muntu wa muchid windjing wakarumuka kwikal mwin Yuda. Ndiy kadingap ufanyidina kuchingel chisu chilemp chakwel eza amubabatisha. Cha usey nakash, ikundj winou watesha kurumburik kwa chom chamwitau kud Nzamb, ni wasota kwakul kapamp kamwing. Nich musangar Filip witiyija ku kwit kwend ni kwinyim kwa kumubabatish, mwin Etiopi “waya mwi njil yend wend usangar.” Pakad kwidjidjek wikala katwarubil mwin kuzangurok wa rusangu ruwamp mwi ngand yend.—Midimu 8:36-39.
4 Ap anch nzau ja kwipan ni dibabatish yidiap ya kukwat nich usey ukemp, chilakej cha nyikel mwin Etiopi chilejen anch kwadinga yisu padingau ni kuyibabatish antu mu kachisu kakemp kupwa kwa kutesh uyakin wa Dizu dia Nzamb.a Chawiy lel, chiwapidil kushinshikin yipul yiney: Kwirijek ik kufanyidina kusambelaku dibabatish? Ov, mu chisik ik tufanyidina kushinshikin reng ra muntu usotila dibabatish? Kuya kurutu ik kwa muspiritu kufanyidina kumekan kurutu kwa kumubabatish muntu? Cha usey chidi anch, ov, mulong wak Yehova usotil atushalapol end kutambul dibabatish?
Kushilamu kwa Kashinsh
5, 6. (a) Mutapu ik wakulau antu a Nzamb a pakur ku rukat ra Yehova? (b) Urund ik wa piswimp ni Nzamb tukutwisha kusanger anch atubabatish?
5 Kupwa kwa kuyikul in Isarel mu Idjibit, Yehova wayitiya kwikal ‘uswan wend wa pakampwil,’ kuyikat ni kuyichidij ni kuyikadish “muchid utumbila.” Pakwez, chakwel kutambul yiyukish yiney, chading chiyifanyidin antu kumukat Nzamb mu mutapu wijikena ni umekena. Chawiy chasalau ku kwitiyij kusal ‘yawonsu yalonday Yehova’ ni asuka nend manswik. (Kubudik 19:4-9) Mu mivu chitot ya kusambish, Yesu wayinkisha in kwilejend mbil ya kuyikadish antu a michid yawonsu in kwilej, ni in itiyija malejan mend ayibabatisha. Urund uwamp ni Nzamb wengamidin pa ritiy mudiay Yesu Kristu chad kwalondul dibabatish.—Mateu 28:19, 20; Midimu 2:38, 41.
6 Jinsangu jinej ja Bibil jilejen anch Yehova uyiyukishin antu akata kusal ni kulam kushilamu kwa kumusadin ndiy. Kud in Kristu, kwipan ni dibabatish jidi nzau ja usey jitwadina ku chiyukish cha Yehova. Tukwatin mupak wa kulondul yijil yend ni kukimb umutakel wend. (Kuseng 48:14) Pakwez, Yehova, mu chifanikesh utukwatin ku chikas ni kutwendish mwi njil yitufanyidina kuya.—Kuseng 73:23; Isay 30:21; 41:10, 13.
7. Ov, mulong wak kwipan ni dibabatish yifanyidin kwikal chiyul cha muntu amwinend?
7 Chibachikin chetu mulong wa kutambul dibabatish chifanyidin kwikal rukat ra Yehova ni impu ya kumusadin. Kwikil muntu ukubabatishau kwend mulong kusu anch muntu kanang umulejin anch wilejin kal chisu chilemp ap anch mulong arund ney ayibabatishin kal. Chakin kamu, anvaj ni in Kristu aswila akutwish kumukasikesh muntu atongina piur pa kwipan ni dibabatish. Kambuy Pita wayikasikesha antu amutesha pa Pentekot chakwel ‘ayibabatisha.’ (Midimu 2:38) Ap mwamu, kwipan kwetu udi mulong ututadila etu ayinetu, ni kwikil muntu ukutwisha kwipan pa ndond yetu. Chiyul cha kumusadin Nzamb chifanyidin kwikal chetwetu ayinetu.—Kuseng 40:8.
Kwirijek Kufanyidina Mulong wa Dibabatish
8, 9. (a) Ov, mulong wak dibabatish dia an diambatenap nich Bibil? (b) Kuya kurutu ik kufanyidinau kusal an kurutu kwa kubabatishiu?
