Cha Kutek pa Ndond ya Kusambish
1. Ov, mutapu ik wamekeshay Yesu anch mudimu wa kulejan wadinga wa usey kudiay ndiy?
1 Mudimu wa kulejan wadinga pa ndond ya kusambish mu mwom wa Yesu. Ndiy wautandurila amwinend, wenda yitot ya makilometre kusutil mu Palestin chakwel alejan rusangu kudi antu avud mudi muchadinga chitwishikin. Ndiy wadinga ni mashakamin mapipela, wadinga ufanyidin kwikal ni chisu chivud ni chawiy chipanay nakash mu mudimu wa kulejan. (Mat. 8:20) Pa chisu cheza chisak cha antu kumupakish mulong wa antu adinga ayej okay, ndiy wayileja anch: “Am niwapidil kulejan rusangu ruwamp ra want wa Nzamb ku mal makwau kand, mulong chawiy chantuminau.”—Luka 4:43.
2. Ov, mulong wak mudimu wa kulejan wadinga wa usey kudiay Yesu?
2 Ov, mulong wak mudimu wa kulejan wadinga wa usey kudiay Yesu? Ndiy watongijokina cha kusambish kutumbish dijin dia Yehova. (Mat. 6:9) Yesu wadinga umukatin Tatukwend wa mwiur ni chawiy wadinga ni maswir ma kuwanyish rusot Rend ni kuziyil kwimbil Yend yawonsu. (Yoh. 14:31) Chikwau kand, ndiy wafila kuyibangin antu ni wasota kuyikwash.—Mat. 9:36, 37.
3. Ov, mutapu tukutwisha kumekesh anch mudimu wa kulejan udi pa ndond ya kusambish mu mwom wetu?
3 Twimburijany Yesu: Kulam mudimu wa kulejan mu mashakamin metu mudi mwasalay Yesu kukutwish kwikal chikokujol mulong mangand masadil yom yikash yitina mu machuku metu am kwikal ni chisu ni maletin kand mitapu ya kwipuwej yivud. (Mat. 24:37-39; Luka 21:34) Chawiy, tufanyidin kushinshikin yom yipandakena usey, kutenchik chisu cha kwirijek chakwel Twakulany pa chisu tudia mu mudimu wa kulejan chisu chawonsu. (Fil. 1:10) Tufanyidin kwiyijidish kwikal ni mashakamin ma mwom mapipela ni kwipuk kusadil mangand chisu chawonsu.—1 Kor. 7:31.
4. Ov, mulong wak chidi cha usey kutek mu mutapu uwamp mudimu wa kulejan pa ndond ya kusambish?
4 Mudia chisu chikemp, muntu wa manangu utekining chom chidia cha usey pa ndond ya kusambish. Chilakej, anch ndiy wilej anch ubaj uding piswimp, ndiy ufanyidin kwasin jinkeu jend pa chisu ni pa usu chakwel asala yitenchik mulong wa kuking dijuku diend ni kuyibabesh amutej nend. Mijikit ya usey ukemp yikutwish kuchingel. Chisu chiyila ni kusej kurutu kwa njit ja Harmagedon chidi chikemp. (Sof. 1:14-16; 1 Kor. 7:29) Chakwel twipandisha ayinetu pamwing ni antu atuteshininga, tufanyidin kubabel chisu chawonsu mashakamin metu ayinetu ni malejan metu, pa chisu tudia mu chikumangen ap pol pa chikumangen. (1 Tim. 4:16) Mwaning, mashakamin metu makwatiken nich mutapu tutekininga mudimu wetu wa kulejan pa ndond ya kusambish!