Tumwinkishany Yehova Yom Yetu Yipandikena Kuwap
1 Chijil chapanay Yehova kud in Isarel chading chilejen patok anch annam akuletau mulong wa kupesh kud ndiy afanyidin kwikal akad “ulim.” Nnam chilim kadingap witiyikina bwat. (Lev. 22:18-20; Mal. 1:6-9) Chikwau kand, pakupeshau, many mawonsu—chikunku chipandikena kuwap—madinga ma Yehova. (Lev. 3:14-16) Chadingay Tatuku ni Mwant wa Isarel, Yehova wadinga ufanyidin kutambul yom yipandikena kuwap.
2 Mud mu chadinga pakur, Nzamb ukat kusanger usey wa yipan yetu. Mudimu wetu ufanyidin kumekesh kalimish kamufanyidina Yehova. Chidi chakin anch, mikadil ya muntu ni muntu yishalijadin. Pakwez, tukwet diyingishin diwamp dia kwishinshikin ayinetu mulong wa kwikal nich kashinsh anch tukat kumwinkish yom yetu yipandikena kuwap.— Ef. 5:10.
3 Mudimu wa Muchim Wawonsu: Chakwel mudimu wetu umutumbish Yehova ni kupukun ku michim ya in kututesh, ufanyidinap kwikal wa manshindangen. Kulond kwetu pantaliken ni Nzamb wetu ni jintong jend jijim kufanyidin kumekesh kujikitish kwizwila mu michim. (Kus. 145:7) Chinech chikasikeshidin usey ujim wa kwikal nich program muwamp wa pakampwil wa kutang Bibil ni wa kwilej.— Jinsw. 15:28.
4 Kumwinkish Yehova yom yetu yipandikena kuwap kwitin kand kwimburij rukat rend mulong wa antu. (Ef. 5: 1, 2) Rukat mulong wa antu rikutubachik tusal usu wa kukimb antu avud anch chiswapel nich rusangu ra uyakin ripanina mwom. (Mar. 6:34) Ritubachikin kumekesh kusanger kwetu kwa pakampwil kud antu twambambina nau. Rikat kutubachik kuyitongin kwinyim kwa kutanijan nau kapamp ka kusambish ni kuyichirikin swa. Ritubachikin kusal yawonsu tukutwisha mulong wa kuyikwash apama mu spiritu.—Mid. 20:24; 26:28, 29.
5 “Yakupesh ya Kushiman”: Mutapu ukwau tukata kumwinkish Yehova yom yetu yipandikena kuwap udi kusutil ku mushiku wetu mu mudimu wend. Anch twirijek nawamp ni kuta muchim nakash pa mudimu wa kulejan, tukutwish kuwanyish chom chijim nakash mu chisu chitudia nich. (1 Tim. 4:10) Kwirijek kuwamp kukutukwash kulond ni kwovikesh nich kashinsh, mwamu kuwejinaku mutapu wa kwakul kufanyidina. (Jinsw. 16:21) Pituyilejina antu akwau rusangu ruwamp, nich kulond kwa muchim utok akutazukin kamu anch “yakupesh ya kushiman.”— Heb. 13:15.