“Ov, Mutapu ik Ukutwisha Kwakul?”
1. Ov, yikangesh ik yirishinau nich antu avud pakach petu?
1 Ov, ukatin Dizu dia Nzamb pakwez chikukasikedin kuvurik tuyom tukemp-tukemp piur pa jinsangu ja Bibil ap ndond yafundilau mazu ma pakampwil mu Bibil? Ov, usotin anch aney ikala nich ukaliweny wakin wa kutesh jinsangu ja pa dishin ni malejan ma Bibil? Mutu wa mulong “Ov, Mutapu ik Ukutwisha Kwakul?” ukata kubudikin ngond ni ngond pa paj wa 31 wa Réveillez-vous ! ukutwish kuyikwash ansand ni amakurump kwijik nawamp Dizu dia Nzamb.—Midimu 17:11.
2. Ov, mutapu ik chifanyidina kusadil yikunku kushalijan ya mutu wa mulong “Ov, Mutapu ik Ukutwisha Kwakul?”
2 Ov, mutapu ik ukutwisha kusadil nawamp mutu wa mulong winou? Nimero wa Réveillez-vous ! wa Chiwong 2006 uletin chiyul ech: “Ikal nich chisu cha kutal pa paj wa 31 . . . Yikunku yimwing yidia pa paj yikeza kupwit manangu ma ansand in kutang; yikwau yikez kukasikan kwakul kudi in kwilej Bibil ija yom yivud. Chikunku ‘Yashikena Chisu ik’ yikez kakukwash kujingunin chisu chashakamau antu a pa chirung cha Bibil ni yinship yijim-yijim yashikena. Pakumanau mu gazet yakul ku yipul ya chikunku ‘Mu nimero winou’, yakul ya yipul yikwau yivud yikez kamekan pa paj ujimbwilau mu nimero winou umwing, mukezau kuyifund kwa kuchikul.
Ov, ukutwishap kukimbijol kurutu kwa kutang yakul ni kupwa kuyilejamu antu akwau yom wilejina? Ukutwish ap kusadil mutu wa mulong winou usu, ‘Ov, Mutapu ik Ukutwisha Kwakul?’ mudi dishin dia kwisambin Bibil mu dijuku ap ni antu akwau.”
3. Mutapu ik majuku mamwing mamana ukwash udiokila ku mutu wa mulong winou, ni chikunku ik chikusangareshina nakash?
3 Chakin kamu, majuku mavud makatining kusadil mutu wa mulong winou mudi dishin dia dilejan dia dijuku. Maku umwing wafunda anch: “Am ni nfumwam twatongin anch chikwikal chiwamp kutekamu ‘Kukimb kwa Yipich kudi An’ mu dilejan dia dijuku chakwel yikala ya kukasikesh ni yisangareshina kudi mwanetu mband wa mivu yisatu. Chidi chom chisangareshina pa kumuman ukat kusend kopi wend wa Réveillez-vous ! nich musangar ni kusutish paj ni paj djat ni pakutanay yikimbinay.” Tatuku umwing mu Brezil ulondin anch: “Am ni mwanam wa mivu sambwad tukatin nakash mutu wa mulong winou udia mu Réveillez-vous ! Ya mukwasha Moses kuta matu, kukimb maverse mu Bibil, kutesh kurumburik kwa yipich, ni kwa machuku ma ngond.” Ashley changadim wa mivu chinan, ufundin anch: “Najikitish kal mulong wa mutu wa mulong ‘Ov, Mutapu ik Ukutwisha Kwakul?’ udia kwinyim kwa Réveillez-vous ! Nilej kal yom yivud mu Bibil kusutil mutu wa mulong winou. Nikat kwakul ku yipul yiney chisu chawonsu.”
4. Ov, mutapu ik dijuku dikutwisha kusadil mutu winou wa mulong chisu cha dilejan dia Bibil mu dijuku?
4 Sadil amboku chisu ni chisu mutu wa mulong “Ov, Mutapu ik Ukutwisha Kwakul?” piukata kwilej Bibil mu dijuku diey. Ukutwish kusadil Index ap Watchtower Library udia pa CD-ROM chakwel kukimbijol yakul ku yipul yimwing pakach pa yipul yikash. Kusutil ku kusal mwamu, ukez kuyifundish aney mutapu wa kukimbijol. Anch ukwet an a makurump mulong wak ukutwishap kuyilej akimba yakul yikasikena kutan ku yipul “Nidi Nany?” ap “Yashikena Chisu ik?” kurutu kwa dilejan dia dijuku. Kupwa akutwish ni yawiy kulejan yamenau mu kukimbijol kwau chisu cha dilejan. Kusadil paj winou nawamp udi mutapu umwing ukutwishau kusadil anvaj chakwel kwandjik Dizu dia Nzamb mu michim ya anau, kuyikwash ijika “Mukand wa Nzamb” kudiokal ku wanikanch.—2 Tim. 3:15; Kuv. 6:7.