MUTU WA MULONG WA KWILEJ WA 19
MUMINY 6 Maur Malejen Uyaj wa Nzamb
Yimburija Angel Ashinshamena
‘En angel end, mutumbishany Yehova.’—Kus. 103:20.
YIDA MU MUTU WA MULONG WINOU
Tukuman malejan tukutwisha kwilejin ku chilakej cha angel ashinshamena.
1-2. (a) Mutapu ik tushalijadina nau angel? (b) Mutapu ik tufanikena nau angel?
CHISU chakupwitinay Yehova ku uyakin, wakutazuka mu dijuku dijim da rukat muda akadivar nau anambaz kuwejaku ni mamiliyon ma angel ashinshamena. (Dan. 7:9, 10) Anch twatongijokin piur pa angel, tukutwish kuman mutapu ushalijadinau niyetu. Chilakej, angel ayitanga pasut kal mivu yivud nakash kurutu etu twikalaku. (Job 38:4, 7) Akwet usu nakash kutupandakanamu etu. Ni ad atumbila ni atentamina nakash kutusutamu etu, mulong tud antu akad kuwanyin.—Luka 9:26.
2 Pakwez, ap anch tushalijadin nau mu yom yivud, tufaniken kand nau mu yom yivud. Chilakej, niyetu tukutwish kwimburij mikadil yiwamp ya Yehova mud awiy. Etu awonsu tukwet want ipau. Chikwau kand, muntu ni muntu ukwet dijin dend, wuntu wend ni yisend kushalijan mud kand angel. Ni kupwa, etu awonsu tukwet maswir ma kumwifukwil Sakatang wetu.—1 Pita 1:12.
3. Yom ik tukutwisha kwilejin ku chilakej cha angel ashinshamena?
3 Mulong tufaniken nau mu yom yivud, chilakej chau chikutwish kutukasikesh ni kutufundish yom yivud. Mu mutu wa mulong winou, tukushinshikin mutapu tukutwisha kwimburij kwikepish kwa angel ashinshamena, rukat rau, kujijaman kwau ni usu usadiningau mulong wa kushitwish chikumangen.
ANGEL IKEPISHINING
4. (a) Mutapu ik ukatau angel kumekesh kwikepish? (b) Mulong wak angel ikepishining? (Kuseng 89:8)
4 Angel ashinshamena ikepishining. Ap anch akwet ukaliweny, manang ni usu nakash, akat kumuziyin Yehova. (Kus. 103:20) Pakatau kuwanyish yisend yiyinkishinau kud Yehova, kakatap kwibaz ap kusadin usu wau mulong wa kwipwitin nkeu. Akwet musangar wa kusal rusot ra Nzamb ap anch akwau tuyijap majin mau.a (Dis. 32:24, 29; 2 Ant. 19:35) Kakatap kwitiy kutambul katumb kamuwanyidina ching Yehova. Mulong wak angel ikepishining mwamu? Mulong amukatin Yehova ni amulimishin nakash.—Tang Kuseng 89:8.
5. Mutapu ik wamekeshay mwangel umwing kwikepish chisu chamupupay kambuy Yohan? (Tal kand chipich.)
5 Shinshikin chinship chimwing chimekeshina anch angel ikepishining. Piswimp ni muvu wa 96 C.C., mwangel wakad kwijikan dijin wamuleja kambuy Yohan yom yishimwokishena. (Kuj. 1:1) Yom ik yasalay Yohan pamanay yom yiney yishimwokishena? Wazengama pansh mulong wa kumwifukwil. Pakwez mwangel ushinshamena winou wamukangesha pakad kulab. Wamuleja anch: “Kangal wasal mwamu! Am nidi kashalapol pamwing niyey nau anamakwey akata kumekesh uman wau anch, adi ayen a Yesu. Chifanyidin kumwifukwil Nzamb!” (Kuj. 19:10) Mwangel winou wading kamu wikepishin nakash! Ndiy kakatap kutambul katumb ap kumubaz. Kapamp kamwing wamuleja Yohan kumwifukwil Yehova Nzamb. Pa chisu chawiy chimwing, mwangel winou kamumanap Yohan mud muntu wakad usey. Ap anch mwangel winou wading wamusadidin kal Yehova mu mivu yivud ni wading ukwet usu nakash kumusutamu Yohan, wamumana mud mbay nend musuk. Ap anch mwangel winou wamupupa Yohan, kamuswejenap. Pakwez, walonda mu mutapu uwamp. Pamwing ap watesha kurumburik anch Yohan wakimba kumwifukwil mulong wa wom wa yom yamanay.
