Yiyukish ya Mudimu wa Uchibol
1, 2. Yiyukish ik yidia mu mudimu wa uchibol, ni mulong wak?
1 Chibol umwing walonda anch: “Nij anch kwikil mudimu ukwau ukutwisha kwinletin musangar udiokila ku kuyilej antu akwau uyakin.” Chibol mukwau muntu mband ni ndiy walonda anch: “Kwisudiel kwa dichuku ni dichuku, tul twam tuding tuwamp nakash, ni muchim wam wizwila too nich musangar.” Ayibol inay ayilondidil akadivar nau anambaz adia kwawonsu apaka kal yiyukish ya mudimu wa uchibol.—Jinsw. 10:22.
2 Kuyikwash antu akwau kwak ronganyin ra Dizu dia Nzamb ripandishina mwom kuletining musangar wakin. (Mudimu 20:35; 1 Tes. 2:19, 20) Chibol umwing wasadina kal mivu yivud wafunda anch: “Chiding cha musangar ni chikat kukasikesh ritiy pa kuman mutapu ukata usu wa Dizu dia Nzamb kuyibachik antu kukarumuk mu mwom yau.” Mwaning, kusutil ku kukwikal ayinau tayad chakwel kuyikwash antu ni kutakel malejan ma Baibel, ayibol akez kusanger ayinau yiyukish mud yiney.
3, 4. Ov uchibol umufundishining nchik muntu kwikamen padiay Yehova, ni mutapu ik chikata kumukwash muntu kukul muspiritu?
3 Kwikamen Padiay Yehova: Kuchingejin pichuku-pichuku pa mwiku utumbila wa Nzamb pasadilau mudimu wau kukat kuyikwash ayibol kukudish “dibuj dia mwiku utumbila” ni kwikal mud dichidij kud awiy. (Gal. 5:16, 22, 23, NW) Chikwau kand, mulong akat kusadil Dizu dia Nzamb chisu chawonsu, chisu ni chisu ayibol akwet ukaliweny wa kusadil Mifund chakwel kuchidij uyakin ni kuyikasikesh akwau. (2 Tim. 2:15) Mukadivar umwing wasala mudimu wa uchibol mu makum a mivu walonda anch: “Kusal mudimu wa uchibol kwankwasha kwikal nich ronganyin rijim ra Baibel, rinasadila mulong wa kuyikwash antu avud kumwijik Yehova ni jintong jend.” Chidi cha musangar mud ik!
4 Ayibol a rawonsu afanyidin kand kwikamen padiay Yehova mu jinjil jikwau jivud. Ritiy rau rikat kukasikan pamenau mutapu ukatau kuyukish usu wau mu kuwanyish maswir mau ma ku mujimbu. Mukadivar umwing ipal ukweta mivu 72 wasadina kal mivu 55 mu uchibol wa rawonsu walonda anch: “Yehova kand kal anlikap bwat.” Chikwau kand, kusutil ku kulam mwom wau uswapela, ayibol akat kwichidij ayinau ku yakamish yivud ya mwom. Ov mwamu chidia ku mutambu wey?—Mat. 6:22; Heb. 13:5, 6.
5. Kusal mudimu wa uchibol kukat kumukwash nchik muntu kusejin piswimp nenday Yehova?
5 Kusej Piswimp Nend Nzamb: Urund wetu ni Yehova udi dipit dimwing dia usey nakash. (Kus. 63:3) Pitukata kusal nakash mu mudimu mulong wa rukat retu kudiay Yehova, urund winou ukat kwikal wa piswimp nakash. (Jak. 4:8) Chibol umwing wa mivu 18 walonda anch: “Mudimu wa uchibol ukat kututwishish ‘kupak ni kuman anch Yehova udi muwamp,’ pichuku-pichuku kutung urund umwing ukash nend Sakatang wetu.”—Kus. 34:8.
6. Chom ik chifanyidinau kwikal nich ayibol, ni anany akwau akata kwisakin nau pamwing?
6 Kuwejin pa kwikal nich mikadil yifanyidina, ayibol afanyidin kwikal nich ritiy rikash, rukat rakin pantaliken nend Nzamb ni mukwau muntu, ni rusot ra kwipan. (Mat. 16:24; 17:20; 22:37-39) Pakwez, mud mutukutwisha kuman yifu yisangera ya ayibol ndond yin yawonsu, yiyukish ya mudimu wa uchibol yipandakenamu kuwap. (Mal. 3:10) Yiyukish yiney yidiap kwau ching kusu kud ayibol, pakwez majuku mau ni yikumangen kand yikat kutaninamu ukwash ujim udiokila ku mwikadil wa manangu uwamp umekeshinau ayibol.—Flp. 4:23.
[Caption on page 1]
[Study Questions]