Mudimu wa Ukristu—Mujikit Wetu wa Kusambish
1 Etu awonsu tukwet midimu kushalijan tufanyidina kusal. Nzamb utwitin kudimukin maswir ma dijuku dietu. (1 Tim. 5:8) Pakwez, mudimu winou witinay Nzamb, wa kudimukin maswir ma dijuku ufanyidinap kushatin pansh mudimu wa kulejan Want ni wa kwikadish in kwilej.—Mat. 24:14; 28:19, 20.
2 Yesu wapana chilikej chetwetu kulondul mu ‘kukimb bil Want.’ (Mat. 6:33; 1 Pi. 2:21) Ap anch wadinga nich yom yikemp ya ku mujimbu, ndiy wiyandjika sens mu kusalang rusot ra Tatukwend. (Luka 4:43; 9:58; Yohan. 4:34) Wikasikesha amwinend kupan uman yisu yin yawonsu. (Luka 23:43; 1 Tim. 6:13) Wayikasikesha in kwilejend kwikal nich kusanger kujim kwa chilik chimwing mu mudimu wa kwangul.—Mat. 9:37, 38.
3 Kumwilikej Yesu Nlel: Tukutwish kulondul chilikej cha Yesu kusutil ku kwikasikesh kushakam mutapu wisikena ni wimanyidina pa mudimu wa Ukristu. Anch tukwet yom yituswiridina mulong wa mwom, tulondulany chiyul cha Baibel cha kulik kudandamen kwikungin yom yivud-yivud ya mangand. (Mat. 6:19, 20; 1 Tim. 6:8) Chipandaken kuwap mud ik kud etu kukimb kujimbish kusadil kwetu pamwing mu mudimu wa kulejan! Anch turishin nich mikadil yikash ya mar, tukutwish kwikasikesh ayinetu mud kamu mwasalay Yesu, kulik kulikidil yakamish ya mwom chakwel yishatina pansh mudimu wetu wa kusambish wa kupalangesh rusangu ruwamp ra Want.—Luka 8:14; 9:59-62.
4 Ap kand antu akweta yisend yivud akat kutek mudimu wa kulejan pa ndond ya kusambish. Mukadivar umwing ukweta dijuku dijim, chisend chijim mu mudimu, ni usadila mud kalam mu chikumangen cha Ukristu ulondin anch: “Nimening mudimu wa kulejan mud mudimu wam wa kusambish.” Nambaz umwing chibol ulondin anch: “Mudimu wa uchibol upandaken kuwap kusutamu mudimu wa ku mujimbu.”
5 Wikalap nchik mwikadil wetu, tulondulany amboku chilikej cha Yesu. Ov mutapu ik? Kusutil kutek mudimu wa Ukristu kwikal mujikit wa kusambish.