Ikal Nich Mushiku mu ‘Kupan Uman’
1, 2. Ov yom ik yikukwatina ku muchim piur pa mutapu wamanay Paul mudimu wa kulejan rusangu ruwamp, ni mutapu ik tukutwisha kwilikej chilikej chend cha “kupan uman”?
1 Mud Yesu ni atushalapol ashinshamena avud a pasak, kambuy Paul wading mwin kulejan wa rusangu ruwamp ukweta mushiku, wading ni ‘kupan uman’ wikalap nchik mwikadil. Ap anch wadinga mu rukan, ndiy “wayakang antu awonsu ezanga ni kumutal. Warumburilanga mazu ma Want wa Nzamb, walejananga mulong wa Nsalejetu Yesu Kristu. Wading ni kulond patok wakad wom ap wakad mwin kumukangesh.”—Mid. 28:16-31.
2 Ni yetu kand tukutwish kwikal nich mushiku mu ‘kupan uman’ pa yisu yawonsu. Chinech chiwejidinaku kupan uman kud antu tusankena mu maweny metu pa kuya ni pa kuchirik ku Chikumangan cha Distrik “Panany Uyaj Kud Nzamb” ni mu musumb utwakinau.—Mid. 28:23; Kus. 145:10-13.
3. Ov mutapu ik tukutwisha kwipuk anch uman wetu wa kukashimwish kangal wikal kusu usu wa chamwamu?
3 Ov Winou Udi Mulad wa Kupan Uman Wakad Kutongin ap wa Kukashimwish? Ov padi kushalijan? Mwawiy. Mulong chom chidia chakad kutongin chikat kushikenang yisu yivud pakad kwirijek, ap pakad kusot, mud anch kachirijekangap ap mud chom cha usey ukemp. Chinech chiletinap chakin kurumburik kwa mudimu wetu. Mud kamu chadinga chakin kud Paul, kupan uyaj Kud Nzamb kusutin kupan uman chidi chom cha usey kud etu, ni chifanyidin kwikal rutong retu ra kupan uman ndond yin yawonsu yifanyidina mu maweny metu. Pakwez, mutapu tukata kwisamb nau antu akwau ukutwish kapamp kamwing kupan chitongijok mud cha kukashimwish—chawiy kulond, mu mutapu umwing wa chisambu, wa urund, ni ufanyidina. Mulad winou wa kwisamb ni muntu ukutwish kulet yibudikin yiwamp.
4. Ov chom ik chamutwishisha Paul kupan uman ndond yading yishichay?
4 Kwirijek Chakwel Kupan Uman: Paul wading ni kukimb mitapu ya kupan uman chisu chadingay mu rukan ku Rom. Kudiok kwi ndond kwadingay ni kushakam, ndiy wasambisha kuyitazuk antakel in Yuda adinga mu musumb, kwez ku chikumbu chend. (Mid. 28:17) Ap anch ku Rom kwading chikumangen cha Ukristu, Paul wading wij anch chisak cha in Yuda adinga mu musumb winiwa ading ij jinsangu jikemp ja ku musul piur pa ritiy ra Ukristu. (Mid. 28:22; Rom 1:7) Ndiy kachirikap kwinyim mu “kupan uman” piur pa Yesu Kristu ni Want wa Nzamb.
5, 6. Ov yisu ik tukutwisha kwikal nich chakwel kupan uman wa kukashimwish, ni kwirijek ik tukutwisha kusal chakwel kusal mwamu mutapu ujim?
5 Tongijokin bil piur pa antu awonsu ukutwisha kwambamb nau mu maweny mey akweta kusu ronganyin rikemp piur pa Atuman’a Yehova. Chitwishikin ap kijap anch tukat kulejan malejan ma Baibel ma ku chikumbu pakad kufut. Dimukin yisu yimekena chakwel kupan uman kud antu usankena chisu uyila mu weny, ndond yikata kwiman motak chakwel kupim, ndond ya kukandamin motak, mu makashing, kud antu adia ku chikumbu cha aeny, adila mu restoran, mu miotak ya antu awonsu ni ndond jikwau. Tenchik kurutu kwa chisu yom ufanyidina kulond chakwel kusambish mambamb ni kupan uman mu wiswimp. Pamwing ap mu machuku ma kurutu ukutwish kusadil kusutil kupan uman wa kukashimwish kud amutej ney, anamakwey, arund ney a mudimu, ni antu akwau a chijiken.
