Ov, Ukulamatany Daang Ku Kashinsh Ken?

“Djat ni ku rufu ram nikudandamen kamu kulond anch, kinifilap nich.”—YOB 27:5.

1, 2. Mu rutung ik mutufanyidina kwiyandjik, ni yipul ik tukwisambina?

TONGIN mudi anch utadil maplan ma chikumbu. Washimok nakash pa kuman mutapu ufatwilau. Usanger pa utongidina mutapu ukeza kwikal chikumbu cha ukwash kudi ey ni ku dijuku diey. Ov, ukutwishap witiyij, anch maplan minam ni yitongijok yin yawonsu ukutwisha kwikal nich yikwikal ya usey ching anch chakin kamu watung ching, wasokinamu, ni kupwa kuchilam nawamp?

² Chawiy chimwing, tukutwish twatongin nakash pa kashinsh anch kadi ngikadil yimwing ya usey nakash yikutwisha kutwikadish etu ni antu tukatina kwikal awamp. Pakwez kutongijokin mu mutapu uwamp piur pa kashinsh kukwetap usey padi etu ching anch twakudish ni kulam kashinsh ketu ka Ukristu. Mu mangand m’ilel, kutung chikumbu kwitining nfalang nakash. (Luka 14:28, 29) Chawiy chimwing, kukudish kashinsh kwitining chisu ni usu, chikalap nchik mwamu chisu ni usu winou yidi ya usey ukash. Komb el twisambinany pa yipul yisatu: Mutapu ik tukwikala antu in kashinsh? Mutapu ik tukutwisha kulam kashinsh ketu ka Ukristu? Chom ik tukutwisha kusal anch muntu kanang walik kulam kashinsh kend pa chisu kanang?

Mutapu ik Tukwikala Antu in Kashinsh?

3, 4. (a) Yehova utukwashining kukudish kashinsh mu jinjil ik? (b) Mutapu ik tukutwisha kukudish kashinsh, mudi mwakudishay Yesu?

³ Twilejang mu mutu wa mulong wasambelangaku anch Yehova utukwatin nich kalimish patwinkishay dilau dia kukwat mupak anch tukukwikal antu in kashinsh. Cha musangar chidi anch, ndiy kakatap kutulikin etu ayinetu. Ndiy utulejin mutapu wa kukudish ngikadil yiney ya usey nakash, ni utwinkishin nakash mwiku wend utumbila, wawiy ukata kutukwash chakwel tusadila malejan mend. (Luka 11:13) Ukat ni kuyilam muspiritu antu asadila usu wau chakwel endila mu kashinsh.—Jinsw. 2:7.

⁴ Ov, mutapu ik watulejay Yehova chakwel twikala in kulam kashinsh? Cha kusambish, chidi kusutil ku kumutum Mwanend, Yesu, panap pansh. Yesu wadinga nich mwom wa kuziyil kuwanyidina. Ndiy “wikal mwin kuziyil [djat ni] ku rufu.” (Filip. 2:8) Mu yom yawonsu yasalay, Yesu wamuziyila Tatukwend wa mwiur, ap pa chisu chadinga chikash kuziyil. Ndiy wamwela Yehova anch: “Pakwez achisala mudi muukatila ey, kangal munikatila am.” (Luka 22:42) Umwing ni umwing wetu ukusal nawamp anch wiyipul anch, ‘Ov, niyam nikutwish nikal nich spiritu wa kuziyil wa chilik chimwing?’ Kusutil ku kwikal nich mwom wa kuziyil nich yibachikin yiwamp ya muchim, tukez kwikal in kulam kashinsh. Tushinshikinany yom yimwing ya mu mwom mudinga kuziyil kwa usey nakash.

5, 6. (a) Ov, mutapu ik wakasikeshinay David piur pa kulam kashinsh anch kwikil antu akwau atumena? (b) Yikokujol ik yirishinau nich in Kristu nlel mulong wa kashinsh pa chisu chidiau ayinau?