Mwangel wamekesha kwikepish chisu chamupupay Yohan (Tal paragraf wa 5)
6. Mutapu ik tukutwisha kwimburij kwikepish kwa angel?
6 Mutapu ik tukutwisha kwimburij kwikepish kwa angel? Niyetu tufanyidin kuwanyish yisend yetu pakad kwibaz ap kwipwitin nkeu. (1 Kor. 4:7) Chikwau kand, tufanyidinap kwiman anch tud a piur nakash kuyisutamu antu akwau mulong twamusadidin kal Yehova mu mivu yivud, ap mulong tukwet yisend kanang mu dirijek da Yehova. Anch tukwet yisend yivud mu dirijek da Yehova, tufanyidin kand kwiman mud akemp nakash. (Luka 9:48) Mud angel, tufanyidin kuyisadin antu akwau. Tufanyidinap kusal anch antu akwau aman anch tukwet usey nakash kuyisutamu awiy.
7. Mutapu ik tukutwisha kumekesh kwikepish chisu tumupupina muntu ap chisu tumuyudina?
7 Tufanyidin kand kwikepish chisu tumupupina muntu ap kumuyul, ikal mbay netu mwin Kristu ap mwanetu. Anch tumuyudin muntu, tufanyidin kumulej yom patok. Pakwez mud mwangel, tufanyidin kumulej muntu yom pakad kumuziyish. Ang twalik kutong anch tud a usey nakash kuyisutamu antu akwau, tukupan chiyul chiwamp chimedina pa Bibil nich kalimish ni rukat.—Kol. 4:6.
ANGEL AYIKATINING ANTU
8. (a) Kukwatijan ni Luka 15:10, mutapu ik ukatau kumekesh angel anch ayikatin antu? (b) Chisend ik chikwetau angel mu mudimu wa kulejan? (Tal kand pa chibur.)
8 Angel ading arund a antu. Ayikatining antu. Akat kusangar anch muntu wasalang chitil chijim wakarumuk, ap anch muntu walikina kal kumusadin Yehova wamuchirikin. Niyetu tukat kusangar anch muntu wilej piur pa Yehova ni wakwat mupak wa kuswimp mu mwom wend ni kumusadin Ndiy. (Tang Luka 15:10.) Angel akat kutukwash kand mu mudimu wa kulejan. (Kuj. 14:6) Ap anch kakatap kulejan kud antu ku kan, akat kuyikwash in kulejan kutan antu akatina kwilej piur pa Yehova. Chakin kamu, tukutwishap kulond nich kashinsh anch angel akat kutulej anch yang umutal muntu kampand. Yehova ukutwish kusadin kand milad yikwau, mud spiritu wend utumbila mulong wa kuyikwash antu akatina kumwijik, ap kuyitakel atushalapol end chakwel ayitan. (Mid. 16:6, 7) Pakwez, ukat kuyisadin angel end mulong wa kutukwash chisu tulejena. Chawiy chisu tulejena rusang ruwamp, tufanyidin kwikal ni kashinsh anch angel adaku mulong wa kutukwash.—Tal mushet “Malembil mau Amakula.”
Ambay a uruw amwing apwish kal kulejan ku prezantwar. Pachirikinau ku chikumbu, nambaz wamuman kal mband umwing unenganena. Nambaz wajingunin kal anch angel akutwish kututwal kud antu akimbina ukwash wa mu spiritu. Usotin kwambamb ni mband winou nich mazu ma rongoj (Tal paragraf wa 8)
9. Mutapu ik tukutwisha kwimburij rukat rikwetau angel mulong wa antu?
9 Mutapu ik tukutwisha kwimburij rukat ra angel? Ang twatesh anch muntu kanang amuchirish kal mu chikumangen, tufanyidin kusangar mud angel. Tufanyidin kumwinkish mukadivar kashinsh anch tumukatin ni tusanger kand mulong wachirik kal kumusadin Yehova. (Luka 15:4-7; 2 Kor. 2:6-8) Tukutwish kand kuyimburij angel kusutin kwipan ni mushiku mu mudimu wa kulejan. (Mul. 11:6) Ni mud mutapu ukatau angel kutukwash chisu tulejena rusang ruwamp, niyetu tufanyidin kuyikwash akadivar nau anambaz netu mu mudimu wa kulejan. Chilakej, ov, tukutwish kwitenchik mulong wa kulejan pamwing ni mwin kulejan musu? Ov, tukutwish kuyikwashaku amapal ap akadivar nau anambaz ada ayilim chakwel asal mudimu wa kulejan?
