Mukwasha Mwaney Kura Nich Runeng

MU MAKASHING mwizwila yom too, maku umwing wovila kuyip wayibarokina in kulandish anch: “Wizwishinany mabuku too mu makashing men pakwez ukwetanyap chom chikutwisha kumukwash mwanam!” Maku wadinga ukimbin yiyul yikutwisha kumukwash nsangarum wend chakwel ajijamena nich rufu ra muntu umwing wa mu dijuku.

Maku winou wadinga uyingin mu kwiyakamish kwend. Chikat kumwakamish mudi ik nsangarum pa kuman chidinga rufu! An alilinau mu majuku mau, rufu rikutwish rez ramusend muntu wadia ukatijadinay nend nakash mwan. Chiudia nvaj, mutapu ik lel ukutwisha kumukwash mwaney anch sot ufishany mukatish ap anch wafishany kal?

Chakin kamu, kura nich rufu ra mukatish, ukutwish wara nich yovil yey bil amwiney; ukutwish wov ushon ni kutongijokin mutapu wamushadisha kal. Pakwez, kiufanyidinap kuvuramen anch mwaney uswiridin ukwash wey. Ditenchik dimwing dilamininga amapal dia mu Minnesota, mu États-Unis, diapalangesha mukand umwing wadinga ulondil anch: “An oviling kusansan ni yikunku ya minsamb, ni, anch wayishany nich yinambay yau ayinau, chisu ni chisu akat kukarumun ap anch kuswimp jinsangu mu jadia.” Mukand winou walonda kand anch: “Chifanyidin kuyilej an uyakin.” Komb chikutwish chikal cha manangu kuyilej aney uyakin wa yom, mu mutapu ukutwishau kutesh kukwatijan nich mivu yau. Chom chinech chikasikening, mulong an akutwish ashalijan mu ukaliweny wau wa kutesh yom yashikenang.—1 Korint 13:11.

Mutapu wa Kurumburil Rufu

Kukimbijol kumwing kulondil anch pa chisu cha kwisamb ni mwan piur pa rufu, anvaj afanyidin kudimukin pa kusadil mazu mudi “kulal,” “kushadik,” ap “waya kal kwend.” Kusadil mazu minam pakad kumarumburil kukutwish kwamurumbangesh mwan mu manangu. Chakin kamu, Yesu wasadila kulal mulong wa kwilakej nich rufu ni kwadinga kamu kufanyidin. Vurikany kand anch, kadingap wisambin ni an. Kurutu warumburila chilakej chinech. Yesu wayileja in kwilejend anch: “Murund nend [Lazar] widjibulang kal mu tul.” In kwilej, ap chadingau kal antu amakurump awiy “atong anch [Yesu] ulondil ya kwiswedish mu tul.” Chawiy Yesu wayileja patok mulong winou anch: “[Lazar] wafang kal.” (Yohan 11:11-14) Anch chafanyidina kuyirumburil antu amakurump mwamu, ov, chikwikal nchik ku mutambu wa anetu!

Mwin kufund Mary Ann Emswiler nenday James P. Emswiler alondil anch: “Nvaj ukutwish wapakish kupipeshaku mazu pa chisu chimurumburidinay mwanend chidinga rufu, pakwez anch wasal mwamu, ukutwish wandjik mu manangu mend yitongijok yakad kwikal mu mutu wend ni yikutwish yamwovish wom ap yamwakamish.” Chilakej, kumulej kwau kusu mwaney anch mukatish ufila ulel kwend kukutwish kwamwovish mwan wom anch, ang waya uchuku ni kulal kakutwishap walank. Pakwez anch wamulejan anch mukatish ufila “waya kal kwend,” mwan ukutwish wiyovu mudi anch amusha kal kwend.

Pa chisu chisotiningau anvaj avud kuyirumburil an chidinga rufu, amana kal anch an ateshining kwau, mazu makin nakash nakash kupandakanamu kuyilejin mu mazu ma ujindj. (1 Korint 14:9) Yikimbijol yiyudil anch ukutwish kumukasikesh mwaney chakwel ipula yipul ni isambina piur pa yitongidinay. Minsamb ya chisu ni chisu yikutwish yakukwash umurumburila patok mwaney yom yiburedinay kutesh ni kukutwish kwakushikij ku kujingunin jinjil jikwau ja kumukwash.

Musul Wakuchingejin wa Umutakel

Pa chisu cha chidil, mwaney ukuchingejin chakwel umwinkisha umutakel, ukwash, ni yakul. Ov, kwisu lel ukutwisha kutan jinsangu jakin piur pa rufu? Antu avud ashikedin kal mu kuman anch Bibil udi musul wakuchingejin wa rongoj ni ruchingej. Mudi jinsangu jakin piur pa mutapu wasambisha rufu, mwikadil wa afu, ni ruchingej piur pa afu. Uyakin wovikena patok ulondil anch “antu afu kijap chom” ukutwish wamukwash mwaney ijika anch mukatish nend ufila kamenap mar. (Mulej 9:5) Chikwau, mu Bibil, Nzamb utwinkishinamu ruchingej anch tukez kuyiman kand akatish netu afa kal mu paradis wa pansh.—Yohan 5:28, 29.

Kusutil ku kukarumukin ku Mifund Yitumbila, ukutwish wamukwash mwaney ileja anch Bibil uletin umutakel wa kuchingejin ni rongoj piur pa mwikadil wawonsu wa mar. Pa chisu chawiy chimwing, mwaney ukutwish waman anch ey mudi nvaj uchingejidin pa Dizu dia Nzamb chakwel utana umutakel pa milong yijim ya mu mwom.—Jinswir 22:6; 2 Timote 3:15.

