Ov, Mulong Wak Tufanyidin Kulam Kashinsh Ketu?

“Nrumburishap, A [Yehova, NW], . . . mudi mudia kashinsh kam.”—KUS. 7:8.

1, 2. Mikadil ik yimwing yipalangena katat yitekininga mu chak kashinsh ka mwin Kristu?

TONGIJOKIN bil pa mikadil yisatu: Nsangarum umwing uyitadil ambay nend a ku shikol. Amusarumwin chakwel ova ujim, pamwingap kusutil ku kumusal ap kumutendish. Ov, ukwifundakesh, ap ukutwish wipwit ni ukuya kwend? Ngand udi kwolikwend amwinend ukat kukimbijol pa Internet. Kadidish kamwing kamekan pa dikalash dia ordinater wend, kalejena ndond yimwing ya Web yijondila. Ov, choziu chikumukwat chakwel aburila dididish dined, anch ukwiyep kamu? Mband mwin Kristu wambambin pamwing ni anambaz akwau kupwa minsamb yakarumuk yikal, ya kuyinyinyit anambaz adia mu chikumangen. Ov, ukushakam wadandamen mu minsamb yiney bil anch ukusot mutapu wa kukarumun minsamb?

² Ap anch mikadil yiney yishalijadin, pakwez yawonsu yikwet chom chimwing chifanikena: Yawonsu yikwatin ku kurish nich chakwel kulam kashinsh mudi mwin Kristu. Ov, ukat kubangin kashinsh key mu manangu mey pa chisu ushinshikidina yakamish yey, maswir mey, ni jintong jey mu mwom? Dichuku ni dichuku, antu akat kutonginang mudi mukumekena yifu yau, pa ukash wa mijimbu yau, yikokujol ya kutan yom ya wom, usu uwamp ni uyimp wa arund, pamwingap ni pa urund wa rukat pakach pa ikundj ni mband. Tukutwish twayibangin nakash yom yiney. Ov, chom ik lel, pakampwil chikimbiningay Yehova pakatay kuupapat muchim wetu? (Kus. 139:23, 24) Kadi kashinsh ketu.

3. Kutond ik kwa pakampwil kutulikidinay Yehova chakwel tutonda, ni chom ik tukushinshikina mu mutu winou?

³ Yehova, mwin Kupan “yom yawonsu yiwamp ni yiwanyidina,” wamwinkisha umwing ni umwing wetu yipan kushalijan. (Yak. 1:17) Tumujikitishin nakash, mulong watwinkisha mujimbu wetu mudi chipan, manangu, chilik cha ukash wa mujimbu, ni ngikadil kushalijan. (1 Kor. 4:7) Pakwez, kakatap kushindil chakwel twikala in kashinsh. Ndiy utulikining etu ayinetu chakwel tumekesha ngikadil yiney. (Kuv. 30:19) Chawiy tuswiridin komb, tushinshikina chidinga kashinsh. Tushinshikin kand mayingishin masatu malejena usey ujim wa ngikadil yiney.

Kashinsh Chom Ik?

4. Mu kashinsh mudi ik, ni chom ik tukutwisha kwilejin ku chijil cha Yehova piur pa milambu ya annam?

⁴ Antu avud ameken mudi anch kijap kwau chidinga kashinsh. Chilakej, pakatau in mafef kwibaz mulong wa kashinsh kau, chisu chivud amekening anch asotin kwisambin piur pa win-yakin. Ngikadil yiney yidi ya usey ujim, pakwez yidi kwau chikunku cha kashinsh. Mu Bibil, dizu kashinsh disambidin mwikadil uwanyidina, kwikal wakad ulim. Dizu dia Hebereu dirumburikina “kashinsh” didiokil ku dizu dirumburikina kwikal wakad ulim, wa kabuj, ap wakad kurumbuk. Mutapu umwing wadisadilangau wadinga piur pa milambu yadingau ni kumulambul Yehova. Chakwel itiyija nnam wadingau ni kulambul chafanyidina ching ikala wakad ulim, ap anch wakabuj. (Tang In Levi 22:19, 20.) Yehova wadinga ni kuyipup mu mutapu ukash antu adinga ni kujiril chijil chinech anch apesh annam ayilim, ayej, ap amputames mudi mulambu.—Mal. 1:6-8.