8 Ov, an akutwish kwipan mu mutapu wengamidina pa manangu? Bibil kalejenap reng ritinau mulong wa dibabatish. Chikwau kand, chakin kamu an akemp kakutwishap kwikal in kwitiyij, kukwat yiyul yengamidina pa ritiy, ap kwipan kud Nzamb. (Midimu 8:12) Piur pa in Kristu a mu mivu chitot ya kusambish, mwin kwilej jinsangu ja pakur Augustus Neander ulondil mu buku wend Histoire générale de la religion chrétienne et de l’Eglise (allemand) anch: “Pa kusambish adinga kuyibabatish ching kusu amakurump, mulong awiy atesha kurumburik kwa dibabatish ni ritiy, ni mutapu kukwatijadin piswimp nakash.”
9 Piur pa an akemp, amwing amekeshining chilik cha chovu cha yom ya pa dishin piur pa Nzamb ni pa rutong rend ni kusal kukwatijan nich yisotilau pachidiau anikanch nakash oku akwau ching kamu akul. Pakwez, kurutu kwa kubabatishiu, chimufanyidin mwanikanch ikal nich urund wa pakampwil ni Yehova. Ufanyidin kwikal nich mufulandal wa chovu chifanyidina cha Bibil, ni kutesh nawamp chitina kwipan, mud muchidia kud amakurump.
10. Nzau ik jifanyidina kusambel kwipan ni dibabatish?
10 Yesu wayileja in kwilej end kuyilej antu asu yom yawonsu yayilejay. (Mateu 28:20) Cha kusambish, antu asu aswiridin kwak ronganyin rakin ra uyakin, rawiy rikeza kuyitwishish kukudish ritiy mudiay Yehova ni mu Dizu diend. (Rom 10:17; 1 Timote 2:4; Hebereu 11:6) Chad lel, anch uyakin wa Mifund wakwat ku muchim wa muntu, ukumubachik ku kukarumuk ni kudiokal mu mwom wend ukur. (Midimu 3:19) Kupwa, muntu ukat kushiken pa dinans disotinay chakwel kwipan amwinend kud Yehova ni kubabatishiu, mud mwalonday Yesu.
11. Ov, mulong wak chidi cha usey nakash anch tusala pakad kujing mudimu wa kulejan kurutu kwa kubabatishiu?
11 Rizau rikwau rijim mu kuya kurutu ku dibabatish ridi ra kulejan rusangu ruwamp ra Want. Winou wawiy mudimu wa kusambish uyinkishinay Yehova antwend mu machuku minam ma kwisudiel. (Mateu 24:14) In kulejan akad kubabatishiu akutwish kusanger kuyilej antu akwau piur pa ritiy rau. Kusal mudimu winou kuyikadishin kand tayad mulong wa mujikit wa chingand wakad kujing ni wa mushiku kupwa kwa dibabatish.—Rom 10:9, 10, 14, 15.
Chom ik Chikukangeshina Kubabatishiu?
12. Chom ik chikutwisha kuyikangesh antu amwing kubabatishiu?
12 Antu amwing akutwish kuchirik kwinyim kulik kubabatishiu mulong akat kwidjidjek kwitiyij chisend chidiokilaku ku kutambul dibabatish. Ij anch chakwel kuwanyish yijil ya Yehova, akez kusal yikarumun yijim mu mwom yau. Ap akutwish kwov wom anch chikez kuyikasiken kushakam kukwatijan nich yisotinay Nzamb kupwa kwa dibabatish. Amwing akutwish ap kutong anch, “Pamwing ap nikez kusal chom chiyimp dichuku dimwing ni akez kwingopat mu chikumangen.”
13. Pa chirung cha Yesu, chom ik chayikangesha antu amwing kwikal in kwilejend?
13 Padingay Yesu pa divu, antu amwing alikina yisakin yau ni urund wa dijuku yiyikangesha kwikal in kwilejend. Mufaris umwing walonda anch ukez kumulondul Yesu kwawonsu Kukuyay. Pakwez Yesu walejana chom chinech pa yisu yawonsu, kadingap ap ni ndond ya kulal uchuku. Pa chisu chamutazukau mwin kutesh mukwau kud Yesu chakwel ikala mwin kwilej wend, ikundj winou wamwakula anch ndiy wadinga usotin bil ‘kumujik’ tatukwend. Chimeken anch, ndiy wakata kushakam kwol kwend ni kuchingej djat pakezay kufil tatukwend pa ndond pa kumulondul Yesu ni kuwanyish chisend chinech cha dijuku pichikeza kushiken. Kupwa, wa kasatu walonda anch kurutu kwa kumulondul Yesu, waswirikena bil ‘kuladik’ in chikumbu chend. Yesu warumburila kubachikin yom kwinoku ku dichadia mud ‘kutal ku yom yishadina kwinyim.’ Chawiy, chamekana anch antu asotina kusal mwamu akez ching kutan mutapu wa kwit dilikishin mulong wa kwiyep chisend chau cha Ukristu.—Luka 9:57-62.
