Mutapu wa Tukura Nich Runeng

“Anend [a Jakob] amakundj ni anend amband awonsu atumbuka aya ni kumwongoj tatukwau. Pakwez Jakob walika kwongoj kwau, walond anch: ‘Bwat, nikuya kamu kudi mwanam kwi ndond ya afu ni kudil kwam.’ Tatukwend wamudila Josef nakash.”—DISAMBISHIL 37:35.

NSHAKUR Jakob wanenganana nakash pa kumushadish mwanend ikundj. Wadandamena nich kunenganan djat ni pakezay kufa. Mudi Jakob, ukutwish pamwingap wiyovu anch kusansan kwa kumufish mukatish ney kudi kukash ni kukezap kupwa. Ov, kunenganan kukash mudi kwinoku kudi chijingidij chilejena anch muntu kamwitiyijinap Nzamb? Bwat kwau!

Bibil ulondil anch Jakob wadinga ikundj mukaritiy. Amushimana Jakob mulong wa ngikadil yiney mu chilik chimwing mudi ngakend Abraham ni tatukwend Isak. (Hebereu 11:8, 9, 13) Dichuku dimwing, ndiy wara tutaku uchuku wawonsu ni mwangel ching anch atambula chiyukish cha Nzamb! (Disambishil 32:24-30) Chimeken patok anch, Jakob wadinga ulamatin nakash ku yom ya muspiritu. Chadi, chom ik tukwilejina ku runeng rovay? Yovil yikash yitukutwisha kwov anch mukatish netu wafa yidingap chilik chimwing ni ritiy rikash mudiay Nzamb. Runeng ridi yovil ya chitangil yezininga anch mukatish netu wafa.

Runeng Chom Ik?

Runeng rikutwish ratukwat mu jinjil kushalijan, pakwez kudi antu avud rikat kwikal kusansan kukash kupandakena kwa yovil. Tushinshikinany chilakej cha Leonardo, wadinga nich mivu 14 pafay tatukwend cha rinkanku mulong wa mayej ma kukasikan kwa kupim nawamp. Leonardo kavurameningap dichuku diamulejau rusangu riner kudiay makwend, mupanyend a tatukwend. Walika bil kwitiyij anch chidi chakin. Wamana chital cha tatukwend payau kumujik, pakwez yom yiney yawonsu yadinga ya wingendj kudiay ndiy. Pa kusut kwa angond musamban, Leonardo katwishangap kand kudil. Chisu ni chisu wadinga ni kukashimok amwinend mudi umuchingedin tatukwend achirika kudiokal ku mudimu. Pasuta muvu chadi lel itiyija. Pa dichuku dinidia ditiyijay wiyova anch udi amwinend. Yom ya usweral—mudi kuchirik kwolikwend kwakad muntu—kwadinga ni kumuvurish kulik kwikalaku kwa tatukwend. Pa yisu yiniya, wadinga ni kudil. Kadingap kand ni tatukwend!

Mudi muchimekena mu yom yamushikena Leonardo runeng rikutwish rikal rikash. Pakwez rusangu ruwamp ridi anch chitwishikin kukupandakan. Pakwez, kukwit chisu. Mudi mudinga chitat chijim chikat kusal machuku chakwel chiyerika, runeng ra kufish ni rawiy ripwilingap kapamp kamwing. Kwitining angond, mivu ap chisu chilemp nakash chakwel runeng risambishaku kukep. Pakwez kusansan kukash kuukutwisha kwov kwinsambishil kukusambish kukep mu kusut kwa chisu, ni ukusambish kwovikan pakemp ni kumekan anch kudi kwau kwa chamwamu.

Oku kand, chimeken anch runeng rawiy njil yitwadila ku kwiyovu nawamp ni ya kwilejin mutapu wa kwitiyij mwikadil usu. Mwi ndond mwadingay muntu mukwikal mwawashi. Tuswiridin twileja mutapu wa kushakam padi muntu winou. Runeng rikutwish ratukwash mu yovil. Chakin kamu, antu awonsu kakatap kunenganan mu mutapu umwing. Pakwez kudi chom chimwing chidia chakin: Chikutwish chikal kusheshik ku mujimbu ap mu manangu kulikin kwa yovil yiney. Ov, mutapu ik uwamp wa kunenganan? Mu Bibil mudi yiyul yimwing ya usey pa mulong winou.a

Mutapu wa Kura Nich Runeng

Antu avud afisha kal amening anch kulond kukutwish kwayikwash nakash. Talany, mudi chilakej, mazu malonday Yob madia mu Bibil, muntu wafisha anend awonsu dikum ni wajijamena yishiken yikwau yikash yamutana. Ndiy walonda anch: “Nikisin kushakam mwom, ni kulond nich kusansan kwa mupim wam.” (Yob 1:2, 18, 19; 10:1) Talany anch Yob wadinga uswiridin “kulond” piur pa yakamish yend. Ov, mutapu ik welay kusal mwamu? Amwinend warumburila anch “ni kulond.”

