Tumwimburijany Yehova Nzamb Ukata Kupan Kukasikesh

1. Chisu chabwambwilay Adam ni Ev, Yehova wayikasikesha antu mutapu ik ni kuyinkish ruchingej?

YEHOVA udi Nzamb ukata kukasikeshan. Wasambisha kusal mwamu kudiosh kamu pasalau antu chitil ni kwikal akad kuwanyin. Chawiy, kupwa kamu kwa Adam ni Ev kumubwambwil Nzamb, walonda uprofet wafanyina kuyikasikesh ni kuyinkish ruchingej antu akuvadika mu machuku ma kurutu anch autesh. Uprofet winou udi mu Disambishil 3:15 ni ukanin anch Satan Djabul akumushesh ni midimu yend yawonsu yiyimp.—1 Yohan 3:8; Kujingunik 12:9.

YEHOVA WAYIKASIKESHA ATUSHALAPOL END A PASAK

2. Yehova wamukasikesha Nowa mutapu ik?

² Tong mutapu Yehova wamukasikeshay kashalapol wend Nowa. Antu ashakama pa chirung chend ading in chisum ni ayimp nakash, ching kwend Nowa ni dijuku diend awiy ading amwifukwidina Yehova. Nowa wafanyina kuziy. (Disambishil 6:4, 5, 11; Jud 6) Pakwez Yehova wamwinkisha Nowa kutakaman mulong wa kudandamen kumwifukwil ni kusal yom yitentamina. (Disambishil 6:9) Yehova wamuleja Nowa anch ukushesh mangand mayimp ni wamurumburila Nowa yom yafanyinay kusal chakwel dijuku diend dipanda. (Disambishil 6:13-18) Yehova wikala Nzamb wa kukasikesh mulong wa Nowa.

3. Yehova wamukasikesh Joshua mutapu ik? (Tal chipich cha kwisambishin.)

³ Kupwa, Yehova wamukasikesha kashalapol wend Joshua, wadinga ni chisend chijim. Wafanyina kuyitakel antu a Nzamb mwi Ngand ya Kushilamu ni kukwat yisak ya amasalay a usu ading ashicha mwinimwa. Yehova wamana anch Joshua wading ni diyingish dia kwov wom, chawiy wamuleja Moses anch: “Mwinkisha Joshua chisend, ni kumukasikesh ndiy, ni kumujijamesh, mulong ndiy ukez kauk ushad kurutu kwa antu inay. Ndiy ukez kuyitek mu jindond jau mwi ngand yiukeza kaman.” (Kuvurik Yijil 3:28) Kupwa Yehova amwinend wamukasikesha Joshua palonday anch: “Ov, am kinakulejap ey mwamu? Ikal mukash ni kwiman dang. Kangal wov wom ap kukatuk mong, mulong am [Yehova] Nzamb wey nidi ni yeyey kwawonsu kuukuya.” (Joshua 1:1, 9) Chakin, mazu minam mamukasikesha kamu Joshua!

4, 5. (a) Mutapu ik Yehova wayikasikeshay antwend pasak? (b) Yehova wamukasikesha Mwanend mutapu ik?

⁴ Yehova wayikasikesha kand antu end mudi chisak. Chilakej, Yehova wading wij anch in Yuda afanyina kwikal ni kuswir kwa kuyikasikesh chisu chikwikalau asuk mu Babilon, ni wayinkisha uprofet ukasikeshina ulondina anch: “Kangal wovany wom, mulong nidi nen. Kangal wazalany, mulong nidi Nzamb wen. Nikukukasikeshany, ni kukukwashany kand. Nikukuchidijany ni kukupandishany.” (Isay 41:10) Kupwa Yehova wayikasikesha in Kristu a kusambish ni utukasikeshin kand niyetu mutapu wawiy umwing.—Tang 2 Korint 1:3, 4.

⁵ Yehova wamukasikesha kand Mwanend. Kupwa kwa Yesu kumubatish, watesha dizu mwiur dikat kulond anch: “Ey udi Mwanam unikatila nakash. Am nikat kusangar mulong weyey.” (Mateu 3:17) Ukutwish kutongin mutapu mazu minam mamukasikesha Yesu chisu chasalay mudimu wend panap pansh?

