Ov, Mwaney Ukutwish Kukwat Mupak wa Manangu?
1. Mupak ik wakwatinau Atuman anikanch pa mulong wa kusadil kwa mash? Let chilakej.
1 Mupak wa manangu piur pa yom ik? Piur pa kutek kwa mash. Mud muchilejenau mu mutu wa mulong ulondila anch “Twendany Kulondwish Yany ya Yehova” mu nimero wa Chinong cha Kalam cha Kalol 15, 1991, cha français, an a Atuman a Yehova adi in kwiman dang ni kumekesh anch maswir mau ma kuziyil chijil cha Nzamb pa mulong wa mash madi ma usey kud awiy mud chimadia kud anvajau. Ov akutwish kuchingej chinech kud mwaney mukemp?
2. Dirumburish dimwing diasadidil mbil ya chijil ik kud mwanikanch ukulika kumutek mash, ni yom ik yifanyidinau anvaj in Kristu ni an au akemp kwilejinaku?
2 Chijil Chilondil Yom Ik? Mu Etats-Unis, dirumburish dijim diatakela piur pa mbil ya anikanch akudila ya kulik kuyitek mash didi Dirumburish Dijim dia Illinois. Pachirikinau mulong wa nambaz wa mivu 17, dirumburish dialonda anch: “Anch uman woviken ni witiyishin anch mwanikanch uswil mu chilik cha kwov kurumburik kwa yibudikin ya yisal yend [ni] kusadil kujingunin kwa ukurump, mwamu chitiyij cha mwanikanch ukudila chimwinkishin ndiy mbil ya chijil cha antu awonsu ya kwitiy ap kulik kwok kwa chimwingang.” Mwamu, mu kujingunin anch mwanikanch ukudil mu chilik cha kukwat mupak wend amwinend, adokiter ap amakurump a mudimu akutwish kumwipul muyej chakwel kumutesh alond chikangesh chend cha kutambul mash. Mwanikanch ukutwish kwikal nich kuswir kwa kwov nawamp kurumburik kwa usey wa kwiyokish ni yibudikin ya kutond kwend mulong wa kumwok ni kulond patok ni kujijaman chitiyij cha relijon wend piur pa chijil cha Nzamb pa mulong wa mash.
3. Yipul ik yifanyidinau anvaj kushinshikin nakash, ni mulong wak?
3 Yom ik Yikutwishay Mwaney Kulond? Ov, aney akutwish kulond ayinau ya chijil cha Nzamb piur pa mash? Ov, itiyijin nich muchim wau wawonsu anch yidi mbil ya Nzamb ya ‘kulik mash’? (Midimu 15:29; 21:25) Ov, akutwish kurumburil chitiyij chau mu Bibil? Ov, akutwish kulond nich kujijaman mupak wau piur pa mash anch adokiter alond anch mwom wau udi mu ubaj, ap anch anvaj au kwikil? Mulong “chisu cha mar chikat kushik kudi antu [etu] awonsu,” mutapu ik lel ukutwishany kuyirijek anen mulong wa kupakiu kwin kwawonsu kwakad kuchingejin kurishishina kushinshaman kwau?—Mul. 9:11; Ef. 6:4.
4, 5. (a) Chisend ik chikwetau anvaj, ni mutapu ik ukutwishau kuchiwanyish? (b) Yitenchik ik yidiaku mulong wa kuyikwash anvaj?
4 Anvaj, Yom ik Ukutwishany Kusal? Ukwetany chisend cha kuyilej anen chitongijok cha Nzamb pa mulong wa mash. (2 Tim. 3:14, 15) Kurumburil kwovikena kudi mu buku Comment raisonner, paj wa 359-364. Mwileja nakash ni dijuku diey. Mu kusadil mulad “Anch Kanang Wakwel Anch—” pa mapaj 362-364, takel kwa kuchirikin yikunku nau aney chakwel kuyikwash kwijik kurumburil yom yitiyijinau ni mulong wak. (1 Pi. 3:15) Pa mikand yikwau ya kutufundish piur pa mash padi broshir Comment le sang peut-il vous sauver la vie ? ni Chinong cha Kalam cha Kalol 15, 2004, cha français, paj 14-24. Chikwau kand, maprogram ma video Soigner sans transfuser—Besoins et droits du patient ni Pas de sang—la médecine relève le défi madiaku katat pa DVD ujimbwilau anch Des Alternatives à la transfusion : Séries documentaires upanina rusangu ra kashinsh piur pa kudimuk ni ukwash wa umwingang (kwok) ni kubaril pakad mash. Ov, dijuku diey diatadil ni kwambambin minsamb yiney machuku am?
5 Yikwasha aney ‘ijika ayinau yiwapila ni yitiyikina ni yiwanyidina ku rusot ra Nzamb’ pa mulong wa mash. Chad lel akutwish kukwat mupak wa manangu ukweta chiyukish cha Yehova.—Rom 12:2.