⁵ Tuswiridin tumuziyila Yehova pa chisu tutongidina anch tudi ayinetu. David mwin kufund wa kuseng walejana usey ujim wa kashinsh pa yisu yadingay amwinend. (Tang Kuseng 101:2.) Chadingay mwant, David wadinga yisu yawonsu pamwing ni antu. Kwadingap kwidjidjek anch pa yisu yivud kwadinga yitot, ap tunan twa antu adinga amutadila. (Isikej Kuseng 26:12.) Kulam kashinsh pa yisu yiney kwadinga nich usey ujim, mulong chadinga chimwitin mwant ikala chilakej chiwamp kudiau antu. (Kuvur. 17:18, 19) Pakwez, David wileja anch, pa chisu chikutwishay wikal amwinend—‘mu chikumbu chend’—wadinga wendil ching mu kashinsh. Ov, chidi nchik ku mutambu wetu?

⁶ Mu Kuseng 101:3, tutaninamu mazu menday David malonday anch: “Kinikutekip chom chiyimp kurutu kwa mes mam.” Nlel kudi mitapu yivud ya kutek kurutu kwa mes metu yom yiyimp, pakampwil pa chisu tudia ayinetu. Kutal pa Internet kwayiletitin kal antu avud yikokujol pa mulong winou. Chitwishikin swa kupumbukin mu kutal yom yijondila, ap kutal yom ya pornografi. Ov, kuyitalang yom yiney kudi chisal cha kumuziyil Nzamb wamupepila David chakwel amafunda mazu minam? Chakin kamu pornografi udi muyimp nakash, mulong ukat kulangwish maku mayimp ni ma choy, ukat kujondish kom, ukat kujip mauruw, ni kumujondish muntu win mwawonsu ukata kumutal.—Jinsw. 4:23; 2 Kor. 7:1; 1 Tes. 4:3-5.

7. Chijil ik chikutwisha kutukwash tulama kashinsh ketu pa chisu tudia ayinetu?

⁷ Chakin kamu, kwikil kashalapol wa Yehova ap umwing udia chakin kamu amwinend. Tatukwetu ututadil. (Tang Kuseng 11:4.) Yehova ukusal mudi ik anch wakumun mutapu ujijamedina choziu! Anch wasal mwamu, chirumburikin anch uteshin chiyul chijingamena mu mazu ma Yesu madia mu Mateu 5:28. Mu yawonsu, kwat mupak wa kulik kutal yipich yin yawonsu yikutwisha yakutek mu choziu cha kusal chom chiyimp. Kangal walandish kashinsh key ka usey nakash ku chisal cha usany cha kutal ap kutang yom ya pornografi!

8, 9. (a) Chikokujol ik pantaliken nich kashinsh charishau nich Daniel ni arund nend? (b) Ov, mutapu ik ukatau ansand in Kristu nlel kumusangaresh Yehova ni ambay nau in Kristu?

⁸ Tukutwish twikal in kulam kashinsh kusutil ku kumuziyil Yehova pitudia mukach mwa apagan. Tonginany bil padiay Daniel ni arund nend asatu. Ayitwala mu usuk mu Babilon padingau achidi ansand. Kwinikwa, adinga mukach mwa apagan adinga akad kumwijik ap amwija pakemp kusu Yehova, Ayuda inay anying ayishindila chakwel adia yakudia yiwamp yadinga yijidikinau mu Chijil cha Nzamb. Chakin kamu ansand inay ela kutan mayingishin mavud anch chadingap kwau chiyipina kuyidia. Oku, anvajau, amakurump, ni in kupesh kelap kuman yadinga yisadilau ansand inay anying. Ov, nany wela kwijik yisadilau? Ching Yehova kusu. Chawiy chakwatau mupak ukash ni amuziyila ndiy kwikalap nchik kuyishindil ni chak.—Dan. 1:3-9.

⁹ Mu mangand mawonsu, ansand Atuman a Yehova mwamu musadilingau niyawiy, alamatining ba-a ku yijil ya Nzamb yiyinkishinau in Kristu ni alikining kuwil ku kushindil kwa arund. Piukata en ansand kulik kwiyandjik mu kuna mon ya kulewishany, mu chisum, kusalan, kusal masandj, ni mu yisal yikwau yiyimp, ukat kumuziyilany Yehova. Anch wasalany mwamu, udandamedinany kulam kashinsh ken. Ukat kutaninanyamu ayinen, ni ukat kumusangareshany Yehova ni ambay nen in Kristu!—Kus. 110:3.

10. (a) Yisal ik yijondila ya masandj yayishikisha ansand amwing ku kujiril kashinsh kau? (b) Kashinsh kakat kututakel mutapu ik pantaliken nich chak cha masandj?

