Angel Atukwashining
1 “Talany, nidi nen machuku mawonsu, chikupu ni kwisudiel kwa mangand.” Mazu minam makasikeshin mud ik kud awonsu ateshina ni kushinshikin mbil ya Yesu yilondila anch: “Yangany . . . uyikadishany in kwilej”! (Mat. 28:18-20) Mutapu umwing udingay Yesu nau in Kristu akin udi kusutin kud angel end. (Mat. 13:36-43) Chisangareshin mud ik kulejan “rusangu ruwamp ra chikupu” mu umwing ni yitang yiney ya muspiritu yishinshamena!—Kuj. 14:6, 7.
2 Mu Mudimu Wetu: Bibil ulejen anch angel ayitumining “kuyikwash antu akeza kutambul dipandish.” (Heb. 1:14, MM) Mu mivu chitot ya kusambish, angel ayikwasha ni kuyitakel in kwilej a Yesu kuya kud antu afanyidina. (Mid. 8:26) Nlel unou, atushalapol a Nzamb adandamedin kuman uman wa umutakel wa angel. Yisu yivud, in chikumbu alonda anch adinga ni kulembil mulong wa kuyikwash chisu chezay Kaman ku chis chau. Chakin kamu, tusanger pamwing nau angel, chisu chiteshinau antu inay uruu wa Want ni kuusadil!—Luka 15:10.
3 Piturishina Nich Rupompat: Daniel, arund nend ansand asatu in Hebereu, mupostol Pita, ni akwau avud ajijamana mu kupakiu kukash amana diking dia Yehova kusutin kud angel, ‘akweta usu nakash.’ (Kus. 103:20; Dan. 3:28; 6:21, 22; Mid. 12:11) Ap pa yisu yimwing tukutwisha niyetu kwiyov mud tuburedin ukwash piturishina nich rupompat, tukutwish kutambul ukwash ku yom yamanay kashalapol wa Elisha pijikay anch “avud awiy adia ni yetwetu kupandakanamu adia nau awiy.” (2 Ant 6:15-17, NW) Ap anch atwaurilap ku usu nau akadivar netu in Kristu, tukutwishap kuziy. Dizu dia Nzamb ditukasikeshin anch: “Mwangel wa Nzamb ukat kujing nau awiy akata kumwov Ndiy wom ni kuyikamunin.”—Kus. 34:7.
4 Piswimp ap kamu yisak ya angel amasalay akwez kuyidiosh antu awonsu abwambwidila ku winyikel wa Kristu. (Kuj. 19:11, 14, 15) Komb pituchingedina dichuku dined, tudandamenany lel kumushiman Yehova nich mushiku, nich ruchingej rawonsu ra ukwash wa amasalay a mwiur atakedinau kud Kristu.—1 Pi. 3:22.