Ikal ni Kashinsh Anch Yehova Ukukwongoj

1. Lejan mutapu wading mashakamin ma in Yuda ading mu winkwal.

TONGIN mutapu wafanyinau kwiyov in Yuda adokala mu winkwal mu Babilon. Atana yikumbu yau yasheshika kal. Mulong wa yitil yau ni ya angakiril au, ayidosha mwi ngand yau ni kuyitwal mwi ngand ya wingendj. (2 Jsng. 36:15, 16, 20, 21) Chakin kamu, ading ni mutapu wa kwikal ni mwom mud wadingau nich antu awonsu. (Jer. 29:4-7) Pakwez, mwom wadingap uswapela, mulong wawiyap mwom wading ukatinau kwikal nich. Mutapu ik wiyovau mulong wa yom yiney? Shinshikin yom yalonday umwing wa pakach pau: “Twashakama pa [yikum ya atuwit] a mu Babilon. Twadila mansoj pitwavurika Sion!” (Kus. 137:1) In Yuda ading akwet kamu kuswir kwa dikasikesh, pakwez nany wela kuyikasikesh?

2-3. (a) Yom ik yasalay Yehova mulong wa in Yuda ading mu winkwal? (b) Yom ik tukwisambina mu mutu wa mulong winou?

² Yehova “ud Nzamb ukata kupan kwongoj kwawonsu!” (2 Kor. 1:3) Mulong ud Nzamb wa rukat, ukat kusanger kuyongoj antu awonsu amusejidina piswimp. Padingau mu Babilon, in Yuda amwing afanyina kunenganan nakash mulong amubwambwila Yehova, ni afanyina kumwifukwil mu mutapu utentamina. (Isay 59:20) Chawiy, mivu 100 kurutu kwa kuyitwal mu Babilon, Yehova wamupepila muprofet Isay mulong wa kufund uruu piur pa in Yuda. Uruu winou wa Isay wafanyina kuyikwash mutapu ik? Isay walonda anch: “Yongojany, yongojany antwam. Mwamu mulondilay Nzamb wetu.” (Isay 40:1) Chakin kamu, kusutin uprofet winou wafundau, Yehova wayongoja in Yuda ading aswirikedina rongoj riner padingau mu winkwal.

³ Mud in Yuda inay, niyetu tukwet kuswir kwa rongoj chisu chawonsu. Mu mutu wa mulong winou, tukushinshikin mitapu yisatu yasadinay Yehova mulong wa kuyongoj in Yuda ading mu winkwal: (1) Wakana kuyilikishin antu akukarumuka, (2) wayinkisha antwend ruchingej, ni (3) wayikwasha chakwel kangal iyakamisha. Pitukwisambina manans minam, tukuman kand mutapu ukatay Yehova kutwongoj nlel unou.

YEHOVA MWIN RANAKEN UKAT KUTULIKISHIN

4. Mutapu ik wamekeshay Yehova anch ud Nzamb wa ranaken? (Isay 55:7)

⁴ Yehova ud ‘Tatuku mwin ranaken.’ (2 Kor. 1:3) Wamekesha mwikadil winou palonday anch ukuyilikishin in Yuda ading mu winkwal anch akarumuk. (Tang Isay 55:7.) Walonda anch: ‘Nikez kakukatany chikupu nich rukat rudimukina, nikez kakumekeshinany ranaken.’ (Isay 54:8) Mutapu ik wamekeshay Yehova ranaken rend? Ap anch in Yuda afanyina kuman mar mulong wa yibudikin ya yisal yau yiyimp, Yehova wayikana anch kakezap kushakam mu Babilon chikupu. Afanyina kushal mu winkwal mu kachisu kakemp. (Isay 40:2) Mazu minam mafanyina kuyongoj in Yuda akarumuka ni kuyinkish kashinsh nakash kupwa kwa kuyikwat mu Babilon!

5. Mulong wak niyetu tukwet mayingishin mavud ma kuchingejin mu ranaken ra Yehova mud in Yuda?

⁵ Yom ik twilejidinaku? Yehova ukat kuyilikishin kamu rawonsu atushalapol end. Tukutwish kwikal nich kashinsh anch mud mwayilikishinau in Yuda ading mu Babilon, Yehova ukutwish niyetu kutulikishin. Mulong wak? Mulong twij patok yom yasalay Yehova mulong wa kulikishin yitil yetu. Yitot ya mivu kupwa kwa muprofet Isay kulejan uprofet, Yehova wamutuma Mwanend mukatish pa mangand mulong wa kupan mwom wend mud difut mulong wa akayitil awonsu akukarumukina. Mulong Yesu watufila, Yehova ukutwish “kudosh” yitil yetu rawonsu. (Mid. 3:19; Isay 1:18; Efes 1:7) Chakin kamu, Yehova ud Nzamb ukata kutulikishin!

