Mekeshany Kujikitish Kwen
1 Ap anch tushich mu “machuku ma mar nakash,” tukwet mayingishin mavud ma kumujikitishin Yehova. (2 Tim. 3:1) Diyingishin dia kusambish pa mayingishin minam kudi kumupan Mwanend mulong wetwetu. (Yoh. 3:16) Chikwau kand, pafilau antu adia mu relijon wa makasu nzal ya muspiritu, etu tusanger mulong wa kuvul kwa yakudia ya muspiritu. (Isa. 65:13) Tudi chikunku cha ukadivar wa pa mangand mawonsu ni twitapila kal dilau dia kubombakan mu kutanduril difukwil diakin. (Isa. 2:3, 4; 60:4-10, 22) Ov mutapu ik tukutwisha kumekesh kujikitish kwetu kudiay Yehova mulong wa yiyukish yivud yitwinkinay?—Kol. 3:15, 17.
2 Musangar wa Kusal Mudimu Nich Muchim Wawonsu: Pisambinay mupostol Paul piur pa kupan kwa yom ya ku mujimbu, ndiy wafunda anch: ‘Nzamb ukatil muntu ukata kupan nich musangar.’ (2 Kor. 9:7) Mbil yiney yisadil kand pa mudimu wetu tumusadidila Nzamb. Kujikitish kukat kumeken ku kuzangijal kwetu mulong wa uyakin, musangar wetu ku yikumangan ya Ukristu, mushiku wetu mu mudimu wa chingand, ni ku kusanger kwetu kuwanyish rusot ra Nzamb.—Kus. 107:21, 22; 119:14; 122:1; Rom 12:8, 11.
3 Mu Isarel wa pakur Chijil chalejanangap uvud kanang wa milambu yimwing. Mwin kwifukwil mwawonsu wading ufanyidin kumekesh kujikitish kwend kusutil ku kupan “mudi mukez kumuyukishilau kudi [Yehova, NW]” yamanangay kal. (Kuv. 16:16, 17) Chawiy chimwing kand nlel, muchim wa kujikitish utubachikin kusal yom yivud mu mudimu wa kulejan Want ni wa kwikadish in kwilej kulondulijan nich mikadil yetu. Angond a Kalol kushik ku Kafumpul-Mashind akat kuwejinaku yisu ya kumekesh kujikitish kwetu. Amwing akat kutaninamu ku machuku ma konje ku mudimu, ku shikol ap ku yisu yikwau yiwamp ya kuwejinaku chisu chau cha kusal mudimu wa chingand, ap wa kusal mudimu wa uchibol nkwash. Ov ukutwishap kutanduril mudimu wey?
4 Jikitishany Nakash: Njil ya usey nakash tumekeshidina kujikitish kwetu kudiay Yehova yidi malembil. (1 Tes. 5:17, 18) Dizu dia Nzamb ditukasikeshin kwikal in ‘kujikitish nakash.’ (Kol. 2:7) Ap anch tukwatiken nakash ap tunenganen, tufanyidin kujikitishang chisu chawonsu mu malembil metu ma pichuku-pichuku. (Fil. 4:6) Chakin, kusutil ku mudimu wetu ni malembil metu, twikalany lel ‘ampich nich nkumbu jivud ja kumujikitishin Nzamb.’—2 Kor. 9:12.