10. Yom ik tukutwisha kwilejin ku chilakej cha Sara?
10 Pakwez yom ik tufanyidina kusal anch tutwishinap kusal yom yawonsu tusotina mu mudimu wa Yehova? Tufanyidin kukimb mitapu yikwau ya kusal pamwing ni angel mu mudimu wa kulejan. Shinshikin chilakej cha Sarab wa mu End. Kupwa kwa kusal mudimu wa uchibol piswimp mu mivu 20, Sara wayela ni wading kwend chisu chawonsu mu ulal. Waziya nakash mu manang. Pakwez kusutin ukwash wa akadivar nau anambaz ni kutang Bibil dichuku dawonsu, Sara wikala kand ni chitongijok chiwamp. Chakin kamu, wafanyina kuswimp program wend wa mudimu wa kulejan kukwatijan ni mashakamin mend. Mulong katwishangap ap kushakam mulong wa kufund mukand, walejanang kwend kusutin telefon. Chawiy, wayichirikinang antu ku telefon ni amulejang piur pa antu akwau ading akatina kwilej Bibil. Yom ik yashikena? Kupwa kwa angond akemp, Sara wikala ni malejan ma Bibil 70! Katwishangap kwilej ni antu inay awonsu. Chawiy wapanap amwing kud antu akwau mu chikumangen. Avud pakach pau akat kukumangan. Angel akwet kamu musangar nakash wa kusal pamwing nau akadivar ni anambaz asadina usu wau wawonsu mulong wa kulejan mud Sara.
ANGEL AKAT KUMEKESH KUJIJAMAN
11. Mutapu ik wamekeshau angel ashinshamena kujijaman?
11 Angel ashishamena ad chilakej chiwamp nakash cha kujijaman. Ajijamedin kal kuburen kutentam ni chisum mu tunan twa mivu. Amana mutapu wamubwambwilau Yehova kud Satan ni angel akwau avud amusadinang. (Dis. 3:1; 6:1, 2; Jud 6) Bibil utulejin piur pa mwangel umwing ushinshamena warisha ni chilembil umwing ukweta dikand. (Dan. 10:13) Chikwau kand, kudosh pa chisu cha Adam ni Ev, angel amen kal anch antu akemp kusu awiy akata kumusadin Yehova. Ap mwamu, angel inay ashinshamena adandamedin kwikal ni musangar wa kumusadin Yehova ni mushiku. Ij anch pa chisu chiwanyidina Nzamb ukudosh kuburen kutentam kwawonsu.
12. Yom ik yikutwisha kutukwash kujijaman?
12 Mutapu ik tukutwisha kwimburij kujijaman kwa angel? Mud angel, niyetu tukutwish kurish ni kuburen kutentam ap rupompat. Pakwez tukwet kashinsh anch, pa chisu chiwanyidina Nzamb ukudosh uyimp wawonsu. Chawiy mud angel ashinshamena, ‘tukatap kuziy kusal yom yiwamp.’ (Gal. 6:9) Ni Nzamb utukanin anch ukutukwash kujijaman. (1 Kor. 10:13) Tufanyidin kumulembil Yehova chakwel atwinkish spiritu wend, ukutukwasha kushimpish muchim ni kulam musangar wetu. (Gal. 5:22; Kol. 1:11) Yom ik ufanyidina kusal anch urishin ni rupompat? Muchingejina nakash Yehova ni kangal wov wom. Yehova ukukukwash ni kukukasikesh chisu chawonsu.—Heb. 13:6.
