Program wa Dijuku​—⁠Mufund wa Dichuku

¹ Dichuku ni dichuku anvaj akweta rukat asadiling usu nakash chakwel kurijek yakudia yiwamp mulong wa anau. Kuyinkish yakudia ya muspiritu yidiokila ku Dizu dia Nzamb kudi kwa usey nakash. (Mat. 4:⁠4) Mutapu umwing ukutwishanya kuyikwash anen kukudish maswir ma yakudia ya muspiritu nawamp ni ‘kukudil ku dipandish’ udi kusutil ku kutek dichuku ni dichuku chisu cha kushinshikin mufund wa dichuku ni yirumburil mu dijuku. (1 Pi. 2:⁠2) Chisu ik ukutwishanya kuwejin chinech mu program wa dijuku dien?

² Pa Yisu ya Kudia: Kusambish dichuku dien nich kwisambin mufund kukutwish kukwash dijuku dien kumuvurik Yehova mu manangu dichuku diakabuj. (Kus. 16:⁠8) Maku umwing wakwata mupak wa kutang ni kwisambin mufund ni yirumburil pamwing ni mwanend ikundj chisu cha kudia pamanch ni kulembil nend kurutu kwa kuya ku shikol. Yiney yamukwasha ndiy kwiman dang chisu chasambishay kurish nich mulong wa wan-a-ngand, kulik yoziu ya masandj, ni kupan uman wa kujijaman kud ansand ni alej kumwing. Ap anch ndiy kusu wadinga kaman ku shikol, ndiy kiyovap kwikal amwinend.

³ Anch kwisambin mufund pamanch chiswapelap, ukutwishany kuushinshikin mu dijuku muten, pamwing ap chisu cha yakudia ya urel. Amwing akat kwisambang kand yom yamenau mu mudimu wa chingand ni yom yamenau mu kutang kwau kwa Bibil pa chisu chinech. Avud avurikining kamu yisu mud yiney chisu cha yakudia ya urel pamwing ni yisu ya musangar yashakaminau pamwing mu dijuku.

⁴ Uchuku: Mu majuku mamwing, chisu chiwamp nakash cha kushinshikin mufund wa dichuku chidi kamu kurutu kwa kulal uchuku. Chinech chikutwish kand kwikal chisu chiwamp cha kulembil pamwing. Pateshinau anen dichuku ni dichuku ukat kulondany mulong wa Yehova ni kulembil kud ndiy, ukat kwikal muntu wakin kud awiy.

⁵ Yehova ayukish amboku usu wen wa kukun uyakin mudiau anen mud kamu mutapu usadidilanya nawamp Examinons les Écritures chaque jour.