YESU WAYIKASIKESHA ANTU AKWAU

6. Chishimu cha Yesu piur pa talent chitukasikeshin mutapu ik?

⁶ Yesu wamwimburija Tatukwend mu kuyikasikesh antu akwau kwikal ashinshamena. Wasala mwamu mu chishimu cha talent, mwalonday anch mukurump wamuleja kashalapol win mwawonsu ushinshamen anch: “Chiwamp, ey udi kashalapol muwamp, mwin yakin! Ey wadi mwin yakin mu yom yikemp, chawiy am nikukutek ey kwikal mwin kulam yom yivud. Ez wandam, tusangar pamwing ni yamam.” (Mateu 25:21, 23) Mazu minam mayikasikesha in kwilejend kudandamen kumusadin Yehova nich kushinshaman!

7. Yesu wayikasikesha mutapu ik atwimbuy end, pakampwil Pita?

⁷ Ap anch atwimbuy ading kutadikijan yisu yivud mulong wa kwijik nany wading mukurump nakash, Yesu wadandamena kushimpish muchim mulong wa awiy. Wayikasikesha kwikal ikepishina ni kuyisadin antu akwau, pa ndond pa kuchingel anch antu akwau ayisadin awiy. (Luka 22:24-26) Yisu yivud Pita warumbuka ni wamuziyisha Yesu. (Mateu 16:21-23; 26:31-35, 75) Pakwez Yesu kamulikap Pita. Wamukasikesha Pita ni wamwinka chisend cha kuyikasikesh akwau.—Yohan 21:16.

KUKASIKESH MU CHISU CHA PASAK

8. Mutapu ik wayikasikeshay Ezekias amakurump a amasalay ni antu a mu Yuda?

⁸ Ap kurutu kwa kulondul chilakej cha Yesu, atushalapol a Nzamb ading ij anch afanyidin kuyikasikesh antu akwau. Tong piur pa Ezekias. Chisu chezau in Asiria mulong wa kurishikish Yerusalem, wakumangeja amakurump a yisak ya amasalay ni antu mulong wa kuyikasikesh, ni ‘ikala nich usu mulong wa mazu mend.’—Tang 2 Jinsangu 32:6-8.

9. Yom ik tukutwisha kwilejin kudi Job piur pa kukasikeshan?

⁹ Tukutwish kand kwilej piur pa kukasikesh kusutin Job. Ap anch amwinend wading ukwet kuswir kwa kumukasikesh, wayifundisha antu akwau mutapu wa kukasikeshan. Job wayileja amakundj eza kumwongoj anch ang ndiy wading uyongojina awiy, ing wafanyina kuyilej yom ya kuyikasikesh ni kusal anch iyova nawamp, pa ndond pa kuyiletin kusansan. (Job 16:1-5) Pakwez kwinsudien Job amukasikesha kudi Elihu ni kudi Yehova amwinend.—Job 33:24, 25; 36:1, 11; 42:7, 10.

10, 11. (a) Mulong wak mwan mband wa Jefite waswirikena kumukasikesh? (b) Anany tufanyidina kukasikesh nlel?

¹⁰ Mwan mband wa Jefite wading ni kuswir kwa kumukasikesh. Tatukwend, Nkalansambu Jefite, waya mulong wa kuyirishikish in Amon. Washilamu anch ang Yehova wamukwash kuwin njit, muntu wa kusambish ukweza kumusankan pakuchirikay ku chikumbu chend wafanyina kuya kumusadin Yehova mu dizang. Isarel wawina njit ni muntu wakusambish weza kumusankan Jefite wading mwanend mband, mwanend kusu umwing. Jefite waziya nakash. Pakwez walama kushilamu kwend ni wamutuma mwanend mband kusadin ku dizang mivu yend yin yawonsu.—Ankalansambu 11:30-35.