5, 6. (a) Yilakej ik yilejena chakin kamu anch pa yisu yivud tukatin chom cha kabuj, ap anch chiwanyidina? (b) Pa mulong utadila kuburen kuwanyin kwa antu, ov, kashinsh karumburikin kwikal wakad chitil? Rumburil.

⁵ Chitongijok cha kukimb ni kukwat nich usey chom chidia cha kabuj, ap chiwanyidina, chikasikenap kutesh. Tongin mudi chilakej, mwin kukimbijol buku wez watan yikunku yimwing ya usey nakash kupwa kwa kukimbijol, chad wajingunin anch mwikil mapaj mavud ma usey. Ushon wamukwat, kupwa wamutudik mu kabach. Ap tongin anch mband umwing udi ku chikum, ukat kunonol atutet adjibwilau kwimpat kudi mambek. Katat mband winou ukat kuzengam wanon umwing wasambish wamushinshikin, mulong yitang yiney yimusangareshin nakash. Wisu umwing lel ukulamay? Ukumulam udia wa kabuj, wakad kubarik. Chawiy chimwing, Nzamb uyikimbin antu akweta ngikadil yiney ya kwikal wa kabuj, ap anch adia awanyidina.—2 Jins. 16:9.

⁶ Pakwez ukutwish wiyipul anch kashinsh kanitin kwikal wakad chitil. Mulong wa chitil chetu ni kuburen kwetu kuwanyin, tukutwish twitongin mudi tudi buku wakad kuwanyin ap mudi chibalakat chimwing cha katet. Ov, mwamu ukata kwiyovu pa yisu yimwing? Cha usey chidi kwijik anch Yehova katuchingejidinap anch twikala awanyidina mudi mufanyidina kamu. Kakatap kutuchingejin tusala yom yakad etu kutwish kusal.a (Kus. 103:14; Yak. 3:2) Pakwez, ndiy utuchingejin anch tulama kashinsh. Ov, kudi kushalijan pakach pa kwikal wakad chitil ni kwikal nich kashinsh? Inge. Chilakej: Nsangarum umukatin changadim usotilay kwat. Chakin, kafanyidinap kumuchingejin anch ikal wakad chitil. Pakwez, chikwikal cha manangu amuchingejina anch amukata nich muchim wend wawonsu, amukata ching kamu ndiy kusu. Chawiy chimwing, Yehova udi “Nzamb wa mukau.” (Kub. 20:5) Ndiy katuchingejinap anch twikal akad yitil, pakwez tumukata nich muchim wawonsu, kumwifukwilang ching ndiy kusu.

7, 8. (a) Chilakej ik chashay Yesu pa mulong wa kashinsh? (b) Kukwatijan nich Mifund, kashinsh karumburikin ik?

⁷ Tukutwish twavurik chakul cha Yesu chisu chamwipulau pa mulong wa chijil cha kusambish chipandakena yijil yawonsu. (Tang Marko 12:28-30.) Yesu kakulap chamwamu bwat; pakwez washakama kukwatijan nich. Ndiy washa chilakej chipandakena kujimb pa mulong wa kumukat Yehova nich manangu mend mawonsu, nich muchim wend wawonsu, nich mupim wend wawonsu ni nich usu wend wawonsu. Ndiy wamekesha anch kashinsh kakat kumeken, kichidiap mu mazu ma chamwamu, pakwez kusutil ku yisal yidiokila ku manangu mawamp. Chakwel anch tulama kashinsh ketu, chitwitin tulondul mu jinzau ja Yesu.—1 Pita 2:21.

