Anch Mbay wa Uruw Waburen Kushinshaman

Maria wa mwi ngand ya Espagne ulondin anch: “Nakata kwam anch nifa chisu chanlejay nfumwam anch ukimbin kwinlik mulong wa kwat changadim. Namana kamu anch wanrumbukin kal nakash, kupandikan anch navurik yom nasala mulong wendendiy.”

Bill, wa mwi ngand ya Espagne ulondin anch: “Panchinau kudi mukajam, nova mudi mu mujimbu wam mwafa kal chom kanang. Yom twading kutongang, twading kuchingejang, ni yom twading turijekina kusal twayisalap kand. Kwading machuku mamwing natongang anch yakamish yapwa kal, pakwez yisu yikwau niyovang nayimp nakash.”

MUNTU ukat kwiyov nayimp nakash anch mbay nend wa uruw waburen kushinshaman. Chawiy, ambay a uruw amwing akat kuman anch akutwish kwau kumulikishin mbay wa uruw witiyidina kurumbuk kwend ni kukarumuk, ni akat kusal usu wa kuwapish mashakamin mau.a Pakwez ap anch uruw wadandamen ap bwat, antu akata kujingunin anch ambay nau a uruw aburenang kushinshaman, akat kwov kusansan kupandikena. Mutapu ik ukatau antu mudi inay kurish ni yakamish yau?

MAVERSE MA BIBIL MAKUTWISHA KUKUKWASH

Chikalap nchik ushon ukash ukatau kwov, ambay a uruw avud akatau kurumbukin akat kutan kukasikesh mu Bibil. Akat kwilej anch Nzamb umen kudil kwau ni uyanakedin.—Malakiy 2:13-16.

‘Anch yakamish yampandaken, ey ukat kwingongoj ni kwinlembijek.’—Kuseng 94:19.

Bill ulondin anch: “Pinatanga verse winou, nova mudi Yehova ukat kwinlembijek mudi mukatay tatuku kumulembijek mwanend.”

‘Ukwikal ushinshamena kudi muntu ushinshamena.’—Kuseng 18:25.

Carmen urumburil anch: “Nfumwam kadingap kashinshamena mu angond avud. Pakwez nading nichingejin anch Yehova ukwikal ushinshamena kudi am. Kafanyinap kwinlik ap pakemp.”

“Kangal wiyakamishany mulong wa chom. Pakwez mu yisu yawonsu mu kulembil kwen, ap pa kuyilembidil antu akwau nich kujikitish, mwijikishany Nzamb yom yawonsu umwitilanya. Chad chisambu cha Nzamb chisutila ronganyin ra antu chikulam michim yen.”—Filip 4:6, 7.

Sasha ulondin anch: “Natanga mukand winou tupamp tuvud. Nadandamena kulembil nakash ni Nzamb wanginkisha chisambu mu mwom wam.”

Antu awonsu twisambina kal kwiur oku ova yisu yimwing mudi afa kwau. Pakwez amuchingejina Yehova Nzamb ni ikala akasikeshinau kusutil Dizu diend. Bill ulondin anch: “Ritiy ram rasala anch mwom wam uwapa ap anch yom yikwau yading yimeken anch yiyipin. Chawiy ap anch chisu chimwing nendina mu ‘ruwengil ra urel,’ Nzamb wading nam.”—Kuseng 23:4.

a Mulong wa kwijik jinsangu piur pa kulikishin ap bwat, tal mitu ya milong yidia mu Réveillez-vous ! wa 22 Ngond wa 4, 1999, ukweta mutu wa mulong ulondina anch “L’infidélité conjugale.”

Yiyul Yimwing Yikutwisha Kukukwash Kujijaman

Tang ni tongijokin pa maverse makasikeshina.

Bill ulondin anch: “Natanga mukand wa Job ni wa Kuseng ni nateka yijingidij pa maverse mawonsu mading makwatijadina ni yom yanshikena. Najingunina anch antu arumburilau mu mikand yiney niyau arisha ni yakamish ni minan mudi yinading nirishina nich.”

Tan kwongoj mu mizik.

Carmen ulondin anch: “Pinakanganyang kulal tul uchuku, nateshang mizik. Kusal mwamu kwangongojang nakash.” Daniel niyend ulondin anch: “Nileja kubul kidar ni mizik yiney yankwashang kwikal ni chisambu.”

Yilejamu antu akwau mutapu wiyovila.

Daniel ulondin anch: “Nadingap ni chaku cha kuyilej antu akwau mutapu niyovila. Pakwez nading nau arund awamp ni nayilejang dichuku diawonsu mutapu niyovila. Nayilejang mutapu niyovila kusutil kuyifundin mikand ni kwambamb nau. Chakin kamu kusal mwamu kwankwasha.” Sasha niyend ulondin anch: “Ukwash wa dijuku diam wading wa usey nakash. Maku wading nam pamwing chisu chawonsu. Anch nikwet yom ya kulond, maku witekinang chisu mulong wa kwintesh. Tatuku niyend wamekeshang anch winkatin ni winkingin ni wankwasha kuchirish chisambu mu muchim wam.”

Dandamen kulembil.

Carmen ulondin anch: “Nalembilang chisu chawonsu. Niyova anch Nzamb wading nam piswimp, wading kwintesh ni kwinkwash. Chawiy mu chisu chinech chikash, namusejina Nzamb piswimp.”