“Ikalangany [in] Kujikitish”
1 Yesu wayoka atubankat dikum, umwing kusu pakach pau wachirika wamujikitish. Chad Yesu wipula anch: “Ov kayokilip dikum? Pakwez chidivu adi kwisu?” (Luke 17:11-19) Chidi cha usey kud etu kwikal in kujikitish ni kwimekesh in kujikitishang mulong wa yom yawonsu yiwamp ni yiwanyidina yitwikishinay Tatukwetu mwin kupan ni mwin rukat udia mwiur, Yehova Nzamb!—Kol. 3:15; Yak. 1:17.
2 Yom ik yimwing tukutwisha kupanin kujikitish? Tukat kujikitish mulong wa difut, chipan cha Nzamb chipandakena kujimb mulong wa antu. (Yoh. 3:16) Tukat kand kumujikitish Yehova mulong watukakina piswimp nend. (Yoh. 6:44) Uumwing wetu wa win Kristu udi diyingishin dikwau dia kwikadil in kujikitish. (Kus. 133:1-3) Chakin kamu, ukutwish watongijokin pa yipan yivud ya Yehova. Kangal twikalany mud in Isarel alika kujikitish ni avuramena yom yayisadilay Yehova!—Kus. 106:12, 13.
3 Ikalany in Kujikitish: Ap anch atubankat awonsu dikum asangera yom yayisadilau kud Yesu, pakwez umwing kusu wamujikitisha. (Luka 17:15) Chawiy chimwing, tumekesh kujikitish kwetu ku kwikalang nich mushiku mu mudimu. Komb anch twimekesh in kujikitish mulong wa yom yatusadinay kal Tatukwetu mwin rukat udia mwiur, michim yetu yikutubachik chakwel tumekesha rukat ni kwipan mu kuyilejang antu akwau rusang rend. (Luka 6:45) Chawiy lel, anch twayirumburil akwetu ‘midimu yivud ya ufun ya Yehova ni yitongijok yend yitutongidinay,’ rukat retu ni kumujikitish kwetu Yehova yikukul.—kus. 40:5.
4 Yilejany Akwen Ikala in Kujikitish: Tufanyidin kudimuk chakwel tuyikwasha anetu ni antu tukata kwilej nau chakwel niyawiy ikala in kujikitish. Anvaj akwet mitapu yivud yakusal mwamu, mud chisu chikatau kutal yom yatangay Yehova. (Rome 1:20) Chisu utakedina dilejan dia Bibil tukutwish twamwipul mwin kwilej anch, “Yom yiney yitulejin ik pa untu wa Yehova?” Chawiy anch kusanger kwa mwin kwilej kwakul, chawiy rukat rend mulong wa Nzamb ni mupak wend wa kumusangaresh yikukul niyawiy.
5 Mu machuku minam ma nsudiel antu avud adi akad kusangar ni kujikitishang. (2 Tim. 3:1, 2) Chikat kumusangarish Yehova mudi ik pa kuyiman atushalapol end ipanina akat kujikitish kusutil ku kusalang mudimu wau wa kulejan!—Yak. 1:22-25.