En Ansand, ov, Ukat Kushinshikinany pa Mipak ya mu Spiritu?

1-3. (a) Milong ya mutapu ik yiyitadina ansand awonsu ni tukutwish kuyifanikesh nich ik? (Tal chipich cha kwinsambishin.) (b) Yom ik yikutwisha kuyikwash ansand in Kristu mu milong mudi yiney?

TONG bil anch ukimbin kuya ku musumb wa kulemp mulong wa chinship kanang cha pakampwil. Mulong wa kusal weny winou, ufanyidin kukandam motak. Piwashika kal pa ndond yikata kwimen motak, ukurumbangan mulong mudi antu avud ni ma motak mavud. Cha musangar, wij kamu nawamp kwisu uyila ni motak ik ufanyidina kukandam. Ukukandamap mutak ukwau, mulong wij anch ukukutwal kwi ndond yindj.

² Mwom udi mudi weny, ni ansand adi mudi antu iminya ndond yikata kwimen motak. Yisu yimwing kudi yom yivud yifanyidina kutond mu mwom ni chinech chikutwish kuyirumbangesh. Pakwez anch wij nawamp ndond uyila, chikukuswapel kutond nawamp. Mupak ik ufanyidina kukwat?

³ Mutu wa mulong winou ukwakul chipul chinech ni ukukukasikesh kushinshikin mwom wey mu kumusangaresh Yehova. Chinech chirumburikin kulondul yiyul ya Yehova mu mipak yawonsu ukwatina mu mwom, mudi shikol ukwileja ni mudimu ukusala ap kwijik anch ukwatan ap bwat ni kuval an ap bwat. Ni chirumburikin kusal usu wa kuwanyish mipak ya mu spiritu, kwawiy kulond anch mipak ap yom yikutwisha kusal anch wikala piswimp ni Yehova. Anch washinshikin pa kumusadin Yehova, ukutwish kwikal nich kashinsh anch ukukuyukish ni ukukukwash kutwish.—Tang Jinswir 16:3.

MULONG WAK KWITEKIN MIPAK YA MU SPIRITU?

4. Yom ik tukwisambina mu mutu wa mulong winou?

⁴ Chidi chiwamp kwitekin mipak ya mu spiritu. Mulong wak? Tukwisambin mayingishin masatu. Diyingishin dia kusambish ni diakaad dikukukwash kuman anch kusal usu wa kuwanyish mipak ya mu spiritu kukukukwash kwikal murund muwamp wa Yehova. Diakasatu dikumekesh mulong wak chidi chiwamp kwitekin mipak yiney chisu uchidia kal nsand.

5. Diyingishin ik didia dia usey nakash dia kwitekin mipak ya mu spiritu?

⁵ Diyingishin dia usey nakash dia kwitekin mipak ya mu spiritu didi mulong wa kumujikitish Yehova mulong wa rukat rend ni mulong wa yom yatusadinay. Nfund a Kuseng umwing walonda anch: “Chidi chiwamp kumujikitish [Yehova] . . . A! [Yehova], ey wansangaresha mulong wa yisalijok yey yikwamushena. Nikat kujikitish mulong wa midimu ya makas mey.” (Kuseng 92:2, 5) Tong piur pa yom yawonsu yakwinkishau kal kudi Yehova mudi mwom, ritiy, Bibil, chikumangen ni ruchingej ra kushakam chikupu mu Paradis. Anch witekin mipak ya mu spiritu, umekeshin kudi Yehova anch ujikitishin mulong wa yom yiney yawonsu ni anch usadin anch wikala nend piswimp.

6. (a) Mipak ya mu spiritu yikwet usu ik pa urund wey ni Yehova? (b) Mipak ik yimwing ukutwisha kwitekin chisu uchidia kal nsand?

⁶ Diyingishin diakaad dia kwitekin mipak ya mu spiritu didi anch ang wasal usu wa kuyiwanyish, usadin mudimu uwamp mulong wa Yehova. Ni chinech chikukusejish piswimp ni ndiy. Kambuy Paul washilamu anch: “Nzamb utentamin, ndiy kakutwishap kuvuramen yisalijok yen ap rukat ruumekeshinanya [mulong wa] dijin diend.” (Hebereu 6:10) Ap an akemp nakash akutwish kwitekin mipak ya mu spiritu. Chilakej, Christine wading ni mivu 10 chisu chakwatay mupak wa kutang chisu chawonsu jinsangu ja mwom ja Atuman ashinshamena. Toby wading ni mivu 12 chisu chitekinay mupak wa kutang Bibil wa kabuj kurutu kwa kutambul dibatish. Maxim wading ni mivu 11 ni mpanyend Noemi wading ni mivu 10 chisu chatambulau dibatish. Awonsu itekina mupak wa kusadin ku Betel. Mulong wa kushinshikin pa mupak wau, ateka fomu wa kwandam ku Betel ku rubumbu mu chikumbu chau. Chidi nchik piur pey? Ov, utongin piur pa mipak yimwing ukutwisha ey kwitekin ni kusambish kusal usu wa kuyiwanyish?—Tang Filip 1:10, 11.

