Yehova Ndiy Mukaleng Mwant Wetu!

“Natekin kal ruchingej ram mwin Nzamb Nsalejam.”—KUS. 73:28, TMK.

1. Kwambatan ni mazu mend mafundilau mu 1 Korint 7:31, ov, Paul wading chakin kamu wisambidin piur pa chom ik?

KAMBUY Paul walonda anch “Yom ya mangand minam yikat kusut.” (1 Kor. 7:31, TMK) Chakin kamu, chimeken anch wamana mudi mangand pa chimet nich in kusengan akweta chisend chikala chiwamp ap chiyimp kushik ni ku kuswimp kwa yom.

2, 3. (a) Kurishish kwa ukaleng wa Yehova akwisikesha nich ik? (b) Yipul ik tukushinshikina?

² Nlel unou, mwikadil kanang wa usey ujim ukat kushiken —ni ukutadil niyey! Wambaten cha pakampwil nich kutentam kwa ukaleng wa Yehova Nzamb. Mwikadil winou akutwish kuurumburil kusutil ku mwikadil udia mwi ngand yimwing. Ku mutambu umwing, kudi anyikel itiyikina ayikedila mulong wa kutenchik yom. Ku mutambu ukwau, kudi ditenchik diyimp diyikedila nich wij, chisum, ni kujipan. Dirijek diakad kutentam didi chikokujol pantaliken ni mwant mwin mangand ni kupakiu kwa an a ngand pantaliken ni winyikel wau.

³ Mwikadil wa chilik chimwing udiaku pa mangand mawonsu. Kudi winyikel witiyikina wa ‘Mukaleng Mwant Yehova.’ (Kus. 71:5) Pakwez antu katat adi mu ubaj wa dirijek diyimp ditakedilau kudi “Sakudimban.” (1 Yoh. 5:19) Dikat kurishish winyikel witiyikina wa Nzamb ni kupak kushinshaman kwa antu awonsu alamatina ku winyikeI wend. Ov, chom ik chasala chakwel kwikala mwikadil winou? Mulong wak Nzamb ulikididil chom chinech? Chom ik tukutwisha kusal puir pa chinech muntu ni muntu ipend?

Mulong Ukwatakena nich Disengan

4. Ov, disengan dijikena pa mangand diambaten nich mitu ya milong ik yaad yovijadina?

⁴ Disengan dined dijikena pa mangand mawonsu diambaten nich mitu ya milong yaad yovijadina: Ukaleng wa Yehova ni kushinshaman kwa antu. Mu Bibil Yehova amutazukin yisu yivud anch ‘Mukaleng Mwant.’ Chilakej, nich kumuchingejin rawonsu, nfund a kuseng wawanga anch: “Natekin kal ruchingej ram mwin Nzamb Nsalejam.” (Kus. 73:28, TKM) “Ukaleng” udi usu ap winyikel upandakenamu wawonsu. Mukaleng ukat kusadil winyikel wa piur nakash. Kudi mayingishil mawamp ma kumuman Yehova Nzamb mudi muntu wa piur nakash.—Dan. 7:22.

5. Ov, Mulong wak tufanyidin kwikal abachikinau kukasikeshin ndond ya piur ya ukaleng wa mangand mawonsu wa Yehova?

⁵ Chidiay Sakatang, Yehova Nzamb udi Mukaleng wa divu ni mangand mawonsu (Tang Kujingunik 4:11.) Yehova udi kand Nkalansambu wetu, Mwin Kupan Yijil, ni Mwant, mulong amwinend usadil midimu yawonsu ya kurumburish, kutek chijil, ni winyikel wa mangand mawonsu usadila achiziyila chijil. (Isay 33:22) Mulong Nzamb ndiy wasala twikalaku ni tumuchingejidin ndiy, tufanyidin kumuman mudi Mukaleng Mwant. Tukez kikal abachikinau kwikal akasikeshidina ndond yend ya piur nakash anch twalam chisu chawonsu mu manangu anch “[Yehova] wakasikesh kal ditand diend mwiur, ndiy udi Mwant wa yom yawonsu.”—Kus. 103:19; Mid. 4:24.

