MUTU WA MULONG WA KWILEJ WA 17
MUMINY 99 Tutikit twa Akadivar
Tudap Ayinetu
‘Nikukukwashany.’—ISAY 41:10.
MU WISWIMP
Tukuman mitapu yinying yikatay Yehova kutubangin.
1-2. (a) Mulong wak tukutwish kulond anch tudap ayinetu chisu turishina ni yikokujol? (b) Yom ik tukumana mu mutu wa mulong winou?
CHISU turishina ni yikokujol yikash, tukutwish kwiyov mud tud ayinetu mu ka waat kakemp pakach pa karung mujim patutina rinkind mukash. Pakwez, tudap kamu ayinetu. Tatukwetu wa rukat uda mwiur kimedinap kwend kusu pa kutuman tukat kurish ni yikokujol, pakwez utukanin kand kutukwash kuyipandakan. Yehova uyinkishin atushalapol end ashinshamena kashinsh anch ‘nikukukwashany.’—Isay 41:10.
2 Mu mutu wa mulong winou tukuman anch Yehova ukat kutukwash kusutin (1) kututakel, (2) kutuwanyishin maswir, (3) kutuchidij, ni (4) kutukasikesh. Yehova utwinkin kashinsh anch chikalap nchik yikokujol tukutwisha kurish nich mu mwom, kakutuvuramenap. Kakutulikap ap pakemp. Komb tukwikalap ayinetu.
YEHOVA UKAT KUTUTAKEL
3-4. Mutapu ik ukatay Yehova kututakel? (Kuseng 48:14)
3 Tang Kuseng 48:14. Yehova wij anch tukutwishap kwitakel etu ayinetu ni anch tukwet kuswir kwa kututakel kud ndiy. Mutapu ik ukatay kuyitakel atushalapol end ashinshamena nlel? Mutapu umwing ukatay kusal mwamu ud kusutin Bibil. (Kus. 119:105) Kusutin Dizu dend dipepidilau, Yehova ukat kutukwash kukwat mipak ni kukudish mikadil yitwadina ku musangar upandakena nlel ni ku mwom wa chikupu mu machuku ma kurutu.a Chilakej, ukat kutufundish kulik kulam rukuny, kwikal in kashinsh mu yom yawonsu tusadina, ni kuyikat antu akwau nich muchim. (Kus. 37:8; Heb. 13:18; 1 Pita 1:22) Anch twamekesh mikadil yiney, tukat kwikal anvaj, ambay a uruw, ni arund awamp.
4 Chikwau kand, Yehova wafundikisha mu Dizu dend nsang jakin ja antu arisha ni yikokujol ni yovil ya mutapu umwing ni yetwetu. (1 Kor. 10:13; Jak. 5:17) Anch twatang nsang jinej ni twasadin malejan tudoshidinaku, tukat kutaninamu mu mitapu yaad. Cha kusambish, tukat kujingunin anch kadap etu a kusambish kurish ni yikokujol; antu akwau niyau arisha ni yikokujol mud yetwetu ni ayijijamena. (1 Pita 5:9) Ni cha kaad, tukat kwilej mutapu wa kurish ni yikokujol.—Rom 15:4.
5. Anany akatay Yehova kusadin mulong wa kututakel?
5 Yehova ukat kututakel kand kusutin ambay netu in Kristu.b Chilakej, atulam a munyingumuku akat kwendin yikumangen yisu ni yisu mulong wa kutukasikesh. Madiskur mau makat kutukasikesh ni kutukwash kulam uumwing wetu wa usey. (Mid. 15:40–16:5) Amakurump a chikumangen niyau akat kusal usu nakash mulong wa kumukwash umwing ni umwing wa pakach petu kushal piswimp ni Yehova. (1 Pita 5:2, 3) Anvaj akat kuyifundish anau kumukat Yehova, mutapu wa kukwat mipak ya manang ni kukudish yaku yiwamp. (Jnsw. 22:6) Ni anambaz in Kristu aswila akat kuyikwash anambaz ayangadim kusutin chilakej chau chiwamp ni kusutin kuyinkish yiyul ni kuyikasikesh.—Titus 2:3-5.
6. Yom ik tufanyidina kusal mulong wa kutaninamu mu umutakel wa Yehova?
6 Yehova watwinkishin kal umutakel wawonsu tukweta nich kuswir mulong wa kukwat mipak yiwamp ni kwikal ni musangar mu mwom. Mutapu ik tukutwisha kumekesh anch tukwatin nich usey yom yatusadinay kal? Jinswir 3:5, 6 ulondin anch: “Mukungamena [Yehova] ni muchim wey wawonsu. Kangal wachingej ronganyin rey amwiney.” Anch twasal mwamu, “Ndiy ukutenchik jinjil [jetu],” charumburik anch, ukutukwash kwipuk milong ni kwikal ni musangar mu mwom. Tumujikitishin Yehova nakash mulong utwij nawamp, utukatin nakash ni ukat kumwinkish muntu ni muntu umutakel uswirikedinay kamu!—Kus. 32:8.