7, 8. (a) Mutapu ik kwitekin mipak ya mu spiritu kukutukwash kukwat mipak yiwamp? (b) Mulong wak changadin umwing walika kuya ku universite?

⁷ Disu diyingishin dia kasatu dia kwitekin mipak ya mu spiritu chisu udia nsand? Mulong udi nsand, ukwet mipak yivud ya kukwat. Ufanyidin kukwat mipak mulong wa kwijik shikol ik ukwileja ni mudimu ik ukusala, ni yom yikwau yivud. Mipak yiney ukwatina mu mwom yidi mudi mansang utanina chisu usadina weny. Anch wij ndond uyila, chikukuswapel kwijik njil ufanyidina kuyil. Chilik chimwing, anch wij mipak yey, chikukuswapel kukwat mipak ya manangu. Jinswir 21:5 ulondin anch: “Yitongijok ya mwin mushiku ya kusal yom yishikin ku kupit.” Anch wasambel kwitekin mipak, ukutwish kand kuyiwanyish swa swa. Chawiy chom chamushikena Damaris chisu chafanyinay kukwat mupak wa usey nakash chisu chadingay changadim.

⁸ Damaris wading ni mapweng mavud papwishay shikol ya sekonder ni wafanyina kuya ku universite mulong wa kwilej yijil (droit) pakad kufut nfalang. Pakwez watonda kusal mudimu ku bank. Mulong wak? Mulong padingay mwan mukemp, wakwata mupak anch ukusal mudimu wa uchibol. Ulondin anch: “Nasalang mu chisu chikemp ku bank. Anch nileja yijil ku universite, nafanyina kwikal ni nfalang jivud, pakwez nafanyinap kuman mudimu wa kusal mu chisu chikemp mudi wa ku bank.” Damaris wasala mudimu wa uchibol mu mivu 20. Ov, watonga anch wakwata mupak uwamp chisu chadingay changadim? Mwaning. Ku bank kusadinay, ukat kutanijan ni antu avud ileja yijil (avocats) asadina mudimu wafanyinay niyend kusal anch waya ku universite. Antu avud pakach pau kakwetap musangar wa mudimu usadinau. Damaris wiyovil anch mivu yiney yawonsu yasalay mu mudimu wa uchibol yamwinka musangar nakash ni yamukwasha kwipuk kwikal wakad musangar mudi awiy.

9. Mulong wak tukat kuyisanger ansand?

⁹ Yitot ya ansand adia pa mangand mawonsu asadin nawamp nakash ni chifanyidin kuyijikitish. Urund wau ni Yehova ni mipak yau ya mu spiritu yidi ya usey nakash mu mwom yau. Ansand inay asangaredin nakash mwom ni chisu chawiy chimwing, akat kwilej kulondul umutakel wa Yehova mu yom yawonsu, mudi yom yitadina shikol, mudimu ni mashakamin ma dijuku. Salomon walonda anch: “Mukungamena [Yehova] ni muchim wey wawonsu.” Walonda kand anch: “Mu jinjil jey jawonsu itiyij kudi Ndiy, ni Ndiy ukez katenchik jinjil jey.” (Jinswir 3:5, 6) En ansand, Yehova ukukatinany nakash! Udiany antu a usey kudi ndiy, ukukuchidijany, ukukutakelany ni ukukuyukishany.

IRIJEKA MULONG WA KUYILEJ ANTU AKWAU PIUR PA YEHOVA

10. (a) Mulong wak mudimu wa kulejan ufanyidin kwikal pakach pa yom ya usey nakash yifanyidina kusal? (b) Mutapu ik ukutwisha kwikal mwin kurumburil muwamp wa yitiyij yey?

¹⁰ Anch washinshikin mwom wey mu kumusangaresh Yehova, ukukat kuyilej antu akwau piur pend. Yesu Kristu walonda anch “rusangu ruwamp arulejan bil.” (Marko 13:10) Chawiy mudimu wa kulejan udi wa kuswapej ni ufanyidin kwikal chom cha usey nakash chifanyidina kusal. Ukutwish kwitekin mupak wa kulejan nakash nakash? Ukutwish kusal mudimu wa uchibol? Pakwez chikwikal nchik anch usangaredinap kulejan nakash? Ni mutapu ik ukutwisha kwikal mwin kurumburil muwamp wa yitiyij yey? Yom yaad yikutwish kukukwash: Irijeka nawamp ni kangal waziy kuyilej antu akwau yom wija piur pa Yehova. Ukutwish kushimwok nakash pa kuman anch usangaredin chad mudimu wa kulejan.