Paulo, wamufisha makwend, ulondil anch: “Chimwing cha yom yankwasha, chadinga kulond piur pa makwam.” Kumulej murund uchingejidina yovil yey yikash kukutwish kwakupimishaku. (Jinswir 17:17) Kupwa kwa kufa kwa makwend, Yone wayita akadivar nend in Kristu anch eza amwendina chisu ni chisu. Ndiy uvurikin anch: “Kulond kwankwasha nikepishaku kuswan kwam.” Niyey ukutwish waman anch, ang walond piur pa yovil yey yikash ni anch wamulejay muntu ukutwisha nawamp win kukwanaken ukutwish watwish nawamp kura nich.

Kufund nikwawiy kukutwish kwakukwash. Antu ameninga anch chiyikasikedin kulond yovil yau amening chisu chimwing anch chiyiswapediling kuyifund. Kupwa kwa rufu ra Saul nenday Yonatan, David muntu ushinshamena wafunda muminy wa ushon nakash mulejenay yovil yend ya ushon. Mumuny winou wa mushet wikala chikunku cha buku wa Bibil wa Samwel wa Kaad.—2 Samwel 1:17–27, Les Saintes Écritures — Traduction du monde nouveau.

Kudil ni kwawiy kukutwish kwakwash. Bibil ulondil anch: “Kudi chirung cha yom yawonsu . . . kudi chisu chimwing cha kudil.” (Mulej 3:1, 4) Chakin kamu, kufa kwa muntu utukatininga chawiy “chisu . . . cha kudil.” Chifanyidinap kwov usany wa kudil anch wovil runeng. Mu Bibil mudi yilakej yivud ya amakundj ni amband ashinshamena alejana patok runeng rovau ni adila. (Disambishil 23:2; 2 Samwel 1:11, 12, NW) Yesu Kristu “wadila” pashejinay piswimp ni nzay mwadingay murund nend Lazar, wafa machuku minimang.—Yohan 11:33, 35.

Chitining kushimpish muchim chakwel kupwish runeng, mulong yovil yisadiling yaya yez, yaya yez. Vurikany anch kwikil usany wa kudil. Antu avud akaritiy amening anch kudil kuyiling pamwing nich runeng.

Ikalany Piswimp Kudi Nzamb

Bibil utulejin anch: “Ikalany piswimp kudi Nzamb, ni yend ukwikal piswimp kudi en.” (Yakob 4:8) Malembil madi njil ya kusambish yetwetu kwikal piswimp ni Nzamb. Kangal wapipeshany usey wa malembil! Bibil utulejin kushilamu oku kwongojina nakash anch: “[Yehova, NW] udi piswimp nau awiy akweta michim yinenganena, ukat kuyipandish akweta michim yitudishila.” (Kuseng 34:18) Utulejin kand anch: “Tek chisend chey kudi Nzamb, Ndiy ukukutuliku.” (Kuseng 55:22) Tonginany bil pa chinech. Mudi mutwisambina kwinsambishil, antu avud adi in ameninga anch chidi cha ukwash amulejamu murund nend uchingejidinay. Ov, chidiap cha ukwash nakash kuburil michim yen kudiay Nzamb ushidilamu anch ukuyongoj michim yen?—2 Tesalonik 2:16, 17.

Paulo, wajimbulangau kwiur oku, ulondil anch: “Panadinga nikangen kujijamen kusansan kunadinga novila ni niyova anch jampwa kal, nadinga ni kwas manungun pansh namwilembil Nzamb. Nadinga ni kumwilembil ankwasha.” Paulo witiyija anch malembil mend mamukwasha nakash. Niyenen ukutwish washikenany ku kujingunin yakul ku kudandamen nich malembil men, “Nzamb wa kwongoj kwawonsu” ukez kukwinkishany usu ni ukash wa kura nich.—2 Korint 1:3, 4; Rome 12:12.

Ruchingej ra Disanguk

Yesu walonda anch: “Am yam mwin kuvumbul antu ni kuyinkish mwom. Muntu mwawonsu ukwingitiyija ukez kupand, ap anch wafap nchik.” (Yohan 11:25) Bibil ulejen anch afu akez kikal aom kand.b Padingay Yesu pansh, ndiy wamekesha anch wadinga nich usu wa kuyisangul afu. Dichuku dimwing, wamusangula changadim ukweta mivu 12. Mutapu ik wasalau anvaj end? Awiy “ashimok[a] ni kushimok kujim.” (Marko 5:42) Mu Want wend, Yesu Kristu Mwant wa mwiur ukez kuyisangul tutikit twa antu panap pansh—pakeza kwikal ngikadil ya chisambu ni yitentamina. (Midimu 24:15; 2 Pita 3:13) Tonginany kushimok kujim kukeza kwikalaku pakezau antu kusanguk ni kuchirik kudi akatish nau!

Claudete, wafisha mwanend ikundj Renato pa chisu chabulay kajil wa yikung kapat, wateka chipich cha mwanend ikundj, mu ditalesh. Wadinga ni kuchital chisu ni chisu ni wilondisha amwinend anch: ‘Tukez kumanijan kand pakezay kusanguk.’ Leonardo wadinga ni kumuvurik tatukwend mudi anch adi kal mu mangand masu mashilayimu Nzamb. Inge, kudiay Claudete, Leonardo ni antu akwau avud afisha kal akatish nau ruchingej ra disanguk ridi musul wa rongoj rau. Mwamu rikutwisha kand kwikal kudi ey!