¹¹ Ap anch chinech chading chikasiken kudi Jefite, chading chikasiken kand nakash kudi mwanend. Pakwez, wading ukatin kusal yom yashilayimu tatukwend. (Ankalansambu 11:36, 37) Chinech chading chirumburikin anch kakumwatap ni kakuvalap. Mulong wa dijuku diau wafanyina kusul. Wading ukwet kuswir kwa kumwongoj ni kumukasikesh nakash. Bibil ulondin anch: “Chinech chikala kamu chaku mu Isarel. An amband a in Isarel ayanga pa muvu ni muvu kudil machuku manying, mulong wa mwan mband wa Jefite mwin Galad.” (Ankalansambu 11:39, 40) Mwan mband wa Jefite utuvurishin piur pa in Kristu a nlel ashadina ajich chakwel atwisha kusal yivud mulong wa Yehova. Ov, umenap anch chidi chiwamp kuyijikitish ni kuyikasikesh?—1 Korint 7:32-35.

ATWIMBUY AYIKASIKESHA AKADIVAR NAU

12, 13. Pita ‘wayikasikesha akadivar nend’ mutapu ik?

¹² Uchuku kurutu kwa Yesu kufa, wamuleja kambuy Pita anch: ‘Simon, Simon, tal! Satan witin chakwel akupepany en awonsu mudi tidiku. Pakwez am nalembilang mulong weyey, chakwel ritiy rey kangal rafa; chad ey, anch wachirik, yikasikesha akadivar ney.’—Luka 22:31, 32.

¹³ Pita wading pakach pa antu atakela chikumangen cha win Kristu cha kusambish. (Galatia 2:9) Wayikasikesha akadivar nend kusutin yisal yend ya kutakaman pa chisu cha Pentekot ni kupwa kwa Pentekot. Kupwa kwa kusal mu mivu yivud, wayifundina akadivar nend anch: “[Am nakufundilany] mukand winou wiswimp . . . Nisotil kukukasikeshany ni kukulejany uman wamam anch, riner rawiy ranaken rakin ra Nzamb. Imanany dang mu ranaken riner.” (1 Pita 5:12) Mikand ya Pita yayikasikesha in Kristu a pa chisu chend. Ni yikat kudandamen kutukasikesh niyetu nlel pituchingedina kuwanyin kwa kushilamu kwa Yehova.—2 Pita 3:13.

14, 15. Mutapu ik utukasikeshina mikand ya Bibil yafunday kambuy Yohan?

¹⁴ Kambuy Yohan wading niyend pakach pa antu atakela chikumangen cha win Kristu cha kusambish. Wafunda Evanjil muwamp piur pa mudimu wa Yesu. Mukand winou wa Bibil wayikasikesha in Kristu mu yitot ya mivu ni udandamedin kutukasikesh niyetu nlel unou. Chilakej, ching kwau mu mukand wa Yohan mwawiy tutangina piur pa mbil ya Yesu yilejena anch rukat udi mwikadil uyimekeshina in kwilejend akin.—Tang Yohan 13:34, 35.

¹⁵ Mikand yisatu yafunday kand Yohan yikwet uyakin wa usey nakash. Anch twaziy mulong wa kurumbuk kwetu, tukat kwikal akasikeshinau kutang anch yakupesh ya difut ya Yesu “[yatutokisha] ku yitil yetu yawonsu.” (1 Yohan 1:7) Ni anch tukat kudandamen kwikal ni yovil ya kwifish nich, tukwikal ongojinau anch twatang anch “Nzamb udi mujim kupandakanamu michim yetu.” (1 Yohan 3:20) Yohan ndiy kusu mwin kufund umwing wa Bibil wafunda anch “Nzamb udi rukat.” (1 Yohan 4:8, 16) Mukand wend wa kaad ni wa kasatu uyilejin in Kristu kudandamen “kwendil mu uyakin.”—2 Yohan 4; 3 Yohan 3, 4, TMK.

16, 17. Kambuy Paul wayikasikesha mutapu ik in Kristu akusambish?

¹⁶ Kambuy Paul wading chilakej chiwamp cha muntu wayikasikeshang akadivar nend. Kupwa kamu kwa Yesu kufa, in kwilej avud ashala mu Yerusalem, musumb wading chisak chitakedila. (Midimu 8:14; 15:2) In Kristu a mu Yudeya alejana piur pa Kristu kudi antu ading itiyijina mudiay Nzamb umwing. Pakwez spiritu utumbila wamutuma Paul kuyilej in Grek, in Rom ni antu akwau ading ifukwidila anzamb avud.—Galatia 2:7-9; 1 Timote 2:7.