11, 12. (a) Yom ik ukutwisha kusal mulong wa kwirijek chakwel ulejana piur pa Yehova kudi antu akwau? (b) Mukadivar umwing nsand wasala mutapu ik mulong wa kulejan piur pa Yehova ku shikol?

¹¹ Sambish mu kurijek yakul ku yipul yikutwishau kukwipul kudi akwen a shikol, chilakej, “Mulong wak umwitiyijin Nzamb?” Pa kapend ka jw.org padi mitu ya milong yikutwisha kwakul ku chipul chinech. Ukutwish kukimb pafundinau anch LA BIBLE ET VOUS > ADOLESCENTS, ukutan fish wa kwilej nich ulondina anch “Pourquoi est-ce que je crois en Dieu ?” Londul yom yilejenau pa fish winou mulong wa kurijek chakul chey. Ukutan mifund yisatu ya Bibil ukutwish kusadin: Hebereu 3:4, Rom 1:20, ni Kuseng 139:14. Padi kand mafish makwau ukutwisha kusadin mulong wa kurijek yakul yey ku yipul yikwau yivud.—Tang 1 Pita 3:15.

¹² Yileja arund ney anch akutwish kwikimbinap ayinau yom pa jw.org. Mwawiy mwasalay Luca. Arund nend a ku shikol ading akat kwisambin piur pa marelijon kushalijan. Luca wamana anch buku winou wading ulondin yom ya makasu piur pa Atuman a Yehova. Ap anch Luca wajimana, wamwita mulej wend anch ukutwish kuyilej ansand a shikol mulong wak yom yiney yading ya makasu. Mulej witiya chakwel arumburila yitiyij yend, ni watwisha kulejan kapend ketu ka web mu kalas ka kabuj. Mulej wayinkisha ansand awonsu devwar wa kuya kutal video ulondina anch Mets un harceleur K.-O. sans utiliser les poings. Ukutwish kutong musangar wovay Luca palejanay piur pa Yehova ku shikol?

13. Mulong wak tufanyidinap kuziy chisu turishina nich milong?

¹³ Anch warish nich milong, kangal waziy pakwez dandamen kusal usu wa kuwanyish mipak yey. (2 Timote 4:2) Mwawiy mwasalay Katharina. Wadinga ni mivu 17 chisu chakwatay mupak wa kuyilej antu awonsu asalangay nend mudimu. Umwing wa pakach pau wamusaalang yisu yivud. Pakwez kavuramenap mupak wend. Mwikadil wend uwamp wamushimwokisha mwin kusal mudimu mukwau, dijin diend Hans. Hans wasambisha kutang mikand yetu, kwilej Bibil ni watambula dibatish. Katharina kadingap kija piur pa yom yiney mulong washemunikina kwi ndond kulemp. Chawiy washimwoka nakash kupwa kwa mivu 13, padingay mu chikumangan pamwing ni dijuku diend, wamana anch mwin kusal diskur wading Hans! Wova musangar nakash mulong kalikap mupak wend wa kulejan kudi antu asalangay nend mudimu.

KANGAL WAVURAMEN MIPAK YEY

14, 15. (a) Yom ik ufanyidina kuvurik anch akwen akubachik kusal yom yikatinau? (b) Yom ik ufanyidina kusal chakwel ujijaman anch akwen akubachik kusal yom yiyimp?

¹⁴ Mutu wa mulong winou wakukasikesh kal kukwat mupak wa kushinshikin mwom wey mu kumusangaresh Yehova ni kwitekin mipak ya mu spiritu. Pakwez ansand avud akweta mivu yey akatin kwau kwisangaresh. Ni akutwish pamwing ap kukutazuk chakwel usala yom yikatinau. Pakwez ufanyidin kusambish katat kusal chakwel amana anch kwitekin mipak ya mu spiritu kudi kwa usey nakash kudi ey. Kangal walik akwen asala yom chakwel uvuramena mipak yiney. Anch wading mwi ndond yikata kwimen motak twisambinang kwinsambishin kwa mutu wa mulong winou, ov, ukukandam kwey motak win wawonsu mulong antu adingamu ading akat kwisangaresh? Bwat, ukusalap mwamu!