6. Mutapu ik tukutaninamu anch twachingejin mu ranaken ra Yehova? (Tal kand chipich.)

⁶ Mazu ma Yehova mapepilay mada mu Isay 55:7 makutwish kutwongoj anch tukat kwifish nich mulong wa yitil twasala pakur. Antu amwing pakach petu akutwish pamwing ap kudandamen kwifish nich mulong wa yitil yasalau pakur kupwa kwa kukarumuk. Tukutwish pamwing ap kudandamen kwifish nich anch tumen mar mulong wa yibudikin ya yom yiyimp twasala. Chakin kamu, anch twit dilikishin da yitil yetu ni twalik kusal yom yiyimp, tukutwish kwikal nich kashinsh anch Yehova ukutulikishin. Chawiy anch Yehova walikishin yitil yetu, kakatap kand kuyivurik. (Ilakej ni Jeremiy 31:34.) Mulong Yehova kakatap kuvurik kand yitil yetu, niyetu tufanyidinap kand kudandamen kuyitongin. Yehova ukat kushinshikin yom tusadina katat pakwez kakatap kushinshikin yom twasala pakur. (Ezek. 33:14-16) Piswimp ap kamu, Tatukwetu wa ranaken ukudosh yibudikin yawonsu yiyimp ya yitil yitumeshina mar.

7. Anch twasadin chitil chijim yom ik yikutwisha kutukwash kuyiman amakurump?

⁷ Yom ik tufanyidina kusal anch kom ketu katufishin nich mulong twasadin chitil chijim ni twachijindjik? Bibil utukasikeshin kwit ukwash wa amakurump. (Jak. 5:14, 15) Chakin kamu, chiswapelingap kuyilej yom twasalang. Pakwez, tufanyidin kuvurik anch Yehova uyisadidin amakundj inay mulong wa kutukwash ni akwet rukat ni ranaken mud Yehova. Anch twavurik yom yiney ni twamekesh anch tud in kukarumuk, tukwikal ni kuswir kwa kuyilej amakurump. Shinshikin mutapu ranaken ra Yehova ramongoja mukadivar Arthur,a kom kend kamufishang nich nakash. Arthur ulondin anch: “Natala pornografi mu mivu yinying. Pakwez pinatesha diskur piur pa kom, namulejamu mukajam ni amakurump. Kupwa, niyova kamu pee, pakwez nifishang kamu nich mulong wa yom nasala. Amakurump anvurisha anch Yehova kandjibwilap. Ukat kutupup mulong utukatin. Mazu mau ma rukat mampukuna ni mankwasha kudosh yitongijok mu muchim wam.” Nlel, Arthur ud chibol ni nkwash wa mudimu. Chitukasikeshin nakash kwijik anch Yehova ukat kutumekeshin ranaken anch twakarumuk.

YEHOVA UKAT KUTWINKISH RUCHINGEJ

8. (a) Ruchingej ik rayinkishau in Yuda kud Yehova? (b) Kukwatijan ni Isay 40:29-31, mutapu ik wafanyinau kwiyov in Yuda akarumuka mulong wa ruchingej rayinkishau kud Yehova?

⁸ Mu kuman kwa antu, in Yuda ading mu winkwal kadingap ni ruchingej ra kuchirik mwi ngand yau. Babilon wading Dikand da pa Mangand Mawonsu pa chisu chinicha, wading wijiken mulong wa chaku cha kulik kuyilikishaku antu akwatangau mu winkwal. (Isay 14:17) Pakwez, Yehova wayinkisha antwend ruchingej. Wakana kuyikol antwend, ni kwikil chom ap chimwing chafanyina kumukangesh. (Isay 44:26; 55:12) Ku mes ma Yehova Babilon wading mud rufunfut. (Isay 40:15) Anch wapep pa chom, rufunfut rikat kudokal. Winou wawiy mutapu wafanyinay Yehova kuyidosh antwend mu Babilon. Ruchingej riner rayikwasha in Yuda mutapu ik? Rayikasikesha. Pakwez rayikwasha kand mu mutapu ukwau. Isay wafunda anch: “Awonsu akata kumukungamen [Yehova], akupizurish usu.” (Tang Isay 40:29-31.) Chakin kamu, ruchingej rafanyina kuyinkish usu; afanyina “kutwik mudi ambur.”