14. (a) Mutapu ik wakulau Pita, Andre, Yakob, ni Yohan payitazukau kud Yesu ikal ayibind a antu? (b) Ov, mulong wak tufanyidinap kwidjidjek kusend mpand ya Yesu?
14 Chilakej cha Pita, Andre, Yakob, ni Yohan chishalijadin nakash. Payitazukau kud Yesu amulondula ni ikala ayibind a antu, Bibil ulondil anch: “Awiy aswakala kusha mand, amulondula.” (Mateu 4:19-22) Ku kukwat swa mupak winou, imena ayinau yasambelau kuyilej kud Yesu: “Itwikany mpand yam, wingiyiyany am; mulong yam nitudishila ni kwikepishil mu muchim; ni en ukez kutanany kwipimish mu muchim; ni en ukez kutanany kwipimish mipim yen. Mulong mpand yam yiwanyidin, ni chisend cham chipipel.” (Mateu 11:29, 30) Ap anch dibabatish dikat kulet chisend cha mpand, Yesu utwinkishin kashinsh anch mpand yiney yiwanyidin ni yiswapela yikutwish kutudutish nakash.
15. Ov, mutapu ik yilakej ya Moses ni Yeremiy yimekeshina anch tukutwish kuchingejin pa ukwash wa Nzamb?
15 Chakin kamu, choviken, kwikal nich yovil ya kuburen kuwanyin. Moses ni Yeremiy pakusambish iyova kuburen kuwanyin kwa kusal midimu yayinkishau kud Yehova. (Kubudik 3:11; Yeremiy 1:6) Mutapu ik wayikasikeshau kud Nzamb? Wamuleja Moses anch “Am nikez kwikal ney.” Wamukana Yeremiy anch “Am nidi ni yeyey, nikukuchidij.” (Kubudik 3:12; Yeremiy 1:8) Niyetu tukutwish kuchingejin ukwash wa Nzamb. Kumukat Nzamb ni kumuchingejin yikutwish kutukwash kupandakan kwidjidjek kukash piur pa kushakam kwambatan nich kwipan kwetu. Kambuy Yohan wafund anch “mu rukat mwikiling wom,” “pakwez rukat ruwanyidina rikat kudjibul wom.” (1 Yohan 4:18) Nsand mwanikanch ukutwish kwov wom ukash pa chisu chendinay amwinend, pakwez ukwet ruchingej pendinay chikas ulamin mu chikas cha tatukwend. Chawiy chimwing, anch twamuchingejin Yehova nich muchim wawonsu, ndiy ushidilamu ‘kutenchik jinjil jetu’ pitwendila ku kabet kend.—Jinswir 3:5, 6.
Chisu cha Kulimish
16. Ov, mulong wak dibabatish ditin kuwuchik mujimbu wawonsu mu mem?
16 Dibabatish akat kudisambel nich diskur dimedina pa Bibil dirumburila kurumburik kwa dibabatish dia Ukristu. Kwisudiel kwa diskur dined, in kubabatishiu akat kulond patok kwa ritiy rau ku kwakul ku yipul yaad ya dibabatish. (Rom 10:10; tal kamushet kadiap pa paj wa 22.) Chad akuyiwuchik in kubabatishiu mu mem, kulondwish chilakej chashay Yesu amwinend. Bibil ulejen anch kupwa kwa kubabatishiu, Yesu “watuntuka mu mem.” (Mateu 3:16; Marko 1:10) Choviken patok, Yohan Mubabatish wamuwuchika Yesu mwawonsu mu mem.b Dibabatish dia kuwuchik mujimbu wawonsu mu mem difanikeshin kukarumuk kwa usey kutwasadila kal mu mwom wetu—tukat kufa mu chifanikesh ku mwom wetu wa pakur ni kusambishiril mwom usu mu mujikit wa Nzamb.