6. Ov, kashinsh chom ik?

⁶ Chakwel kukasikeshin ukaleng wa mangand mawonsu wa Yehova, tufanyidin kushal in kashinsh kudi ndiy. “Kashinsh” udi mwikadil uwanyidina ap wakad ulim. Muntu mwin kashinsh udi muntu wakad kufish nich ni utentamina. Nshankur Job wading muntu wa mutapu winou.—Job 1:1.

Mutapu Wasambisha Disengan

7, 8. Mutapu ik watadikijay Satan mbil ja ukaleng wa Yehova?

⁷ Piswimp kwinyim kwa mivu 6 000, chitang cha muspiritu chimwing chatadikija mbil ja ukaleng wa Yehova. Maku ma choy ma kwikal wifukwidilau mawiy mabachika mazu ni yisal ya ntombuj winou. Wayibachika antu aad a kusambish, Adam ni Ev, ku kulik kushinshaman ku ukaleng wa Nzamb ni kupakish kusal dijin dia Yehova kusutil ku kulond anch Wayidimba (Tang Disambishil 3:1-5.) Ntombuj washikena ku kwikal Mukankuny mujim Satan (Chipad), Djabul (Sakafukej), nnak (sakudimban), ni nnak mujim (chidiany).—Kuj. 12:9.

⁸ Satan witeka amwinend mudi nyikel chipad. Kurutu kwa kurishish mudi kwinoku, ov, chom ik chafanyidinay Mukaleng Mwant Yehova kusal? Ov, wela kapamp kamwing kuyishesh antombuj awonsu asatu—Satan, Adam, ni Ev? Chakin kamu wading ni usu wa kusal mwamu, ni chisal mudi chinech chela kumekesh anch Yehova ukwet usu upandakenamu wawonsu. Chela kand kumekesh anch Yehova walonda yakin piur pa chibau cha kujip chijil chend. Mulong wak Nzamb kasalap chisal cha mutapu winou?

9. Yom ik yatadikijay Satan?

⁹ Kusutil ku kudimban ni kuyidiosh Adam ni Ev mwin njil ya Nzamb, Satan watadikija mbil ya Yehova ya kwikal ufanyidinau kuziyil kudi antu. Chikwau kand, kusutil ku kuyishikij antu aad a kusambish ku kumubwambwil Nzamb, Satan watadikija kand kushinshaman kwa yitang yawonsu yikweta manangu. Mudi kamu mulejenau piur pa Job, wadinga ushinshamena ku ukaleng wa Yehova, Satan walonda anch ukutwish kuyidiosh antu awonsu kudiay Nzamb.—Job 2:1-5.

10. Kusutil ku kulik kuyishesh kapamp kamwing, yom ik yatwishishay Nzamb?

¹⁰ Kusutil kulik kuyishesh kapamp kamwing, Yehova wamutwishisha Satan kwikal nich chisu cha kumekesh uyakin wa mazu mend. Nzamb wayinkisha kand antu chisu cha kumekesh kushinshaman kwau ku ukaleng wend. Ov, yom ik yasadika mu kusut kwa yitot ya mivu? Satan watunga dirijek diyimp dia usu nakash. Yehova ukez kadishesh ni kumushesh Djabul, ni kupan uman ujim wa kutentam kwa ukaleng wa Nzamb. Yehova Nzamb wading nich kashinsh ka chibudikin chiwamp chasambelay kulejan pasambisha wintombuj mu Eden.—Dis. 3:15.

