“Tupandakeshany Kukasikeshijan” Umwing ni Mukwau

1. Mulong wak Paul wayiyula in Kristu a kusambish in Hebereu ‘kupandakesh’ kukasikeshijan umwing ni mukwau?

MU MIVU chitot ya kusambish, kambuy Paul wapana chiyul ech kudi in Kristu in Hebereu: “Tutalijanany muntu ni mukwau chakwel tukwashijanany kumekesh rukat ni kusal yisalijok yiwamp. Kangal twalikany chaku cha kukumangan pamwing, mudi mukat kulikau antu amwing. Pakwez chifanyidin tupandakeshany kukasikeshijan muntu ni mukwau, mulong umenany anch, dichuku [. . .] dikat kusej piswimp.” (Hebereu 10:24, 25) Akadivar afanyina kwiyipul mulong wak Paul wayileja kupandakesh kukasikeshijan umwing ni mukwau. Kupwa kwa mivu piswimp yitan, diyingishin dimwing diamekana patok. Pa chisu chinicha, amana anch dichuku dia dirumburish dia Yehova piur pa Yerusalem diading piswimp. Ajingunina anch ading afanyidin kuchin mu musumb mudi mwayilejau kusal kudi Yesu. (Luka 21:20-22; Midimu 2:19, 20) Dichuku dia Yehova diashika mu muvu wa 70, chisu chasheshau in Rom musumb wa Yerusalem.

2. Mulong wak tufanyidin kutong nakash piur pa kukasikeshijan umwing ni mukwau nlel?

² Nlel unou, tudi niyetu mu mashakamin ma mutapu umwing. Dichuku ‘dijim ni dikwatishena wom’ dia Yehova didi piswimp. (Jowel 2:11) Mazu ma muprofet Sofoniy matadin kand chisu chetu: “Dichuku dijim dia [Yehova] didi piswimp, didi kamu piswimp, dezil mau!” (Sofoniy 1:14) Mulong wa diyingishin dined, tufanyidin “[kutalijan] muntu ni mukwau chakwel tukwashijanany kumekesh rukat ni kusal yisalijok yiwamp.” (Hebereu 10:24) Tufanyidin kuyibangin nakash akadivar netu, chakwel tutwisha kuyikasikesh chisu chikwetau kuswir.

NANY UKWETA KUSWIR KWA KUMUKASIKESH?

3. Mulong wak kambuy Paul walonda piur pa kukasikeshijan? (Tal chipich cha kwinsambishin.)

³ “Kwakam mu muchim kukat kumuziyish muntu, pakwez dizu diwamp dikat kumuletin musangar.” (Jinswir 12:25) Etu awonsu yisu yimwing tukweting kuswir kwa kutukasikesh. Paul wovikesha patok anch ap antu akweta chisend cha kuyikasikesh akwau akwet niyau kuswir kwa kuyikasikesh. Wayifundina akadivar nend a ku Rom anch: “Niswiridin nakash kukumananyaku, chakwel nikukwashany kuman chiyukish chidiokila kudi [spiritu] wa Nzamb, mulong wa kukukasikeshany. Charumburik anch, etu awonsu tukwashijanany. Ritiy ramam rukukukwashany en, chad niyam ritiy renen rukwinkwash am.” (Rom 1:11, 12) Chawiy ap kambuy Paul wading ukwet kuswir kwa kumukasikesh yisu yimwing.—Tang Rom 15:30-32.

4, 5. Anany tukutwisha kukasikesh nlel ni mulong wak?

⁴ Nlel unou, tukutwish kuyikasikesh antu amusadidina Yehova chisu chawonsu, mudi ayibol ashinshamena. Avud pakach pau alikin kal yom yikatau kusanger mu mwom chakwel atwisha kusal uchibol. Chinech chidi kand chakin mulong wa amishoner, antu asadidina ku Betel, atulam a minyingumuku ni akajau ni antu asadidina mu ma biro ma kukarumwin. Antu inay awonsu ipanin mulong wa kusutish chisu chijim mu kumusadin Yehova. Chawiy tufanyidin kuyikasikesh. Kudi kand antu avud akatina kwikal mu mudimu wa chisu chawonsu pakwez katwishinap. Niyau akat kujikitish nakash anch ayikasikesh.