⁸ Kukwatijan nich yilondila Mifund, kashinsh ketu karumburikin anch: Kwipan nich muchim wawonsu kudiay Muntu umwing kusu udinga mwiur, Yehova Nzamb, ni ku rusot ni rutong rend yilejenau patok. Kulam kashinsh kurumburikin anch mu mwom wetu wa pichuku pichuku, chom cha kusambish tukukimba chidi kumusangaresh Yehova Nzamb. Yom yikwikala ya kusambish mu mwom wetu yifanyidin kwikal yendendiy. El tushinshikinany mayingishin masatu malejena mulong wak chidi cha usey ujim.

9. Kashinsh ketu kakwatin mutapu ik ku mulong wa ukaleng wa pa mangand?

⁹ Ukaleng wa Yehova wengamidinap pa kashinsh ketu. Ukaleng wend utentamin, wa chikupu, ni wa pa mangand mawonsu. Ukez kushal mwamu chikupu, chikalap nchik chom chikusalay ap kulond chitang ap chisu. Pakwez, ukaleng wa Nzamb aushinga nayimp majir mwiur ni pansh. Chawiy chifanyidinay kufundakesh wintakel wend—chakwel awitiyikisha kamu anch udi wa zwang, utentamina, ni wa rukat—ku mes kwa yitang yawonsu yikweta manangu. Chitudia Atuman a Yehova, tukatining twisambina piur pa ukaleng wa pa mangand wa Nzamb ni muntu win mwawonsu usotila kutesh. Ov, mutapu ik lel tukumekesh anch tudi ku mutambu wa ukaleng winou? Ov, mutapu ik tulejena anch tumutondin Yehova mudi Mukaleng wetu? Chidi kusutil ku kulam kashinsh.

10. Kufund ik kwafundanay Satan piur pa kashinsh ka antu, ov, mutapu ik usotila kusal?

¹⁰ Shinshikin mutapu ukwachikina kashinsh key. Satan walonda kal mu mutapu umwing anch kwikil muntu ap umwing ukutwisha kwikal ku mutambu wa ukaleng wa Nzamb, anch kwikil muntu ap umwing ukumusadila Yehova nich rukat kamu. Kurutu kwa chisak chijim cha yitang yivud ya muspiritu, Djabul wamwela Yehova anch: “Yom yawonsu yakwetay muntu ukuyipan mulong wa kuchidij mwom wend.” (Yob 2:4) Shinshikin anch Satan kamupanap kusu ditayeng Yob ikundj utentamina pakwez ndiy walonda mu mutapu wa kwel anch wisambidin piur pa antu in awonsu. Chakin kamu Bibil niyend umutazukin Satan anch: “Mwin kuyifund anamakwetu.” (Kubur. 12:10) Ndiy umusadil Yehova nich kulond anch in Kristu—kumwing niyey—kakutwishap ikal ashinshamena. Satan ulondil anch ukumwitun Yehova chakwel upadish mwom wey. Ov, wiyovil nchik mudi mukufundinau mwamu? Ov, ukutwishap wasanger anch wamumekesh Satan anch udi muka makasu? Kusutil ku kulam kashinsh key, ukutwish wasal mwamu.

11, 12. (a) Yilakej ik yilejena anch mutapu tukwatininga mipak yetu ya pichuku pichuku chid mulong wa kashinsh ka muntu ni muntu? (b) Ov, mulong wak kulam kashinsh kudi kwitapil dilau?