¹⁰ Tufanyidin kand kwikal in kuziyil pitusadila pamwing ni antu akweta mujimbu windjing. Twij kamu anch Dizu dia Nzamb dilikishin masandj. Pakwez, chiswapeling kulikin manangu metu maya ku yitongijok yijondila. Chilakej, ansand amwing ashikena kal kusadil utun ap kusarumun maku mau ma mujimbu mulong wa kusal masandj ap kushiken mu kwichuk umwing ni mukwau, nich kutongin anch chakin kamu yisal yiney kiyidiap kwau “masandj.” Ansand inay avuramedin anch—ap akutwish atond kuvuramen anch—dizu didia Bibil dikarumwinau anch masandj dirumburikin mwikadil wijondina, ni akutwish amwopatinay muntu mu chikumangen.a Pakwez, cha ushon chidi anch, akat kuvuramen usey wa kashinsh. Mulong tusadil usu wa kulam kashinsh ketu, tukatap kusot mutapu wa kwiyingish mulong wa yisal yiyimp. Tukat kusot kupakish kutal mu chilik ik tukutwisha kusal chitil pakad kupupiu. Kitukatap kutal ching kusu pa yibudikin ya dipup yikutwisha kudiokal ku chisal chiyimp. Pakwez, tukat kwasin pa kusal yom yikutwisha kumusangaresh Yehova mu kwipukang yom yikutwisha kumunenganesh. Pa ndond pa kutal mu chilik tukutwisha kushejin ku chitil, tukat kwimedin kulemp nich ni ‘kuchin kusotan.’ (1 Kor. 6:18) Chawiy tukata kumekesh chakin kamu anch tudi antu alamina kashinsh.

Mutapu ik Tukutwisha Kulam Kashinsh Ketu?

11. Ov, chisal ni chisal cha kuziyil chidi cha usey nakash? Let chilakej.

¹¹ Tukat kukudish kashinsh ku kuziyil, chawiy tukata kulam kashinsh kusutil ku kujijamen mu mwom wa kuziyil. Chisal chimwing cha kuziyil chikutwish chamekan kwikal cha chamwamu—mudi kamulong ka usweral. Mwawiy, yisal yiney ya kuziyil yikez kwikal yivud mu kusut kwa chisu. Chilakej: Ditafad dimwing dikutwish diamekan kwikal dia chamwamu, pakwez anch twamatek mavud pa ndond yimwing, tukutwish twatung chikumbu chimwing chiwamp. Chawiy kusutil ku kuwejin pa yisal yetu ya kuziyil, chawiy tulamina kashinsh ketu.—Luka 16:10.

12. Mutapu ik washay David chilakej cha kulam kashinsh pamumeshau mar ni kumusal yom yakad kutentam?

¹² Kashinsh ketu kakat kumeken pakampwil pa chisu tukata kujijamen pa yisu yikash, yitusadidilau yom yiyimp, ap yitusadidilau yom pakad kutentam. Tushinshikinany chilakej cha David chidia mu Bibil. Padingay uchidi nsand, wajijamena mar mamushau kudi mwant wadinga ufanyidina kwikal ntimesh wa ulabu wa Yehova. Pakwez, Mwant Saul, Yehova wadinga wamulika kal ni chawiy wamwovila David mukau umwing ukash, mulong ndiy watondau kudi Nzamb. Pakwez, Saul wadinga uchiyikedil mu chisu kanang ni chawiy chasadilay amasalay a Isarel mulong wa kuya kumukwat David. Yehova walikina chisal chinech chakad kutentam chisadika mu mivu kanang. Ov, David wamwovila Nzamb kuyimp? Ov, ndiy wakwata mupak anch kwikal diyingishin dia kashinsh? Chakapul chaya mwang. Ndiy wadinga ulikishin nakash mwaz wa Saul mudi muntu wazizidilau many wa Nzamb, walika kumubul Saul pa chisu chamekana mutapu wa kumusal mwamu.—1 Sam. 24:2-7, NW.