¹⁷ Paul wendangana mwi ngand yitazukinau katat anch Turquie, ni mu Grèce ni mu Itali. Wayileja antu ading akad kwikal in Yuda ading ashicha mu jingand jinej ni wasala yikumangen ya win Kristu. Mwom wadingap uswapela kudi in Kristu inay asu. Antu a mu jingand jau ayizengola, chawiy ading akwet kuswir kwa kuyikasikesh. (1 Tesalonik 2:14) Piswimp mu muvu wa 50, Paul wafunda mukand wa kukasikesh nich ku chikumangen chisu chading mu Tesalonik. Walonda anch: “Etu tukat kumujikitish Nzamb machuku mawonsu mulong wenen, tukat kudandamen kukuvurikany mu kulembil kwetu. . . . Tukat kuvurik mudimu wa ritiy ren, ni yom yiwasalanya mu rukat ni mu ruchingej rudimukina.” (1 Tesalonik 1:2, 3) Wayileja kand in Kristu kukasikeshijan umwing ni mukwau ni wafunda anch: ‘Ongojijanany pamwing umwing ni mukwau ni kukasikeshijan umwing ni mukwau.’—1 Tesalonik 5:11.

CHISAK CHITAKEDILA CHIKAT KUPAN KUKASIKESH

18. Chisak chitakedila chamukasikesha Filip mutapu ik mu mivu chitot ya kusambish?

¹⁸ Mu mivu chitot ya kusambish, Yehova wasadina chisak chitakedila mulong wa kuyikasikesh in Kristu awonsu, pamwing ni antu ading atakedila chikumangen. Chisu chalejanay Filip piur pa Kristu kudi in Samaria, chisak chitakedila chamukwasha. Chatuma antu aad pakach pau, Pita ni Yohan, mulong alembila chakwel in Kristu asu atambula spiritu utumbila. (Midimu 8:5, 14-17) Filip pamwing ni akadivar nau anambaz inay asu ikala akasikeshinau nakash kusutin ukwash watambulau kudi chisak chitakedila!

19. Mutapu ik wiyovau in Kristu akusambish chisu chatangau mukand wa chisak chitakedila?

¹⁹ Kupwa, chisak chitakedila chading chifanyidin kukwat mupak wa usey nakash. Ov, in Kristu akad kwikal in Yuda ading afanyidin kuyitwal ku mukand mudi mwadingau in Yuda, kukwatijan ni Chijil cha Moses? (Midimu 15:1, 2) Kupwa kwa chisak chitakedila kulembil mulong wa kutambul spiritu utumbila ni kutongin pa mifund, akwata mupak anch kusal mwamu kwadingap kwau kwa usey. Kupwa afunda mukand urumburila mupak wau ni ayituma akadivar mulong wa kupan mukand winou ku yikumangen. Chisu chatangau in Kristu inay mukand winou, “ova musangar nakash mulong wa mazu madingamu ma kuyikasikesh.”—Midimu 15:27-32.

20. (a) Chisak Chitakedila chikat kutukasikesh mutapu ik etu awonsu nlel unou? (b) Chipul ik tukwisambina mu mutu wa mulong wambakedinap?

²⁰ Nlel unou, Chisak Chitakedila cha Atuman a Yehova chikat kuyikasikesh antu adia ku Betel, atushalapol adia mu mudimu wa pakampwil wa chisu chawonsu ni etu awonsu. Mudi akadivar a mu mivu chitot ya kusambish, tukat kusangar nakash mulong wa kukasikesh kwinoku! Chikwau kand, mulong wa kuyikasikesh antu alika uyakin, Chisak Chitakedila chabudisha mu muvu wa 2015 broshir Muchirikina Yehova. Pakwez ching kwau akadivar atakedina awiy afanyidina kuyikasikesh antu akwau, anch etu awonsu tufanyidin kusal mwamu? Tukwisambin chipul chinech mu mutu wa mulong ulondwilaku ou.