¹¹ Mulong wa kashinsh key wikadishin mwom wey wa pichuku pichuku ni kutond kwey kwikal kwa usey ujim. Shinshikin kand mikadil yisatu yitwisambinang kwisambishin kamu. Ov, mutapu ik welau kulam kashinsh kau? Nsand wadingau ni kusal kudi ambay nend a ku shikol wela kusu niyend kujiman kupwa kwifundakesh, pakwez ndiy wavurika dibabesh dined anch: “Kangal wifundikeshinany ayinen akarukat, pakwez shilany ujim wa Nzamb ndond; mulong achifunda anch: Kufundakesh kuding kudi am; yam nikeza kafutan, mwamu mwalonday Mwant [Yehova, NW].” (Rome 12:19) Ndiy waya kwend. Ngatan usadidila Internet ukutwish watal yom yilangwishina maku ma masandj, kupwa wavurik chijidik chidia mu mazu malonday Yob anch: “Nachipa machip ni mes mam, kinikutalap kand mes kudi amband.” (Yob 31:1) Chawiy chimwing, ikundj niyend walik kumalik mes mend matala yipich yilangwishina maku ma masandj, wayiyep yom yiney mudi mukatau kwiyep ulemb. Mband wisambina mu chisak mukutwishay kutesh runyinyit rikemp wiyep, wavurika chiyul chilondila anch: “Muntu ni muntu wa pakach petu amusangarisha mukwau ku kuwap kwend ni kumukudish.” (Rome 15:2) Kunyinyit kukutwishay kuchirikin kukutwishap kwakudish. Kukutwishap kwikal nich chibudikin chiwamp padiay nambaz nend mwin Kristu; ni kukutwishap kwamusangaresh Tatukwend. Chawiy wayikel rudim rend ni wakarumun minsamb.

¹² Mu mwikadil umwing ni umwing, mwin Kristu ukutonda kusal yom mwamu, chakin kamu, ulondil anch: ‘Yehova ndiy Mwant wam. Nifanyidin nisala yom yikutwisha yamusangaresh.’ Ov, mwamu umeninga kutond kwey ni mipak yey? Anch mwamu uyimeninga, ukutwish chakin kamu kushakam kukwatijan nich mazu masangareshina muchim mafundau mu Jinswir 27:11 anch: “Mwanam ikundj, ikal mwin manangu chakwel wez usangarish muchim wam, mwamu ni yam nikez katwish kumwakul muntu ukwinsala masal.” Twitapidil dilau mudi ik pa kuusangaresh muchim wa Nzamb! Ov, chidiap cha usey anch tusala usu wetu wawonsu chakwel tulama kashinsh ketu?

13. Mazu menday Yob ni David malejen nchik anch kashinsh wawiy mufulandal pakezinay Yehova kurumburishin?

¹³ Twaman kal anch kashinsh kakat kututwishish twikala ku mutambu wa ukaleng wa Yehova. Pawiy pa mufulandal pakezay Nzamb kuturumburishin. Yob wautesha nawamp win kamu uyakin winou. (Tang Yob 31:6.) Yob wadinga wij anch Nzamb ukat kuyipim antu in awonsu mwi ‘mpezil yiwamp,’ ni Ukat kusadil yijil yend yiwanyidina ya kutentam mulong wa kupim kashinsh ketu. David niyend walonda anch: “[Yehova, NW] ukat kurumburish antu! Nrumburishap, A [Yehova, NW], mudi mudia kutentam ni mudi mudia kashinsh kam. . . . Nzamb utentamin ukat kupak manangu ni muchim.” (Kus. 7:8, 9) Twij anch Nzamb ukutwish mu yid yijingamina nakash yidia mukach mwa muntu, yifanikeshina “manangu ni muchim.” Chawiy tufanyidin tuvurika chom chikimbinay. Mudi mwalonday David, Yehova ukat kurumburish mudi mudia kashinsh ketu.

14. Ov, mulong wak kitufanyidinap kutongin anch kuburen kwetu kuwanyin, kwikal kwetu aka yitil kutukangeshin kulam kashinsh ketu?

