Yom Yikutwisha Kukushiken

Muntu ni muntu ushalijadin, chawiy, anch muntu wafa, tukatap etu awonsu kwov ushon mu mutapu umwing ni antu akwau. Ap anch chiletining ushon anch muntu wafa, pakwez antu amwing akat kumekan mud kanenganenap ap kakatap kumekesh mutapu wovilau ushon. Chid chakin anch kwitiyin ni kumekesh ushon kukutwish kumukwash muntu kuyerik, pakwez kwikil kwau mutapu umwing “uwamp” wa kumekesh ushon usutinamu yikwau. Yaku ya ndond yapaminay muntu, wuntu wend, yom yamushikedina kal, pamwing kand ni mutapu wafangay muntu udidinau yikutwish kwikal ni yibachikin pa mulong winou.

YOM IK YIKUKUSHIKENA?

Antu afishina kakutwishap kwijik kamu yom yikutwisha kuyishiken. Pakwez yovil yimwing ni yakamish yikat kuyishiken antu awonsu, ni muntu ukutwish kwirijek kurutu mulong wa kuyirish nich. Shinshikin yovil ni yakamish yimwing yilondwilaku ey:

Kwiyov rumbangan. Muntu wafishina ukutwish kudil nakash, kwikal ni kuswir nakash kwa mukatish nend wafila, ni yovil yend yikutwish kuswimpol yisu yivud. Kulat ni kuvurik yom yikur kukutwish kand kusal anch yovil yiney yikala yikash nakash. Pakwez kwinsambishin, muntu wafishang ukutwish kurumbangan mu manangu ni kulik kwitiyij anch mukatish nend wafang. Tiina uvurikin yom yamushikena pafay nfumwend Timo pakad kutongin. Ulondin anch: “Kwinsambishin nakanganya cha kusal. Natwishap ap kudil. Manangu manrumbangana nakash kushik ni mu chilik cha kukangany kupim. Natwishap kwitiyij yom yashikena.”

Kwiyakamish, kwov ujim, ni kwifish nich. Ivan ulondin anch: “Chisu chikemp kupwa kwa rufu ra mwanetu ikundj Eric wading ni mivu 24, am ni mukajam Yolanda twova ujim nakash! Chinech chatushimokisha, mulong tudingap mwamu. Twifisha kand nich, twiyipula anch twafanyinap kusal yom yivud mulong wa kumukwash mwanetu.” Alejandro, wafisha mukajend kupwa kwa mayej malaba nakash, niyend wifisha nich. Ulondin anch: “Kwinsambishin namana anch ang Nzamb winlikin nimana mar mwamu, kwakulond anch nid muntu muyimp. Kupwa nifisha nich mulong chading mud nading nikat kumufish nich Nzamb anch ndiy udia musul wa yom yashikena.” Kostas niyend twajimbulang mu mutu wa mulong wa kwinyim ulondin anch: “Yisu yimwing namujimenang Sophia mulong wafa. Kupwa nifishang nich mulong wa yovil yiney. Mulong ndiy kadingap kwend ni mulong.”

Kurumbangan mu yitongijok ni mu manangu. Kud yisu yimwing, muntu wafishang ukutwish kwikal ni yitongijok yirumbangena ni yakad kuwanyin. Chilakej, ukutwish kusambish kutongin mud umuteshin ni umumen muntu wafang, ap ukutwish kand kwiyov mud ud nend pamwing. Chikutwish kand kumukasiken muntu wafishang kutek manang pa ndond yimwing ap kuvurik yom. Tiina ulejen anch: “Yisu yimwing nading nikat kwambamb ni antu, pakwez najinguninang anch manangu mam mad kwau kwindj! Yom yading yirumbangen kamu mu mutu wam, yom yashikena chisu chafay Timo yangezang mu manangu. Yisu yimwing nakanganyang kutek manangu pa ndond yimwing ni chinech chanziyishang nakash.”

Yovil ya kwiyauril. Muntu wafishang ukutwish kusambish kujiman swa ap kwiyov nayimp anch ud ni antu akwau. Kostas ulondin anch: “Pinading ni ambay a uruw, niyovang mud nikwetap kwam ndond pakach pau. Pakwez niyovang kand mwamu ap chisu nading nau ajich.” Yolanda, mband a Ivan uvurikin anch: “Niyovang nayimp nakash pa kutesh antu akat kwinan piur pa tumilong tukemp tukemp mu kufanakesh ni milong twading nich etu! Kupwa kud antu atulejang anch anau ad kwau nawamp. Ap anch nayisangerang, pakwez yisu yimwing namanang anch chikasiken kuyitesh. Am ni nfumwam twamana anch mwamu mu yiding kwau, pakwez twakatap kudandamen ni mambamb minam ni twashimpishangap muchim mulong wa kurish ni yom yiney.”

