Mukand Wa Chisak Chitakedila

“RANAKEN rikala kudi en ni chisambu chidiokila kudi Nzamb Tatukwetu ni Nsalejetu Yesu Kristu.” Kwinoku kwadinga kulangwish kwasadilay Paul mu mikand yend yivud yatumay ku yikumangen. Kumekeshin nawamp yom tusotila mulong wenen awonsu.​—⁠Ef. 1:⁠2.

Chakin kamu tujikitishin nakash mulong wa ranaken ra Yehova kusutil ku difut dia ya kupesh ya Kristu Yesu! Kusutil ku difut, twitapidil dilau ku mes ma Nzamb. Tukutwishap kushiken chinech kusutil ku usu wetu ayinetu, ap mu kwilej Bibil nich mushiku, kulejan rusangu ruwamp, ap kusal midimu yikwau yiwamp. Dilikishin dia yitil ni mwom wa chikupu atutekidinay, chidiap mud difut mulong wa usu wetu, pakwez mud yipan yimekeshina ranaken ra Yehova kusutil kudiay Kristu Yesu.​—⁠Rom 11:⁠6.

Paul wayifundila ambay nend akaritiy anch: “Tukat kunilembilany chakwel kangal utambulany ranaken ra Nzamb chamwamu. Mulong ndiy walonda anch: nakwovilany ku muten uwamp, Ni mu dichuku dia dipandish nakukwashilany. Talany, katat kudi chisu chiwamp, talany, lel dichuku dia dipandish.” Kwadinga “chisu chiwamp” pasak ku disheshik dia Yerusalem mu mivu chitot ya kusambish. Antu a michim yitok amukata Yehova ayipandisha muspiritu. Chinech chatwala ku dipandish dijim dia ku mujimbu mulong wa antu awonsu ashinshamena achina mu Yerusalem kurutu kwa kusheshik kwend mu muvu wa 70 C.C.​—⁠2 Kor. 6:​1, 2.

Nlel unou, tushich kand, mu “chisu chiwamp” ni “dichuku dia dipandish.” Antu itiyijinay Yehova mud atushalapol end ni apandishinau muspiritu akwet ruchingej ra kupand ku mujimbu ku “Dichuku dijim dia [Yehova]” didia katat piswimp.​—⁠Sof. 1:⁠14.

Kwez kwa dichuku dia Yehova kututwikin chisend chijim nakash. Tuwapidil kuyibabesh antu mulong wa dichuku dined ni kuyikwash antu a michim yitok kutaninamu ku ranaken ra Yehova chakwel ni yau atwisha kupandishiu. Paul wijika nakash usey wa chisend chinech. Ndiy wafunda anch: “Anch [nilejenap] katumb kawamp riyind kudi am.” Wamekesha kand mutapu wiyovay mu mazu malondwila am: “Am nidi mwin chikal [. . .] cha in ronganyin ni antu ayisup. Chawiy chipandikena kudi am kwirijek kulejan katumb kawamp.”​—⁠1 Kor. 9:16; Rom 1:​14, 15.

Yehova ukutufish nich anch twadiul mudimu wa usey wa kuyibabesh antu. Tubabel ku yom yalonday Yehova kud muprofet Ezekiel: “Mwan a muntu, nakutek kal ey kwikal kalam wa muchid wa in Isarel. Ey ukez kuyilej kubabesh kwam kwawonsu. Anch nalond anch muntu muyimp ukez kufa, chad ey walik kumubabesh chakwel ndiy akarumun yaku yend, ipandisha, ndiy ukez kufil mu yitil yend, chawiy mash ma rufu rend makez kwikal pa mutu wey.”​—⁠Ezek. 3:​17, 18.

Machuku minam ma kwinsudiel madi makash. Chiswapelap kwikal isikena mu milong ya dijuku, mu mudimu wa ku mujimbu, mu mujikit wa chikumangen, ni mu kulejan. Chikwau kand, avud pakach pen akat kurish nich mayej, runeng, upal, pamwing ap rupompat. Avud pakach pen akwet “yisend yilimina.” Tusotil kumekesh rukat retu kud en, kukwatijan nich yom yalonday Yesu anch: “Ezany kwen kudi am en awonsu ukata kusalany mudimu ni ukwetany yisend yilimina, am nikuninkishany kwiswedish.” (Mat. 11:28) Tukujikitishinany nakash en awonsu wasadilanya usu wa kudandamen kumusadil Yehova nich kushinshaman kwikalap nchik yikokujol yijim ap yikemp.

Mud chibudikin cha kulejan kwen kwa mushiku ni mujikit wen wa kufundish ni mulong wa chiyukish cha Yehova, kwikel mwayen wa antu 4,762 abatishinau pa mangand mawonsu rubing ni rubing. Mu muvu wa mudimu wadiap ou, asadil yikumangen yisu 1,375. Tuchingejin ni kulembil anch buku musu Chom ik Chakin Kamu Chifundishinay Bibil?, udiaku kal mu jindim 120 ni kusut, ukukwash tutikit twa antu kutaninamu ku ranaken ni chisambu cha Yehova mu “dichuku dia dipandish” dined.

Ijikany nich kashinsh anch Chisak Chitakedila chikukatilany ni anch tukat kulembil mulong wenen. Niyetu tukujikitishinany mulong wa kulembil kwen mulong wetwetu.

Akadivar nen,

Chisak Chitakedila cha Atuman a Yehova