9. Mayingishin ik madingau nich in Yuda makuchingejin mu kushilamu kwa Yehova?

⁹ Yehova wayinkisha kand in Yuda diyingishin da kuchingejin mu kushilamu kwend. Mutapu ik? Tongin piur pa uprofet wading wawanyina kal. Ading ij anch in Asiriya apandakana michid ya kwiyand kwa Isarel, ni ayitwala antu mu winkwal. (Isay 8:4) Amana mutapu wamusheshau Yerusalem kud in Babilon ni kuyitwal mu winkwal. (Isay 39:5-7) Adingaku chisu chamujipau mwant Sedekias mes ni kumutwal mu Babilon. (Jer. 39:7; Ezek. 12:12, 13) Yom yiney yawonsu yalejanay Yehova, yasadika kamu. (Isay 42:9; 46:10) Yom yiney yawonsu yafanyina kukasikesh ritiy rau ni kuyinkish kashinsh anch kushilamu kwa Yehova mulong wa kuyikwol kukuwanyin!

10. Yom ik yikutwisha kutukwash kulam ruchingej retu mu machuku minam ma nsuden?

¹⁰ Yom ik twilejidinaku? Chisu twiyovila anch tuziyin, ruchingej rikutwish kutukasikesh ni kutwinkish kand usu. Tushich pa chirung chikash, ni turishin ni akankuny a Nzamb akweta usu ni atupompatina. Pakwez, tufanyidinap kuziy. Yehova watwinkishin kal ruchingej ruwamp nakash ra kwikal ni mwom wa chikupu mu chisambu ni diking. Tufanyidin kulam ruchingej riner mu manang ni mu michim yetu. Chamwamu, ruchingej retu rikutwish kwikal mud ndond yiwamp nakash tutadidina pa dikalash dikisina. Mutapu ik tukutwisha “kwowish dikalash” detu da chifanakesh mulong wa kukasikesh ruchingej retu? Tufanyidin kwitekin chisu cha kutongijokin mutapu ukwikala mwom mwi ngand yisu. Tufanyidin kutang mitu ya milong, kutal mavideo ni kutesh miminy yisambidina piur pa ruchingej retu. Ni tufanyidin kumulej Yehova piur pa yom yawonsu tuchingedina mu Paradis.

11. Yom ik yamukwashina nambaz umwing ukweta mayej makad kuyerik kwikal kand ni usu?

¹¹ Shinshikin mutapu ruchingej ramukwashina Nambaz Joy ukweta mayej makad kuyerik. Ulondin anch: “Ang nikwet milong yivud, nikat kumulej Yehova yovil yam ni kashinsh kawonsu anch ukat kwintesh. Yehova ukat kwingakul kusutin kwinginkish ‘ukash upandakena ukash wawonsu.’” (2 Kor. 4:7) Joy ukat kutongin kand mutapu ukwikalay mwi ngand yisu, mwakad kezay muntu kulond anch: ‘Niyedin.’ (Isay 33:24) Anch twamwazuril Yehova muchim wetu mu malembil ni kushinshikin pa ruchingej retu, niyetu tukutwish kwikal ni usu.

12. Mayingishin ik tukweta ma kuchingejin mu kushilamu kwa Yehova? (Tal kand chipich.)

¹² Mud mwasalay kud in Yuda, Yehova utwinkishin niyetu mayingishin mavud makuchingejin mu kushilamu kwend. Tongin piur pa uprofet uwanyidina pa chirung chetu. Chilakej, tumen dikand da pa mangand mawonsu dida ‘chikunku chimwing chikwet usu, chikwau chiziyin.’ (Dan. 2:42, 43) Tukat kutesh kand “kuzal kwa divu kwi ndond yimwing kupwa yikwau,” ni tukat kulejan rusang ruwamp “ku michid yawonsu.” (Mat. 24:7, 14) Uprofet winou ni ukwau kand ukat kukasikesh ritiy retu mu kushilamu kwa Yehova kukuwanyina mu machuku ma kurutu.

YEHOVA UKAT KUTUKWASH KULIK KWOV WOM

13. (a) Yikokujol ik yafanyinau kurish nich in Yuda chisu chayikwolau? (b) Mud mulejenau mu Isay 41:10-13, mutapu ik wayikasikeshau in Yuda kud Yehova?

