Ov, Mulong wak Kwikal in Kujikitish?

“Mukatish Raquel,

Nikujikitishin nakash mulong wa kwikal kwey musul wam wa dikasikesh. Ap anch wijap, untu wey ukasikeshina ni mazu mey ma rukat mankwasha nakash.”—Jennifer.

OV, WATAMBULAP kal pakad kuchingejin mukand wa kukujikitish? Anch mwawiy, chakin kamu mazu minam makusangaresha nakash. Oku, chidi cha chivadik twiyova anch atukwatin nich usey ni atushangaredin.—Mateu 25:19-23.

Mazu ma kujikitish makat kukasikesh urund pakach pa muntu ujikitishina ni ujikitishinau. Chikwau, muntu ukata kumekesh kujikitish ulondwil mu jinzau ja Yesu Kristu, ndiy kadingap ni kukangany kuman midimu yiwamp yisadilau antu akwau.—Marko 14:3-9; Luka 21:1-4.

Cha ushon chidi anch, mazu ma muntu ma kujikitish, ma kulond ku kan ap ma kufund, chimeken anch mikadil kal ma kukimb. Bibil wasambela kubabesh anch “mu machuku ma kwisudiel,” antu akez kwikal “akad kujikitish.” (2 Timote 3:1, 2) Anch kitubabelap, kupalangan kwa ukadia-kutun kumeken ilel kukutwish kwajip yovil ya kujikitish yitukutwisha kwikal nich.

Ov, chom ik chifanyidinau anvaj asala chakwel ayileja anau mutapu wa kwikal in kujikitish? Ov, nany utufanyidina kujikitish? Ni mulong wak tufanyidin kwikal in kujikitish, ap anch antu atwombilamu adi akad kujikitish?

Mu Dijuku

Anvaj asadiling mudimu ukash mulong wa anau. Pa yisu yimwing, ap anvaj akutwish iyov anch kwikil uyijikitishina mulong wa usu wau usadilau. Ov, chom ik chikutwishau kusal mulong wa kutenchik mwikadil winou? Kudi yom yisatu ya usey yifanyidinau kusal.

(1) Chilakej. Mudi muchidinga mu mitapu ya kumufumb mwan, chilakej chiding mulej muwamp. Bibil ulondil piur pa maku wa pasak mukash mu mudimu wa mu Isarel anch: “Anend akat kutumbuk ni kumujikitish.” Ov, kwisu kwilejinau an inay kujikitish? Chikunku chikwau chishadilaku cha verse winou chiletin chakul. Chilondil anch: “[N]fumwend ukat kumushimek.” (Jinswir 31:28) Anvaj akata kujikitishan umwing ni mukwau ayilejin anau anch mazu makat kumusangaresh muntu ujikitishinau, makat kukasikesh urund wa dijuku, ni madi chijingidij cha kukul.

Tatuku umwing ukweta dijin dia Stephen ulondil anch: “Napakisha kwikal chilakej cha anam ku kumujikitish mukajam kupwa kwa yakudia.” Kwikala chibudikin ik? Stephen ulondil anch: “Ayangadim am aad amana chom chinech, ni chayikwasha ikala in kujikitish nakash.” Anch waten kal, ov, ukat kumujikitish mbay ney wa uruw chisu ni chisu mulong wa midimu ya pichuku pichuku yimekeninga mudi ya usweral yisadilingay? Ov, ukat kuyijikitish aney, ap anch asal yom yiwadia uchingejidina asala?

(2) Kufumb. Yovil ya kujikitish yiding mudi yisalamb. Chifanyidin kuyikun chakwel yileta yibudikin yiwamp. Ov, mutapu ik ukutwishau anvaj kuyikwash anau chakwel ayikudisha ni ikala in kujikitish? Mwant Salomon mwin manangu wakasikeshina chom chimwing cha usey pafunday anch: “Muchim wa mwin kutentam ukat kutong nawamp mutapu wa kwakul.”—Jinswir 15:28.

