Anch Wafish Muntu Ukatina

Vanessa wa mwi ngand ya Australie ulondin anch: “Natwishap kusal chom ap chimwing mulong wa kukangesh rufu ra yayam ikundj wafa pakad kuchingejin. Mu kusut kwa angond, navurikang rufu rend ni niyovang nayimp nakash, novang mudi mpak yikat kwinsay mukach mwa mujimbu. Yisu yivud, najimanang nakash. Niyipulang anch mulong wak wafilay yayam? Mulong nadingap kusutish nend chisu chivud padiay mwom.”

ANCH niyey wafishin muntu ukatina, niyey ukutwish kwikal ni yovil kushalijan, yidiokila ku kusansan kwa kwiyov kwikal amwiney ni kuziy. Pamwing ap ukutwish kand kwov ujim, kwikal ni yovil ya kwifish nich ni wom. Ukutwish pamwing ap kwiyipul anch chidi cha usey kudandamen kwikal mwom.

Ikal nich kashinsh anch ushon chidiap chijingidij cha kuziy. Umekeshin mutapu wadia umukatina muntu wafang. Pakwez, ov, chiswapel kukepish ushon wey?

YIYUL YIMWING YIKUTWISHA KUKUKWASH KUJIJAMAN

Anch umen anch ushon wey ukutwishap kupwa, ukutwish kulondul yiyul yilejenau kwinshin oku yikutwisha kukwongoj:

CHIYIPINAP KWAU KWOV USHON

Etu awonsu tukatap kumekesh ushon mu mutapu umwing ni uvud wa machuku tukata kumekesh ushon winou ushalijadin. Chawiy, kudil kukutwish kukukwash kukepish ushon wey. Vanessa, wajimbulangau kwinsambishil ulondin anch: “Anch nikimbin anch nikepisha ushon wam; nadilang.” Sofía, ukweta mwanchend mband wafa mu chikashimwish ulondin anch: “Chikat kwinsal nayimp nakash anch natongin pa yom yashikena, nikat kwov mudi muntu wowishinau pa chitat chivukina. Kusansan kuding kukash, pakwez kukat kusal anch chitat chiya.”

YILEJAMU ANTU AKWAU YITONGIJOK YEY NI MUTAPU WIYOVILA

Yisu yimwing, ukutwish kukat kwikal pa ndond ya amwiney. Pakwez kurish ni ushon amwiney kudi mudi kukakalijan amwiney difund dipandikena kulim. Jared ukweta mivu makum sambwad, wafisha tatukwend, ulondin anch: “Nayilejamu antu akwau mutapu nading niyovila. Natwishap kuyilej nawamp mutapu nading niyovila, pakwez nova musangar mulong nayijikishamu antu akwau.” Janice, wajimbulangau mu mutu wa mulong wakusambish, niyend ulondin anch: “Kwambamb nau antu akwau piur pa mutapu nading niyovila kwangongojang nakash. Niyovang anch antu akwau ovil mutapu niyovila ni namana anch nijijamedinap chakamish amwinam.”

ITIY UKWASH

Dokter umwing ulondin anch: “Kupwa kwa kufish muntu, anch muntu wafishang witiy kumukwash kudi arund nend ni kudi anamakwend, chikat kumuswapel kujijamen ushon ni kuupandikan.” Yijikisha arund ney yom yikutwishau kusal mulong wa kukukwash; mulong pamwing ap akwet kuswir kwa kukukwash pakwez kijap yom yifanyidinau kusal.—Jinswir 17:17.

SEJ PISWIMP NI NZAMB

Tina ulondin anch: “Pafay nfumwam mulong wa kanser, nadingap kand ni muntu wa kulej milong yam, minan ni yovil yam, chawiy nafanyina kumulej Nzamb yom yawonsu! Nasambisha kumwit Nzamb dichuku diawonsu chakwel ankwasha kusutish nawamp dichuku. Nzamb wankwasha mu mitapu yivud ni nikutwishap kuyijimbul.” Tarsha, wading ukweta mivu 22 chisu chafay makwend, ulondin anch: “Kutang Bibil dichuku diawonsu kwankasikeshang. Natangang chom kanang chikasikeshina natongijokinang.”

TONGIN PA CHISU CHIKUVUMBUKAY MUKATISH NEY

Tina ulondin kand anch: “Pinafisha, ruchingej ra divumbuk rangongojap mulong nading nikwet kuswir kwa kwikal ni nfumwam, ni anam amakundj aad ading akwet kuswir kwa kumuman tatukwau pa chisu chinicha. Chawiy, kupwa kwa mivu yinying, nashinshikina pa ruchingej ra divumbuk. Ruchingej riner rinkwashin kujijaman. Nikat kutongijok mudi nimumen kand, ni chinech chikat kwinletin chisambu ni musangar!”

Pamwing ap ushon wey ukutwishap kupwa kapamp kamwing. Pakwez yom yamanay Vanessa yikutwish kukukwash. Ulondin anch: “Ukutwish kutong anch ushon wey ukezap kapwa, pakwez ukwiyov anch ushon ukusambish kukep mu kusut kwa chisu.”

Ijik anch ap anch ukudandamen kwov nayimp mulong wa mwanamakwey wafila, mwom wey udandamedin kwikal ni usey nakash. Kusutil ukwash wa Nzamb, ukutwish kudandamen kusanger urund uwamp ni mwom usangareshina. Ni piswimp ap Nzamb ukuyivumbul afu. Nzamb ukatin anch niyey wez umwaka mukatish ney. Chawiy pa chisu chinicha kusansan kwawonsu kudia mu muchim wey kukez kupwa kamu chikupu!

Maverse ma Bibil Makutwisha Kukukwash

Nzamb ubangidin ushon ni mansoj mey.

Mwin kufund Bibil umwing wamuleja Nzamb anch: ‘Tekap mansoj mam mu mulond wey. Kamafundilap mu mukand wey?’—Kuseng 56:8.

Ukutwish kumulej Nzamb yom yidia mu muchim wey.

“Nikat kumulej [Nzamb] yakamish yam yawonsu . . . [Yehova],a nikat kukudidil ey kwinkwash.”—Kuseng 142:3, 6.

Ufanyidin kwikal ni ruchingej.

‘Kukez kwikal divumbuk.’—Midimu 24:15.

Nzamb ushidinamu kuyichirish antu avud nakash afila kal ku mwom ni ukatin kusal mwamu.b—Job 14:14, 15.

a Yehova diawiy dijin dia Nzamb dilejenau mu Bibil.

b Mulong wa kwijik jinsangu jivud piur pa divumbuk, tal shapitre wa 7 wa buku Chom ik Chitufundishinay Bibil? wapalangeshau kudi Atuman a Yehova ni ukutwish kumutambul pa kapend ka www.jw.org.