Yipul Yey Ayakwil

Piumukwashina mweney chakwel ajijamena rufu ra mukatish, ukutwish wikal mu mwikadil umwing wakad ey kutwish kwijik cha kusal. Chom ik ukusala lel?a El tushinshishikinany yipul yimwing yiukutwisha wiyipul.

• Ov, nifanyidin kumujindjikin mwanam runeng ram? Chiding cha chivadik kusot kumuchidij mwaney. Pakwez, ov chidi chiyimp anch mweney wakuman anch unenganen? Anvaj avud ashikedin kal ku kuman anch chiwapdil kwikal wakin piur pa ushon wau, chawiy kuyilej anau anch choviken kwau kunenganan. Amwing isamba kal pamwing ni anau piur pa yilakej yidia mu Bibil ya antu anenganana patok. Chilakej, Yesu wadila pafay murund nend Lazar. Yesu kajindjikap yovil yend.—Yohan 11:35.

• Ov, mwanam ufanydin kwikalaku ku chikumbu kudia chidil ap kuya kwinzay ap kuya kusadilau diskur dia rufu? Anch mwan ukwikalaku, chikwikal cha manangu kusambel kumurumburil yom yikusadikaku, ni mulong usadinau yom yiney yawonsu. Chakin kamu, mu mikadil yimwing, anvaj akutwish akwat mupak anch kudi mayingish mawamp makutwisha kusal anch anau kangal ikalaku ku yom yiney yawonsu ap ku yikunku ya midimu yiney yawonsu yikusadika. An adinga kusadikina midimu ya chidil yitakedilau Atuman a Yehova akutwish ataninamu mu yiyul ya diskur dikusalau diengamidina pa Bibil. Chikwau, ‘kukatijan’ kukumekeshau antu adiaku kukutwish kwikal kwa usey ni kwikal rongoj rikash, ap kudi mwan.—Rome 12:10, 15; Yohan 13:34, 35.

• Ov, nifanyidin nisamba ni mwan piur pa mukatish ufila? Yikimbijol yimwing yilondil anch, ang walik kamu kwisambin mulong winou, mwaney ukutwish nich kurumbuk watong anch umujindjikidin chom kanang piur pa muntu wafila ap anch usotil kumujimangesh kamu mu manangu. Mwin Kufund Julia Rathkey ulondil anch: “Chidi chijim kuyikwash an ileja kushakam nich yom yijau nawamp pa ndond pa kuyilik ashakama mu wom.” Kulond patok piur pa muntu ufila, pamwing nich kwisambin yom yiwamp ku mutambu wa muntu winou ni mwom wend, kukutwish kwakwash nakash pa kunenganan. Anvaj adia Atuman akat kuyongoj anau nich ruchingej ra Bibil ra disanguk dikeza kusadik mu paradis pa divu, mwawiy kimukezap kand kwikal mayej ni rufu.—Kuburik 21:4.

• Ov, mutapu ik nikutwisha kumukwash mwanam pachididilay? Pa chisu cha kunenganan, mwaney ukutwish waman yijingidij kanang pa mujimbu, chilakej mudi mayej. Mwan ukutwish wikal mwin kujiman chisu ni chisu ap urumbangena mu manangu mulong wiyovil anch kakawetap wa kumukwash. Kangal wakashimuk anch mwaney wasambish kwifish nich amwinend, ni wakulamat nakash, ap anch wasambish kwov wom ukash anch walab kuwayang ap anch wayel. Ov, mutapu ik ukutwisha kura nich mwikadil winou ukash wa mwaney? Mwaney kafanyidinap iyova anch kiumenap anch kudi chom chiyimp chisadikina. Komb ufanyidin kusadil njingunin yey ni shinshikin chisu chisutishinay mu mwikadil winou. Kangal wapakish kumurumburil ap kupipesh mutapu ukwachikinay mwaney nich rufu. Mukasikesha chisu ni chisu, ni mwita akwipula yipul yikwetay ni isambany chisu ni chsu. Ukutwish wakasikesh ruchingej ra mwaney—ni reyey amwiney—“mu kwongoj kwa mukand wa Nzamb.”—Rome 15:4.

• Chad mutapu ik nikuchirisha kand chaku cham ni mijikit ya mu dijuku? Ansil alondiling anch, pakad kulab chirishany chaku chen mudi mu chidia, muchitwishikina. Kwikal nich chaku chiwamp akulondiling anch kudi chom cha usey mulong wa kura nich runeng. Mu Atuman a Yehova, anvaj avud ashikedin kal ku kuman anch kwikal nich chaku chiwamp cha muspiritu, kwikal nich dilejan dia Bibil dia dijuku ni kukumangan ku yikumangan ya Ukristu, kukutwish kwachirish ni kukasikesh dijuku.—Kuvurik Yijil 6:4-9; Hebereu 10:24, 25.

Djat ni pakezinay Yehova Nzamb kudiosh mayej ni rufu, an akura chisu ni chisu nich yishiken ya rufu. (Isay 25:8) Pakwez, nich kukasikesh ni ukwash wakin, chitwishikin kuyikwash an atwisha kura nich ni kupandakan anch mukatish wafa.

[Mazu madia kwishin kwa paj]

[Chipich chidia pa paj wa 11]

Mukasikesh mwaney chakwel ipula yipul ni isambina piur pa yitongidinay

[Chipich chidia pa paj wa 12]

Chirishany chaku chiwamp ni kwikal nich dilejan dia Bibil dia dijuku