Anvaj, ov, ukutwishany wayifumbany anen asambish kutongin pa usu ni muchim wa kupan yidia kwinyim kwa yipan yawonsu yitambwilau? Kutongijokin kwa mutapu winou kukutwish kwakudish kujikitish mudi mudikata divu diwamp kukudish yisalamb. Maria, walila an asatu, ulondil anch: “Chitining chisu chakwel ushakam pamwing ni aney chakwel uyirumburila yom yikwachikina anch muntu kanang wayinkish chipan—anch muntu winou wadi ukutongidin ni anch wadi ubangidin akuleja mutapu ukatay kukutongin. Pakwez, novil anch chifanyidin kuujikitish usu winou.” Mambamb mudi minam mayikwashining an ileja kichidiap kusu yifanyidinau kulond pakatau kujikitishany pakwez kand mulong wak ufanyidinau kujikitish.

Anvaj in manangu ayikwashining anau chakwel iyepa yovil ya kwel anch yom yawonsu yiwamp yitambwilau yiyifanyidin.a Chiyul chidia mu Jinswir 29:21 piur pa kuyisadil aswik chilik chimwing mudi an anch: “Muntu ukumulila muswik [wend] nawamp kudiokal pa wanikanch wend, kwisudiel ndiy ukez kwikal mudi mwanend kamu.”

Ov, mutapu ik ukutwishany kuyikwash an akemp akemp ikala in kupan kujikitish? Linda, maku ukweta an asatu, ulondil anch: “Nfumwam ni am twadinga ni kuyikasikesh anetu ni awiy awejinaku yitongijok ku mazu ma kujikitish nich mitwadinga ni kufund ku kufwatul chifwatul chitukutuma nich pamwing ap ku kutek chikas pa kart.” Chakin, chifwatul chikutwish chikal cha upalakas ni yifundinau yikash kutang, pakwez yilejinau an kusutil ku chisal chinech yidi ya usey nakash.

(3) Kudandamen. Etu awonsu tukweting chivadik cha kwikal in ushish, ni chibachikin chinech chikutwish chatukangesh twikala in kujikitish. (Disambishil 8:21; Mateu 15:19) Ap mwamu, Bibil uyikasikeshin atushalapol a Nzamb anch: “Sotany kutambul manangu masu mu muchim; mudjalany muntu musu kwanitangilanyau mu chifu cha Nzamb.”—Efes 4:23, 24.

Pakwez, anvaj akweta ronganyin, akata kuyikwash an chakwel ‘amudjala muntu musu’ amening anch chiding chiswapela pa kuchilond pakwez chikash pa kuchisal. Stephen, ujimbwilau kwiur oku, ulondil anch: “Kuyilej ayangadim etu chakwel asambish kujikitishan mu mazu mau ayinau, pakad kuyivurishang, chita chisu chilemp.” Pakwez Stephen ni mukajend kalikap. Ndiy udandamedin kulond anch: “Nich kudandamen nakash, ayangadim etu ashikena ku kwilej dilejan dijim. Katat tusanger pa kuyiman mutapu ukatau kuyijikitish antu akwau.”

Chidi Nchik Piur pa Arund ni Amutej Netu?

Anch twakangany kujikitish, tukutwishap twikal in kujikitishan, pakwez tukwikal in kuvuramen. Ov, chakin kamu chidi cha usey ku mutambu wetu anch kangal twova kusu yovil ya kujikitishan pakwez tufanyidin kwikal in kujikitishan? Chakwel anch twakula ku chipul chinech, tushinshikinany chom chimwing chashikena mu mwom wa Yesu pantaliken nau ayej a musong wa mak.

Padingay ni kuya ku Yerusalem, Yesu wasankanijana ni amakundj dikum adinga akwet musong wa mak. Bibil ulondil anch: “Awiy abarika mazu anch: Mwant Yesu, itwovilap etu riy. Ndiy chayimanay wayel anch: Yangany ukimekeshany ayinen kudi in kupesh. Chikwasuta pachadiay ni kuya ayerika. Umwing wa awiy, chamanay anch nawap kal, wakarumuk wachirik, wend umushiman Nzamb ni dizu dikash; ndiy wabwik mpal yend pansh ku yidjatil yend, wend umujikitish; ndiy wading mwin Samaria.”—Luka 17:11-16.

