Ansand—Ov, Chom Ik Ukeza Kusalany Nich Mwom Wen?

“Nidi kand mudi mwin kubulan yinkany, kinikat kubulap chamubudil.” —1 KOR. 9:26.

1, 2. Chakwel utwisha mu mwom wey piupamina, Ov, chom ik ufanyidina kwikal nich?

ANCH uyil mu weny mwinjil yakad ey kwijik nawamp, ukwikal nich kuswir kwa kart ni kwa busol. Kart winou ukez ka kukwash kujingunin pa ndond udia ni kuya mwinjil yiwamp. Busol ukez kakukwash chakwel uya ku mutambu uwamp. Pakwez, kart ni busol kakutwishap kwikal nich usey anch wijap kwindond ufanyidina kuya. Mulong wa kwipuk kwendol pakad rutong, ufanyidin kwijik nawamp kuufanyidina kuya.

² Piukeza kupam, mwikadil wa mutapu winou ukutwish kukushiken. Ukwet yom yaad ya kashinsh yiukutwisha kusadil kudi kart ni busol. Bibil udi kart ukutwisha kukukwash chakwel wijika kwindond ik ufanyidina kuya. (Jinsw. 3:5, 6) Anch ukat kwijidish kom key nawamp, kakutwish kukukwash nakash chakwel udandamena kwendil mwinjil yitentamina. (Rom 2:15) Kakutwish kwikal mudi busol. Chakwel utwisha mu mwom wey, ufanyidin kwijik kuuyila. Ufanyidin kwijik nawamp rutong rey.

3. Ov, yiyukish ik yidiokila ku kwitekin rutong yisambinay kudi Paul mu 1 Korint 9:26?

³ Kambuy Paul walejana mu wiswimp yiyukish ya kutenchik rutong ni ya kusal usu wa kuyiwanyish pafunday anch: “Am nikat kubambil mau mes kurutu, matadil kwisudiel. Nidi kand mudi mwin kubulan yinkany, kinikat kubulap chamubudil.” (1 Kor. 9:26) Anch ukwet rutong, ukutwish kubambil nich ruchingej. Piswimp ap, ukez kukwat mipak yimwing ya usey piur pa kwifukwil, mudimu, uruw, ni dijuku, ni yom yikwau. Kupwa, ukez kaman anch udi pakach pa yom yivud yiufanyidina kutond. Pakwez anch watenchik kurutu kwa chisu yiukeza kusal, ni kukwat mupak wimedina pa uyakin ni yany yidia mu Dizu dia Nzamb, ukezap kuwil mu yoziu ya kulondul njil yiyimp.—2 Tim. 4:4, 5.

4, 5. (a) Ov, chom ik chikeza kushiken anch witekinap amwiney rutong? (b) Ov, mulong wak yiutondina yifanyidin kwikal yitakedilau kudi rusot ra kumusangaresh Nzamb?

⁴ Anch witekidinap amwiney rutong, arund ney ni alej ney akez kukubachik chakwel usala yom yimenau anch yitentamin kudi ey. Chakin kamu, ap anch ukwet ntong ja pakampwil, antu amwing akutwish kulet yitongijok yau. Piuteshina yiyul yau, iyipula amwiney anch: ‘Ov ntong jiletinau jikutwish kwinkwash chakwel ni muvurika Sakatang wam pinichidia nsand ap jikez kwinkangesh kusal mwamu?’—Tang Mulej 12:1.

⁵ Ov, mulong wak yiutongina kusal mu mwom wey chifanyidin yikala yitakedilau kudi rusot ra kumusangaresh Nzamb? Diyingish dimwing didi anch Yehova utwinkishin yom yawonsu yiwamp yitukweta. (Jak. 1:17) Chakin kamu, etwawonsu tufanyidin kumujikitish Yehova. (Kuj. 4:11) Chikwikal chom chiwamp nakash mudi ik kudi ey anch wamekesh kujikitish kwey ni kumutek Yehova mu manangu piutekidina ntong? Shinshikinany amboku ntong yitufanyidina kuwanyish ni yitufanyidina kusal mulong wa kuyiwanyish.