13. Ov, mutapu ik tukutwisha kulam kashinsh ketu anch atusal nayip ap aturumbukin?

¹³ Malejan ik ma usey mitwilejidina nlel kusutil ku chilakej cha David! Tudi chid cha chikumangen cha mangand mawonsu mudia antu akad kuwanyin, muntu ap wisu udia pakach pau ukutwish watusadil chom chiyimp ap ukutwish walik ritiy. Chakin kamu, tuyukishiwin kushakam pa chisu chikasikena kuyijondish antu awonsu a Yehova. (Isay 54:17) Pakwez, mutapu ik tufanyidina kusal anch muntu kanang waturumbukin? Anch twalikin rukis pantaliken nend mbay netu mwin kwifukwil riyipisha muchim wetu, kashinsh ketu kudi Nzamb kakutwish kijond. Yisadilau antu akwau yikutwishap yikal diyingishin dietwetu kumwovil Nzamb wetu kuyip ap dia kulikin mwom ushinshamena. (Kus. 119:165) Kujijamen ap mu yoziu kukutwish kwez kwatukwash tulama kashinsh ketu.

14. In kulam kashinsh asadining nchik mulong wa yikarumon yisadikina mu dirijek ni ya kutenchik malejan?

¹⁴ Tukutwish kand kulam kashinsh anch twipuk spiritu wa kusotijol tuyilim, spiritu wa runyinyit. Chirumburikin anch, ching kwikal ushinshamena kudiay Yehova. Ndiy ukat kuyiyukish antwend kupandakanamu mwadingay ni kusal pasak. Mu rusangu rawonsu ra muntu difukwil diakin kandikal aditumbishap pa mangand mudi mudidia katat. (Isay 2:2-4) Anch kwikal yirumburil ya mifund ya Bibil yitenchikinau ap anch atenchik mutapu wa kusal yom, tufanyidin tuyitiyija. Tukat kusangar pa kuman uman ulejena anch chitokish cha muspiritu chiyil kamu ni kujimb. (Jinsw. 4:18) Anch chatukasiken kutesh kuswimp kuswimpinau, tukumwilembil Yehova atukwasha chakwel atukwasha kutesh nawamp dinans dined. Pa chisu chawiy chimwing, tufanyidin kujijamen mu mwom wetu, nich kulam kashinsh ketu.

Ov, Chikwikal Nchik Anch Muntu Kanang Kalaminap Kashinsh?

15. Ov, nany kusu ukutwisha kushesh kashinsh key?

¹⁵ Chinech chidi chipul cha usey nakash, ov, kimwawiyap? Mudi mutwilejina mu mutu wa mulong wasambedilaku ou, kashinsh kadi kamu ka usey ujim. Pakad kashinsh, tukutwishap twikal nich urund ni Yehova ni tukwikalap nich ruchingej rakin. Lamany mu manangu anch: Kudi ching muntu umwing kusu mu mangand ukutwisha kushesh kashinsh key. Muntu winou udi ey amwiney. Wawiy uyakin wateshay Yob. Chawiy chalonday anch: “Djat ni ku rufu ram nikudandamen kamu kulond anch, kinifilap nich.” (Yob 27:5) Anch niyey wakwata kal mupak mudi winou ni anch washakam piswimp ni Yehova, kiukezap kushadish kashinsh key.—Yak. 4:8.

16, 17. (a) Anch muntu wasal chitil chijim, ov, chom ik chiyimp kafanyidinap kusal? (b) Ov, chom ik cha manangu chifanyidina kusal?

¹⁶ Pakwez, antu amwing akangeny kulam kashinsh kau. Ap mudi muchamekana padingau atwimbuy achidiaku aom, amwing au awiy mu yisal ya yitil yikash. Anch chom chinech chakushiken, ov, kwikil ruchingej? Kimwawiyap. Chom ik chifanyidina kusal? El bil tushinshikinany chom kichifanyidinap kusal. Chivadikin cha untu chidi cha kusot kujindjikin anvaj yitil, ap amakurump. Pakwez, Bibil utuvurishin anch: “Muntu mwin kujindjik kurumbuk kwend kakukulip nawamp, pakwez mwin kwitiyil kurumbuk ni kukulik, ukez katan ranaken.” (Jinsw. 28:13) Antu asotininga kujindjik yitil arumbukining nakash, mulong chitwishikiningap kumujindjikin Nzamb chom ap chimwing. (Tang Hebereu 4:13.) Akwau niyawiy asotiling kwikal nich mwom wa mwend kwimpat mwend mu wat, nich yambangesh kumusadil Yehova oku akwet mashakamin ma mwom wa yitil. Mwom mudi winou uburedin kashinsh—chakin kamu, udi chinyim nich kashinsh. Yehova kasangaredinap yisal ya kumwifukwil yisadilau antu ajindjikina yitil yau yijim. Pakwez, antu inay in rubabek amwovishin ujim.—Jinsw. 21:27; Isay 1:11-16.