⁵ Anany kand akwau tufanyidina kukasikesh? Tukutwish kand kuyikasikesh akadivar nau anambaz avud atondina kushal ajich mulong akatin kumuziyin Yehova ni kwatijan “ching mu Mwant.” (1 Korint 7:39, TMK) Amband akat kwikal akasikeshinau nakash anch anfumwau ayilej anch ayikatin ni ajikitishin mulong wa yom yawonsu yisadinau. (Jinswir 31:28, 31) In Kristu ajijamedina kuzengol ap mayej akwet kuswir niyau kwa kuyikasikesh. (2 Tesalonik 1:3-5) Yehova ni Yesu akat kuyongoj antu inay awonsu ashinshamena.—Tang 2 Tesalonik 2:16, 17.

AMAKURUMP AKUTWISH KUTUKASIKESH

6. Yom ik twilejina piur pa chisend cha amakurump mu Isay 32:1, 2?

⁶ Tang Isay 32:1, 2. Tushich pa chirung chikash ni chiswapel kwov ushon ap kuziy. Yesu Kristu ukat kusadin akadivar azizidilau many ni “ayilol” ashinshamena adia pakach pa amikoku akwau mulong wa kutukasikesh. Amakurump inay a chikumangen kadiap “ant” piur pa ritiy retu pakwez adi ‘ambay netu a mudimu’ mulong wa musangar wetu. Akatin kutukwash kwikal ni musangar ni kushal ashinshamena.—2 Korint 1:24.

7, 8. Mutapu ik ukutwishau amakurump kuyikasikesh antu akwau kusutin yom yilondinau ni yisadinau?

⁷ Amakurump akutwish kumwimburij kambuy Paul, wasala usu chisu chawonsu mulong wa kuyikasikesh akadivar nend. Wayifundina in Kristu a ku Tesalonik ading azengodinau anch: “Mulong twakukatanya nakash, twading tukwet musangar wa kukurumburilany Rusangu Ruwamp ridiokila kudi Nzamb. Twasangara kand kwipan ayinetu kudi en, mulong wadingany akarukat netu nakash.”—1 Tesalonik 2:8.

⁸ Amakurump akutwish kukasikesh antu kwau kusutin yom yilondinau. Pakwez, chitin kwau kusal ching mwamu? Paul wayileja amakurump a ku Efes anch: “[Ufanyidinany] kuyikwash aburedina. Vurikany mazu malonday Nsalejetu Yesu amwinend anch: ‘Chiyukish cha mwin kupan chipandakenamu cha mwin kutambul.’” (Midimu 20:35) Paul wading tayad “kupan yom yawonsu ni kwipan kand amwinend” mulong wa akadivar nau anambaz nend. Wamekesha kusutin yisal yend anch wading tayad mulong wa kuyisadin yom yiwamp. (2 Korint 12:15) Chilik chimwing, amakurump afanyidin kuyongoj ni kuyikasikesh antu akwau, kadiap kwau ching kusutin yom yilondinau pakwez kusutin kand yom yisadinau. Chinech chimekeshin anch ayibangidin kamu chakin.—1 Korint 14:3.

9. Mutapu ik ukutwishau amakurump kupan yiyul mu mutapu wa kukasikeshan?

⁹ Mulong wa kuyikasikesh akadivar, amakurump yisu yimwing afanyidin kupan yiyul. Amakurump akutwish kwilej mu Bibil mulong wa kusal mwamu mu mutapu ukasikeshina. Yesu washa chilakej chiwamp nakash mulong wa kupan yiyul chisu chatumay uruu ku yikumangen ya mu Aziy Mukemp kupwa kwa rufu ni divumbuk diend. Wading ni yiyul yikash ya kupan ku chikumangen cha Efes, Perigam ni cha Tiatir. Pakwez kurutu kwa kuyinkish chiyul, wayijikitisha mulong wa yom yawonsu yiwamp yading yisadinau. (Kujingunik 2:1-5, 12, 13, 18, 19) Yesu wachileja chikumangen cha Laodisey anch: “Am nikat kuyipup ni kuyikand antu awonsu inikatila. Chawiy ikal nich mushiku, ukarumuk kudiokal ku yitil yey.” (Kujingunik 3:19) Amakurump etu amwimburijin Yesu mu mutapu wa kupan yiyul.