Ov, Rutong ik Ukutwisha Kwitekin?

6. Ov, rutong ik rijim nakash ni ra usey ukutwisha kwitekin, ni mulong wak?

⁶ Mudi mwisambinangau mu mutu wa mulong wasutang, rutong rijim nakash ra usey ukutwisha kwitekin ridi ra kumekesh anch chilejenau mu Bibil chidi chakin. (Rom 12:2; 2 Kor. 13:5) Arund ney akutwish kwitiyij mu dikarumun ap mu malejan kushalijan ma makasu ma chirelijon mulong antu akwau ayileja anch yawiy yom yifanyidinau kwitiyij. Pakwez, ukutwish kulik kwitiyij ku yitongijok yiney yakad kwambatan nich yom yiwileja kal. Vurik anch Yehova usotin chakwel ey umusadina nich manangu mey mawonsu. (Tang Mateu 22:36, 37.) Tatukwetu wa mwiur usotil anch ukasikesha ritiy rey pa uman wakin.—Heb. 11:1.

7, 8. (a) Ov, ntong ik ja kuwanyish mu machuku makemp jikeza kukasikesh ritiy rey? (b) Ov, chom ik chikeza kukushiken anch wawanyish ntong jinej mu machuku makemp?

⁷ Mulong wa kukukwash ukasikesha ritiy rey, ov, mulong wak ukutwishap kwitekin ntong jimwing ja kuwanyish mu machuku makemp? Rutong rimwing rikutwish kwikal ra kulembil dichuku ni dichuku. Chakwel malembil mey mikala zwang ni ma pakampwil, ufanyidin kulam mu manangu ap kufund milong yimwing yikash ya kushikena muten yiusotina kujimbul mu malembil mey. Ikal nich kashinsh anch ukezap kujimbul ching kusu yom warisha nich pakwez ukez kulembil kand piur pa yom yiwasangera. (Fil. 4:6) Rutong rikwau ridi ra kutang Bibil dichuku ni dichuku. Ov, wij anch, anch watang mapaj manying pa dichuku, ukez kapwish kutang Bibil mwawonsu mu muvu umwing?a Kuseng 1:1, 2 ulondin anch: “Wayuk muntu . . . ukat kusangar pakulondul Yijil ya [Yehova], ukat kuyilej muten ni uchuku.”

⁸ Rutong ra kasatu ra kuwanyish mu machuku makemp ukutwisha kwitekin ridi ra kwirijek mulong wa kwakul ku chikumangan ni chikumangan cha chikumangen. Cha kusambish, ukutwish kusambish kutang yakul ap maverse. Kupwa, ukutwish kwikal nich rutong ra kwakul mu mazu mey amwiney. Chakin kamu, yisu yawonsu wakwila, ukat kupan mulambu kudi Yehova. (Heb. 13:15) Anch wawanyish ntong jinej, ruchingej rey rikez kupam, ni kujikitish kwey kudi Yehova, ni ukez kwikal tayad mulong wa kwitekin ntong ja mu machuku ma kurutu.

9. Anch kandikal wikala mwin kulejan Want, ov, ntong ik ja kuwanyish mu machuku ma kurutu jiukutwisha kwitekin?

⁹ Ov, ntong ik ja kuwanyish mu machuku ma kurutu tukutwisha kwitekin? Anch kandikal usambisha kulejan rusangu ruwamp patok, rutong rey ra mu machuku ma kurutu rikutwish kwikal ra mwin kulejan Want. Piukeza kuwanyish rutong riner riwamp, ukez kasot kwikal mwin kulejan wa chisu chawonsu ni usongina mabuj, kangal wakangany kulejan ngond ap umwing. Ukez kusot kand kwilej mutapu wakusadil Bibil mu mudimu wa chingand. Piusadila mwamu, ukez kujingunin anch musangar wey ukupandikan nakash mu mudimu wa kulejan. Chawiy lel, ukutwish kusutish yisu yiwanyidina mu mudimu wa kulejan ku chikumbu ni chikumbu ap kupakish kutakel malejan ma Bibil. Piudia mwin kulejan wakad kubatish, Ov, rutong ik ridia ra usey nakash kupandakanamu rutong ra kuwanyish yitinau chakwel utambula dibatish ni ushikena ku kwipan ni kwikal Kaman wa Yehova Nzamb mwin kubatishiu?