¹⁷ Anch mwin Kristu wasal chitil chijim, chom chifanyidinay kusal chijiken patok. Chawiy chisu cha kukimb ukwash wa amakurump in Kristu. Yehova ukwet ditenchik diatekay kal mulong wa kutadil mayej makash ma muspiritu. (Tang Yakob 5:14.) Kangal wom wa dipup ukukangesh kudandamen nich ukash wey wa muspiritu. Ov, muntu mwin manangu ukutwish wachin kusansan kwa ndong ap kwov wom wa kumupasul chakwel iyokisha mulong kanang wa ukash wa mujimbu?—Heb. 12:11.

18, 19. (a) Chilakej cha David chilejen nchik anch chitwishikin kuchirish kand kashinsh? (b) Mupak ik ukwatina piur pa kashinsh key?

¹⁸ Ov, kudi ruchingej ra kulank? Ov, chitwishikin kutan kand kashinsh anch kashadik? Tushinshikinany kand chilakej cha David. Ndiy wasala chitil chijim. Wamutala nich ris mband wayen, wasala masandj, ni watenchika chakwel amujipa ikundj wa mband. Chikasikesh kulondil David pa chisu chinech anch udi muntu wa kashinsh, ov, kimwawiyap? Ov, mwikadil wend kiwadingap ni ruchingej? David waswiridina ni watambula dipup dikash. Pakwez, kukarumuk kwend kwakinakin kwamubachika Yehova kumwovil riy. David wilejina kusutil ku dipup ni washirisha kashinsh kend ku kumuziyil Nzamb ni kujijamen mu mwom wa mutapu winou. Mwom wa David wadinga chilakej cha yom yitutangina mu Jinswir 24:16 anch: “Anch mwin kutentam wawa tupamp sambwad, ukulank kand.” Kukwikal chibudikin? Tushinshikinany yom yamwelau Salomon kudiay Yehova kupwa kwa David kufa. (Tang 1 Ant 9:4, NW.) Nzamb wamuvurika David mudi ikundj wa kashinsh. Yehova ukutwish wayowish matayeng antu asala yitil pakwez akarumukina kudiokal ku yitil yijim.—Isay 1:18.

¹⁹ Inge, ukutwish wikal muntu wa kashinsh kusutil ku kuziyil nich rukat. Lamany kujijaman nich kushinshaman, ni anch wasalany yitil yijim, karumukany chakin kamu. Kashinsh kadi dipit dia usey mudi ik! El umwing ni umwing wetu akwata mupak wakwatay David anch: “Pakwez am nikat kwendil mu kashinsh.”—Kus. 26:11.

[Mazu madia kwishin kwa paj]

Ov, Ukwakul Nchik?

• Ov, ukutwish nchik kwikal muntu wa kashinsh?

• Mu jinjil ik ukutwisha kulam kashinsh key?

• Chitwishikin nchik kutan kand kashinsh?

[Kamushet kadia pa paj wa 8]

‘CHAPANDAKANA KUWAP’

Mband umwing wadinga ni divumu dia angond atan ndiy walonda mazu minam pa kuman kashinsh ka mband umwing ngendj. Ndiy wadinga mu ka chikumbu ka kulandishin kafe, ni kwinyim kwa asaa avud wavurika anch wavuramena kachibut kend mwinimwa. Mu kachibut kinak mwadinga 2 000 $, jawiy nfalang kusu jadingay nich ja kusadil. Kurutu weza kuyilej in kufund jurnal anch: “Nanenganana nakash.” Pakwez, changadim umwing wakamana kachibut ni wasambisha kumukimb mwin kachibut. Kamumanap, chawiy waya wakasha ku biro wa ampurish, ni ampurish amumana mband ukweta divumu. Nich musangar mwin kachibut walonda anch: “Chakin kamu, chadinga chom chakin, chakin kamu kusal.” Ov, mulong wak changadim winou wasala usu wend mulong wa kuchirish nfalang jinej? Jurnal ulondil anch mulong ndiy umwing wa Atuman a Yehova, ndiy “wamekesha kashinsh kend mulong wa malejan ma religion mamulilau nich.”

[Chipich chidia pa paj wa 9]

Ansand akutwish alam kashinsh padiau mu choziu

[Chipich chidia pa paj wa 10]

David wakanganya pa chisu kanang kulam kashinsh, pakwez weza kukatan kand