11. Yom ik yasalau antu avud nich kalimish ku ukaleng wa Yehova?

¹¹ Antu avud itiyija ni alama kushinshaman kwau ni kalimish ku ukaleng wa Yehova ni kutumbish dijin diend. Mu uvud winou mudi Abel, Enok, Nowa, Aburaham, Sara, Moses, Rut, David, Yesu, atwimbuy a Kristu akusambish, ni mamiliyon ma antu alamina kashinsh nlel unou. Antu in kukasikesh ukaleng wa Nzamb mudi inay amekeshin anch Satan udi samakasu ni kutokish dijin dia Yehova ku masaal mapandakena masaalanay Djabul nich kulond anch ukutwish kuyidiosh antu awonsu kudiay Nzamb.—Jinsw. 27:11.

Chakin Disengan Dikwet Chibudikin

12. Ov, mutapu ik tukutwisha kuchingejin anch Nzamb kakezap kulikidil rawonsu uyimp?

¹² Tukutwish kuchingejin anch Yehova ukupwish mulong utadila ukaleng wend. Ndiy kakezap kulikidil uyimp rawonsu, ni twij anch tushich mu machuku ma nsudiel. Yehova wasala chisal pantaliken ni uyimp pa chirung cha Mabeb. Washesha Sodom ni Gomor ni Farao ni amasalay end. Sisera ni amasalay end ni Sanakerib ni yisak ya amasalay end in Asiria katwishap kurutu kwa Udia Piur Nakash. (Dis. 7:1, 23; 19:24, 25; Kub. 14:30, 31; Ank. 4:15, 16; 2 Ant 19:35, 36) Chawiy lel, tukutwish kuchingejin anch Yehova Nzamb kakezap kulikidil rawonsu kuburen kalimish ku dijin diend ni mar mayimeshinau Atuman end. Chikwau kand, tumen nlel uman wa chijingidij cha kwikalaku kwa Yesu ni cha nsudiel ya ditenchik dined diyimp dia yom.—Mat. 24:3.

13. Mutapu ik tukutwisha kwiyep ku kusheshik pamwing ni akankuny a Yehova?

¹³ Chakwel kwiyep kusheshik pamwing ni akankuny a Nzamb, tufanyidin kushinshaman ku ukaleng wa Yehova. Mutapu ik tukutwisha kusal mwamu? Chidi kusutil ku kwiyauril ni winyikel uyimp wa Satan ni kulik kuyov antu end wom. (Isay 52:11; Yoh. 17:16; Mid. 5:29) Tukutwish kukasikesh ukaleng wa Tatukwetu wa mwiur ching kusu anch twashal aurikina ni winyikel wa Satan ni kwikal ni richingej ra kwikal akupand pa chisu chikutokishay Yehova dijin diend ku masaal ni kumekesh anch ndiy Mukaleng wa Mangand Mawonsu.

14. Ov, chom ik chilejenau mu yikunku kushalijan ya Bibil?

¹⁴ Alejen mu Bibil kachom ni kachom piur pa antu ni ukaleng wa Yehova. Mashapitre masatu ma kusambish ma Bibil matulejin piur pa chitangil ni kuwil kwa muntu mu chitil, Pakwez, mashapitre masatu mansudiel misambidin piur pa kukolik kwa antu. Mapaj mavud malejen kachom pa kachom piur pa jinzau jakwatau kudi Mukaleng Mwant Yehova mulong wa kuwanyish rutong rend piur pa antu, pa divu, ni pa mangand mawonsu. Disambishil dilejen mutapu Satan ni uyimp wandama mu mangand, ni chikunku cha nsudiel cha Kujingunik chilejen mutapu akezau kadiosh uyimp, kumushesh Djabul, ni kusadik kwa rusot ra Nzamb pansh mudi mwiur. Chikwau kand, Bibil wisambin piur pa chom chaleta chitil ni rufu ni umekeshin kand mutapu akezau kuyidiosh pa divu ni kuyiswimp nich musangar wakad nsudiel ni mwom wa chikupu kudi antu akashinsh.

