Panshon—Ov Wazuril Chis ku Mujikit Wiwejidinaku?
1 Antu avud asadila mudimu ukash asotin chisu chikutambulau panshon ukeza kuyikamunin ku kukakalijan ni mar ma midimu ya ku mujimbu. Pakwez, chisu chivud, panshon ukat kuletang kuburen kusanger, usweral, ni kunanap swa. Kuburen kwa mujikit ukweta rutong kukutwish kusha manangu ma muntu mu kwiyandjik nakash mu kwiyakamish piur pend amwinend. Ku mutambu ukwau, anvaj apamina kal akat kwakam mulong wa ijikurau ni an akwau chisu chisadilau anvajau usu wa kuman nfalang. Mwikadil winou ukatap kuswimp yipwichik ya mwom.
2 Chinyim ni chinech, in Kristu avud amen chikunku chinech chisu mu mwom wau mud chis chazurilau mulong wa kusal mijikit yivud ya muspiritu. Anch anau amakurump akat kuyilil mu chikumbu cha dijiku diau, akwet want ipau wa kusal chinech. Mukadivar umwing wasambisha mudimu wa uchibol mbing jaad kupwa kwa kuwanyish mivu 65 walonda anch: “Kand kal nimanap mu mwom wam chirung chipitishena nakash nich yiyukish mud mivu dikum ya mudimu nasadila mu uchibol.” Ambay a uruw amwing afunda anch: “Muvu wetu upandakena kuwap wasambisha chisu twasambisha mudimu wa uchibol.” Mwaning, kud antu avud, panshon upanin chisu chipandakena kuwap cha kutanduril mudimu wau ni kwangul yiyukish yipitishena yidiokila kud Yehova.
3 Dandamen Kwikal Ukwatikena ni Usongina Mabuj: Antu avud atambwila katat panshon ananapin kal akad ukwash upaninau kud antu awonsu nlel ni ileja kusal mudimu ukash ku upal. Ap anch kakutwishap kand kwikal nich ukash wa usand, adandamedin kwikal in mudimu a kashinsh asongina mabuj. Mu teritwar wa mutiy umwing, ayibol 22 pa chitot—akadivar ni anambaz piswimp 20000—akwet mivu 60. Amapal inay akat kupan ukwash ujim nakash ku mudimu wa kulejan. Uman wau ni ngikadil yau ya winzamb yipitishin yikumangen yisadidilau mudimu.— Jak. 3:17, 18.
4 Kudandamen kwikal ukwatikena mu mudimu kukat kukwash kwikal nich ukash wa mujimbu ni kuwapish mwikadil wa mwom. Nambaz umwing ipal ukweta mivu 84 wasambisha mudimu wa uchibol chisu chatambulay panshon walonda anch: “Kwikal nich malejan ma Baibel mavud ma antu asangaredina kwankwashin chakwel kwikal uzangurokina mu manangu. Mulong nikwetap motak, nikat kwend nakash ra pansh. Chinech chikwashin kulam ukash wa mujimbu wam.” Ambay a uruw amwing ayibol amapal alonda anch: “Mudimu wa kulejan ukat kulam ukash wetu wa manangu ni wa mujimbu. Tudi chisu chin chawonsu pamwing. Tukat kusip nakash ni kusanger mwom.”
5 Kusadil Ndond Kudia Kuswir: In Kristu amwing asenda panshon akweta mikadil ya nfalang yifanyidina ikala abachikinau kusadil ndond kudia kuswir kujim nakash kwa in kulejan Want. Akwau atandurila mudimu wau chakwel kusadil mu teritwar mulondinau rudim ra wingendj. Mud kambuy Paul, in kulejan inay akweta mushiku akat ‘kusal yom yawonsu mulong wa rusangu ruwamp chakwel kwikal in kusal pamwing nau [akwau, NW].’—1 Kor. 9:23.
6 Ambay a uruw aad asambisha mudimu wa uchibol kupwa kwa kulil anau aad. Kwinyim kwa mivu yivud ya mudimu wa uchibol, awiy asambisha kwilej rudim ra ngand ya Chine. Katat chikwetau mivu 70 ni kusut, ading ni musangar wa kuman chisak cha rudim ra in Chine chadingau ni kusadil pamwing chakwel chikala chikumangen. Ambay a uruw mud inay ameken kamu kwikal chiyukish mud ik!
7 Kwikil Panshon mu Mudimu wa Kulejan: Ap anch antu avud atambwiling panshon mu mudimu wau wa ku mujimbu, kwikil panshon kud mwin Kristu mwin mwawonsu mu mudimu wa Nzamb. Awonsu afanyidin kudandamen kushinshaman “ni kushik kwisudiel.” (Mat. 24:13, 14) Mu teritwar wetu, ayibol a rawonsu 700 ni kusut akwet mivu 60, amekeshin kusanger kujim piur pa mudimu wa kulejan. Chakin kamu nich mivu yikwetau, amwing kakutwishap kusal yivud mud mwasalau pa kusambish mu mudimu wa Yehova. Pakwez chikasikeshin mud ik kuyiman akat kusal chikutwishau kusal nich muchim wau wawonsu! Dizu dia Nzamb diyikasikeshin kuchingejin anch Yehova kakezap kuvuramen mudimu wau ni rukat rau rimekeshinau mulong wa dijin diend.— Luka 21:1-4; Heb. 6:10.
8 Anch wasejin kal piswimp ni chisu cha panshon wey, ov mulong wak ukutwishap kulembil ni kutongin piur pa mutapu ukutwisha kusadil sens kuswimp kwa mikadil yey? Ku ukwash wa Nzamb, ukutwish kuman anch panshon wazuril kud ey yis mulong wa mujikit wiwejidinaku uletina kushiman kud Yehova ni yiyukish yivud.— Kus. 148:12, 13.