Runeng Rijim Nakash

“Am ni Sophiaa twading twatijadin kal kwasut kal mivu 39 payelay mayej makash mamushikija ku rufu. Arund nam ankwasha nakash, ni nasalang usu chakwel nikala ukwatikena. Pakwez mu muvu wakabuj, niyovang mud ambaril kal chibar. Yovil yam yaswimpang chisu chawonsu. Ap anch kwasut kal mivu yisatu kudiosh kwafilay mukajam, pakwez nikat kwovang kusansan nakash, yisu yivud pakad kutongin.”​—Kostas.

Ov, wafishinap kal mukatish ney? Anch mwawiy, ukuman kamu anch mazu ma Kostas mad makin. Kufish mbay wa uruw, mwanamakwetu ap murund, kud pakach pa yom yikata kulet kusansan ni kuziy nakash. Antu akata kwilej runeng ridiokila ku kufish itiyin niyau chitongijok chinech. Mutu wa mulong umwing wabudishau mu buku The American Journal of Psychiatry ulondin anch “kufish kud kushadish kumwing kujim, kujim kamu nakash.” Muntu wovila kusansan kwa mutapu winou ukutwish kwiyipul nich runeng anch: ‘Ov, nikudandamen kwiyov mwamu kushik ni chisu ik? Ov, nikez kikal kand ni musangar? Kwisu nikutwisha kutan rongoj?’

Nimero wa Lankany! winou wisambidin yakul piur pa yipul yiney. Mutu wa mulong wambakedina ukwisambin yom yikutwisha kukushiken anch wafishin mukatish ney machuku ma kwinyim am. Mitu ya milong yikwau yambakedinap yikwisambin yom yikukukwasha kukepish runeng rey.

Tuchingejin kamu anch gazet winou ukuyongoj ni kuyikwash antu amena mar mulong afishin mukatish nau.