[Mazu madia kwishin kwa paj]

[Kamushet/​Chipich chidia pa paj wa 7]

“Nzamb wa Kwongoj Kwawonsu”

“Kuyuk kwikal kudi Nzamb ni Tatuku wa Nsalejetu Yesu Kristu, Tatuku wa riy ni Nzamb wa kwongoj kwawonsu.”—2 Korint 1:3.

Verse winou wa Bibil ulejen anch Nzamb ukat kuyikwash atushalapol end ashinshamena chakwel ajijamena milong ni yikokujol yiney yawonsu yikutwisha kuyitan. Yehova ukutwish wamusadin murund ap mukatish nau ukweta yitiyij mudi yikwetau mulong wa kuyongoj.

Leonardo, wafisha tatukwend, uvurikin chom chimwing chamanay chamukasikesha ni chamwongoja. Wadi wachirik kal kwolikwend, ni pavurikay anch ku chikumbu kwikil muntu, wasambisha kubarok kudil. Waya mu park umwing wadinga piswimp washakam pa chibas, ni wadandamena kudil. Padingay ni kudil, waninet wamwilembil Nzamb amukwasha. Kukashimuk, kamotak kiman piswimp ni padingay, ni Leonardo watal waman anch umwing wa akadivar nend in Kristu ndiy ukendishina. Mukadivar wadinga uyil ni kushawol yom pakwez washadika njil yadinga yifanyinay kuya. Kwikalaku kwend kwamwongoja nakash Leonardo.

Ikundj umwing mufir, wiyova amwinend ni wanenganana nakash. Kalikap kudil mulong wamana anch kwikil kand chom chiwamp mu mangand. Wamwilembila Nzamb chakwel amukwasha. Padingay ni kulembil telefon wend wadjima. Wadinga mwijikurend mband. Ndiy uvurikin anch: “Mambamb metu miswimp manchirishina usu ukash. Kapamp kamwing natesha anch kwintazuk kwinoku ku telefon kwadinga chakul ku malembil mam.”

[Kamushet kadia pa paj wa 9]

Ayongojin Akwau

“[Nzamb] ukat kutwongoj mu mar metu mawonsu, chakwel ni etu tukutwish kuyongoj ni yau adia mu mar nich kwongoj kwatongojau nich etu kudi Nzamb.”—2 Korint 1:4.

In Kristu avud imena kal ayinau chirumburikina mazu minam. Ayongoja chakwel atwisha kujijamen nich rufu ra mukatish nau, niyawiy amen anch akutwish kuyikasikesh ni kuyongoj akwau.

Tushinshikinany chilakej cha Claudete, wadinga ni kuyendil antu akwau mulong wa kuyilej yitiyij yend yadinga yengamidina pa Bibil. Kurutu amufisha mwanend ikundj, wadinga ni kuya kumwendilang mband umwing wafisha mwanend ikundj mulong usu wamukepa. Mband winou wasangera nakash kumwendil kwinoku, pakwez wiyova anch Claudete kakutwishap wovu mudi mwovilay. Pakwez, kupwa kamu kwa kufa kwa mwanenday Claudete, mband winou wamwendila ni wamuleja anch wezang chakwel amana anch chakin Claudete uchilamin ritiy rend mulong katat niyend wafish kal mwanend ikundj. Washimoka pa kuman ritiy ra Claudete, mband winou wilej katat Bibil pakad kujing ni Claudete ni utanin rongoj rikash mu Dizu dia Nzamb.

Pafishay tatukwend, Leonardo wakwata mupak wa kwilej rudim ra yijingidij chakwel atwisha kuyilej atujika matu uruu wa Bibil wongojina. Weza kujingunin anch usu wasalay mulong wa kuyikwash atujika matu wamukwasha nakash. Ndiy ulondil anch: “Chimwing cha yom yankwasha kujijamen runeng chadinga kusot kwam kuyikwash atujika matu amwijika Nzamb. Nasadila chisu chilemp ni usu uvud mulong wa kuyikwash. Runeng ram rakarumuka rikal musangar panamumana muntu wa kusambish nileja nend wababatishiwu! Chakin kamu, kadinga kapamp ka kusambish kudiosh pafilay tatukwam, nova musangar ujim.”—Midimu 20:35.

[Chipich chidia pa paj wa 5]

Kulond piur pa yovil yey kukutwish kwakupimishaku

[Chipich chidia pa paj wa 6]

Kufund kukutwish kwikal kwa ukwash mu kwijikishany runeng

[Chipich chidia pa paj wa 6]

Kutang yilondilau piur pa ruchingej ra disanguk kukutwish kwikal musul wakin wa rongoj

[Chipich chidia pa paj wa 8]

Yesu washilamu anch ukez kuyisangul antu awonsu amwitiyijina