¹⁵ Chawiy, yom ik ufanyidin kusal mulong wa kujijaman anch akwen akubachik kusal yom yisadinau? Ipuk yom yikutwisha kusal anch chikukasikena kujijamen yibachikin yiney. (Jinswir 22:3) Tong piur pa yibudikin yiyimp yikutwisha kwikalaku anch wasal yom yiyimp. (Galatia 6:7) Ni itiyin nich kwikepish anch ukwet kuswir kwa yiyul yiwamp. Tesh yom yikulejinau anvajey ni akadivar nau anambaz akweta ukaliweny adia mu chikumangen.—Tang 1 Pita 5: 5, 6.

16. Yom yamushikena Christoph yimekeshin mutapu ik anch chidi cha usey kwikepish?

¹⁶ Mwikadil wa kwikepish wamukwasha Christoph kwitiy chiyul. Machuku makemp kupwa kwa kutambul dibatish, wasambisha kuya chisu chawonsu kwi ndond ya kusadin jiminastik. Kwinikwa, ansand akwau amutazuka kwibomb nau mulong wa kusengan mu chisak chau. Wamulejamu mukurump umwing piur pa mulong winou, ni mukurump winou wamuleja kutongin piur pa ubaj kampand, mudi ubaj wa kwikal mwin kubambil. Ap mwamu, Christoph wakwata mupak wa kwibomb ni chisak chinech. Pakwez kupwa kwa chisu kanang, wajingunina anch masengan minam mading ma chisum ni ma ubaj. Weza kand kuyilej amakurump ni amwinkisha yiyul ya mu Bibil. Christoph ulondin anch: “Yehova wantumina in kwinginkish yiyul awamp ni namutesha, ap anch chita chisu kanang.” Ov, niyey wikepishin mulong wa kwitiy yiyul yiwamp?

17, 18. (a) Yehova ukatin anch ansand asala yom ik nlel? (b) Mutapu ik ukutwisha kwipuk kunenganan mulong wa mipak ukukwata chisu ukupama? Let chilakej.

¹⁷ Bibil ulondin anch: “Sangar kwez, ey mwanansand [ap changadim] ni usand wey. Chifanyidin kusanger machuku ma usand wey.” (Mulej 11:9) Yehova ukatin anch ey wikala ni musangar chisu udia nsand. Mu mutu wa mulong winou, wilej kal anch mutapu umwing wa kwikal ni musangar udi wa kudandamen kushinshikin pa mipak ya mu spiritu ni kulondul yiyul ya Yehova mu kutenchik kwey ni mipak yey yawonsu. Anch wasambel kusal mwamu mu mwom wey, ukutwish kand kuman mutapu ukatay Yehova kukutakel, kukuchidij ni kukuyukish. Tong piur pa yiyul yawonsu yakwinkishinay kal mu Dizu diend ni sadin chiyul ech: “Muvurika Sakatang wey mu machuku ma usand wey.”—Mulej 12:1.

¹⁸ Ansand akat kupam mau mau ni akat kwikal antu amukurump. Cha ushon, avud akat kunenganan anch akwata mipak yiyimp ap kitekinap mipak chisu chadingau ansand. Pakwez anch washinshikin pa mipak ya mu spiritu, ukwikal ni musangar piur pa mipak yiney chisu ukwikala muntu mukurump. Wawiy mutapu wiyovilay Mirjana. Padingay changadim, wading wij masengan kampand nawamp. Amutazuka kuya kusengan ku masengan ma kubambil ma Olympique. Pakwez, watonda kumusadin Yehova chisu chawonsu. Kupwa kwa mivu 30 ni kusut, udandamedin kwikal mu mudimu wa chisu chawonsu pamwing ni nfumwend. Ulondin anch antu akatining kwijikan, katumb, usu ni mapit kakwetingap musangar. Ulondin kand anch mupak upandakena kuwap udi wa kumusadin Nzamb ni kuyikwash antu akwau kumwijik ndiy.

19. Mulong wak chidi chiwamp kushinshikin pa mipak ya mu spiritu chisu udia nsand?

¹⁹ En ansand uwanyidinany kukujikitishany mulong chikalap nchik milong urishinanya nich, udandamedinany kushinshikin pa kumusadin Yehova. Witekidinany mipak ya mu spiritu, ni umenany anch mudimu wa kulejan udi wa usey nakash mu mwom yen. Chikwau kand, ulikinanyap anch mangand makupumbulany mulong uvuramenany mipak yen. Ukutwish kwikalany nich kashinsh anch mudimu wen wa usu udiap wa chamwamu. Ukwetany akadivar nau anambaz nen akukatinanya ni akukwashinanya. Chawiy ‘shikijany mijikit yen kudi Yehova, ni yitongijok yen ya kusal chom yikuwanyin.’