Ov Yom ik Utekina pa Ndond ya Kusambish?
1 Yirijek yivud ya relijon yikasikeshidin nakash pa kusal midimu yiwamp, mud kutung mashikol ap mpital. Pakwez, Atuman’a Yehova, kavuramedinap ‘kusal yom yiwamp ni kukwashijan muntu ni mukwau,’ pakatau kutek pa ndond ya kusambish kuyikwash antu akwau muspiritu.—Heb. 13:16.
2 Chilikej cha mu Mivu Chitot ya Kusambish: Yesu wasala midimu yivud yiwamp pa chirung cha mudimu wend wa panap pansh, pakwez mudimu wend wa kusambish wadinga wa kupan uman wa uyakin. (Luka 4:43; Yohan 18:37; Midimu 10:38) Ndiy wayinkisha in kwilejend mbil anch: “Yangany kudi antu a michid yawonsu, yikarumunany kwikal in kwilejam. . . . Yilejany.” (Mat. 28:19, 20) Chikwau kand ndiy wamekesha anch antu akumwitiyija akez kushikij midimu pa chilik chimwing chipandikena kujimb nakash mudimu wasambishay. (Yohan 14:12) Yesu wateka pa ndond ya kusambish mudimu wa kulejan mulong wayikwasha antu kwilej njil ya dipandish.—Yohan 17:3.
3 Mupostol Paul wamana mudimu wend wa kulejan mud “kufanyin,” mudimu umwing umwitinau kusal pakad ndiy kutwish kuvuramen. (1 Kor. 9:16, 17, TMK) Wadinga witenchikin chakwel kwipan mutapu win wawonsu, kujijaman mu kupakiu kwin kwawonsu, ap kuman mar ma kuburen kwa yom yawonsu yiswiridikina chakwel awanyisha mudimu wend. (Midimu 20:22-24) Mupostol Pita ni arund nend amekesha niyawiy mwikadil wa chilik chimwing. Ap chadingau mu rukan ni kwikalap nchik yibul, “ading ni kulejan ni kurumburil Rusangu Ruwamp ra Yesu Kristu Uzizidilau Many.”—Midimu 5:40-42.
4 Ov chidi mutapu ik ku mutambu wetu? Ov tukat kutekang pa ndond ya kusambish mudimu wa kulejan rusangu ruwamp ra Want ni wa kwikadish in kwilej? Mud Yesu, ov tukat kuyibangin chakin kamu antu adia “aziyila ni kujilijil mudi amikoku akad kafung”? (Mat. 9:36) Yinship ya katat yishikedina mu mangand ni uprofet wa Baibel yilejen patok anch chisu chiyil mau-mau mulong wa nsudiel ya ditenchik dined diyimp! Kulam nawamp mu manangu usey wa mudimu wa kulejan kukez kutubachik kudandamen kulejan nich mushiku.
5 Shinshikin Mikadil Yey: Mulong chisu ni chisu, mikadil ya muntu yikat kuswimpang, chidi cha manangu kwishinshikin chisu ni chisu chakwel kutal anch kudi kuswir kwa kusal yitenchik chakwel kusal nakash mu mudimu wa kulejan. Nambaz umwing wadinga chibol wa rawonsu mu mivu ya 50, ya 60, ni ya 70 pakwez wamana anch chidi cha manangu kwimik mulong wa kuyelol. Pakwez, mu kusut kwa machuku, mayej mapwa. Washinshikidin kand katat ak mikadil yend ni kukwat chiyul cha kutwish kusal kand mudimu wa uchibol. Wasangara kamu nakash mud ik pa kukumangan ku Shikol ya Ayibol padingay nich mivu 90! Ov chidi mutapu ik ku mutambu wey? Ov udi piswimp ni kutambul panshon ap anch udi piswimp ni kupwish shikol? Ov kuswimp kwa mikadil yey kukutwishishin kusal mudimu wa uchibol?
6 Pamanay Yesu anch Mart “wading wiyakamishin nakash mulong wa midimu yivud,” ndiy wamwinkisha chiyul nich manangu anch ukez kwangul yiyukish yivud ang wasal yom yiswapela. (Luka 10:40-42) Ov ukutwish kupipesh mwikadil wa mwom wey? Ov chidi kamu cha usey anch en awonsu mwaad wen ikundj ni mband usalany mudimu wa ku mujimbu? Ang kwasadik yitenchik kanang, ov chitwishikin anch dijuku diwanyisha maswir mad nich difut ditambwilay muntu umwing kusu? Antu avud atambula kal ukwash wa muspiritu kusutil ku kusal yitenchik chakwel asala nakash mudimu wa kulejan.
7 Tulondulany etu awonsu chilikej chashay Yesu ni apostol! Chakin kamu tukutambul chiyukish cha Yehova mulong wa kusal usu wetu wawonsu chakwel kusal yawonsu tukutwisha mu mudimu wa usey nakash wa kulejan rusangu ruwamp ra Want.—Luka 9:57-62.