6 Ukwikal nich kuswir kwa mikand ya kusadil chisu cha kupan uman wa kukashimwish. Ov mikand ik? Ufanyidin kusadil trakt mwin mwawonsu. Anch trakt Aimeriez-vous en savoir plus sur la Bible ? udiaku, shinshikin maparagraf matan ma kusambish, mupaninau mayingish kushalijan mulong wa kutang Baibel. Lejan kupon udia panyim wa kwitin dilejan dia Baibel diakad kufut dia ku chikumbu. Anch waman antu akwila nawamp, pan broshir Nzamb Witin. Chakwel kusambel kwitenchik mulong wa kusankan antu akata kulond rudim rikwau, send matrakt, mabroshir ap magazet mu jindim jilondinau mu maprovinse makwau. Anch uyil mu weny nich motak (ap nking), ukutwish kusend mikand yikwau ya pa dishin mulong wa antu amekeshina kusanger kwa kashinsh mu uruu wa Want.
7, 8. Ov kubabesh ik tufanyidina kuta muchim piur pa mutapu wetu wa kudjal ni yaku yetu chisu tuyila mu weny ni pa yisu ya kwipuwangej?
7 Dimuk Nich Mutapu Wey wa Kudjal ni Yaku Yey: Tufanyidin kushinshikin nawamp anch yaku yetu, mutapu wetu wa kudjal ni kwileng kwetu yikezap kuyinkish antu akwau chitongijok chiyimp ap kuyibachik ‘kulondin nayimp’ dirijek dia Yehova. (Mid. 28:22) Chinech chidiap kusu pa chisu tukumangena ku chikumangan pakwez kand pa chisu tudia mu weny ni mu chisu cha kwipuwangej. Tour de Garde wa Kafunfut 1, 2002, paj wa 18, paragraf wa 14, ubabeshin anch: “Mutapu wetu wa kudjal ufanyidinap kwikal wa kwimekesh, wakad kufanyin, wa kulangwish maku ma masandj, wa kumekesh yikunku ya mujimbu ap kwikal muswik wa mulad wa kudjal. Tufanyidin kand kudjal mu mutapu umwing umekeshina ‘kumwakam Nzamb.’ Chinech chitin chakin kamu kutongijokin, ov kimwawiyap? Udiap mulong wa kudjal kusu mutapu ufanyidina ku yikumangan ya chikumangen [ap pa yisu ya chikumangan cha distrik] ni kupwa kudiul yisu yikwau. Mutapu wetu wa kudjal ni kwileng ufanyidin kumekesh chisu chawonsu kumwakam kwetu Nzamb, mulong tudi Atushalapol in Kristu pa chisu chin chawonsu.”—1 Tim. 2:9, 10.
8 Tufanyidin kudjal kwa kwikepish ni kwa kalimish. Anch mutapu wetu wa kudjal ni yaku yetu yimekeshin chisu ni chisu yitiyij yetu mudiay Nzamb, tukezap ap pakemp kuchirikin kwinyim mu kupan uman wa kukashimwish anch mulong mutapu wetu wa kudjal ufanyidinap.—1 Pi. 3:15.
