Itekina Jintong ja Muspiritu
1 Chikez kwikal cha ntumb mud ik kumushiman Yehova chikupu ni chikupu! Chakwel kutukwash kushiken rutong riner, tukutwish kwitekin jintong ja muspiritu katat ni kusal usu chakwel kujiwanyish. Chinech chikat kututwishish kusadil usu wetu nich manangu. (1 Kor. 9:26) Jintong ik ukutwisha ey kushiken?
2 Dilejan dia Baibel: Ov ukat kurijekang yikumangan yawonsu ya chikumangen? Anch mwawiy, ov ukat kwitekinaku chisu mulong wa kukimbijol ni kutongijokinap chisu wilejina? Chilikej, chisu urijekina Dilejan dia Tour de Garde dia rubing ni rubing ni Dilejan dia Buku dia Chikumangen, ov utekining kusu kashony pa yakul ap anch ukimbining mifund yijimbwilau ni kutongijokin kand pa mayingishin ma yirumburil yipaninau? Ov ukutwish kuchisal chikala rutong rey ra kukimbijol piur pa manans makemp rubing ni rubing mu chikunku cha kutang kwa Baibel chikwinkinau ku Shikol ya Mudimu ya Uteokras? Yikimbijol yiney ya yom ya muspiritu yitining chisu ni usu, pakwez yikat kuletang yiyukish yivud ya muspiritu.—Jinsw. 2:4, 5.
3 Yikumangan ya Chikumangen: Rutong rikwau ridi ra kukumangan ku yikumangan yawonsu yitan ya chikumangen pakad kujing. Kushik pa chisu chifanyidina chakwel kwibomb pamwing ni ambay netu in ritiy mu kuwang muminy ni malembil ya kusambish kukwashin kukasikesh mwikadil wa manangu ni wa muspiritu wa chikumangen. Tufanyidin kand kwikasikesh chakwel kupan yirumburil (kwakul) ku yikumangan yawonsu ni kupakish kurijek mutapu wetu wa kupan yirumburil. Pamwing ap ukutwish kulejan mutapu wambatena mufund udia mu paragraf nich misamb ap kulejan mutapu wa kusadil mafundish minam mu mwom wa pichuku-pichuku.—Heb. 10:24, 25.
4 Mudimu wa Chingand: Mudimu wetu ukat kuyang kamu kurutu anch twitekin jintong. Ov witekidin kal rutong ra asaa kanang utongidina kusal mu mudimu ngond ni ngond? Amwing amening chinech kwikal cha ukwash nakash. Ap kand ov ukutwish kurijek mitambu yikwau ya mudimu wey, chilikej mud kusadil kwa Baibel mu mujikit wa ku chikumbu ni chikumbu, kusal kuchirikinamu kusu kukweta mabuj, kwikasikesh chakwel kusambish dilejan dia Baibel, ap kufundish mu mutapu umwing uwamp pa malejan?
5 Anvaj, ov ukat kuyikasikeshangany anen chakwel itekina jintong mu mudimu wa Yehova? Yikwashany amana anch kusadil mud chibol, mishoner, ap mud chid cha dijuku dia Betel yidi njil yimwing yipandikena kuwap ya kumekeshin kujikitish kwau kujim pantaliken nend Yehova.—Mul. 12:1.
6 Pitushinshikidina mijikit yetu, twitekinany jintong ja muspiritu, ni kwikasikesh chakwel kujiwanyish, tukez kutan musangar ujim mu mudimu wetu ni kwikal musul wa dikasikesh kud antu akwau.—Rom 1:12.