YEHOVA UKAT KUTUWANYISHIN MASWIR METU
7. Mu mitapu ik yimwing yikatay Yehova kutuwanyishin maswir metu? (Filip 4:19)
7 Tang Filip 4:19. Kudoshaku kututakel mu spiritu, Yehova ukat kuyukish usu wetu tusadining mulong wa kwikal nich yakuda, yakudjal, ni ndond ya kushakam. (Mat. 6:33; 2 Tes. 3:12) Chid chakin anch tukutwish kwiyakamish piur pa maswir metu ma ku mujimbu, pakwez Yehova kakatinap anch twiyakamish kupandakan. (Mat. 6:25) Mulong wak? Mulong Tatukwetu kakuyilikap ap pakemp atushalapol end ashinshamena chisu chidau mu maswir. (Mat. 6:8; Heb. 13:5) Tukutwish kamu kumuchingejin palondinay anch ukutuwanyishin maswir metu.
8. Yehova wamusadina David yom ik?
8 Shinshikin mutapu wamukwashau David kud Yehova. Mu mivu yivud, padingay David ukat kumuchin Mwant Saul, Yehova wamwinkisha ndiy ni antwend yom yading yiswirikedinay mulong wa kupand. Patongijokinay mutapu wamubanginau kud Yehova mu mivu yiney, David wafunda anch: “Nading nsand, katat nananap kal, pakwez kand kal nimumanangip mwin kutentam amulikil, ap anend aswadil yakudia.” (Kus. 37:25) Mud David, pamwing ap niyey wamen kal mutapu Yehova wawanyishinay kal nich rukat maswir ma akadivar nau anambaz ney mu yirung yikash.
9. Mutapu ik ukatay Yehova kuwanyish maswir ma antwend nlel mu yirung ya yinship yikash? (Tal kand chipich.)
9 Yehova ukat kuwanyish kand maswir ma antwend anch kwashiken chinship chikash. Chilakej, chisu chashikena kamungun mu mivu chitot ya kusambish, in Kristu a ku jindond kushalijan ayitumina akadivar ni anambaz nau yom yading yiswirikedinau. (Mid. 11:27-30; Rom 15:25, 26) Nlel antu a Nzamb akat kumekesh niyau muchim winou wa kupan. Anch kwashiken chinship chikash, Yehova ukat kuyibachik antwend nich rukat mulong wa kupan yom mud yakuda, mem, masun, ni mon kud antu ada kwindond kwashikenang mar minam. Yisak ya in kutung akat kurijek yikumbu ni Yot ya Want yayipang. Ni atushalapol a Yehova akat kusadin Bibil pakad kulab mulong wa kuyikasikesh ni kuyongoj antu ashadishang yikumbu yau ap akatish nau.
Mutapu ik ukatay Yehova kutukwash ni kutukasikesh anch kwashiken chinship chikash? (Tal paragraf wa 9)d
10-11. Yom ik wilejidina ku chilakej cha Borys?
10 Yehova uyikwashining kand antu akad kumwifukwil. Chilik chimwing, niyetu tukat kukimb mitapu ya kuyibangin antu akad kumusadin ndiy. (Gal. 6:10) Kusal mwamu kukat kwikal uman uwamp kud awiy. Shinshikin chilakej cha Borys, mukurump wa shikol mu Ikren. Ap anch kadap Kaman wa Yehova, Borys ukat kuyisadin ansand a shikol ada Atuman mu mutapu uwamp ni ulimishining yitiyij yau. Pakwatay Borys mupak wa kuchin kwi ndond kwadingay mulong wa njit, akadivar amukwasha. Mu kusut kwa chisu, Borys wakumangana ku Chivurikish cha rufu ra Yesu. Patongijokinay pa yom yamusadinau kud akadivar, walonda anch: “Atuman a Yehova ambangina nawamp nakash. Niyijikitishin nakash.”
11 Niyetu tukutwish kumwimburij Tatukwetu wa ranaken uda mwiur kusutin kumekesh rukat kud antu ada mu maswir, ikala ambay netu in Kristu ap bwat. (Luka 6:31, 36) Tuchingejin anch usu tusadin wa kumekesh rukat kud antu ukuyibachik kwikal in kwilej a Kristu. (1 Pita 2:12) Pakwez chikalap nchik yibudikin, tukwikal ni musangar udokiling ku kupan.—Mid. 20:35.