Ov, Yesu wadiurila kwend kuburen kwa antu akwau kumekesh kujikitish kwau? Rusangu ridandamedin anch: “Yesu wakul walond anch: Ov, kayokilingip dikum? Pakwez chidivu adi kwisu? Kikwadiap umwing watonga kwez kupan uyaj kudi Nzamb, ching kwend mwin mweny ou?”—Luka 17:17, 18.

In mayej ma mak akwau chidivu kadingap antu ayimp. Kwinsambishil, awonsu amekesha patok anch amwitiyijin Yesu ni adinga tayad kuziyil ku yany yend, mudi kuya ku Yerusalem mulong akimekesha ayinau kudiau in kupesh. Pakwez, ap anch ova pakad kwidjidjek yovil yikash piur pa chisal cha riy chayisadilau kudi Yesu, awiy akanganya kulond kujikitish kwau kudiay ndiy. Mwikadil wau winou wamwovisha Kristu ushon nakash. Ov, chidi nchik ku mutambu wetu? Anch muntu kanang watusadil yom yiwamp, ov, tuding tayad kumujikitish ni, pichifanyidina, kumulej anch tumujikitishin kusutil ku kumufundin ka dizu ka kumujikitish?

Bibil ulondil anch: “Rukat kirukwetap dichim, ap kwitong.” (1 Korint 13:5, Manswik Masu) Chawiy lel, mazu makin ma kujikitishan kimadiap ching kusu chijingidij cha chaku chiwamp pakwez madi kand uman wa rukat. Mudi mutwilejidina kusutil ku rusangu ra ayej a musong wa mak, antu asotila kumusangaresh Kristu akwet rukat mudi riner ni ayijikitishining antu awonsu, pakad kutal ngand yau, ulombu wa chikit chau, ap relijon wau.

Iyipula amwiney, ‘Chisu ik chansudiel chinamujikitisha mutej nam, mbay nam a mudimu, mbay nam wa ku shikol, chid cha in kusal mudimu ku rupital, mwin kulam makashing, ap muntu win mwawonsu wankwasha?’ Ov, mulong wak kulik kutenchik dipaper mulong wa dichuku dimwing ap maad, ufunda uvud wa tupamp ulondila chakin kamu anch nakujikitish ap kufund ka mukand ka kujikitishan? Kufund kwinoku kukutwish kwakukwash wijika chiufanyidina kurijek pa mulong wa kujikitishan.

Chakin kamu, muntu upandakenamu kujikitish kwetu udi Yehova Nzamb. Ndiy udi Mwin Kupan wa “yom yawonsu yiwamp ni yiwanyidina.” (Yakob 1:17) Chisu ik chansudiel chiwamujikikisha chakin kamu Nzamb mulong wa yom kanang ya pakampwil yakusadilay?—1 Tesalonika 5:17, 18.

Ov, Mulong Wak Kujikitish ap Anch Antu Akwau Alikining Kwau Kujikitish?

Antu amwing kakutwishap atujikitish pitukata kuyijikitish. Ov, mulong wak, tufanyidin kujikitishan ap anch antu akwau alikining kwau kujikitish? Tushinshikinany diyingishin dimwing kusu.

Kusutil ku kuyisadil yom yiwamp antu akata kulik kujikitish, tukumwimburij Sakatang wetu mwin kujikitishan, Yehova Nzamb. Ap anch antu avud kakatap kumujikitish mulong wa rukat rikatay kuyimekeshin Yehova, kukata kumukangesh alika kuyisadil yom yiwamp. (Rome 5:8; 1 Yohan 4:9, 10) Ndiy “ukat kubudishilang muten wend kumunyikin padi ayimp ni awamp, ni kunakish ruvul padi in kutentam ni akad kutentam.” Anch twasal usu wa kujikitishan ap anch tushich mu mangand makad kujikitishan, tukez kwimekesh ayinetu anch tudi “an a [Tatukwetu] udia mwiur.”—Mateu 5:45.

[Mazu madia kwishin kwa paj]

[Tablo wa jinsangu udia pa paj wa 15]

Tenchik dipaper mulong wa dichuku dimwing ap maad, ufunda uvud wa tupamp ulondila chakin kamu anch nakujikitish

[Chipich chidia pa paj wa 15]

Ikal chilakej cha aney mu kujikitishan

[Chipich chidia pa paj wa 15]

Chitwishikin kuyilej ap an akemp ikala in kujikitishan