10, 11. Ov, ntong ik ja machuku ma kurutu jikutwishau antu abatishau kal kwitekin ayinau?

¹⁰ Anch wikadil kal kashalapol wa Yehova mwin kubatishiu, kudi ntong ja mu machuku ma kurutu ufanyidina kuwanyish. Yisu yimwing ukutwish kukwash chikumangen mu mudimu wa kulejan mu chingand chakad kwendil nakash. Ukutwish kand kusadin usu ni ukash wey wa mujimbu mu mudimu wa uchibol nkwash ap wa rawonsu. Tunan ni tunan twa ayibol akweta musangar tukez kukulej anch mudimu wa chisu chawonsu yidi njil ya yiyukish yiufanyidina kulondul mulong wa kumuvurik Sakatang wey mu usand wey. Yiney yawiy ntong yiukutwisha kuwanyish piudia kud anvajey. Chikumangen chen chikez kutaninamu kand yiyukish yidiokila ku kuwanyish ntong jinej.

¹¹ Ntong jikwau ja mu machuku ma kurutu jikez kukutwal pol pa chikumangen chey. Chilakej, ukutwish kutenchik chakwel uya kusal kwindond yikwau ap mwin ngand yikwau yikweta kuswir nakash kwa in kulejan. Ukutwish kukwash mudimu wa kutung Yot ya Want ap mabiro ma mitiy ma mwi ngand ya wingendj. Ukutwish kwandam ap mu mudimu wa Betel ap kwikal mishoner. Chakin kamu, rutong ra usey nakash ufanyidina kuwanyish kurutu kwa kuya kulemp ni kuwanyish ntong ja mu machuku ma kurutu jilejanau pinap ja kutambul dibatish. Anch kandikal utambula dibatish, shinshikin pa chiufanyidina kusal mulong wa kuwanyish ntong jinej ja usey nakash mu mwom wey.

Wanyish Rutong ra Dibatish

12. Ov, mulong wak antu amwing atambwiling dibatish, ni mulong wak mayingish minam mawanyidinap?

¹² Ov, mutapu ik ukutwisha kurumburil rutong ra dibatish? Antu amwing akutwish kutong anch didi diking ku kwipan mu chitil. Akwau akutwish kutong anch afanyidin kuyibatish mulong ayibatish kal arund nau. Ansand akwau akutwish kusot kuyisangaresh anvajau. Pakwez, dibatish didiap chom chikutwisha kutukangesh kusal yom yitukutwisha kusal mu ujindj; ufanyidinap kutambul dibatish mulong wa yipwichik ya antu akwau bwat. Ufanyidin kutambul dibatish piukeza kwijik nawamp kurumburik kwa yom yitinau mulong wa kwikal umwing wa Atuman a Yehova ni piukwikala nich kashinsh anch udi tayad ni usotin kusend chisend chinech.—Mul. 5:4, 5.

13. Ov, mulong wak ufanyidin kutambul dibatish?

¹³ Diyingish dimwing ditufanyidina kutambwil dibatish didi mulong Yesu wayinkisha in kumulondul mudimu anch “yikarumunany kwikal in kwilejam. . . . Yibatishany.” Ndiy waleta kand chilakej kusutil ku kutambul dibatish. (Tang Mateu 28:19, 20; Marko 1:9.) Chikwau kand, dibatish didi rizau rimwing ra usey kudi antu asotila kupand. Kupwa kwa kulejan piur pa kutung wat kudi Nowa mwa yilanay dijuku diend ni amwinend pa chisu cha Mabeb ma mem, kambuy Pita walonda anch: “Mem minam chidi chijingidij cha dibatish, . . . mulong wa kuvumbuk kwa Yesu Kristu.” (1 Pita 3:20, 21) Chawiy lel, chinech chirumburikinap anch, dibatish dined didi diking utambwila dia kukulam pa chisu chikeza kushiken mar. Pakwez, watambula dibatish mulong umukatin Yehova ni usotin kumusadil nich muchim wey wawonsu, nich mupim, nich manangu mey mawonsu, nich usu wey wawonsu.—Mar. 12:29, 30.

