Ayibid​—⁠Pakwez Asongina Mabuj

¹ Anch udi pakach pa Atuman’a Yehova avud akweta ubid, ukutwish kudandamen kwikal nich mudimu usongina mabuj. Pa chinech, mikadil yey yikutwish kukwinkish yisu ya pakampwil yeyey kupan uman ni kuyikasikesh akwau.

² Kupan Uman: Antu avud afanyidina kurish nich ubid akat kusal sens mudimu wa kulejan. Chilikej nambaz umwing wading nich ubid wa kwend ni mar nakash pa kulond mulong wa kubaril kwamubarilau, wamana anch ukutwish kusal mudimu wa kupan magazet anch nfumwend wimik motak wau piswimp ni njil yendidilau antu avud ra pansh. Dichuku dimwing, wapana magazet 80 mu asaa aad kusu! Mikadil yey ya pakampwil yikutwish kand kukushikij ku kwambamb ni antu adinga akasikena kusankan mu mutapu ukwau. Anch chidi mwamu, yimana antu inay mud teritwar wey wa pakampwil.

³ Mudimu wey wa kulejan ukutwish kusong mabuj mud ik! Anch antu akwau aman kukankaman kwey ni usu uwamp ukweta uyakin wa Baibel pa mwom wey, awiy akutwish kwikal apwitinau ku rusangu ra Want. Chikwau kand, anch wasankan antu amena mar, yiwamana kal mu mwom yikutwish kukukwash kwikal tayad kuyinkish kongoj kudiokila mu Dizu dia Nzamb.​—⁠ 2 Kor. 1:⁠4.

⁴ Ukutwish Kuyikasikesh Akwau: Ov rusangu ra mwom wa Laurel Nisbet rakukasikeshap, muntu wadinga utekinau mu ulal wa chikung (poumon d’acier) mivu 37, pakwez wayikwasha antu 17 kushiken ku ronganyin ra uyakin wa Baibel? Chilik chimwing, chilikej chey chikutwish kuyibachik arund ney akaritiy kwikasikesh mu mudimu wa Yehova.​—⁠g93 1/22 p. 18-21.

⁵ Ap anch mikadil yey yikukangeshin kuya kurutu mu mudimu mud kamu mutapu usotila, ukutwish kamu kudandamen kuyikasikesh akwau. Mukadivar umwing walonda anch: “Nileja anch ap muntu ukweta ubid upandakena ukutwish kamu kwikal mwin ukwash ujim kud akwau. Am ni mukajam tudi mud ink kud yid kushalijan ya chikumangen chetu. Mulong wa mikadil yetu, tudiaku kwetu, ni tudi kwetu tayad.” Pakwez, mulong wa ubid wey, choviken anch ukutwishap chisu chawonsu kusal mudimu kwambatan nich mushiku wey. Ap mwamu, kusutil ku ukwash umwing ukutwish kusal mudimu wa kulejan nich usu. Chawiy lel, anch uswiridin ukwash kanang, kangal widjidjek kuyilej amakurump ap antu akwau mu chikumangen akutwisha kukukwash.

⁶ Yehova ukat kuman yom yawonsu usadila mulong wa kumusadil, ni ukat kusanger nakash mudimu wey usadila nich muchim wey wawonsu. (Kus. 139:​1-4) Anch wamuchingejin ndiy, ukutwish kukwinkish usu wa kusal mudimu umwing usongina mabuj ni urumburikina.​—⁠ 2 Kor. 12:​7-10.