En Ansand—Tangany Dizu dia Nzamb!
1 Usand udi chisu cha milong ni cha kukwat mipak yikash. Avud pakach penen ansand in Kristu akat kurish pichuku-pichuku nich yibachik ya kujiril yijidik ya mashakamin ma winzamb. Kurutu kwa kukwat mipak yen yitadina kwilej, mudimu, ni uruw, ufanyidinany kwitekin ntong jen ja muspiritu. Anch wasalany mwamu ukutwishany lel kukwat mipak yikwau yikutwisha kwikal ya ukwash mu machuku mashalaku kal ma mwom wen. Kwitekin ntong ja mu spiritu jijikena kukukukwashany kusal nich manangu ni kutwishish njil jen. Kusutil ku kutang ni kutongijokin pa Dizu dia Nzamb chisu chawonsu, kukukubachikany ushakamany kwambatijan nich chiyul chend chipepidilau nich spiritu, ni ukez kayukilany mu yisalijok yen.—Jos. 1:8; Kus. 1:2, 3.
2 Mutapu ik Ukutaninanyamu? Mangand ma Satan mizwil nich maswir mashikijena ku kusal nayimp. (1 Yoh. 2:15, 16) Pamwing uyijany ambay nen a shikol ap antu akwau a reng ren ashikena kuman mar mulong wa kwilikidin ku kuyishindil kud arund. Kulamatin ku chiyul cha Bibil kukukasikeshinany mu mikadil ni mu spiritu ulikany njil ya chitil. Chikwau kand, chiyul cha Dizu dia Nzamb chikukukwashany kwipuk mipit yijingamina ya Satan. (2 Kor. 2:11; Heb. 5:14) Kwendil mwi njil ja Nzamb kukukuletinany musangar wakin—musangar wa pakampwil mwi njil yen ya mwom.—Kus. 119:1, 9, 11.
3 Yijidik ya Dizu dia Nzamb yakad kuswimpang yisutinamu manangu ma chiuntu. (Kus. 119:98-100) Kwijidin yijidik ya Bibil ni kutongijokin pa jintong jijinguninau ja Yehova pamwing nich malembil ma muchim utok yikutwish kukukwashany kwikal mu urund wa piswimp nenday Mwin kufundish Bibil mwin manangu, Yehova Nzamb. Ndiy ukat kushilamu anch: “Am nikez kukwijidish ni kukulej mwi njil yiukeza kuya, nikez kuyul padi ey ni dis diam.”—Kus. 32:8.
4 Itekinany Chisu cha Kumutang: Changadim umwing mwin Kristu witekina rutong ra kutang Bibil mwawonsu, ni wamupwisha mu muvu umwing. Mutapu ik wataninayamu? Uvurikin anch: “Nileja yom yivud nakash piur pa Yehova—yom yansejisha piswimp nend ndiy ni yansala nimwova wom mu machuku mam ma mwom mashadilaku.” (Jak. 4:8) Ov wamutanginany kal Bibil mwawonsu wakabuj? Anch kand kal, ov ukutwishanyap kwitekin rutong ra kumutang? Chakin kamu, Yehova ukuyukish usu wen ni ukutambulany yiyukish yijim.