14. Ov, mulong wak antu amwing akat kwidjidjek kubatishiu, pakwez ukashinsh ik ukweta?

¹⁴ Antu amwing akutwish kwidjidjek kutambul dibatish mulong ovil wom anch akutwish kuyopat pa yisu yikwau. Ov, wovil niyey wom winou? Anch chidi mwamu, chirumburikinap anch wom winou udi wakad usey. Chimekeshin anch uteshin kurumburik kwa usey wa chisend cha kwikal umwing wa Atuman a Yehova. Ov, kukutwish kwikal kand diyingish dikwau? Pamwing ap kandikal witiyija anch kuziyil ku yany ya Nzamb kudi kwa usey mu mwom wey. Pa chinech, kutongijokin piur pa yibudikin yikata kuyishiken antu akad kuziyil ku yany ya Bibil kukutwish kukukwash chakwel ukwata mupak. Chikwau kand, ukatin pamwing ap yijil ya Nzamb pakwez amwiney ukwetap ukashinsh anch ukutwish kuziyil ku yijil yiney mu mwom wey. Chikutwish kwikal chakin kamu chitongijok chiwamp, mulong chimekeshin anch udi mwin kwikepish. Chad, Bibil ulondin anch michim ya antu awonsu akad kuwanyin yidi ya rubabek. (Jer. 17:9) Pakwez ukez kutwish anch wadandamen ‘kulam dizu dia [Nzamb].’ (Tang Kuseng 119:9.) Chikalap mayingish ma kubachikina ku kwidjidjek kubatishiu, ufanyidin kupwish milong ni yakamish yiney.b

15, 16. Ov, mutapu ik ukutwisha kulond anch udi tayad mulong wa dibatish?

¹⁵ Pakwez, mutapu ik ukutwisha kulond anch udi tayad mulong wa dibatish? Chakusambish, ufanyidin kwiyipul amwiney yipul yiney: ‘Ov, nikutwish kurumburil kudi antu akwau malejan majim majim ma Bibil? Ov, nikat kwipan mu mudimu wa kulejan ap anch anvaj am kakatap kwipan mu mudimu winou? Ov, nikat kusal usu wa kukumangan ku yikumangen yawonsu ya win Kristu? Ov, nikutwish kuvurik yisu yimwing narisha ku yipwichik ya arund? Ov, nikutwish kudandamen kumusadil Yehova ap anch anvaj ni arund nam akat kwinkangesh kusal mwamu? Ov, nalembila piur pa urund wam ni Nzamb? Ov, nipanin nich muchim wam wawonsu kudi Yehova mu malembil?’

¹⁶ Dibatish didi rizau ra kukarumun mwom rifanyidina kukwat nich usey. Ov, udi mwin kukul kamu mulong wa kushinshikin nawamp rizau riner? Kukul kurumburikinap ching kwijik kusal madiskur mawamp ku chimet ap kwakul mu mutapu ushimokishina ku yikumangan. Pakwez, chitin kukwat nawamp mipak yimedina pa ronganyin ra yany ya Bibil. (Tang Hebereu 5:14.) Anch udi pa chisu cha kukwat mupak winou mu mwom wey, anch witekin rutong ra kusal mwamu chidi chisend chijim nakash—cha kumusadin Yehova nich muchim wawonsu ni kushakam mu mutapu umekeshina anch wipanin chakin kamu kudi ndiy.