ANGEL AKAT KUSHITWISH CHIKUMANGEN
13. Chisend ik cha pakampwil chikwetau angel mu machuku minam ma nsuden? (Mateu 13:47-49)
13 Mu machuku minam ma nsuden, Yehova wayinkishin kal angel mudimu wa pakampwil. (Tang Mateu 13:47-49.) Mamiliyon ma antu pa mangand mawonsu akat kusanger rusang ruwamp. Amwing pakach pau akat kuswimp yom yimwing mu mwom wau mulong wa kushakam kukwatijan ni mbil ja Yehova ni kumusadin mu mutapu ukatinay, pakwez akwau bwat. Angel akwet chisend cha ‘kuyauril antu ayimp nau antu atentamina.’ Chinech chirumburikin anch akwet chisend cha kushitwish chikumangen. Chinech chirumburikinap anch ang muntu wimik kumusadin Yehova, kakutwishap kand kumuchirikin ni anch mu chikumangen mukutwishap kwikal milong. Chakin kamu, tufanyidin kwikal ni kashinsh anch angel asadin usu nakash mulong wa kushitwish chikumangen.
14-15. Mutapu ik tukutwisha kwimburij usu ukatau angel kusal mulong wa kushitwish chikumangen? (Tal kand chipich.)
14 Mutapu ik tukutwisha kwimburij usu ukatau kusal angel mulong wa kushitwish chikumangen? Tufanyidin kusal usu nakash mulong wa kuchidij urund wetu ni Yehova. Tukat kusal mwamu kusutin kutond arund amukatina ndiy ni kulik kusal chom chin chawonsu chikutwisha kuyipish urund wetu ni ndiy. Anch twasal mwamu, tukat kukwash kushitwish chikumangen. (Kus. 101:3) Tukutwish kand kuyikwash akadivar nau anambaz netu kushal ashinshamena kud Yehova. Chilakej, yom ik tufanyidina kusal anch twatesh anch mbay netu mwin Kristu wasalang kal chitil chijim? Mulong tumukatin muntu winou, tukumukasikesh kuyiman amakurump. Anch muntu winou kasadinap mwamu, tufanyidin kuyilejamu amakurump. Tukatin anch mbay netu mwin Kristu wayipishang urund wend ni Yehova atambul ukwash pakad kulab!—Jak. 5:14, 15.
15 Cha ushon, antu amwing akata kusal yitil yijim akat kuyidosh mu chikumangen. Anch chikal mwamu, tukatap “kwibomb” nau pamwing.c (1 Kor. 5:9-13) Ditenchik dined dikat kutukwash kushitwish chikumangen. Chikwau kand, anch twalik kwibomb ni antu adoshinau kal mu chikumangen, tukat kuyisadin mu mutapu uwamp. Kusal mwamu kukutwish kuyikwash kumuchirikin Yehova. Anch amuchirikin Yehova, tukat kusangar pamwing ni Yehova ni angel end.—Luka 15:7.
Yom ik tufanyidina kusal anch twatesh anch mbay netu mwin Kristu wasalang kal chitil chijim? (Tal paragraf wa 14)d
16. Mu mitapu ik yimwing tukutwisha kuyimburij angel?
16 Kwilej piur pa angel ni kusal nau mudimu pamwing did kamu dilau dijim nakash! Twimburijany mikadil yau yiwamp, mud: kwikepish kwau, rukat rau mulong wa antu, kujijaman kwau ni usu ukatau kusal mulong wa kushitwish chikumangen. Anch twayimburij angel ashinshamena, niyetu tukutwish kwikal mu dijuku da atushalapol a Yehova chikupu ni chikupu.
MUMINY 123 Tuziyinany Nich Kushinshaman Mbil ya Uteokras
a Pakach pa mamiliyon ni mamiliyon ma angel, pad kwau aad alejenau majin mau mu Bibil: Mikayel ni Gabriyel.—Dan. 12:1; Luka 1:19.
b Dijin adiswimpin.
c Mud mwalejenau mu Nsang Jisu ja 2 Jidokila ku Chisak Chitakedila 2024, anch muntu wadoshinau kal mu chikumangen wez ku yikumangan, mwin kulejan mwawonsu ukutwish kukwat mupak wa kumwinkish moy ap bwat kukwatijan ni kom kend kafumbinau kud Bibil.
d KURUMBURIL CHIPICH: Nambaz umwing umulejin mukwau kuyiman amakurump. Kupwa kwa chisu chikemp, palikay murunend kusal mwamu, nambaz wayilejamu amakurump piur pa yom yasadika.