9. Ov kuwin ik mu kupan uman kwatwishay Paul mu Rom?
9 Uman wa Kukashimwish Ukat Kusong Mabuj: Mu chirung cha mivu yaad yadingay kambuy Paul mu rukan mu Rom, wamana yibudikin yiwamp kudiokal ku usu wend wa kupan uman. Luka walonda anch “amwing itiyija yom yalonday.” (Mid. 28:24) Paul amwinend wachinda chibudikin cha usu wend wa “kupan uman” chisu chafunday anch: “Mar manshikena am makwasha kupalangesh Rusangu Ruwamp. Mulong wa chom chinech, atulam awonsu a chikumbu cha want ni antu akwau awonsu ij nawamp anch, am nidi mu rukan mulong wa kumwambat Kristu. Anamakwetu in Kristu amwing awejaku kal kakwau ni kakwau ruchingej rau mwi Nsalejetu mulong am nidi mu rukan, chad awejaku kal kand kujijaman kwa kurumburil dizu dia Nzamb patok wakad wom.”— Filp 1:12-14.
10. Kutwish ik mu kupan uman kwatwishinau ambay a uruw aad muvu wasutina ou?
10 Muvu wasutina ou, kupwa kwa kusutish dichuku ku chikumangan cha distrik, ambay a uruw amwing apana uman wa kukashimwish ukweta mabuj kud mband umwing mwin mudimu wa kwangan yakudia mu restoran wayipula piur pa yijingidij ya chikumangan cha distrik. Amuleja piur pa chikumangan ni piur pa ruchingej ripaninay Baibel mulong wa machuku ma kurutu ma antu. Amwinkisha trakt Aimeriez-vous en savoir plus sur la Bible ? ni kurumburil piur pa ditenchik dia dilejan dia Baibel dia ku chikumbu pakad kufut. Mband winou walonda anch usotin muntu umwing wa kwezang kumutal, ni wizwisha dijin diend ni adres wend panyim pa trakt, ni wayita ambay a uruw inay kusal yitenchik chakwel kumwendil. Ov yibudikin ik ukutwisha kusanger muvu unou kusutil kwikal nich mushiku mu “kupan uman”?
11. Ov ngikadil ik tufanyidina kukudish chakwel kutwal kurutu rusangu ruwamp muvu unou kusutil ku “kupan uman”?
11 Kutwal Kurutu Rusangu Ruwamp: Tongap bil musangar wa Paul pateshay anch arund nend in Kristu ading ni kwimburij chilikej chend cha mushiku! Tusalany yawonsu tukutwisha chakwel kutwal kurutu rusangu ruwamp kusutil ku kupan uman wa kukashimwish piur pa ritiy retu ra pa dishin mud kamu tukutambula kand ukwash udiokila ku chikumangan cha distrik cha muvu unou.
[Caption on page 1]
[Study Questions]
[Caption on page 3]
[Picture on page 3]
Mikand Yiswiridikina Chakwel Kupan Uman wa Kukashimwish
■ Aimeriez-vous en savoir plus sur la Bible ? (trakt)
■ Nzamb Witin Etu Tusal Ik? (broshir)
■ Matrakt mu jindim jikwau
■ Mikand yikwau ya pa dishin
[Caption on page 4]
[Picture on page 4]
Kangal Wayivuramenany!
Ov kuyivuramen anany? Antu awonsu amekeshina kusanger akweza kukumangan ku Chivurikish cha rufu ra Kristu ap ku diskur dia pa kampwil. Ov twayitazukin kal kwez kukumangan ku chikumangan cha distrik cha muvu unou? Chakin kamu avud pakach pau, anch twayikasikesh nich rukat, akukumangan. Anch asanger urund wa ukadivar utungina ku chikumangan cha distrik ni program ukasikeshina wa mu spiritu, akez kushejin piswimp nend Yehova ni dirijek diend. Ov mulong wak kulik kuyitazuk avud ni kutal anch akwitiy? Yirumburila kachom ni kachom mud kamu chiswiridikina, kuwejinaku machuku ma ngond ma chikumangan ni jinsangu jikwau piur pa mutapu wa kushik ndond ya chikumangan, yisu ya yikunku kusambish ni kupwa, ni kusambel kuyilej program wa chikumangan ufundinau pa chibur cha Réveillez-vous! wa 8, 2003.