KADIAP KWAU CHING AMAKURUMP AFANYIDINA KUYIKASIKESH ANTU AKWAU

10. Mutapu ik etu awonsu tukutwisha kukasikeshijan umwing ni mukwau?

¹⁰ Kadiap kwau ching amakurump afanyidina kuyikasikesh antu akwau. Paul wayikasikesha in Kristu awonsu kulond “mazu mawamp makutwisha kukasikesh antu kukul mu ritiy mudi muchifanyidina, ni kuyiyukish” antu akwau. (Efes 4:29) Etu awonsu tufanyidin kushinshikin pa yom yikwetau nich antu akwau maswir, mwamu tukutwish kuyikwah. Paul wayifundina in Kristu In Hebereu anch: “Kasikeshany makas men maziyila, ni manungun men mazalizadina! Endany salal mudi antu endidila mu jinjil jitentamina, chakwel mwin kubet kangal wawa, pakwez ayerika kwend.” (Hebereu 12:12, 13) Etu awonsu tukutwish kukasikeshijan umwing ni mukwau kusutin yom tulondina, ap anch tudi an akemp nakash.

11. Yom ik yamukwasha Marthe chisu chading chiziyinay nakash?

¹¹ Nambaz utazukinau anch Marthe wading uziyin nakash mu chisu kanang.a (Tal mazu ma kwinshin.) Wafunda anch: “Dichuku dimwing pinading nilembila mulong wa kwinkasikesh, nasankanijana ni nambaz umwing wamekeshina rukat ni ranaken, yom nading nikweta nich kuswir mu chisu chinicha. Wanleja yom yamushikena yading yifanikena ni yom nading nirishina nich am ni namana anch nadingap amwinam.” Chimeken anch nambaz winou ipal kajinguninap mutapu mazu mend mamukwasha Marthe!

12, 13. Mutapu ik tukutwisha kusadin chiyul chidia mu Filip 2:1-4?

¹² Paul wafunda kudi in Kristu a mu Filip anch: “Chawiy anch kuding ruchingej mu Kristu, anch kuding kwongoj kwa rukat, anch kuding urund mu spiritu, kwonganyin ni kwanaken, chad izwishany musangar wam mu kushakamany pamwing mu kwovijan, ikalany mu rukat rumwing, ikalany ni muchim umwing ni chiyul chimwing. Kangal wasalany yom ya kwaurok ap ya kwitumbish nich, pakwez ikepishany, umwing amutonga mukwau kujimb chipandakena amwinend. Kangal umwing ni umwing asotijolang ku yom yend amwinend, pakwez asota kand yom ya akwau.”—Filip 2:1-4, TMK.

¹³ Etu awonsu tufanyidin kukimb mitapu ya kukwashijan umwing ni mukwau. Tukutwish kupan “kwongoj kwa rukat,” “urund mu spiritu,” ni “kwonganyin ni kwanaken” mulong wa kuyikasikesh akadivar nau anambaz netu.

MITAPU YIMWING YA KUKASIKESHIJAN

14. Mutapu ik umwing tukutwisha kupan kukasikesh?

¹⁴ Chikat kutusangaresh anch twatesh anch antu twakwasha pakur adandamedin kushal ashinshamena. Kambuy Yohan wafunda anch: “Kwikil chom chikwau chinsangarishina mudi pinateshina anch anam adandamedin [kwendil] mu uyakin.” (3 Yohan 4) Ayibol avud akat kwov musangar nakash anch ajingunin anch muntu kampand wakwashau kwijik uyakin pakur udandamedin kumusadin Yehova nich kushinshaman, ap pamwing ap wikadin kal chibol. Chawiy anch ayibol aziy, tufanyidin kuyivurish yom yawonsu yasalau kal mulong wa kuyikwash antu akwau.