YEHOVA UKAT KUTUCHIDIJ
12. Yehova ushidinamu kuyichidij antwend mutapu ik? (Kuseng 91:1, 2, 14)
12 Tang Kuseng 91:1, 2, 14. Nlel, Yehova ushidinamu kutuking mu spiritu. Kakumulikap Satan chakwel ayipisha difukwil dend. (Yoh. 17:15) Ni anch “mar makash” mashik, tukutwish kwikal ni kashinsh anch Yehova ukuwanyish kushilamu kwend kwa kuchidij antwend mu spiritu ni ku mujimbu.—Kuj. 7:9, 14.
13. Mu mitapu ik yikatay Yehova kumuchidij muntu ni muntu pakampwil?
13 Mutapu ik ukatay Yehova kumuchidij muntu ni muntu pakampwil? Kusutin Bibil, Yehova ukat kutukwash kujingunin yom yida yiwamp ni yiyimp. (Heb. 5:14) Anch twashakam kukwatijan ni mbil tutanina mu dizu da Nzamb, tukwichidij ku ubaj wa mu spiritu ni wa ku mujimbu. (Kus. 91:4) Chikwau kand, Yehova ukat kutuking kusutin chikumangen. (Isay 32:1, 2) Kusej piswimp nau antu amukatina Yehova ni ashicha kukwatijan ni mbil jend kukat kutukasikesh ni kutukwash kwipuk yibachikin yiyimp.—Jnsw. 13:20.
14. (a) Mulong wak Nzamb kakatap kutuking ku yikokujol yawonsu? (b) Kuseng 9:10 utwinkin kashinsh ik? (Tal kand mazu ma kwinshin.)
14 Yisu yimwing Yehova wayichidija atushalapol end a pakur ku mujimbu. Pakwez kasalangap mwamu chisu chawonsu. Yisu yimwing tukutwish kurish ni ‘yinship yakad kuchingejin.’ (Mul. 9:11) Yehova walikidila kand chakwel atushalapol end amwing ayizengol ap kuyijip mulong wa kusaul makasu ma Satan. (Job 2:4-6; Mat. 23:34) Ukat kusal kand mwamu ni nlel. Ap anch Yehova kapwishinap yikokujol yetu, tukutwish kwikal ni kashinsh anch kakuyilikap antu amukatina.c—Kus. 9:10.
YEHOVA UKAT KUTUKASIKESH
15. Mutapu ik tukata kutambul dikasikesh didokila mu Dizu da Nzamb, malembil, ni ambay netu in Kristu? (2 Korint 1:3, 4)
15 Tang 2 Korint 1:3, 4. Yisu yimwing tukat kunenganan, kuziy ap kwiyakamish. Pamwing ap urishin ni yom yikunenganeshina ni kusal wiyova anch ud amwiney. Ov, kud muntu wovila kamu nawamp mutapu wiyovila? Inge, Yehova. Kakatap ching kusu kwov kusansan twovila, pakwez kand ukat “kutwongoj mu mar metu mawonsu.” Mutapu ik? Chisu tukata kumufungwil muchim wetu mu malembil, ukat kutwinkish “chisambu cha Nzamb chisutila ronganyin ra antu.” (Fil. 4:6, 7) Tukat kutan kand rongoj anch twatang mu Bibil yom yitulejinay Yehova. Mu Buku winou, Yehova ukat kutulej mutapu utukatinay, ukat kutufundish mutapu wa kwikal in manang, ni kutwinkish ruchingej. Tukat kutan kand dikasikesh ku yikumangan yetu, kutukata kwilej yom yikasikeshena yidokila mu Bibil ni kusutish chisu pamwing nau ambay netu in Kristu atukatina.
16. Yom ik wilejidina ku chilakej cha Nathan ni Priscilla?
16 Mulong wa kuman mutapu ukatay Yehova kutukasikesh ni kutwongoj kusutin Dizu dend, tushinshikinany chilakej cha Nathan ni Priscilla, ashicha mu États-Unis. Kwasut kal mivu yivud, akwata mupak wa kubuukin kwi ndond kwadinga maswir nakash ma in kulejan. Nathan ulondin anch: “Twading tukwet kashinsh anch Yehova ukuyukish usu tusadina.” Pakwez, kupwa kwa kushik kwi ndond yisu kwafanyinau kusadin, arisha ni mayej ni milong ya kuburen nfalang. Ambay a uruw inay achirika kwol kwau ni adandamena kurish ni milong ya kuburen nfalang. Nathan uvurikin anch: “Niyipula mulong wak Nzamb katuyukishap mutapu twading tutongidina. Nasambisha kwiyipul anch kwading chom chiyimp nasala.” Pakwez, mu kusut kwa chisu, Nathan ni Priscilla ajingunina anch Nzamb kayilikap chisu chadingau mu maswir. Nathan ulondin anch: “Mu yirung yiney yikash, Bibil wikala mud murund wa manang wading utukasikeshina ni kututakel. Kushinshikin pa mutapu watukwashay Yehova kujijamen yirung yiney yikash kwatukwasha kulik kwimen pa milong yetu, pakwez kwirijek mulong wa kujijamen yikokujol ya kurutu nich ritiy.”