15. Ov, chom ik tufanyidina kusal chakwel tutaninamu ayinetu chakwel disengan diambatena ni ukaleng wa Nzamb dipwa?

¹⁵ Piswimp ap yom ya mangand yikez kukarumuk nakash. Mulong wa kutadikij ukaleng wa Nzamb ukez kupwa. Satan kakezap kutakel ni akez kamushesh. Pakwez, chakwel kutaninamu mu yiyukish yivud yatakelay kulejan mu Dizu dia Nzamb, tufanyidin kukasikesh ukaleng wa Yehova, nlel unou. Tufanyidinap kushal pakad kukwat mupak. Chakwel tutwisha kulond anch: “[Yehova] udi ni yamam,” tufanyidin kushal ku mutambu wend.—Kus. 118:6, 7.

Tukutwish Kulam Kashinsh!

16. Ov, mulong wak tukutwish kwitiyij anch chiswapel kudi antu kulam kashinsh kudi Nzamb?

¹⁶ Tukutwish kukasikesh ukaleng wa Yehova ni kulam kashinsh ketu, mulong kambuy Paul wafunda anch: “Yoziu yikata kushik kudi en, yawiy kand yikata kushik kudi antu awonsu. Pakwez Nzamb udi mwin yakin, kakwitiyap yoziu kukupandakany en. Piyikushikena yoziu yiney, ndiy ukukulejany mutapu wa kukwasanik chakwel ukupandakany wakad kuwa.” (1 Kor. 10:13) Ov, chom ik chidia musul wa yoziu yisambinay Paul, ni mutapu ik waletay Nzamb jinjil ja kuyipandakan?

17-19. (a) Ov, ku choziu ik kwawilau in Isarel mwimpay? (b) Mulong wak chitwishikin kudi etu kulam kashinsh ketu kudi Yehova?

¹⁷ Mudi mumekeshina yom yayishikena in Isarel mwimpay, “Yoziu” yikata kushikenang kusutil mikadil kanang yikutwisha kutubachik chakwel tujirila chijil cha Nzamb. (Tang 1 Korint 10:6-10.) In Isarel ela kurish nich yoziu, pakwez awiy asota “yom yiyimp” payinkishay Yehova mu chilay angwad avud mwin ngond umwing. Ap anch antu ashakama chisu chimwing pakad mbij, Nzamb wayinkisha mana mavud chakwel adia. Pakwez, awila mu yoziu ya ris ripandakena pakungulau angwad.—Kuch. 11:19, 20, 31-35.

¹⁸ Pakusambish, patambulay Moses Chijil ku Mukandu wa Sinay, in Isarel asambisha kwifukwil akish, ni kwipan mu kwifukwil musamb a ngomb ni mu maku mayimp. Kuburen kwa ntakel wakad kumekan ni mes kumekeshin anch kwadingap wa kuyikangesh kuwil mu choziu chinech. (Kub. 32:1, 6) Kapamp kamwing kupwa kwa kwandam Mwingand ya Kushilamu, tunan twa in Isarel atupwitina kudi amband a in Moab, asambisha kusal nau masandj. Pa chisu chinicha, tunan twa in Isarel twafa mulong wa yitil yau. (Kuch. 25:1, 9) Pasuta mivu, in Isarel awila mu yoziu ya kwinan kwa wimbwambwol, pa chisu chinicha asambisha kumwel Moses ni Nzamb amwinend yom yiyimp! (Kuch. 21:5) In Isarel inana ap kupwa kwa kusheshik kwa antu ayimp mudi Kore, Datan, Abiram, ni anamakwau, awiy asambisha kutong nayimp anch kusheshik kwa ambwambwol inay kwadingap kutentamina. Mudi chibudikin, in Isarel 14 700 asheshika ku chipupu chatumay Nzamb.— Kuch. 16:41, 49.