17. Ov, mutapu ik ukutwishau in kubabatishiu ni in kutal kuwejin kalimish ku chinship cha dibabatish?
17 Dibabatish diding chisu cha kulimish ni cha musangar ukash. Bibil ulejen anch Yesu wadinga ni kulembil pamuwuchikau kud Yohan mu Wit Yordan. (Luka 3:21, 22) Kwambatan nich chilakej chinech, in kubabatishiu ilel afanyidin kumekesh ngikadil ya kalimish. Ni mulong Bibil utukasikeshin kudjal nich kwikepish pichuku-pichuku mu mwom, chidi cha usey ujim mud ik kutesh chiyul chinech pa dichuku dia dibabatish dietu! (1 Timote 2:9) In kutal niyawiy afanyidin kumekesh kalimish kafanyidina ku kutesh nawamp diskur dia dibabatish ni ku kutal mutapu ubabatishinau kwa kalimish.—1 Korint 14:40.
Yiyukish Yikatau Kusanger in Kwilej Ababatishau Kal
18, 19. Dibabatish diletining yisend ni yiyukish ik?
18 Pitwipanina ayinetu kud Nzamb ni kubabatishiu, tukat kwikal yid ya dijuku dia pakampwil. Cha kusambish, Yehova wikadil Tatukwetu ni Murund netu. Twadinga in kushadik kurutu kwa dibabatish dietu; katat twovijadin kal ni Nzamb. (2 Korint 5:19; Kolosay 1:20) Kusutil ku yakupesh ya Kristu, twasheja piswimp kud Nzamb ni ndiy washeja piswimp netu. (Yakob 4:8) Muprofet Malakiy warumburila mutapu utilingay Yehova matu ni kuyitesh antu asadidina ni kusend dijin diend, ni uwejidin majin mau mu buku wend mulong wa yivurikish. Nzamb ulondil anch, “Awiy akez kikal antwam,” “nikez kayovil riy mudi tatuku mukat kumwovilay mwanend riy ukata kumusadil.”—Malakiy 3:16-18.
19 Dibabatish ditwishishin kand kwikal chid cha ukadivar wa pa mangand mawonsu. Pipulay kambuy Pita anch yiyukish ik yikezau kutambul in kwilej a Kristu mulong wa kwipan kwipanau kal, Yesu washilamu anch: “Awonsu ashila kal yikumbu yau, ap anamakwau amakundj, ap anamakwau amband, ap tatuku, ap maku, ap an, ap ngand, mulong wa dijin diam, akez katambul yanzukesh chitot, akez kaswan kupand kwa chikupu.” (Mateu 19:29) Pa kusut kwa mivu, Pita wafunda piur pa “chisak chawonsu cha akadivar” chikudila “mu mangand mawonsu.” Pita wimena amwinend ukwash ni yiyukish ya ukadivar wa rukat, niyetu tukutwish kwimenap.—1 Pita 2:17; 5:9.
20. Ruchingej ik ramushena ridiokila ku dibabatish?
20 Chikwau kand, Yesu wamekesha anch antu amulondwila ndiy ‘akez kaswan mwom wa chikupu.’ Chakin kamu, kwipan ni dibabatish yiletin ruchingej ra kutambul “kupand kudia mwom udia kwakin”—mwom wa chikupu mu mangand masu ma Nzamb. (1 Timote 6:19) Mufulandal uwamp mud ik mulong wa dikez tukutwisha kwitungin ayinetu ni majuku metu? Ruchingej riner ramushena rikez kututwishish “kwendin mu dijin dia Yehova Nzamb wetu chikupu ni chikupu.”—Mike 4:5, NW.
[Mazu madia kwishin kwa paj]
a In Yuda tunan tusatu ni in kukarumuk kwikal in Yuda atesha kulond kwa Pita pa Pentekot ayibabatisha niyawiy kapamp kamwing. Chakin kamu, mud ntung mwin Etiopi, awiy adinga kal ij mafundish ma pa dishin ni yijil ya Dizu dia Nzamb.—Midimu 2:37-41.
b Dizu dia Grek baʹpti·sma (dibabatish) dirumburikin “chisal cha kuwuchik, kuwuchik ni kutuntwish,” kwambatan nich Expository Dictionary of New Testament Words wenday Vine.
Ov, Ukutwish Kurumburil?
• Mutapu ik ni mulong wak tufanyidina kwakul ku rukat ra Yehova?
• Kuya kurutu ik kwa muspiritu kufanyidina kusambel dibabatish?
• Ov, mulong wak tufanyidinap kushil wom wa kukangany ap kwidjidjek kwitiyij chisend kutukangesh kutambul dibabatish?
• Yiyukish ik ya pakampwil yikutwishau kusanger in kwilej ababatishau kal a Yesu Kristu?
[Chipich chidia pa paj wa 24]
“Chom ik chikwinkangesha am kwimbabatish?”
[Chipich chidia pa paj wa 27]
Dibabatish diding chisu cha kulimish ni cha musangar ukash