¹³ Ap anch Yehova wayikasikesha in Yuda kusutin ruchingej ruwamp nakash, wading wij anch akurish ni yikokujol chisu chikuyikwolau. Yehova wasambela kulejan anch, kwinsuden kwa winkwal wa in Yuda, mwant umwing ukweta dikand ukurishikish ni kuyikel michid yading yombinamu Babilon ni kupwa ukumurishikish chad Babilon amwinend. (Isay 41:2-5) Ov, in Yuda afanyina kwov wom? Yehova wasambela kuyikasikesh antwend, payilejay anch: “Kangal wovany wom, mulong nidi nen. Kangal wazalany, mulong nidi Nzamb wen.” (Tang Isay 41:10-13.) Yom ik yakimbay Yehova kurumburil palonday anch “nidi Nzamb wen”? Kayivurishap in Yuda kumwifukwil mulong awiy ading ij anch ading akwet kuswir kwa kusal mwamu. Pakwez, wading uyivurishin anch wading nau mulong wa kuyikwash.​—Kus. 118:6.

14. Yehova wayikwasha in Yuda mutapu ik mulong wa kulik kwov wom?

¹⁴ Yehova wayikwasha kand in Yuda kulik kwov wom payivurishay piur pa dikand dend dijim ni ronganyin rend. Wayileja in Yuda kushinshikin atutumbu. Wayileja anch kimenap kwend ching pa kutang atutumbu, pakwez uyij kand atutumbu awonsu pa majim mau. (Isay 40:25-28) Anch Yehova wij katumbu ni katumbu pa dijin, chakin kamu wij nawamp dijin da kashalapol wend mwawonsu! Ni anch Yehova wading ni usu wa kutang atutumbu, ukwet kand usu wa kuyikwash atushalapol end. Chakin kamu, in Yuda kadingap ni diyingishin da kwov wom.

15. Yom ik yasalay Nzamb mulong wa kurijek manang ma in Yuda piur pa yom yading yiyichingedina kurutu?

¹⁵ Yehova wayileja kand atushalapol end yom yafanyinau kusal pa chisu chikuyikwolau. Mu chikunku chimwing cha Buku wa Isay, Nzamb wayileja antwend anch: “Andamany mu yikumbu yen, wipatilanyamu. Jingamanyaku bil pakemp, ching ujim wasut.” (Isay 26:20) Chimeken anch in Yuda aziyina ku kubabesh kwinoku pezay Mwant Sirus kurishikish Babilon. Mwin kufund nsang ja pakur umwing Mwin Grek ulondin anch chisu chandamay Sirus mu Babilon, “wayinkisha amasalay end mbil ya kuyijip antu awonsu akutanau pol pa yikumbu.” Tongin mutapu wafanyinau kwiyov antu ading ashicha mu Babilon. Pakwez in Yuda afanyina kupand mulong aziyina kwi mbil ya Yehova.

16. Mulong wak tufanyidinap kwov wom piur pa yom yikushikena pa chirung cha mar makash? (Tal kand chipich.)

¹⁶ Yom ik twilejidinaku? Piswimp ap tukurish ni mar makash makad kusadikangap kal kudosh kwayitanginau antu. Chisu chikusambisha mar minam, pa mangand mawonsu antu akwikal mu kanrumbangesh ni akwov wom. Pakwez atushalapol a Yehova bwat. Mulong twij anch Yehova ud Nzamb wetu. Tukwikal atakamena, mulong twij anch ‘dipandish detu did piswimp.’ (Luka 21:28) Ap chisu chikubombakana michid mulong wa kuturishikish, tukudandamen kumuchingejin Yehova. Ukutuchidij kusutin angel ni umutakel wend. Mutapu ik ukutwinkishay umutakel winou? Twijap kamu. Pakwez, chimeken anch tukutambul umutakel winou kusutin yikumangen yetu. Yikumangen yiney yikwikal mud ‘yikumbu yetu,’ mukwikala diking detu. Mutapu ik tukutwisha kwirijek mulong wa yom yituchingedina kurutu oku? Tufanyidin kwikal piswimp nakash nau akadivar ni anambaz netu, kwikal aswakela kuziyin ku umutakel tutambwila mu dirijek da Yehova, ni kwikal ni kashinsh anch Yehova ndiy utakedina dirijek detu.​—Heb. 10:24, 25; 13:17.

17. Mutapu ik ukutwisha kuchingejin mu dikasikesh da Yehova?

¹⁷ Ap anch mwom wa in Yuda ading mu Babilon wading ukasiken, Yehova wayikasikesha. Ukusal kand mwamu kud etu. Chawiy chikalap nchik yom yikushikena mu mwom wetu, tudandamenany kumuchingejin Yehova mulong wa kutukasikesh. Chakin kamu, tufanyidin kuchingejin mu ranaken rijim ra Yehova. Tudandamenany kukasikesh ruchingej retu, ni kangal twavuramen anch Yehova ud Nzamb wetu, tukwetap diyingishin da kwov wom.