¹⁹ Kwikil yoziu ap yimwing yalejanau yadinga yakad in Isarel kukangany kurish nich. Antu awila mu yoziu mulong ashadisha ritiy rau ni kumuvuramen Yehova, rukat rend rayilama, ni kutentam kwend kwayiteka mu jinjil jend. Mudi mwayishikena in Isarel, yoziu yawonsu yitukutwisha kurish nich, yikat kushikenang antu awonsu. Anch twasal usu uswiridinau wa kurish nich ni kumuchingejin Nzamb anch ukez katulam, tukutwish kulam kashinsh ketu. Tukutwish kuchingejin chinech mulong “Nzamb udi mwin yakin” ni kakezap kulikidil chakwel “yoziu [yitupandakana].” Yehova kakezap kutulik ni kusal anch tuwila mu mikadil yikutwisha kuyikangesh antu kusal rusot rend.—Kus. 94:14.

20, 21. Piturishina nich yoziu, ov, mutapu ik utulejinay Nzamb “mutapu wa kukwasanik”?

²⁰ Yehova utulejin “mutapu wa kukwasanik” kusutil ku kutukasikesh chakwel turisha mu yoziu. Chilakej, in kutuzengol akutwish kusambish kutumesh mar ku mujimbu chakwel atubachika ku kulik ritiy retu. Yisal yiney yikutwish kutwinkish chitongijok cha kulik ritiy retu mulong wa kwipuk kutubul, kutumesh mar makash, pamwing ap kuchin rufu. Pakwez, kwambatan nich dikasikesh dia Paul diapepilau mu 1 Korint 10:13, twij anch mwikadil ukata kulet yoziu uding kusu wa chisu chikemp. Yehova kakezap kulikidil upandakana ni kushiken mu kutukangesh kushal ashinshamena kudi ndiy. Nzamb ukutwish kukasikesh ritiy retu ni kutwinkish usu tuswiridina chakwel tulama kashinsh.

²¹ Yehova utukasikeshin kusutil ku spiritu wend utumbila. Spiritu winou ukat kutuvurish kand yitongijok yidia mu Mukand wa Nzamb yituswiridina chakwel turisha nich yoziu. (Yoh. 14:26) Chawiy lel, kakezap kutudimb chakwel tusala yom yiyimp. Chilakej, tuteshin milong yakwatijadina nich ukaleng wa Yehova ni usey wa kulam kashinsh ketu. Nich ronganyin riner, antu avud ayikasikesha kudi Nzamb chakwel ashala ashinshamena djat ni ku rufu. Pakwez ridiap rufu rayinkisha mutapu wa kukwasanik; Yehova ndiy wayikwasha chakwel atwisha kujijaman djat ni kwinsudiel pakad kuwil mu yoziu. Ndiy ukutwish kusal chilik chimwing ku mutambu wetu. Pa chinech, ndiy ukat kusadil kand angel end ashinshamena mulong wa kutukwash mudi atushalapol mulong “ndiy wayituma mulong wa kuyikwash antu akeza katambul dipandish didiokila kudi Nzamb.” (Heb. 1:14) Mudi mulejanau kudi mutu wa mulong ulondwilaku, ching kusu antu in kashinsh awiy akutwisha kuchingejin kwikal ni chisend chisangareshina cha kukasikesh ukaleng wa Nzamb chikupu. Tukutwish kwikal pakach pau anch twalamat dang kudi Yehova mudi kudi Mukaleng Mwant wetu.

Ov, Mutapu ik Ukutwisha Kwakul?

• Ov, mulong wak tufanyidin kwitiyij anch Yehova udi mukaleng Mwant wetu?

• Ov, chom ik chirumburikina kulam kashinsh ketu kudi Nzamb?

• Mutapu ik twija anch piswimp ap Yehova ukez kukasikesh ukaleng wend?

• Kulondulijan nich 1 Korint 10:13, ov, mulong wak chitwishikin kulam kashinsh?