Inkishinau Rusangu Ruwamp ra Nzamb
1 Tukwet chisend chiwamp mud ik cha kwikal inkishinau rusangu ruwamp ra Nzamb! (1 Tes. 2:4) Ap anch antu amwing akutwish kutun uruu winou wa usu, antu akweta michim yiwamp ayipwitidin ku uruu winou mud ku madjimb mawamp. (2 Kor. 2:14-16) Mulong wa antu itiyijina ni kuziyil ku rusangu ruwamp, uruu winou urumburikin dipandish. (Rom 1:16) Chom ik tufanyidina kusal nich rusangu ruwamp ritwinkinau?
2 Yesu ni Atwimbuy: Yesu wateka pa ndond ya kusambish kulejan rusangu ruwamp. (Luka 4:18, 43) Ap pa chisu chovay nzal ni kuziy, rukat rend mulong wa antu ni kusanger kwend mulong wa uruu kwamubachika kuyilej antu akwau uruu winou. (Marko 6:30-34) Kusutil ku mazu mend ni ku yisal yend, ndiy wakasikeshina mu manangu ma in kwilejend usey wa mudimu wa kulejan Want.—Mat. 28:18-20; Marko 13:10.
3 Mu kumwimburij Yesu, atwimbuy alejana uruu wa Want nich mushiku. Ap pa chisu chayibulau ni kuyinkish mbil ya kulik kulejan, ‘awiy kalikap kurumburil ni kulejan rusangu ruwamp.’ (Midimu 5:40-42) Kambuy Paul wasala mudimu winou pakad kuziy. (1 Kor. 15:9, 10; Kol. 1:29) Ndiy wafanikesha chisend cha kulejan rusangu ruwamp mud dibaz diatambulay kud ambay nend antu, ni wadinga tayad kutun yisakin yend chakwel anch awanyisha uruu winou.—Midimu 20:24; Rom 1:14-16.
4 Chisend Chetu Nlel: Kusanger mulong wa mudimu utumbila utwinkishinau kukez kutubachik kukimb jinjil ja kujimbish mutapu wetu wa kusadil mu mudimu wa kulejan. (Rom 15:16) Edward, muntu wadinga ni kwendilang ching pa nking ya ayilim, washakamanga ku chis cha dikadij (hotel) ni kulond nau angendj piur pa ritiy rend. Pakwez, chasotay kusal yivud nakash, amutungila kapalakany ka pakampwil pa motak, ni kusutil ku motak winou, ndiy wasala mudimu wa uchibol mivu yivud nakash, wendangana tunan twa makilometre mu mudimu winou. Mud Edward, antu avud nlel atenchikin kal mikadil yau chakwel atwisha kusal yivud mu kupalangesh rusangu ruwamp.
5 Mu kuyimburij Yesu nau atwimbuy end, tutekany lel chisu chin chawonsu pa ndond ya kusambish mudimu wa kulejan mu mwom wetu. Anch tukat kusal mwamu, tumekeshin rukat retu mulong wa antu ni kusanger kwetu rusangu ruwamp ritwinkishinau.