Milong ya ukash wa mujimbu. Muntu wafishang ukutwish kulik kwov ja kudia, kuwum, ni kuker tul. Muvu umwing kupwa kwa rufu ra tatukwend, Aaron uvurikin anch: “Natwishangap kulal. Uchuku win wawonsu, nalankang pa saa yawiy yimwing mulong wa kutongijokin pa rufu ra tatuku.”

Alejandro uvurikin anch wikala ni milong ya ukash wa mujimbu yakadiay kutwish kurumburil: “Namanijana ni dokter tupamp tuvud ni wanleja anch nid kwam nawamp. Natonga anch runeng nading nich rawiy raletishang milong yiney.” Milong yiney yashikena kupwa. Ap mwamu, mupak wakwatay Alejandro wa kuya kumanijan ni dokter wading wa manangu. Chidil chikutwish kuziyish mutapu ukata mujimbu kwichidij ku mayej, kuvuvurish mayej madingaku kal, ap kuletish kand makwau.

Yakamish ya kusal midimu ya usey. Ivan urumburil anch: “Kupwa kwa rufu ra Eric, twafanyina kuyilejamu anamakwetu ni arund, pakwez twayilejamu kand antu akwau mud, mukurump wend wa mudimu ni mwin chikumbu chading chifutidinay. Kwading kand mikand yivud ya mburamatad twading tufanyidina kwizwish. Kupwa, chading chitwitin kuman mutapu wa kusal yom yashay Eric. Chading chitwitin kushinshikin pa yom yiney pa chisu twading tuziyina mu manangu ni ku mujimbu.”

Pakwez kud antu amwing, milong yikat kwez mu kusut kwa chisu, pakampwil chisu chifanyidinau kusal yom yasalangay mukatish nau wafila. Yawiy yom yamushikena Tiina. Urumburil anch: “Timo ndiy washinshikinang milong ya ku bank ni ya nfalang. Katat yam nading nifanyidina kusal yom yiney, ni chinech chasala kand anch niziya nakash. Niyipula anch nikutwish kamu kuwanyish yom yawonsu yiney.”

Yakamish twajimbula kal kwiur oku—yikala ya mu manangu ap ya ku mujimhu—yikutwish kulet chitongijok cha kwel anch muntu kakutwishap kupandakan runeng. Uyakin ud anch runeng rikutwishay muntu kwikal nich anch wafish mukatish nend rikutwish kwikal rikash nakash, pakwez kwijik mwamu kurutu kwa chisu kukutwish kumukwash muntu kurish nich nawamp. Pakwez chitin kuvurik anch, antu awonsu kakatap kwikal ni yakamish yawonsu yiney. Chikwau kand, antu afishina akutwish kutan rongoj anch ijik anch chiyipinap kwau kwikal ni yovil yikash ya runeng.

OV, NIKEZ KIKAL KAND NI MUSANGAR?

Yom ufanyidina kwijik: Runeng rikudandamenap kwau chikupu; rikusambish kukep pakemp pakemp. Chinech chirumburikinap anch “ukuyerik” kamu kapamp kamwing ap ukumuvuramen mukatish ney wafila. Pakwez, pakemp pakemp, runeng rey rikusambish kudut. Muntu wafishina ukutwish kwov runeng riner anch wavurik yom yimwing pakad kutongin, mu yisu yimwing ya usey mud, dichuku dia uruw, dichuku diafay mukatish nend, ap machuku makwau kand. Pakwez mu kusut kwa chisu, antu avud akat kuchirish manangu ni kusambish kand kusal midimu mud mwasalangau pakur. Chinech chid chakin, pakampwil anch muntu wafishang amukwash kud anamakwend ni arund nend ni anch amwinend wasal yom kanang mulong wa kurish nich.

Rikupwa chisu ik? Antu amwing akat kwiyovaku nawamp kupwa kwa angond. Pakwez antu avud akat kusambish kwiyov nawamp kupwa kwa muvu umwing ap yaad. Ni akwau akwet kuswir kwa chisu chivud nakash.a Alejandro uvurikin anch: “Nadandamena kwikal ni runeng nakash piswimp mu mivu yisatu.”

Shimpish muchim. Kangal kwiyakamish piur pa yom ya diamashik, sal yom kukwatijan ni usu wey, ni ijik anch runeng ukweta rikudandamenap chikupu. Pakwez ov, kud yom ukutwisha kusal mulong wa kukepish runeng rey katat ni kurikangesh chakwel kangal rilab nakash?