15. Chom ik tukutwisha kusal mulong wa kuyikasikesh antu amusadidina Yehova nich kushinshaman?

¹⁵ Atulam a minyingumuku avud akat kulond anch awiy nau akajau akat kwikal akasikeshinau nakash anch atambul mukand wa kujikitish kupwa kwa kwendil chikumangen. Chinech chidi kand chakin mulong wa amakurump, amishoner, ayibol, antu asadidina ku Betel, antu awonsu inay amusadidin Yehova nich kushinshaman. Anch twayijikitish, tukutwish kuyikasikesh nakash kusutamu mutapu tutongidina.

ETU AWONSU TUKUTWISH KUKASIKESHAN

16. Yom ik yiswapela tukutwisha kusal mulong wa kumukasikesh muntu kanang?

¹⁶ Chikwikal nchik anch umen anch chikukasikedin kuyilej antu akwau mutapu wiyovila piur pau? Chakin, chikasikenap kwau kuyikasikesh antu akwau. Sal usu wa kumusipish muntu. Anch niyend kasipinap, pamwing ap ukwet mulong ni uswirikedin muntu kampand wa kwambamb nend. Ukutwish kumwongoj anch wamutesh nawamp palondinay.—Jakobu 1:19.

17. Yom ik yamukasikesha mukadivar umwing nsand?

¹⁷ Mukadivar umwing nsand utazukinau anch Henri wajimana nakash chisu chalikau anamakwend a piswimp avud kumusadin Yehova. Umwing wa pakach pau wading tatukwend, ni wading mukurump wa chikumangen. Kalam wa munyingumuku umwing wamana anch Henri wading ukwet ushon ni wamusenda mulong wa kuna nend kafe. Wamutesha nawamp Henri chisu chading chimulejinay yovil yend. Henri wajingunina anch mutapu umwing ukutwishay kusal mulong wa kukwash dijuku diend kushal mu uyakin udi wendendiy kushal ushinshamena. Wikala kand ukasikeshinau patangay Kuseng 46, Sofoniy 3:17, ni Marko 10:29, 30.

18. (a) Yom ik yafunday Mwant Salomon piur pa kukasikeshan? (b) Yom ik yatulejau kusal kudi kambuy Paul?

¹⁸ Yom ik tukutwisha kwilejin kusutin yom yamushikena Marthe ni Henri? Etu awonsu tukutwish kumwongoj ni kumukasikesh mukadivar ap nambaz udia mu maswir. Mwant Salomon wafunda anch: “Chidi chom cha musangar kudi muntu kwikal ni dizu pa chisu chidiburedinau, ni dizu dia mu chisu chau didi diwamp.” (Jinswir 15:23, 30) Ov, ukutwish kutong piur pa muntu kanang wija uziyina ap ukweta ushon? Umenap anch chidi chiwamp kusal chom kanang mudi kumutangin Chinong cha Kalam ap kumulej yom yidia pa kapend ka web? Chikwau kand, Paul wafundisha anch kuwang miminy ya Want pamwing kukutwish kusal anch twiyova nawamp. Wafunda anch: “Lejijanany ni kubabeshijanany umwing ni mukwau nich manangu mawonsu. Muwangilany Nzamb miminy ya kuseng, ni miminy ya win Kristu, ni miminy ya kumushiman, muwangilany [Yehova] nich kujikitish mu michim yen.”—Kolosay 3:16; Midimu 16:25.

19. Mulong wak kukasikeshan kukwikal kwa usey nakash piswimp ap ni yom ik tufanyidina kusal?

¹⁹ Pitusejina piswimp ni dichuku dia Yehova, chikwikal cha usey nakash kudi etu kukasikeshijan umwing ni mukwau. (Hebereu 10:25) Tukwikal ni musangar anch twasal kukwatijan ni chiyul cha Paul chilondina anch: “Ongojijanany pamwing umwing ni mukwau, ni kukudishan mudi chiukat kusalany kand.”—1 Tesalonik 5:11, TMK.