Mutapu wa Kuwanyish Ntong Jey ja Muspiritu
1. Ntong ik ja muspiritu jitekidinau ansand avud in Kristu?
1 Chiudia nsand mwin Kristu, pakad kwidjidjek ntong jey mu mwom jimedin pa kumukat Yehova ni mud mudia mazu ma Yesu mayilejay in Kristu awonsu anch “sambilany bil kusurib want.” (Mat. 6:33) Rutong rey rikutwish pamwing kwikal ra kujimbish mudimu wey mu kusadil mud chibol ap kusadil kwi ndond kudia kuswir kwa in kulejan a Want. Amwing akutwish kwikal ni yitongijok ya kwipan kusadin mu mudimu wa rutung ap kuya ku mutiy. Ntong jinej jidi chakin kamu jisangareshina ni jitinau kuwanyish!
2. Yom ik yikutwisha kukukwash kuwanyish ntong jey ja muspiritu?
2 Chakwel kuwanyish ntong jey ufanyidin kujifund. Chinong cha Kalam cha Kafunfut 15, 2004 (Français), chilondil anch: “Yitongijok ya mu manangu yikat kwikal zwang anch ukutwish kuyilond mu mazu makutwisha kovikan. Chawiy ukusot kufund pa dipaper ntong jey ni milad ukusadila mulong wa kujiwanish.” Chikwau, ntong jikemp-jikemp jikutwish kukukwash kwijik kuya kwey kurutu ni kwasin kamu pa kuwanyish rutong ra ku machuku ma kurutu.
3. Jimbul ntong jiukutwisha kuwanyish mu machuku makemp jikutwisha kukwash kuwanyish yitinau mulong wa dibatish.
3 Ntong ja Kuwanyish mu Machuku Makemp: Anch kand kal akubatish, shinshikin yiufanyidina kusal chakwel kuwanyish rutong riner. Uswiridin kutesh kurumburik kwa mafundish ma pa dishin ma Bibil. Anch kand kal akubatish, itekina rutong ra kwilej nawamp buku Chifundishinay Bibil, ni kutang maverse mawonsu majimbwilau. (1 Tim. 4:15) Itekina kand rutong ra kutang Bibil mwawonsu kusambish ku Disambishil djat ku Kujingunik, mud musadilingau yid ya Béthel ni in kwilej ku Gilead. Kupwa, itekina program wa kutang Bibil dichuku ni dichuku. (Kus. 1:2, 3) Tongin mutapu yikutwisha kukukwash kukul muspiritu! Sambish ni kupwish kutang Bibil ni dilejan nich malembil madiokila mu muchim, ni sal usu wawonsu mulong wa kusadil yiwilejina—Yak. 1:25.
4. Ntong ik ja kuwanyish mu machuku makemp jikutwishay kwitekin mwin Kristu witekina kal rutong ra ku machuku ma kurutu ra kuya ku Béthel ap ra kusadil mud chibol wa pakampwil?
4 Anch akubatish kal, ntong ik jikwau utongidina kuwanyish? Ov, usotil kukudish ukaliweny wey wa kulejan? Chilakej, ov, ukutwish witekin rutong ra kwikal nich nkeu ja kusadil Dizu dia Nzamb mu mudimu wa chingand? (2 Tim. 2:15) Mutapu ik ukutwisha kujimbish mudimu wey? Itekina ntong jiukutwisha kuwanyish mu machuku makemp jikwatijadina nich mivu ni mikadil yey ni jikeza kukukwash kuwanyish ntong ja ku machuku ma kurutu.
5. Ov, mutapu ik kwitekin ntong ja kuwanyish mu machuku makemp kwamukwasha mukadivar umwing kuwanyish rutong ra kusadil ku Béthel?
5 Rusangu ra Muntu Watwisha: Payay Tony nsand wa mivu 19 ni kutal biro wa mutiy wa Atuman a Yehova, maku mend ma kusadil ku Béthel malanka. Pakwez, mashakamin mend madinga mayimp, ni wading kand kal ipana kud Nzamb. Tony wakwata mupak wa kutenchik mwom wend kukwatijan nich jinjil ja Yehova ni witekina rutong ra kuwanyish yitinau mulong wa dibatish. Kupwa kwa kuwanyish rutong riner, Tony witekina rutong ra uchibol nkwash ni kupwa kusadil mud chibol wa rawonsu, wafunda pa kalandriye machuku ma ngond masotay kusambish. Tongin musangar wovay pasalay kal chisu kanang mud chibol, amutazuka kusadil ku Béthel!
6. Yom ik yikutwisha kukukwash kuwanyish ntong jey ja muspiritu?
6 Niyey ukutwish kuwanyish ntong jey ja muspiritu chisu utekina yisakin ya Want pa ndond ya kusambish. Shikij “mijikit yey” kud Yehova kusutil mu malembil ni sal usu wey wawonsu ujiwanyisha.—Jinsw. 16:3; 21:5.