¹⁴ Tongin anch Yehova Nzamb uyipapatin mabiliyon ma michim ya antu nlel. (1 Jins. 28:9) Tupamp twinch twamanay kal muntu ulamina kashinsh ka Ukristu? Chakin kamu, tupamp tukemp! Pakwez, kitufanyidinap kutongin anch kuburen kwetu kuwanyin kukat kutukangesh nakash kulam kashinsh. Pakwez, tukwet diyingish diwamp dia kuchingejin, mudi mwasalau David ni Yob, anch Yehova ukez kututan tulamin kashinsh, chikalap nchik mutapu tudia akad kuwanyin. Vurikin anch kwikal wakad chitil kadiap kapopu ka kulam kushinshaman kwetu. Ching kusu antu asatu adinga akad yitil pa divu dined, ni aad pakach pau, Adam ni Eve, akanganya kulam kashinsh. Pakwez, kudi mamiliyon ma antu akad kuwanyin apandakana kal kulam kashinsh kau mukusalang mwamu. Niyey ukutwish kwey.

15. Mutapu ik wamekeshay David anch kashinsh ketu kadi ka usey ku ruchingej retu ra machuku ma kurutu?

¹⁵ Mulong Yehova ukez kurumburishin pa kashinsh ketu, komb kakwet usey ku ruchingej retu piur pa machuku ma kurutu. David wading wij anch chom chinech chidi chakin. (Tang Kuseng 41:12.) Ndiy wasanger nakash kwitiyik kudiay Nzamb. Chitudia in Kristu akin nlel, David wadinga uchingejin kushakam chikupu, tudandamenany kumushejin Yehova Nzamb piswimp ni kumusadil ndiy. David wamana usey wa kulam kashinsh kend anch usotil amana mutapu ukuwanyina ruchingej rend. Chawiy chimwing, Yehova utukwashin, utulejin, ututakedil, ni utuyukishin anch twalam kashinsh.

16, 17. (a) Ov, mulong wak wakwata kal mupak wa kulamat ba ku kashinsh key? (b) Yipul ik yikwisambinau mu mutu wambakedinap ou?

¹⁶ Ruchingej ridi ra usey ku musangar utwovila katat. Rikutwish ratwinkish musangar utuswiridina pa yisu ya mar. Ruchingej rikutwish kand kulam manangu metu. Vurikany anch, Bibil ufanikeshin ruchingej nich mpup. (1 Tes. 5:8) Mudi muyikata mpup kuuchidij mutu wa isalay wasina njit, ruchingej ni rawiy rikutwish rachidij manangu metu palemp nich yitongijok yiyimp, yitongijok yiyimp yilangwishinay Satan mu mangand manam mayila mu kujiy. Mwom wakad ruchingej udi wa chamwamu. Tuswiridin twishinshikina ayinetu nich kashinsh, kushinshikin nawamp win kamu kashinsh ketu pamwing nich ruchingej retu. Kangal wavuramenany anch ku kulam kashinsh, ukat kukasikeshinany ukaleng wa Yehova ni kuchidij ruchingej ren ra usey ukash mulong wa machuku ma kurutu. Ov, ukulamatany ba ku kashinsh ken!

¹⁷ Mulong kashinsh kakwet usey ujim nakash, tuswiridin kushinshikin yipul yimwing. Ov, mutapu ik tukudishina kashinsh? Mutapu ik tukutwisha kukalam? Ni chom ik chifanyidina kusal anch muntu kanang kasotilap kukalam pa chisu kanang? Mutu wa mulong wambakedinap ou ukuyisambin.

[Mazu madia kwishin kwa paj]

Ov, Ukwakul Nchik?

• Kashinsh kalondilau mulong wa ukaleng wa mangand mawonsu chom ik?

• Mutapu ik ushindamedina Kashinsh pa ruchingej?

• Mu mutapu ik kushinshaman kukutwish kwalet kushindamen mulong wa ruchingej retu?

[Chipich chidia pa paj wa 5]

Pichuku pichuku mu mwom wetu wa katat tukat kura nich yikokujol mulong wa kashinsh ketu