17. Mutapu ik wamukasikeshau nambaz Helga? (Tal kand chipich.)
17 Akadivar nau anambaz akutwish kutukasikesh. Mutapu ik? Shinshikin chilakej cha Helga, nambaz ushicha mu Hongri. Mu mivu yivud, warisha ni yikokujol yasala anch iyakamish ni kwiman anch kakwetap kwend usey. Pakwez patongijokinay, wajingunina anch Yehova wasadina akadivar nau anambaz mu chikumangen mulong wa kumukasikesh mu mivu yiney yawonsu. Ufundin anch: “Yehova ukat kwinkwash chisu chawonsu ang waman anch niziyin nakash mulong wa mudimu wam wa ku mujimbu, mulong wa mwanam muyej nibangidina, ap mulong wa yikokujol yikwau. Kwikil dichuku ap dimwing mu mivu 30 yasutina ey mwakangenyay kuwanyish kushilamu kwend kwa kwinkasikesh. Ukat kuyisadin antu akwau mulong wa kwinkasikesh. Mazu mau mawamp, ni mamekeshina anch ambangidin mankwasha kwiyov anch nid wa usey. Yisu yivud natambulang uruu, kart, ni mazu ma kujikitish pa chisu nading kamu niswirikedina.”
Mutapu ik ukutwishay Yehova kukusadin mulong wa kuyikwash antu akwau? (Tal paragraf wa 17)
18. Mutapu ik tukutwisha kuyikasikesh antu akwau?
18 Tukwet dilau da kumwimburij Nzamb wetu kusutin kuyikasikesh antu akwau. Mutapu ik tukutwisha kusal mwamu? Tukutwish kuyitesh nich kushimpish muchim ni kusal yom kanang mulong wa kuyikwash. (Jnsw. 3:27) Tusadin usu wa kuyikasikesh antu awonsu arishina ni yikokujol, kuwejinaku ni antu akad kal kumusadin Nzamb. Anch amutej netu arish ni mar, mayej, ap yakamish, tufanyidin kuyendin, kuyitesh, ni kuyitanginaku mikand yikasikeshina mu Bibil. Anch twamwimburij Yehova, “Nzamb ukata kupan kwongoj kwawonsu,” tukuyikwash, kadap kwau ching ambay netu in Kristu kujijamen yikokujol yau, pakwez tukuyikwash kand antu akad kumusadin Nzamb kukwat mupak wa kwilej piur pend.—Mat. 5:16.
YEHOVA UD NETU MACHUKU MAWONSU
19. Yom ik yikatay Yehova kutusadin, ni mutapu ik tukutwisha kumwimburij?
19 Yehova ukat kuyibangin nakash antu awonsu amukatina. Kakatap kutulik ayinetu chisu turishina ni yikokujol. Mud mukatay nvaj wa rukat kumubangin mwanend, Yehova niyend ukat kuyibangin atushalapol end ashinshamena. Ukat kutuwanyishin maswir, kutuchidij, ni kutukasikesh. Tukat kumwimburij Tatukwetu wa rukat anch twayikwash ni twayikasikesh antu akwau chisu chirishinau ni yikokujol. Mu mangand minam tukutwish kurish ni yikokujol ni runeng, pakwez tufanyidin kwikal ni kashinsh anch Yehova ud netu. Watukanin kal anch: “Kangal wovany wom, mulong nidi nen.” (Isay 41:10) Kukan kwinoku kutwinkishin kashinsh anch Yehova ud netu, tukwikalap kamu ayinetu!
MUMINY 100 Yakany Antu Nawamp
a Tal mutu wa mulong “Tukwatany Mipak Yimulimishina Nzamb” mu Chinong cha Kalam cha 1 Ngond wa 4, 2011.
b Tal paragraf wa 11-14 mu mutu wa mulong “Dandamen Kulondul Umutakel wa Yehova” uda mu Chinong cha Kalam cha Ngond wa 2, 2024.
c Tal “Yipul ya in Kutang” mu Chinong cha Kalam cha Ngond wa 2, 2017.
d KURUMBURIL CHIPICH: Akadivar a mu Malawi, akat kutambul ukwash wa ku mujimbu ni wa mu spiritu kupwa kwa kurish ni chinship chikash chidokila ku yom yatangau.