“Uchisadilangany mu Kwinvurik Am” Rufu ra Kristu ra Kuvurik pa Ndol 2
1. Ov, mulong wak Ndol 2, 2007, didi dichuku dia ngond dia usey?
1 Pa Ndol 2, 2007, tutikit twa antu mu mangand mawonsu tukez kukumangan mulong wa kuvurik yakupesh ya rufu ra Yesu. Yesu wafa mulong wa kukasikesh ukaleng wa tatukwend wa mwiur, ni kumekesh anch Satan Djabul wadimbana anch antu akat kumusadil Nzamb mulong kusu wa yibachikin yau ya choy. (Yob 2:1-5) Yakudia ya Urel ya Mwant yituvurishin kand etu anch kusutil ku rufu rend mudi muntu uwanyidina, wakad chitil, Yesu ‘wapana mwom wend mulong wa kuyikwol antu avud.’ (Mat. 20:28) Pakwez, Yesu wayileja in kwilej end anch: “Uchisadilangany mu kwinvurik am.” (Luka 22:19) Ov, kujikitish mulong wa chipan chinech cha usey cha Nzamb kukubachikin kusambish kwirijek mulong wa kuvurik chisal chinech chipandikena kuwap cha rukat?—Yohan 3:16.
2. Ov, Mutapu ik tukutwisha kurijek muchim wetu mulong wa Chivurikish?
2 Rijek Muchim Wey: Anch twashinshikin yom yashikena mu machuku ma nsudiel ma mwom wa ukauntu wa Yesu, tukutwish kurijek muchim wetu mulong wa Chivurikish. (Ezra 7:10) Chakwel kutukwash kusal mwamu, atwitin kutang program wa pakampwil wa Bibil udia mu Examinons les Écritures chaque jour — 2007 ni pa Calendrier wa 2007. Kutang kwinoku kwa dichuku ni dichuku kwambaten nakash nich machuku ma yinship yilejenau yashikena pa rufu ra Yesu kukwatijan nich kalandrie tusadidina nlel unou. Machuku ni machuku ma ngond majimbwilau mu Bibil mimedin pa kalandrie wa in Yuda, ulejena anch dichuku dikat kusambish kupwa kwa muten kwandam kushik pa kupwa kwa muten ukwau kwandam. Mutapu winou ushalijadina wa kuchind machuku aushinshikidin ni kuumekesh mu program wa kutang kwa Bibil wa Chivurikish. Kuchirikin jinsangu jinej mu kutang Bibil ni kutongijokin nakash mu malembil piur pa rukat ripandikena kujimb ra Nzamb kukez katukwash kutambul yiyukish yivud yidiokila ku Chivurikish.
3. Ov, mutapu ik tukutwisha kuyikwash antu asangaredina ni akad kusal mudimu wa kulejan chakwel kutan ukwash udiokila ku Chivurikish?
3 Yitazuka Antu Akwau Kwez Kukumangan: Wenjil wa Mudimu Wetu wa Want wa Kasan wijikisha kampany wa pakampwil wa kuyitazuk antu ku chinship chinech cha pakampwil. Irijeka chakwel ushika kurutu kwa saa pa chisu chiwanyidina urel wa Chivurikish mulong wa kuyak antu asangaridina. Ukutwish kushakam nau pamwing, kutal anch akwet Bibil ni buku wa miminy. Yijikisha kudi antu akwau a mu chikumangen. Kupwa kwa program itekina chisu cha kwakul ku yipul yau. Yitazuka kwez kukumangan ku diskur dia pakampwil dikusalau pa Ndol 15. Amakurump akuta muchim cha pakampwil chakwel kushinshikin anch antu inungina pamwing ni chikumangen ikala kal akad kusal mudimu wa kulejan atambula diladikij dia Chivurikish ni dia diskur dia pakampwil.
4. Ov, mutapu ik tukutwisha kuyikwash antu kudandamen kuya kurutu mu spiritu kupwa kwa Chivurikish?
4 Yikwasha Antu Asu Asangaredina ni Akad Kusal Mudimu wa Kulejan Kuya Kurutu: Mwin kulond ku Chivurikish ukez kurumburil mu wiswimp anch tusotining kuyifundish antu Bibil ku yikumbu yau pakad kufut ni kuyikasikesh antu asu asangaredina chakwel kudandamen kwilej piur pa Yehova. Ukutwish kusadil yirumburil yend mudi dishin mulong wa kupan ukwash wa mu spiritu kudi antu atazukinau. Anch kand kal asambisha kwilej Bibil, ikal nich kashinsh anch ukez kuyendil machuku makemp kupwa kwa Chivurikish ni kuyilej program wa kwilej nau Bibil pakad kufut. Mulong wa kukudish ronganyin ni ritiy rau kudi Nzamb, afanyidin kand kukumangan ku yikumangan ya chikumangen. (Heb. 10:24, 25) Chakwel kusal mwamu, yikasikesha kukumangan pakad kujing. Amakurump afanyidin kutenchik program chakwel kuyendil in Kristu akad kusalang kand mudimu chakwel akumangana ku Chivurikish ni kuyikwash kushinshikin yom yalondinau mu diskur. Yiney yikutwish kuyikasikesh chakwel kuchirikin kand mijikit yau mu chikumangen.
5. Ov, kuvurik Chivurikish kukwet usu ik padi etu?
5 Kuvurik Chivurikish kuletining chisu cha kutongin pa usey wa yom yasalau Yehova ni Yesu mulong wa kuwap kwetu. Kutongijokin kwinoku kukat kupandikesh rukat retu mulong wa awiy ni kukwet usu pa ngikadil yetu. (2 Kor. 5:14, 15; 1 Yohan 4:11) Katat chawiy chisu cha kusambish kwirijek ayinetu ni antu asangaredina mulong wa chisu chinech cha usey, chisu ‘twijikeshina patok rufu ra Nsalejetu.’—1 Kor. 11:26.