17. Ov, chom ik chikeza kukukwash chakwel urisha nich yoziu yikutwisha kushiken kupwa kwa dibatish diey?

¹⁷ Kapamp kamwing kupwa kwa kutambul dibatish, ukutwish kwikal ni mushiku upandikena wa kumusadin Nzamb. Chawiy lel, ukutwish kurish piswimp ap nich yoziu yikeza kupak ritiy ni ukaliweny wey. (2 Tim. 3:12) Kangal watong anch udi ching amwiney urishina nich yoziu yiney. Tesh yiyul yidiokila kudi anvajey. It ukwash kudi antu akudila kal adia mu chikumangen. Lam urund ni antu akeza kukukwash. Kangal wavuramen anch Yehova ukat kukulam, ni ndiy ukez kukwinkish usu uswiridina chakwel urisha nich mikadil yawonsu yikutwisha kushiken.—1 Pita 5:6, 7.

Ov, Mutapu ik Ukutwisha Kuwanyish Ntong Jey?

18, 19. Ov, mutapu ik ukutwisha kutaninamu anch washinshikin piur pa yom utekina pa ndond ya kusambish?

¹⁸ Chikalap nchik yitongijok yey yiwamp, ov, chimeken anch kandikal wikala ni chisu chiwanyidina mulong wa kusal yiusotina ni yiuswiridina kusal? Anch chidi mwamu, ufanyidin kushinshikin yom utekina pa ndond ya kusambish. Chilakej: Send chitung cha plastik ni tek mwinomu mayal majim-majim. Kupwa wejinamu usukuril ni kumizwish. Ukwikal nich chitung chizwila mayal ni usukuril. Chad, diosh mu chitung chinech usukuril ni mayal. Sambish kutekamu bil usukuril, ni kupwa pakish kutek mayal mu chitung chinech. Mukwikalap kand ndond. Mulong wateka usukuril pa ndond ya kusambish.

¹⁹ Ukutwish kurish nich yikokujol mudi yiney piutenchikina chisu chey. Anch watek yom mudi kwipuwangesh pa ndond ya kusambish, ukez kuman mudi ukwetap kand chisu cha kusal yom ya usey mu mwom wey—mudi kumusadil Nzamb. Pakwez anch walondul chiyul cha Bibil cha “kujingunin yom yipandakena kuwap,” ukez kuman anch ukwet chisu cha kukimb yisakin ya Want ni cha kwipuwangesh.—Fil. 1:10.

20. Ov, chom ik ufanyidina kusal anch wasambish kwov wom ni kwidjidjek piusadina usu wa kuwanyish ntong jey?

²⁰ Piusadina usu wa kuwanyish ntong jey, kuwejaku ni dibatish, ukutwish kuman yakamish ni kwidjidjek mu machuku malondwilaku. Anch ‘wapan yakamish yey yawonsu kudi [Yehova] ndiy ukukulam.’ (Kus. 55:22) Katat, ukwet chisu cha kusal mudimu umwing wamushena ni wa usey nakash mu rusangu ra muntu, kampany wa kulejan ni kufundish mu mangand mawonsu. (Mid. 1:8) Ukutwish kutond kulik kusal pamwing mudimu winou. Ap ukutwish kusal niyey mudimu winou. Kangal walik kusadil ukaliweny wey mu kumusadin Nzamb ni kukasikesh yisakin ya Want wend. Kiukezap kwinan dichuku ap dimwing mulong wa kumusadil “Sakatang wey mu machuku ma usand wey.”—Mul. 12:1.

[Mazu madia kwishin kwa paj]

Ov, Mutapu ik Ukutwisha Kwakul?

• Ov, mutapu ik ufanyidina kwitekin ntong?

• Ov, ntong ik jimwing jiwapidila kuwanyish?

• Ov, chom ik chifanyidina kusal mulong wa kuwanyish rutong ra kutambul dibatish?

• Ov, kushinshikin yom utekina pa ndond ya kusambish kukukwashin kuwanyish ntong jey mutapu ik?

[Chipich chidia pa paj wa 23]

Ov, ukwet rutong ra kutang Bibil dichuku ni dichuku?

[Chipich chidia pa paj wa 24]

Ov, dilejan ik wileja kal kusutil ku chilakej chinech?